Ragíʼmaa mundxaʼwami̱jna̱ rí mbá 70 xa̱bi̱i̱ Jesús niniñaaʼ o rí ikhaa nánguá nigruiguíin ga̱jma̱a̱ numuu rí tákúwíin gajmíi̱n índo̱ niʼni timbá aʼphu̱ Ganitsu wañuu. Nákha ikhú, Jesús i̱ndó nindoo maxtáa gajmíi̱n apóstoles ndrígióo.

Xó ma bi̱ mbá 12 ga̱jma̱a̱ bi̱ mbá 70 Jesús nigruiguíin. Ikhaa ginii niraʼwíin náa xúgíinʼ xa̱bi̱i̱, mbá 12 xa̱bekha bi̱ nixnáa mbiʼñún apóstoles (Luc. 6:​12-16). Nákha nixtáa náa Galilea “nigimbíin bi̱ mbá gu̱wi̱i̱nʼ ejmi̱i̱n” ga̱jma̱a̱ “nikuʼmiin mutaraʼa ga̱jma̱a̱ numuu Xa̱bu̱ Ñajunʼ ndrígóo Dios ga̱jma̱a̱ dí muni̱ thanún bi̱ naʼniún nandii” (Luc. 9:​1-6). Nda̱wa̱á itháán náa Sur náa Judea, “niraʼwíin mbá 70 ga̱jma̱a̱ nikuʼmiin magún ginuu majmi̱i̱n majmi̱i̱n” (Luc. 9:51; 10:1). Ikha jngóo náa mixtiʼkhu enii xuajin rí najuiʼtáraʼa kúwá xa̱bi̱i̱.

Judíos bi̱ naguánú nanindxuún xa̱bi̱i̱ Jesús nuniri̱ya̱a̱ʼ má xúʼko̱ ndxa̱a̱ Pascua mámbá tsiguʼ, mbáa gajmiún bi̱ kúwá náa guʼwún (Éx. 12:​6-11, 17-20). Nákhá inuu makhañúu, Jesús nijkha náa Jerusalén gajmíi̱n apóstoles ndrígióo, mú ikhaa táʼthún xúgíinʼ xa̱bi̱i̱ bi̱ kúwá náa Judea, Galilea ga̱jma̱a̱ náa Perea rí muniriya̱a̱ʼ ndxa̱a̱ Pascua mbóó gajmíi̱n. Nakujmaa rí nákhá ikhú, ikhaa nindoo maxtáa i̱ndó gajmíi̱n apóstoles ndrígióo. Ikha jngóo niʼthí: “Ra̱ʼkhá tháán nindoʼ rí makuíʼtsu náa Pascua rígi̱ ga̱jma̱á nindxa̱la nákhá xóó tségi̱ʼdu̱u̱ mamínuuʼ” (Luc. 22:15).

Náá numuu rí nindoo maxtáa gajmíi̱n i̱ndó ikhiin xá. Numuu rí inuu má makhañúu “¡A̱ʼdá múgiúu Dios bi̱ narígúu aʼkhúún xa̱bu̱ numbaaʼ!” (Juan 1:29). Makhañúu náa Jerusalén, náa najuixnájxi̱ tsigijñaʼ náa inuu Dios asndu nákha niʼníí. Mugu̱ bi̱ najmaa náa Pascua naʼni marmáʼáan a̱jkiu̱ún israelitas rí Jeobá niʼni káwíin náa Egipto, mú ga̱jma̱a̱ numuu rí Jesús maxnáximinaʼ, mba̱a̱ rí gaʼngo̱o̱ gaʼni, ikhaa maʼni káwíin xúgíinʼ xa̱bu̱ náa aʼkhá ga̱jma̱a̱ náa nakháñún (1 Cor. 5:​7, 8). Ga̱jma̱a̱ numuu rí Jesús maxnáximinaʼ bi̱ mbá 12 apóstoles maguanúu mani̱ndxu̱ún rajkhúu congregación cristiana (Efes. 2:​20-22). Jerusalén xuajin kaʼwu tuáʼán mbá 12 itsí náa rajkhúu ga̱jma̱a̱ ikhí kiʼniraʼmáʼ “mbá 12 mbiʼñún bi̱ mbá 12 apóstoles ndrígóo A̱ʼdá múgú” (Apoc. 21:​10-14). Ikha jngóo apóstoles bi̱ naguajún jmbu maguaʼdáá mbá ñajunʼ dí gíʼdoo numuu náa mambanúu rí Dios nandoo. Rígi̱ naʼni makru̱ʼu̱lú náá numuu rí Jesús nindoo maxtáa gajmíi̱n ikhiin náa iwáá rí niʼniriya̱a̱ʼ ndxa̱a̱ Pascua ga̱jma̱a̱ nda̱wa̱á náa niʼni timbá aʼphu̱ Ganitsu wañuu.

Bi̱ mbá 70 ga̱jma̱a̱ eʼwíinʼ xa̱bi̱i̱ tákúwá gajmiún Jesús nákha ikhú. Mu xúgíinʼ xa̱bi̱i̱ bi̱ gaguajún jmbu mambáñun Ganitsu wañuu. Náá numuu rá. Numuu rí xúgíinʼ bi̱ nda̱wa̱á ganindxu̱ún cristianos bi̱ kaxtaʼwíin, maguanúʼ makuwá náa nimbánuu ga̱jma̱a̱ nindxu̱ún rí mutañájunʼ, dí niʼthí Jesús gajmíi̱n apóstoles ndrígóo nákha mbruʼun rúʼko̱ (Luc. 22:​29, 30).