1, 2. Índo̱ gátraʼwíí matani ndiéjunʼ rí itháan gíʼdoo numuu náa ikháán, náa numuu rí ndayóoʼ matanimbaaʼ xtayáá bi̱ Niʼníín rá. (Atayáá timbá xtíʼkhu.)

Á MU nindxa̱a̱ʼ mbáa dxámá o dxáʼgú, mbáa nitandrígú mbaʼa xtágabu, ga̱jma̱a̱ numuu rí xú káʼnii gíʼmaa matani nda̱wa̱á. Mbáa xa̱bu̱ bi̱ nuʼsngáa, bi̱ nuxnún xtágabu e̱ji̱i̱n escuela o eʼwíínʼ xa̱bu̱ bi̱ nuʼthá rí matanigajmaa itháan o maraʼdáá mbo̱o̱ carrera mu nda̱wa̱á matadaaʼ itháan mbújkha̱a̱. Mú, Jeobá naxnáá mbá xtágabu mu mi̱dxu̱ʼ náa kamba̱a̱ rí itháan májánʼ. Gajkhun, ikhaa nandoo rí majmañaaʼ májánʼ mu ma̱ta̱ya̱a̱ xú káʼnii gáraxtaa índo̱ garámáánʼ náa nitatsigajmaa (Col. 3:23). Mú, índo̱ gatraʼwíí ma̱ta̱ya̱a̱ ndiéjunʼ rí itháan gíʼdoo numuu náa ikháánʼ, naʼtháanʼ rí matasimbaaʼ xtayáá ikha ndrígóo. Rígi̱ gambáyaaʼ mu matraʼwíí májánʼ rí ikhaa nandoo matani náa iwáá mbiʼi (Mat. 24:14).

² Garmáʼáan a̱jkia̱nʼ rí Jeobá ndaʼyoo májánʼ ndiéjunʼ gágíʼnuu numbaaʼ rígi̱ ga̱jma̱a̱ mbá chíʼgíʼ mbiʼi rí eguanúu (Is. 46:10; Mat. 24:3, 36). Ma̱ngaa, naniniáanʼ májánʼ. Ga̱jma̱a̱ nda̱yo̱o̱ ndiéjunʼ rí eʼni makuwáanʼ gagi ga̱jma̱a̱ tsímáá, ga̱jma̱a̱ rí naʼni makuwáanʼ gíná ga̱jma̱a̱ náa nadaʼ a̱jkiu̱lú. IKha jngó, maski ajndu tikhu  xtágabu nakujmáán rí májánʼ nindxu̱u̱, a mú tsénimbu̱ún rí naʼthí náa Biblia ra̱májánʼ nindxu̱u̱ (Prov. 19:21).

3, 4. Ndiéjunʼ niguaʼnii Adán ga̱jma̱a̱ Éva mangiin e̱ji̱i̱n xíñúʼ jma̱a̱ numuu rí ninimbu̱ún kuyáá xtágabu dí ra̱májánʼ rá.

³ Xtágabu rí ra̱májánʼ nikumu̱u̱ asndu nákha nixtáa timbá xa̱bu̱ numbaaʼ índo̱ Satanás niʼni nduwaaʼ. Ikhaa niʼthúu̱n Eva ga̱jma̱a̱ ajmbio̱o̱ rí makuwíin itháan gagi á mu nuraʼwíí muni rí ikhiin nandún (Gén. 3:1-6). Rí phú gajkhun nindxu̱u̱, rí Satanás i̱ndó nindxa̱ʼwáminaʼ ga̱jma̱a̱ numuu ikhaa. Nindoo rí ikhiin gajmiún e̱jín xíñiiʼ mbuyamajkuíí i̱ndó ikhaa ki xóo Jeobá. Mú ndiéjunʼ niʼnii ga̱jma̱a̱ numún ikhiin xá. Nda̱a̱ rí niʼnii ga̱jma̱a̱ numún. Jeobá nindxu̱u̱ bi̱ nixnúún xúgíʼ rí guáʼdáá: Rí munigu̱nʼ, rí makuwa náa mbá ixi̱ ri̱ʼi̱ mitsaan ga̱jma̱a̱ mani̱ndxu̱ún jmbii mu makuwá kámuu.

