1, 2. Xú káʼnii esngájma xkridoo Tony rí maʼndoo muriʼkhui̱i̱ xóo kuwáanʼ rá.

TONY ninindxu̱u̱ mbáa ndxáma bi̱ tágaja̱a̱ ga̱jma̱a̱ anu̱u̱ ga̱jma̱a̱ na̱nguá ejmañuu náa escuela. Asndu nindxa̱ʼwáminaʼ mamiñúʼ raʼnigajmaa. Índo̱ naʼni iwáá xmáná na̱jkha̱ gajmíi̱n náa cine bi̱ nambáxu̱u̱ gajmii. Tségi̱ʼdu̱u̱ gajmíi̱n xa̱bu̱ ga̱jma̱a̱ na̱nguá ejmuu droga, mú na̱nguá gíʼdoo numuu vida ndrígóo ga̱jma̱a̱ tséʼnimbo̱o̱ rí xtáa Dios. Ikhú nininuʼ mbáa xa̱bu̱ gajmii bi̱ ni̱ndxu̱ún xa̱bi̱i̱ Jeobá ga̱jma̱a̱ niraxu̱u̱n rí tsíkro̱ʼo̱o̱. Ikhiin nixná folleto El origen de la vida ga̱jma̱a̱ ¿Es la vida obra de un Creador?

² Índo̱ xa̱bu̱ gajmii nitangi̱i̱n, Tony niriʼkuminaʼ xóo xa̱bu̱ nindxu̱u̱. Ra̱ʼkhá tháán niʼnigajmaa wéñuʼ rí asndu i̱yi̱i̱ʼ niguanúu wayuu. Tony niʼthúu̱n: “Gajkhun rí Dios xtáa”. Ikhú nigruigú maʼnigajmaa Biblia, ga̱jma̱a̱ mañu mañú ni̱jkha̱ rariʼkhuu xóo eʼyoo vida ndrígóo. Ma̱ngaa, ninindxu̱u̱ mbáa bi̱ itháan nijmañuu náa escuela ndrígóo. Rí asndu director niguanúu tsiánguá. Ikhú niʼthúu̱n: “Nitriʼkuminaʼ xóo xa̱bu̱ ni̱ndxa̱ʼ ga̱jma̱a̱ xóo ejmañaʼ. Lá ga̱jma̱a̱ numuu rí xtáá ratanigajmaa gajmiáanʼ xa̱bi̱i̱ Jeobá rá”. Tony niʼthúu̱n rí xúʼko̱ ga̱jma̱a̱ niʼthúu̱n rí xtáa rajmañuu. Nda̱wa̱á, niramuuʼ náa preparatoria ga̱jma̱a̱ rí xúgi̱ nindxu̱u̱ precursor regular ma̱ngaa nindxu̱u̱ siervo ministerial. Rí xúgi̱  xtáá gagi ga̱jma̱a̱ numuu rí gíʼdaa anu̱u̱ bi̱ nindxu̱u̱ Jeobá (Sal. 68:5).

3. Ndiéjunʼ xtágabu exnún Jeobá jiáma ga̱jma̱a̱ wa̱ʼxa̱ʼ rá.

³ Rí xóo nixtáa Tony naʼni marmáʼáan a̱jkiu̱lú rí Jeobá naxmiéjunʼ kaʼñúún jiáma ga̱jma̱a̱ wa̱ʼxa̱ʼ. Ikhaa nandoo rí maraxtaa itháan gagi. Ikha jngó, naxnáʼ xtágabu rígi̱: “Rí mbiʼi xúgi̱ garmáʼáan a̱jkia̱nʼ xtayáá Dios bi̱ Niʼníín nákha xóó nindxa̱ʼ dxámá o dxáʼgú” (Ecl. 12:1, nota). Rí mbiʼi xúgi̱, rí matani rígi̱ miʼskhaa nindxu̱u̱, mú maʼngulú muʼni. Jeobá má gambayaaʼ mu maraxtaa májánʼ, raʼkháa i̱ndó xúgi̱ ma̱ngaa xúʼgíʼ mbiʼi rí gáraxtaa. Mú makru̱ʼu̱lú rígi̱, mbuʼyáá ndiéjunʼ nimbañúún israelitas mú maʼthúu̱n náa ku̱ba̱ʼ rí Jeobá niʼthí maxnúu ga̱jma̱a̱ ndiéjunʼ nixnúu tsiakii David mu maʼngo̱o̱ maxmíjná ga̱jma̱a̱ Goliat xá.

