DIANA gíʼdoo itháan rí mbá 80 tsiguʼ. Mú ajmbio̱o̱ nigiʼdoo nandii Alzheimer ga̱jma̱a̱ nixtáa náa nuxtiewu̱u̱n xa̱bu̱ buanii asndu índo̱ nikháñu. Ikhaa ma̱ngaa nixtáa gíná ga̱jma̱a̱ numuu rí nikháñun a̱jmi̱i̱n e̱ji̱i̱n ga̱jma̱a̱ nigiʼdoo nandii rí nagumbiʼyuu carcer de mama. Maski ajndu xúʼko̱, a̱ngiu̱lú bi̱ kuwa náa congregación nduyáá índo̱ na̱ʼkha̱ náa reunión o índo̱ naʼtáraʼa, nuthi rí xtáa má xúʼko̱ gagi.

John ninindxu̱u̱ superintendente viajante itháan rí a̱jma̱ skiñúʼ ijtsu̱ tsiguʼ. Niniguʼ wéñuʼ ñajunʼ rígi̱, rí asndu ndiyóoʼ maniñuʼ mu mañewu̱u̱n mbáa bi̱ kaʼyoo, bi̱ naʼniu nandii. Índo̱ a̱ngiu̱lú bi̱ niniʼniiʼ asndu nákha ginii ndiyáá náa mbáa asamblea, nuthi rí na̱nguá niriʼkuminaʼ nditháan. Tániñuʼ ranindxu̱u̱ mbáa xa̱bu̱ bi̱ xtaa gagi.

Xú kaʼnii enii mu makuwá gagi Diana ga̱jma̱a̱ John rá. Xú káʼnii gándoo maxtáa gagi mbáa, maski ajndu xtáa ramínuuʼ o naniñuʼ mbá ñajunʼ rí naniguʼ wéñuʼ xá. Náa Biblia nariʼña̱a̱: “Xa̱bu̱ jmbii maxtáa gagi náa Jeobá” (Sal. 64:10). Mú makru̱ʼu̱lú májánʼ rí gíʼdoo numuu, mbuʼyáá rí phú naxnúlú gagi, ga̱jma̱a̱ rí na̱nguá.

Náa vida ndrígúlú, rígá tikhu rí naʼni makuwáanʼ gagi mbá xngaa, xóo muniʼgúnʼ o munujúnʼ, maguaʼdíin e̱ji̱i̱n o mundrígú mbá ñajunʼ ndrígóo Dios. Naʼni makuwáanʼ gagi numuu rí Jeobá nixnúlú regalo rígi̱. Ikhaa niʼnii rí mudamijná xa̱bu̱, ga̱jma̱a̱ muguaʼdíin e̱jñún ma̱ngaa naxnúlú ñajunʼ muʼni náa xuajñu (Gén. 2:18, 22; Sal. 127:3; 1 Tim. 3:1).

Mú nguáná, maʼni rí makuwáanʼ gagi mbá xngaa. Phú gíná nindxu̱u̱ índo̱ nakháñuu mbáa bi̱ ndiʼyáa o naʼni nduwánʼ ga̱jma̱a̱ imba̱a̱ xa̱bu̱ (Ezeq. 24:18; Os. 3:1). Mbáa nguáná e̱ji̱i̱n xúnimbu̱ún kuñún anu̱ún ga̱jma̱a̱ Dios asndu nagumiin expulsar náa congregación. Mbáa xkri̱da, e̱ji̱i̱n gaʼyee Samuel niniñaaʼ Jeobá; ga̱jma̱a̱ rey David nikudaminaʼ mbá aʼkhá ga̱jma̱a̱ rígi̱ niʼni rí mumíniiʼ bi̱ kuwa náa goʼwóo (1 Sam. 8:1-3; 2 Sam. 12:11). Gaʼkhu xóo rígi̱, na̱ʼkha̱ kagu̱ tsingíná ga̱jma̱a̱ gamiéjunʼ rí tséʼni makuwáanʼ gagi.

 Ikhaa kayuʼ, ñajunʼ rí nakhánulú náa Dios ma̱ndoo mandáti̱gu̱lú ga̱jma̱a̱ numuu rí naʼniulú nandii, rí muñewu̱u̱n bi̱ kuwa náa guʼwúlú o naxtiʼkhuu ñajunʼ náa xuajñu Jeobá. Mbaʼin a̱ngiu̱lú ndiyóoʼ muniñaʼ ñajunʼ rí nuni, nuthi rí asndu nakuwa gíná numuu rí nanigunʼ wéñuʼ.

Gajkhun má rí gagi ma̱ndoo mani̱ndxu̱u̱ mbá xngaa. Mú xkri̱da ndrígóo Samuel ga̱jma̱a̱ eʼwíínʼ nusngájma dí rígá imbo̱o̱ xóo makuwáanʼ gagi ga̱jma̱a̱ tsímáá maski ajndu na̱nguá kuaʼti̱i̱n rí maxtiʼkhuu o mumíniiʼ ga̱jma̱a̱ numuu xkujndu.

Jesús ndiʼyoo májánʼ ndiéjunʼ phú nindxu̱u̱ rí maraxtaa gajkhun gagi. Índo̱ nixtáa mekhuíí, májánʼ wéñuʼ nixtáa. Ikha jngó “nixtáá gagi náa ikhaa [Jeobá] xúgíʼ mbiʼi” (Prov. 8:30). Mú, índo̱ ni̱ʼkha̱ náa tsu̱du̱u̱ ku̱ba̱ʼ nguáná ndiyóoʼ maraʼnuu xkujndu gakhi̱i̱. Maski ajndu xúʼko̱, nixtáa raʼni ñajunʼ anu̱u̱ (Juan 4:34). Ndiéjunʼ nimbáyúu mu maʼngo̱o̱ maraʼnuu gaʼkhu índo̱ inuu makhañúu xóo xa̱bu̱ numbaaʼ xá. Náa Biblia naʼthí: “Ga̱jma̱a̱ gagi rí nigiʼdoo niʼngo̱o̱ náa ixi̱” (Heb. 12:2). Guʼyáá a̱jma̱ enii rí Jesús niʼthí ga̱jma̱a̱ numuu gagi, xóo muʼthá, rí phú gajkhun maraxtaa gagi.