⁴ Phú gíná ninindxu̱u̱, rí Adán ga̱jma̱a̱ Évá túnimbu̱ún kuyáá Dios ga̱jma̱a̱ niniñaaʼ rambáxu̱u̱n gajmiún ikhaa. Xó má nduʼyáá, gakhi̱i̱ nimíniiʼ. Nigíʼdi̱i̱ niʼni xa̱bu̱ buanii ga̱jma̱a̱ nikháñun, ikhaa kayuʼ xóo mbá ri̱ʼi̱ rí nujndoʼ índo̱ natrujtu. E̱jín xíñiiʼ majngi̱i̱n nimíniiʼ ga̱jma̱a̱ numuu aʼkhá rí nixudami̱jná (Rom. 5:12). Maski ajndu xúʼko̱, mbaʼin xa̱bu̱ nuraʼwi̱i̱ rí xúnimbu̱ún kuyáá Dios. Nandún makuwa xó má rí nandún ikhiin (Efes. 2:1-3). Nasngájma kaʼwu rí “nda̱a̱ ku̱ma̱ [...] rí nambánii ga̱jma̱a̱ Jeobá”, xóo muʼthá, xtágabu rí naʼthí Satanás na̱nguá ejmaa (Prov. 21:30).

5. a) Ndíjkha jngó rí nikumún kaʼñúún xa̱bu̱ numbaaʼ Jeobá rá. b) Náa numuu nduʼyáá rí gajkhun nindxu̱u̱ rígi̱ rá.

⁵ Jeobá nda̱yo̱o̱ májánʼ rí tikhun xa̱bu̱, xó má jiáma ga̱jma̱a̱ wa̱ʼxa̱ʼ, nandún muniʼniiʼ ga̱jma̱a̱ muni ñajunʼ (Sal. 103:17, 18; 110:3). Ikhaa nandoo kaʼñúún xúgínʼ. Lá ikháanʼ nindxaʼ mbá rí ikhiin xá. A mu xúʼko̱, ma̱niguáaʼ rí Jeobá gáxnáa ga̱jma̱a̱ rí naʼni maraxtaa gagi (atraxnuu Salmo 103:5; * Prov. 10:22). Xó má mbuʼyáá ganitsu rí na̱ʼkha̱ náa Dios, rí maxniáanʼ bi̱ mambaxáaʼ májánʼ gajmiáanʼ, metas rí xánindxu̱u̱ ndíí ga̱jma̱a̱ libertad rí phú gajkhun nindxu̱u̱.

6. Ndíjkha jngó gíʼmaa maxmiéjunʼlú rí mbuʼyáaʼ Dios, ga̱jma̱a̱ xú káʼnii exnáʼ Jeobá rí ndayáaʼ rá.

⁶ Mixtiʼkuáanʼ ni̱ndxu̱lú náa xujkhúʼ numuu rí ikháanʼ ndaʼyulú mbuʼyáaʼ Dios, i̱ndó bi̱ Niʼniáanʼ ma̱ndoo maxnúlúʼ xúgíʼ rí ndayúlú (Mat. 4:4). Índo̱ nudxawíín rí naʼthúlúʼ, nakru̱ʼu̱lú májánʼ, nakánulúʼ ku̱ma̱ ga̱jma̱a̱ gagi. Jesús niʼthí: “Gagi kuwa bi̱ nduyáá rí ndañúnʼ mbuyáaʼ Dios” (Mat. 5:3). Jeobá naxnáʼ rí ndayáaʼ índo̱ natraxnuu ajngóo ga̱jma̱a̱ mixtiʼkhu ganitsu rí mambáyaʼ rí naxná “ñumba tsi jmbi, tsi majan indxaʼhuaminaʼ” (Mat. 24:45; Is. 65:13, 14).