4, 5. Ndiéjunʼ eʼsngúlúʼ ga̱jma̱a̱ numún israelitas ma̱ngaa David rá. (Atayáá timbá xtiʼkhu.)

⁴ Índo̱ israelitas inuu maʼthúu̱n náa ku̱ba̱ʼ rí Jeobá niʼthí maxnúu, táʼthúu̱n rí muniratamijná rí mani̱ndxu̱ún itháan míjiinʼ soldados ní maʼ rí magúun guxmijna náa guerra (Deut. 28:1, 2). Rí phú niʼthún, rí munimbu̱ún xtángoo ndrígóo ga̱jma̱a̱ rí makumún kuyáá ikhaa (Jos. 1:7-9). Xó ma rí ndaʼyoo xa̱bu̱ numbaaʼ, xtágabu rúʼko̱ ragíʼdoo numún. Mú xtágabu rúʼko̱ nimbañúún ikhiin, Jeobá nimbañúún ma xúʼko̱ mu muʼni gámbíin cananeos (Jos. 24:11-13). Gajkhun, rí matanimbaaʼ xtayáá Dios giʼnii gíʼmaa maraʼdáá fe. Á mu kuaʼdáá fe rúʼko̱, mambáyulúʼ makuwáanʼ má xúʼko̱ májánʼ. Rígi̱ xóó nindxu̱u̱ gajkhun rí mbiʼi xúgi̱ xóo nákha wajyúúʼ.

⁵ Goliat ninindxu̱u̱ mbáa xa̱bu̱ bi̱ naxmínaʼ bi̱ naʼni itháan rí ajtsú metros rí mba̱yi̱ʼ (9,5 pies). Ma̱ngaa, kagu̱ mbaʼa ajua̱nʼ (1 Sam. 17:4-7). Mú, xó má David, i̱ndó mbá xkarajtsi kayá ga̱jma̱a̱ nigiʼdoo fe náa Jeobá. David nikujmaa rí nindxu̱u̱ mbá xa̱bu̱ skágunʼ, náa bi̱ na̱nguá niguaʼdáá fe náa ikhaa. Mú ragájkhun nindxu̱u̱: I̱ndó Goliat ninindxu̱u̱ skágunʼ (1 Sam. 17:48-51).

6. Ndiéjunʼ gúʼthá náa artículo rígi̱ rá.

⁶ Náa artículo rí ndiʼyáá ginii niʼthí ga̱jma̱a̱ numuu a̱jkhu̱ rí nayambáá mu makuwáanʼ gagi: Muñewa̱a̱n rí mambáxulúʼ gajmiúlú Jeobá, gambaxáʼ gajmiáanʼ bi̱ nandún kuyáá Jeobá, metas rí xánindxu̱u̱ ndíí ga̱jma̱a̱ mbuyamajkuíí libertad rí Dios naxnúlú. Náa artículo rígi̱, muʼthá itháan ga̱jma̱a̱ numuu rígi̱, rí na̱ʼkha̱ raʼthí náa Salmo 16.

7. a) Xú káʼnii nindxu̱u̱ mbáa xa̱bu̱ bi̱ ndayáʼ Dios rá. b) Tsáa nindxu̱u̱ bi̱ naxnúu xúgíʼ David, ga̱jma̱a̱ xú káʼnii nimbáyúu rígi̱ xá.

⁷ Xa̱bu̱ bi̱ ndayáʼ Dios gíʼdoo fe náa ikhaa ga̱jma̱a̱ naʼniminaʼ mbaʼyoo xó má eʼyoo Jeobá. Ndayáʼ ikha ndrígóo ga̱jma̱a̱ naʼnimbánuu (1 Cor. 2:12, 13). Xúʼko̱ ninindxu̱u̱ David. Náa mbá ajmúú, niʼthí rí Jeobá nindxu̱u̱ bi̱ naxnúu xúgíʼ rí ndayóoʼ, nindoo gáʼthi rí nimbáxu̱u̱ májánʼ ga̱jma̱a̱ ikhaa (Sal. 16:5). Nixnáa núma̱aʼ Dios numuu rí nambáyuminaʼ náa ikhaa (Sal. 16:1). Ikha jngó, niʼnirámáʼ rí nixtáa gagi wéñuʼ. Nda̱a̱ imbo̱o̱ rí naʼni maxtáa gagi wéñuʼ ki xóo mambaxúu ga̱jma̱a̱ Jeobá (atraxnuu Salmo 16:9, 11). *