7. Xú káʼnii embáyaʼ ganitsu rí naxná Dios rá.

⁷ Ganitsu rí na̱ʼkha̱ náa Dios maxnáʼ ku̱ma̱ ga̱jma̱a̱ majmañaaʼ matatsaʼwa̱a̱ edxa̱ʼ, ga̱jma̱a̱ rí mambáyaʼ matiewumínaʼ náa mixtiʼkhu xkujndu (atraxnuu Proverbios 2:10-12). * Mbáa xkri̱da, mambáyaʼ ma̱ta̱ya̱a̱ nduwaʼ rí nuthi xa̱bu̱ ga̱jma̱a̱ numuu rí nda̱wa̱a̱ Dios o á mu xtaʼdáá mbújkha̱a̱ ma̱ndoo maraxtaa gagi. Ma̱ngaa, mambáyaʼ matani gaʼduunʼ rí nagua̱ʼa̱ matani dí ra̱májánʼ ga̱jma̱a̱ xajpatriguiin náa rí nandaʼ matani. Ikha jngó, atani asndu xó má eʼngaʼ mu maraʼdáá ku̱ma̱ ndrígóo Dios ga̱jma̱a̱ rí matatsaʼwa̱a̱  májánʼ edxa̱ʼ. Xúʼko̱ gáta̱ya̱a̱ rí Jeobá nandoo kaʼyaʼ ga̱jma̱a̱ rí maraxtaa májánʼ (Sal. 34:8; Is. 48:17, 18).

8. Á mú nataxúʼmaminaʼ mijngii náa Dios rí mbiʼi xúgi̱, xú káʼnii gambáyaaʼ rúʼko̱ nda̱wa̱á rá.

⁸ I̱mba̱ nguáthá mbiʼi, maguma gámbáa dí rígá náa numbaaʼ ndrígóo Satánas, ga̱jma̱a̱ i̱ndó Jeobá ganindxu̱u̱ bi̱ mambáyulúʼ. Maʼga̱nú marigá mbóo mbiʼi náa rí mbaʼyóoʼ rí ikháanʼ makumulúʼ kuʼyáá rí ikhaa má gáxnulú ganitsu (Hab. 3:2, 12-19). Ikha jngó, rí mbiʼi xúgi̱, ndayóoʼ itháan muxuʼmamíjná náa Anu̱lú bi̱ xtáa mekhuíí ga̱jma̱a̱ rí makumulúʼ kuʼyáá ikhaa (2 Ped. 2:9). Xúʼko̱, tséʼniuu má ndiéjunʼ garigá, maku̱ma̱ʼ xóo David, bi̱ niʼnirámáʼ: “Náa xúgíʼ rí mani ginii ndaʼyáaʼ má xúʼko̱ Jeobá. Numuu rí ikhaa xtáa náa ñawún mújúnʼ, nda̱a̱ nimbá rí maʼni maxpatrigun” (Sal. 16:8).

9. a) Xó ma eʼthí náa Juan 6:44, ndiéjunʼ eʼni Jeobá rá. b) Ndíjkha jngó nindxu̱u̱ kiejunʼ rí muniʼnúnʼ eʼwíínʼ xa̱bi̱i̱ Jeobá rá.

⁹ Índo̱ natatsinuwinʼ mbáa bi̱ raʼkháa xa̱bi̱i̱ Jeobá, nguáthá tayáá ga̱jma̱a̱ numuu xá. Tsitaninuwiinʼ májánʼ. Mbáa natayáá xú kaʼnii mbiʼyuu, xú kaʼnii xa̱bu̱ nindxu̱u̱ o asndu itháan. Xú káʼnii mixtiʼkhu nindxu̱u̱ índo̱ natasitniiʼ mbáa xa̱bi̱i̱ Jeobá rá. Natayáá má rí nandoo kaʼyoo Jeobá ga̱jma̱a̱ Dios má niríyaʼ numuu rí ndiʼyoo mbá rí májánʼ náa ikhaa ga̱jma̱a̱ nindxaʼóo mu maxtáa náa xuajñu (atraxnuu Juan 6:44). * Mú itháan á mu na̱ʼkha̱ náa i̱mba̱ xuajen, costumbre o xú káʼnii raza ndrígóo ga̱jma̱a̱ natasinuwiin májánʼ ga̱jma̱a̱ ikhaa naniniʼ májánʼ.

10, 11. Ndiéjunʼ eʼni mbríguiin xa̱bi̱i̱ Jeobá ga̱jma̱a̱ xú káʼnii embáyulú rígi̱ rá.

¹⁰ Mbá xkri̱da, natayáá nacha̱ rí naʼthí ikháá má ajngáa rí naratá, “mbá ajngáa mikaʼwu” rí nindxu̱u̱ gajkhun (Sof. 3:9). Xóo muʼthá, najmáanʼ ndu̱ya̱a̱ rí mbóó eniʼniiʼ Dios, ikha ndrígóo ga̱jma̱a̱ rí kuaʼti̱i̱n marigá nda̱wa̱á, xó má i̱ʼwáʼ. Ga̱jma̱a̱ rígi̱ rí itháan gíʼdoo numuu rí ma̱ndoo muniʼnuu ga̱jma̱a̱ numuu eʼwíínʼ xa̱bu̱, rúʼko̱ naʼni rí makumulúʼ kuʼyáá ikhaa ga̱jma̱a̱  rígi̱ nayambáá mu mambaxúlúʼ má xúʼko̱ gajmiúlú.

¹¹ Raʼkháa mbaʼ marata̱ rí ni̱ndxa̱ʼ xa̱bi̱i̱ Jeobá rí xtaʼdiin bi̱ nambáxa̱ʼ gajmiáanʼ. Náa xúgíʼ numbaaʼ xtaʼdiin m bi̱ nambáxa̱ʼ májánʼ gajmiáanʼ maski ajndu xóó tsitaniʼnuuʼ xúgínʼ. Lá xtáa mbáa xa̱bu̱ kaníí bi̱ raʼkháa xa̱bi̱i̱ Jeobá bi̱ ma̱ndoo maʼthí ikhaa kayuʼ xóo rígi̱ ráʼ.

12. Ndiéjunʼ metas rí na̱ʼkha̱ náa Dios gándoo gátani rá.

¹² (Atraxnuu Eclesiastés 12:1). * Lá xtáá rataniminaʼ má xúʼko̱ mu matani itháan ñajunʼ Dios rá. Mbáa xtaa rataniminaʼ mu matraxnuu Biblia xúgíʼ mbiʼi o maraxna májánʼ comentarios náa guʼwá nagimbáanʼ ga̱jma̱a̱ náa marataráʼa. Asndu xú káʼnii má, xú káʼnii ekumaʼ índo̱ nagájnuu májánʼ rí natani o índo̱ eʼwíínʼ nuʼthá rí májánʼ nitani̱ rá. Gajkhun rí nadxaʼ. Numuu rí natagíiʼ natani giʼnii ñajunʼ Dios, xó má niʼni Jesús (Sal. 40:8; Prov. 27:11).

13. Ndíjkha jngó rí itháan májánʼ nindxu̱u̱ rí muʼni ñajunʼ Dios ki xóo rí mbuʼyáá dí rígá náa numbaaʼ rá.

¹³ Á mu nataniminaʼ mu matani itháan ñajunʼ Dios, maku̱ma̱ʼ rí xtaa gagi ga̱jma̱a̱ vida ndrígáʼ gíʼdoo numuu. Apóstol Pablo niʼnirámáʼ: “Aguajunla gujkhuʼ ga̱jma̱a̱ gudrigáanʼla wíí, gaguaʼdáá má xúʼko̱ rí muni náa ñajunʼ ndrígóo Señor, ikháanʼ má ndu̱ya̱a̱la rí ñajunʼ ndrígála na̱nguá nindxu̱u̱ ndíí náa Señor” (1 Cor. 15:58). Xa̱bu̱ bi̱ nunimi̱jna̱ mbuyáaʼ dí rígá náa numbaaʼ, xóo makhánun mbújkha̱a̱ o majmaʼnuunʼ wéñuʼ, na̱nguá kuwa gagi (Luc. 9:25). Xóo mbuʼyáá ga̱jma̱a̱ numuu rey Salomón, rí ikhaa ni̱jkha̱nú nisngájma rí xúʼko̱ nindxu̱u̱ (Rom. 15:4).

14. Ndiéjunʼ eʼsngáaʼ ga̱jma̱a̱ numuu rí niʼni Salomón rá.

¹⁴ Salomón, nigiʼdoo wéñuʼ ga̱jma̱a̱ nigiʼdoo tsiakii, niraʼwíí náa vida ndrígóo mu maʼnii rí nindoo ikhaa (Ecl. 2:1-10). Niʼni guʼwá, niʼdu ixi̱ ri̱ʼi̱, ga̱jma̱a̱ niʼni xúgíʼ rí nindoo. Lá nixtáa gagi ga̱jma̱a̱ rúʼko̱ xá. Ikhaa niʼthí, índo̱ nindxa̱ʼwáminaʼ ga̱jma̱a̱ xúgíʼ rí niʼni, ndiʼyoo rí xúʼgíʼ ninindxu̱u̱ ndíí ga̱jma̱a̱ tágiʼdoo numún (Ecl. 2:11). Ndiéjunʼ eʼsngáa ga̱jma̱a̱ numuu Salomón rá.