8. Ndiéjunʼ nindxu̱u̱ tikhu rí gajkhun mambáyaʼ maraxtaa itháan tsímáá rá.

⁸ Bi̱ kúwi̱i̱n nuni rí nandún ikhiin o nduyáaʼ maguaʼdáá mbújkha̱a̱ na̱nguá kúwi̱i̱n gagi xóo nixtáa David (1 Tim. 6:9, 10). Mbáa ndxájulú Canadá naʼthí: “ Rí gajkhun maraxtaa gagi tséʼkha̱ náa vida ndrígúlú, na̱ʼkha̱ náa rí nuxnáá Jeobá Dios, bi̱ naxnúlú xúʼgíʼ rí májánʼ” (Sant. 1:17). Xó má natayáá, á mu xtaʼdáá mbá fe mba̱a̱ náa Jeobá ga̱jma̱a̱ natani ñajunʼ, maraxtaa gagi ga̱jma̱a̱ magiʼdoo numún vida ndrígáʼ. Mu maraʼdáá itháan fe, gíʼmaa “matríyaʼ mbiʼi” mu  maraxtaa ga̱jma̱ʼ ikhaa. Xú káʼnii gátani rá. Matraxnuu Ajngá rawunʼ, ma̱ta̱ya̱a̱ rí niʼni ga̱jma̱a̱ matatsaʼwamínáʼ xú káʼnii xa̱bu̱ nindxu̱u̱, ga̱jma̱a̱ rí nandoo kaʼyaʼ (Rom. 1:20; 5:8).

9. Xó má David, ndiéjunʼ gátani mu Ajngá rawunʼ Dios mariʼkhuu xóo xa̱bu̱ ni̱ndxa̱ʼ rá.

⁹ Numuu rí Jeobá nindxu̱u̱ mbáa anu̱lú májánʼ ga̱jma̱a̱ nandoo kaʼyulú, nguáná naxprígulú. David ndiʼyamajkuu wéñuʼ gixprígú rúʼko̱, ikha jngó niʼthí: “Mani mba̱a̱ Jeobá, bi̱ naxnúʼ xtágabu. Índo̱ mbruʼun naxpriguʼ rí nandxaʼwaminaʼ itháan mijnuʼ” (Sal. 16:7). Índo̱ niʼthí ga̱jma̱a̱ numuu róniu̱u̱, nindoo gáʼthi rí xóo nikumu̱u̱ kaʼyoo itháan Jeobá. Nandxa̱ʼwáminaʼ náa xtágabu ndrígóo ga̱jma̱a̱ naʼniminaʼ majmañuu mandxaʼwáminaʼ xóo eku̱mu̱u̱ ikhaa. Niniñaminaʼ rí xtágabu rígi̱ maxnúu ikha, xóo muʼthá, mariʼkhuu xóo mbáa xa̱bu̱ bi̱ itháan májánʼ. Á mu xúʼko̱ etani mangáán, rí nandaʼ xtayáá Jeobá ga̱jma̱a̱ rí nandaʼ matanimbaaʼ mani̱ndxu̱u̱ itháan gújkhuʼ. Ma̱ngaa manindxa̱ʼ mbáa xa̱bu̱ bi̱ najmañuu. Mbáa ndxájulú a̱ʼgu̱ bi̱ nagumbiʼyuu Christin, niʼthí: “Índo̱ nanigajmaa̱ ga̱jma̱a̱ nandxa̱ʼwáminaʼ rí xtáá raguxnuu, naku̱mu̱ʼ rí Jeobá niʼnirámáʼ mú mambáyuʼ ikhúún”.