15. Ndijkha jngó gíʼdoo numuu maraʼdáá fe, ga̱jma̱a̱ xú kaʼnii gambayaaʼ, xó má eʼthí náa Salmo 32:8 rá.

¹⁵ Tikhun xa̱bu̱ najmañún índo̱ náa vida ndrígu̱ún nakiéʼkhun ga̱jma̱a̱ numíniiʼ rí niʼni. Jeobá na̱nguá eyoo rí matagíʼniin xúʼko̱ kaʼnii. Nandoo rí matadxawíín ga̱jma̱a̱ matanimbaaʼ. Mú ndaʼyóoʼ maraʼdáá fe, nditháan xátanga̱a̱ a̱jkia̱nʼ rí gátraʼwíí matani ga̱jma̱a̱ numuu fe ndrígáʼ. Ga̱jma̱a̱ nditháan xámbumuu ngajua rí natasngájma ga̱jma̱a̱ numuu mbiʼyuu (Heb. 6:10). Ikha jngó, ataniminaʼ asndu xó má eʼngaaʼ mu maraʼdáá fe. Xúʼko̱ gáta̱ya̱a̱ ikháán rí xúgíʼ rí naʼthí Jeobá nindxu̱u̱ mu maraxtaa májánʼ (atraxnuu Salmo 32:8). *

16. Náa numuu rí gíʼmaa mbuʼyamajkuíí ga̱jma̱a̱ majmulúʼ májánʼ libertad rá.

¹⁶ Pablo niʼnirámáʼ: “Ga̱jma̱a̱ náa rígá espíritu ndrígóo Jeobá, na̱nguá kaxtuʼwájmáanʼ” (2 Cor. 3:17). Xúʼko̱, Jeobá nandoo  kaʼyoʼ libertad, ga̱jma̱a̱ xúʼko̱ má niʼniaʼ mu maʼndulú kuʼyáá. Mú, nandoo rí majmaa májánʼ, rúʼko̱ gáñewanʼ. Mbáa natátsiʼnuuʼ jiáma ga̱jma̱a̱ wa̱ʼxa̱ʼ bi̱ nduyáá náa nurima̱ʼ xa̱bu̱, o xúʼko̱ eʼni mangiin, nunigajmaa gitsíin dí gamíi, nutsikha ndí o naʼwa̱a̱n iyaʼ najnga̱a̱. Mbáa naʼniu makuwa gagi mbá xngaa. Mú nuni numa̱a̱ ga̱jma̱a̱ numuu rí nuni: Tséʼngu̱u̱n gúniñaaʼ, naʼniún nandii o asndu nakháñun (Gál. 6:7, 8). Nakumu̱ún rí ma̱ndoo muni asndu xú káʼnii má rí gaʼndún, mú nuni nduwamijná (Tito 3:3).

17, 18. a) Náa numuu rí ma̱ndoo muʼthá rí muʼnimbulúʼ kuʼyáá Jeobá naʼni káwáanʼ rá. b) Xú káʼnii mixtiʼkhu nindxu̱u̱ libertad rí nigiʼdoo Adán ga̱jma̱a̱ Eva ga̱jma̱a̱ rí xóo guaʼdáá xa̱bu̱ numbaaʼ rí mbiʼi xúgi̱ rá.

¹⁷ Imbo̱ʼ nindxu̱u̱, rí muʼnimbulúʼ kuʼyáá Jeobá mambáyulúʼ. Rígi̱ naʼni makuwáanʼ májánʼ ga̱jma̱a̱ naʼni káwáanʼ (Sal. 19:7-11). Mú índo̱ najmaaʼ májánʼ libertad ndrígáʼ, xóo muʼthá, rí natasimbaaʼ xtángoo ga̱jma̱a̱ ikha jmbu rí Jeobá naxnáʼ, natasngájmáán Jeobá mangiin ana̱ʼ rí ma̱ndoo muxna̱a̱ itháan libertad. Gajkhun, rí Dios ma̱ndoo maʼni “maguma káwíin xóo e̱ji̱i̱n Dios” (Rom. 8:21).