10. Xó má eʼthí náa Isaías 26:3, xú káʼnii eyambáá rí manindxa̱ʼ mbáa xa̱bu̱ bi̱ nda̱yáaʼ Dios rá.

¹⁰ Á mu ni̱ndxa̱ʼ mbáa xa̱bu̱ bi̱ nda̱yáaʼ Dios, Jeobá gáxnáʼ ku̱ma̱ ga̱jma̱a̱ rí makruaʼaʼ ma̱ta̱ya̱a̱ xú káʼnii xtáa rarígá náa numbaaʼ ga̱jma̱a̱ ndiéjunʼ gagíʼnuu nda̱wa̱á xó má ikha eʼyoo. Maʼni ga̱jma̱a̱ numuu rí nandoo ma̱ta̱ya̱a̱, ndíjkha jngó gíʼdoo numuu vida ndrígúlú, ga̱jma̱a̱ matraʼwíí májánʼ rí matani ga̱jma̱a̱ rí xámiñaʼ rí garigá nda̱wa̱á (atraxnuu Isaías 26:3). * Mbáa ndxájulú bi̱ nagumbiʼyuu Joshua, bi̱ xtáa náa Estados Unidos, naʼthí mbá rí phú gajkhun nindxu̱u̱: “Á mu xtaa mijngii náa Jeobá, ma̱ta̱ya̱a̱ kaʼwu ndiéjunʼ nindxu̱u̱ rí phú gíʼdoo numuu ga̱jma̱a̱ rí na̱nguá”.

11. Xú káʼnii niraʼwíin David bi̱ mambaxúu gajmíi̱n rá.

¹¹ (Atraxnuu Salmo 16:3). * David ndiʼyoo májánʼ xú káʼnii gíʼmaa maraʼwíin bi̱ mambáxuʼ gajmíi̱nʼ bi̱ nandún kuyáá Jeobá. Nixna mbiʼñún “santos” numuu rí nunimíjna̱ munimbánii xtángoo ndrígóo Dios. Ga̱jma̱a̱ niʼthí rí maxtáa gajmíi̱n ikhiin naʼni rí maxtáa májánʼ. Imba̱a̱ bi̱ niʼnirámáʼ Salmo niʼthí ikháá kayuʼ. Niʼnirámáʼ rí ikhaa nambáxu̱u̱ gajmíi̱n xúgínʼ bi̱ namiñun kuyáá Dios ga̱jma̱a̱ nunimbánii ikha ndrígóo (Sal. 119:63). Xó má ndiʼyáá náa artículo ginii, ikháán mangáán ma̱ndoo mambaxáʼ gajmiáanʼ bi̱ nandún kuyáá Jeobá ga̱jma̱a̱ bi̱ nunimbu̱u̱n náa ikhaa. Gajkhun, ma̱ndoo mambaxáʼ gajmiáanʼ bi̱ mixtiʼkhu tsigúnʼ.

12. Ndíjkha jngó nimbáxu̱u̱n májánʼ David ga̱jma̱a̱ Jonatán rá.

¹² David raʼkháa i̱ndó niraʼwíin bi̱ mambaxúu gajmíi̱n bi̱ mbóó tsigúnʼ gajmíi̱n. Lá narmáʼáan a̱jkia̱nʼ xú káʼnii nigumbiʼyuu bi̱ nimbáxu̱u̱ ga̱jma̱a̱ David ráʼ. Jonatán. Rí nimbáxu̱u̱ ga̱jma̱a̱ phú mitsaan ninindxu̱u̱ xó má eʼthí náa Biblia. Mú, lá natayáá rí Jonatán mbá skíñúʼ gu̱wa̱ʼ tsiguʼ itháan nikhi̱i̱ ki xóo David ráʼ. Ndíjkha jngó nimbáxu̱u̱ májánʼ ga̱jma̱a̱ xá. Numuu rí nájmi̱i̱n niguáʼdáá fe náa Dios, nduyamajkumijná, ga̱jma̱a̱ ninindxu̱ún míjiinʼ xa̱bu̱, xó má tsiakii rí nisngajma índo̱ nixnamijná gajmiún xa̱bu̱ bi̱ nikiʼníin kuyáá Dios (1 Sam. 13:3; 14:13; 17:48-50; 18:1).