¹⁸ Ikhaa rúʼko̱ nindxu̱u̱ rí Adán ga̱jma̱a̱ Eva niguaʼdáá nákha ginii. Nguáthá xtángoo nigíiʼ Dios náa ixi̱ ri̱ʼi̱ Edén rá. káaʼ mbóó: Rí xúphu̱ xndúu ixi̱ (Gén. 2:9, 17). Lá natayáá ikháánʼ rí nindxu̱u̱ mbá xtángoo ra̱májánʼ rá. Na̱nguá. Mixtiʼkhu nindxu̱u̱ xtángoo rí nuni xa̱bu̱ ga̱jma̱a̱ nutsudi̱i̱n eʼwíínʼ rí munimbaníí.

19. Xú káʼnii eʼsngúlúʼ Jeobá ga̱jma̱a̱ Jesús rí xúʼni̱ rí nandulúʼ rá.

¹⁹ Ku̱ma̱ ndrígóo Jeobá nakujmaa rí xú káʼnii eʼni ga̱jma̱a̱ ni̱ndxu̱lú. Ikha jngó tséxnulú mbaʼa wéñuʼ xtángoo, naʼsngúlú mu nunimbánii ga̱jma̱a̱ ngajua. Nandoo rí muʼnimbulúʼ ikha ndrígóo ga̱jma̱a̱ maguiyulú kuʼyáá dí ra̱májánʼ (Rom. 12:9). Nuxkamaa xkri̱da rí xú káʼnii niʼsngáa Jesús náa kúbá, náa rí niʼthí rí maʼga kaguáanʼ muʼxudamíjná aʼkhá (Mat. 5:27, 28). Xóo Rey náa Reino ndrígóo Dios, maʼsngúlú má xúʼko̱ náa numbaaʼ nuxi̱ʼ mu ma̱ndoo mbuʼyáá rí májánʼ ga̱jma̱a̱ dí ra̱májánʼ xó má eyoo ikhaa (Heb. 1:9). Ma̱ngaa mambáyulúʼ muguaʼdáá ku̱ma̱ májánʼ. Atatsaʼwáminaʼ rí ni xátangaán matatsaʼwamínáʼ rí mataxuʼdáminaʼ aʼkhá ni má xatamíniʼ ga̱jma̱a̱ numuu rígi̱. Ikhú maraʼdáá libertad rí Jeobá niʼthí maxnáʼ.

20. a) Xú kaʼnii ejmuu Jeobá libertad ndrígóo rá. b) Xú kaʼnii embáyulú xkri̱da ndrígóo Dios rá.

²⁰ Gajkhun má, rí xaguaʼdáá muraʼwíí muʼni asndu xó má eyulú, numuu rí nandulúʼ kuʼyáá má xúʼko̱ Dios mangiin náa a̱ngiu̱lú. I̱ndó Jeobá xtáa rathulú rí mbuʼyaridáá. Maski ajndu ikhaa gíʼdoo libertad rí tsétumuu, niraʼwíí rí ma̱ndoo kaʼñún xa̱bu̱ numbaaʼ (1 Juan 4:7, 8). Ikha jngó ma̱ndoo mbuyaridáá Dios á mu nuraʼwíí muʼni rí naniguʼ ikhaa.

21. a) Ndiéjunʼ niʼthúu̱n David, Jeobá rá. b) Ndiéjunʼ gúʼyáá náa imbo̱ʼ artículo rá.

²¹ Lá natayamajkuíí xúgíʼ rí májánʼ rí naxnáá Jeobá rá. Náa artículo rígi̱, nikuwáanʼ ruʼthá ga̱jma̱a̱ numuu ganitsu rí na̱ʼkha̱ náa Jeobá, bi̱ nambaxáʼ májánʼ gajmiáan, metas rí gíʼdoo numuu ga̱jma̱a̱ rí kuaʼti̱i̱n makhánulúʼ libertad rí phú gajkhun nindxu̱u̱ (Sal. 103:5). Mbáa maʼdxaʼ wéñuʼ xóo rí nikumu̱u̱ David índo̱ niʼthúu̱n Jeobá: “Matani rí maniʼnúnʼ kamba̱ʼ rí maʼga̱ kañún maxtáá. Rígá wéñuʼ gagi náa iná ikháán; marigá má xúʼko̱ rí májánʼ náa ikháán asndu kámuu” (Sal. 16:11). Náa imbo̱ʼ artículo ma̱ta̱ya̱a̱ i̱ʼwáʼ rí gíʼdoo numuu rí na̱ʼkha̱ náa Dios rí naʼthí náa Salmo 16. Rígi̱ mambáyaʼ makruaʼaʼ májánʼ xú káʼnii gándoo gáraxtaa gagi.