13. Xú káʼnii gándoo maraʼdiin mixtiʼkun bi̱ mambaxáʼ gajmiáanʼ rá. Araxná mbá xkri̱da.

¹³ Xó má David ga̱jma̱a̱ Jonatán, ikháanʼ ma̱ngaa ma̱ndoo makuwáanʼ májánʼ, a mu nambáxulúʼ gajmiúlú bi̱ nandún kuyáá Jeobá ga̱jma̱a̱ bi̱ nusngajma rí gajkhun guáʼdáá fe náa ikhaa. Mbáa ndxájulú a̱ʼgu̱ bi̱ nagumbiʼyuu Kiera, bi̱ mbayuuʼ má tsiguʼ xtáa raʼni ñajunʼ Jeobá, naʼthí: “Gúʼdiin bi̱ nambáxuʼ gajmíi̱nʼ náa xúgíʼ numbaaʼ,  bi̱ naguwaʼ mixtiʼkhu xuajen ga̱jma̱a̱ mixtiʼkhu costumbre ndrígu̱ún”. A mu natani xóo ikhaa, ma̱ta̱ya̱a̱ kaʼwu rí Ajngá rawunʼ Dios naʼni makuwáanʼ jnduʼ ga̱jma̱a̱ náa xi̱ʼ kaʼwu ndrígóo.

14. a) Ndiéjunʼ gambayaaʼ mataʼgíiʼ metas rí xánindxu̱u̱ ndíí rá. b) Ndiéjunʼ nithi tikhun jiáma ga̱jma̱a̱ numuu rí matani itháan ñajunʼ Dios rá.

¹⁴ (Atraxnuu Salmo 16:8). * Mú David, rí itháan nigiʼdoo numuu náa vida ndrígóo nindxu̱u̱ rí maʼni ñajunʼ Dios. Ikháán mangáán maraxtaa májánʼ ga̱jma̱a̱ tsímáá á mu natayaridáá xkri̱da ndrígóo. Atani rí ñajunʼ Dios maʼni ginii náa vida ndrígáʼ ga̱jma̱a̱ atagíʼ má xúʼko̱ metas xó má rí naniguʼ ikhaa. Mbáa ndxájulú bi̱ mbiʼyuu Steven niʼthí: “Rí manimbánuu mbá meta ga̱jma̱a̱ nda̱wa̱á nda̱yo̱o̱ rí niʼngoʼ nini, rúʼko̱ naʼni maxtáá tsímáá”. Mbáa ndxáma bi̱ na̱ʼkha̱ náa Alemania bi̱ xtáa rayambáá i̱mba̱ xuajen naʼthí: “Índo̱ gíkiu̱u̱n, tsíyooʼ matangáan mayexi kidíiʼ ga̱jma̱a̱ mba̱yo̱o̱ xúgíʼ rí nini ninindxu̱u̱ i̱ndó ga̱jma̱a̱ numuʼ ikhúúnʼ”. Nanduxu rí matatsaʼwamínáʼ xóo ekumún ikhiin. Á mu xúʼko̱, ga̱jma̱á rí najmañaʼ mu matayamajkuíí Dios ga̱jma̱a̱ atambáñun eʼwíínʼ (Gál. 6:10). Atagíʼ metas rí matani itháan ñajunʼ Dios ga̱jma̱a̱ atanda̱ʼa̱a̱ rí mambáyaʼ mu mataxkamaa. Ga̱jma̱a̱ ikhaa naniguuʼ wéñuʼ mariʼña̱a̱ rí nutakháñii (1 Juan 3:22; 5:14, 15).

15. Xú kaʼnii metas rí gaʼndoo mataʼgíʼ matani rá. (Atayáá kúgumaʼá “Tikhuu metas rí ma̱ndoo matani”.)

¹⁵ Ndiéjunʼ metas rí maʼndoo matani rá. Tikhu nindxu̱u̱ maraxna comentarios náa guʼwá nagimbáanʼ, manindxa̱ʼ precursor o mi̱dxu̱ʼ náa Betel. Ma̱ngaa ma̱ndoo mataʼgíminaʼ majmañaaʼ imbo̱o̱ ajngáa mu midxuuʼ gátayambáá náa i̱mba̱ xuajen. Mbáa ndxáma bi̱ mbiʼyuu Barak bi̱ naʼni káxi̱ ñajunʼ Jeobá, naʼthí: “Nda̱a̱ imbo̱ʼ ñajunʼ rí maʼni maxtáá itháan gagi rí magúxunʼ mámbá miʼcha̱, numuu rí nda̱yo̱o̱, rí mani ñajunʼ Jeobá ga̱jma̱a̱ xúgíʼ tsiakii ndrígóo”.

16. Xú káʼnii nikumu̱u̱ David ga̱jma̱a̱ numuu xtángoo rí Jeobá nixnúu ga̱jma̱a̱ náa numuu rá.

¹⁶ (Atraxnuu Salmo 16:2, 4). * Náa artículo  ginii, ndiʼyáá rí xtángoo ga̱jma̱a̱ ikha ndrígóo Dios nambáyulúʼ mú maʼndulú kuyáá rí májánʼ ma̱ngaa mawiyulú kuʼyáá dí ra̱májánʼ (Amós 5:15). Náa Salmo 16, David niʼthí ga̱jma̱a̱ numuu rí manindxu̱lúʼ xa̱bu̱ májánʼ a̱jkiu̱u̱n, rígi̱ nindxu̱u̱ mbá cualidad rí itháan májánʼ. Rí náa Jeobá e̱ʼkha̱. David niʼni tsiakimínáʼ mu mbaʼyáridoo cualidad ndrígóo Jeobá ga̱jma̱a̱ rí maguiyuʼ kaʼyoo rí Dios tsíyoo gaʼyoo, xóo mbuyamajkuíí xándú. Rígi̱ naʼni makuwa gíná xa̱bu̱ ga̱jma̱a̱ na̱nguá eyamajkuíí Jeobá bi̱ kaʼyoo magruígú xúgíʼ (Is. 2:8, 9; Rev. 4:11).

17, 18. a) Ndiéjunʼ niʼthí David mugíʼnii á mu nduʼyamajkhún dios bi̱ ragájkhun rá. b) Náa numuu rí tikhun xa̱bu̱ numíniiʼ wéñuʼ rá.

¹⁷ Nákha wajyúúʼ, náa nduyamajkhún dios bi̱ ragájkhun kagujtuminaʼ ga̱jma̱a̱ rí muxudami̱jna̱ aʼkhá xa̱bu̱ (Os. 4:13, 14). Mbaʼin xa̱bu̱ ndiyamajkhún dios bi̱ ragájkhun ga̱jma̱a̱ numuu rí nanigu̱nʼ muxudami̱jna̱ aʼkhá xa̱bu̱. Mú rígi̱ tséʼni rí makuwa gagi, i̱ndó naʼni mumíniiʼ. Xó má niʼthí David náa Salmo 16:4 rí ‹gaʼko̱ naʼni makuwíín gíná› ga̱jma̱a̱ numún bi̱ nduyamajkhún dios bi̱ ragájkhun. Asndu xa̱bu̱ buʼko̱ nuxnaxi̱i̱n ejñúnʼ xóo tsigijñaʼ náa dios bi̱ ragájkhun (Is. 57:5). Jeobá nditháan tániguʼ dí ra̱májánʼ rí nini (Jer. 7:31). Á mú ikháánʼ niraxtaa nákha mbiʼi rúʼko̱, lá ragájkhun rí maraxníin wéñuʼ núma̱aʼ ana̱ʼ á mu ndiyamajkuíí Jeobá xáʼ.

¹⁸ Rí mbiʼi xúgi̱, religión dí ragájkhun nuniñaʼ rí xa̱bu̱ muxudami̱jna̱ aʼkhá gajmiún bi̱ raʼkhíin ajmbiún o guʼñún, ma̱ngaa nuniñaʼ rí xa̱bu̱ mani̱ndxu̱ún a̱jma̱ ñajúnʼ. Xó má asndu nákha wajyúúʼ (1 Cor. 6:18, 19). Xa̱bu̱ nakumu̱ún rí ma̱ndoo muʼni asndu xó má eñún ikhiin, mú rí gajkhun nindxu̱u̱ rí ikhiin má “numíniiʼ wéñuʼ”. Mbáa xúʼko̱ tayáá mangáán. Ikha jngó, atadxawíín ana̱ʼ bi̱ xtáa mekhuíí. Á mu nandaʼ maraxtaa májánʼ atatsimbaaʼ xtayáá ikhaa. Nditháan xámbumaaʼ á mu natani dí ra̱májánʼ maʼni rí matamíniiʼ wéñuʼ ki xóo maʼndaʼ maraʼdáá wéñuʼ (Gál. 6:8). Joshua, bi̱ niʼthá ga̱jma̱a̱ numuu náa kutriga̱ 10, ikhaa naʼthí: “Ma̱ndoo majmulúʼ libertad ndrígúlú xó má rí gaʼndulúʼ. Mú, a mu tséjmañulú gájmulúʼ, xákuwáanʼ gagi”.

19, 20. Ndiéjunʼ rí májánʼ gundrígúu jiáma ga̱jma̱a̱ wa̱ʼxa̱ʼ bi̱ gusngajma fe náa Jeobá ga̱jma̱a̱ bi̱ gunimbu̱u̱n rá.

¹⁹ Jesús nithúún xa̱bi̱i̱: “Á mu nunimbala ajngóoʼ, phú gajkhun rí nindxa̱la xa̱bi̱ʼ, ga̱jma̱a̱ muniʼnúʼ rí gajkhun, ga̱jma̱a̱ rí gajkhun gáʼni káwáanʼ” (Juan 8:31, 32). Rí gajkhun rígi̱ naʼni káwáanʼ náa religión dí ragájkhun ga̱jma̱a̱ nduwaʼ ndrígóo. Ga̱jma̱a̱ raʼkháa i̱ndó rúʼko̱. Xó má ndiʼyáá, rí nda̱wa̱á “maguma káwíin xóo e̱ji̱i̱n Dios” (Rom. 8:21). Mú asndu mbiʼi xúgi̱ ma̱ndoo makuwáanʼ gagi. Xú káʼnii rá. Rí muʼnimbulúʼ kiʼsngáa ndrígóo Cristo. Xúʼko̱ gatatsiʼnúuʼ rí gajkhun, raʼkháa i̱ndó ga̱jma̱a̱ numuu rí nadxuu rajmañaʼ, numuu rí nandaʼ matatsimbaníí má xúʼko̱ náa vida ndrígá.

²⁰ Ndxáma ga̱jma̱a̱ ndxáʼgú, atayamajkuíí libertad rí Dios naxnáʼ. Á mu najmaa májánʼ, mambáyaʼ maraxtaa májánʼ nda̱wa̱á. Mbáa ndxájulú ndxáma niʼthí: “Rí majmaʼ májánʼ libertad ndrígá rí mbiʼi xúgi̱ mambáyaʼ índo̱ gánindxa̱ʼ xa̱bu̱ nikhi̱i̱ ga̱jma̱a̱ índo̱ gátraʼwíí mbá rí gíʼdoo numuu matani, xóo mataʼyááʼ mbá ñajunʼ májánʼ o matraʼwi̱i̱ rí matatsiʼgúnʼ o matanujúnʼ o maraxtaa mbáwiin mbáa nguáthá tsiguʼ”.

21. Ndiéjunʼ gáʼyóóʼ matani á mu nandaʼ maraʼdáá ‹vida rí má phú gajkhun nindxu̱u̱› rá.

²¹ Náa numbaaʼ xkawiʼ rígi̱, asndu ‹vida rí phú gajkhun nindxu̱u̱› na̱nguá ejyúuʼ. Nimbáa nda̱wa̱a̱ tsáa eʼyoo rí garigá mbiʼi rí gajtsi (Sant. 4:13, 14). Ikha jngó, itháan májánʼ rí maraxtaa má xúʼko̱ náa kamba̱a̱ rí maʼga̱ kañán náa ‹vida rí má phú gajkhun nindxu̱u̱› (1 Tim. 6:19). Gajkhun má, Dios na̱nguá etsudáanʼ mu̱ʼgua̱lú ikhí. Mámbáa rí ikháanʼ kaʼyoo maraʼwíí rí maʼni. Ikha jngó, atani rí Jeobá mani̱ndxu̱u̱ bi̱ mambáyaʼ. Atayamajkuíí xúgíʼ rí májánʼ dí naxnáʼ ikhaa (Sal. 103:5). Ga̱jma̱a̱ ga̱ku̱ma̱ʼ xtayáá rí ikhaa má gáxnáʼ rí maraxtaa kámuu ga̱jma̱a̱ gagi (Sal. 16:11).