Mbóo mbiʼi, 70 discípulos nitangi̱i̱n ga̱jma̱a̱ gagi, numuu rí nini milagros náa nigún gutaraʼa, xóo muxkawíin xa̱bu̱ wéñiʼ. Ikhú, Jesús niʼthún: “Mú, xákuwáanʼ gagi ga̱jma̱a̱ numuu rígi̱, rí espíritu xkawiiʼ nunimbu̱ún kuyala, gaʼdxala ga̱jma̱a̱ numuu rí mbiʼyalaʼ nigumaraʼmáʼ mekhuíí” (Luc. 10:1-9, 17, 20). Maski ajndu nanigulúʼ wéñuʼ ñajunʼ rí nuʼni, mú rí mambáxulúʼ gajmiúlú Jeobá gíʼdoo itháan numuu ga̱jma̱a̱ naʼni makuwáanʼ itháan gagi.

Imbo̱o̱ mbiʼi, índo̱ Jesús xtáa raʼsngúún mbaʼin xa̱bu̱, mbáa a̱ʼgú judía niʼthí dí ra̱ʼkha̱ tháán gagi xtáa ru̱dúu̱ numuu rí naʼsngáa májánʼ. Mú Jesús niʼthúu̱n: “¡Gagi kuwa xa̱bu̱ bi̱ nudxawíín ajngóo Dios ga̱jma̱a̱ nunimbaníí!” (Luc. 11:27, 28). Á mu mbáa gíʼdiin e̱ji̱i̱n májánʼ a̱jkiu̱ún, gajkhun dí ra̱ʼkha̱ tháán gaʼdxuu. Mú itháan maʼniuu maxtáa gagi á mu  ikhaa naʼnimbo̱o̱ kaʼyoo Jeobá ga̱jma̱a̱ á mu nambáxu̱u̱ májánʼ ga̱jma̱a̱ ikhaa.

Xúʼko̱ kaʼnii, rí makuwáanʼ gagi nindxu̱u̱ rí mambaxúlúʼ májánʼ gajmiúlú Jeobá. Gajkhun má, rí maguaʼdáá xkujndu tséʼni rí makuwáanʼ gagi, mú tsíriyaʼ kaʼyulú rí makuwáanʼ gagi. Ikha jngó, índo̱ naʼngulú ga̱jma̱a̱ naguajún jmbu náa Jeobá, rúʼko̱ naʼni rí makuwáanʼ itháan gagi (Rom. 5:3-5). Garmáʼáan a̱jkiu̱lú rí Jeobá naxnún xi̱ʼ kaʼwu ndrígóo bi̱ nakumu̱ún kuyáá ikhaa, ga̱jma̱a̱ mbá cualidad rí naxná náa xi̱ʼ kaʼwu nindxu̱u̱ gagi (Gál. 5:22). Náa Salmo 64:10 naʼthí: “Xa̱bu̱ jmbii maxtáa gagi náa Jeobá”.

Xúgi̱ rígi̱ nasngájma náa numuu rí Diana ga̱jma̱a̱ John, bi̱ niʼthá ga̱jma̱a̱ numuu nákha ginii, túnimbati̱ga̱ rí makuwa gagi maski niguáʼdáá xkujndu. Diana naʼthí: “Nimbáyuminaʼ náa Jeobá, xó má eʼni mbá ada̱ bi̱ nambáyuminaʼ náa anu̱u̱”. Ma̱ngaa niʼthí: “Nakumuʼ rí Dios nimbáyuʼ mu xániñuʼ rataráʼa ga̱jma̱a̱ gagi”. Ndiéjunʼ gúʼthá ga̱jma̱a̱ numuu John rá. Ikhaa naʼthí rí nákha tsiguʼ 1998 nijuiʼthá masngaa náa Escuela de Entrenamiento Ministerial ga̱jma̱a̱ numuu rúʼko̱ niʼni rí maʼnigajmaa itháan. Núma̱aʼ ga̱jma̱a̱ numuu rí niʼnigajmaa̱, rúʼko̱ nimbáyúu mu xániñuʼ raʼtaráʼa má xúʼko̱, ga̱jma̱a̱ nda̱wa̱á niniñuʼ ranindxu̱u̱ superintendente viajante. Niʼthí rí táʼniu mingíjyúuʼ muniñaʼ ñajunʼ rí guáʼdáá, mú ikhiin nikuwa xawii mu muni asndu xú káʼnii má gáʼthi Jeobá. Ga̱jma̱a̱ niʼthí xóó: “Tsigáwiinʼ a̱jkiu̱xuʼ nditháan”.

Mbaʼin eʼwíínʼ a̱ngiu̱lú nuthi rí gajkhun nindxu̱u̱ ajngáa rí na̱ʼkha̱ náa Salmo 64:10. Mbuʼyáá ga̱jma̱a̱ numuu mbáa xa̱bu̱ gajmii bi̱ nini ñajunʼ náa Betel itháan rí mbá skíñúʼ gu̱wa̱ʼ tsiguʼ náa Estados Unidos ga̱jma̱a̱ nindrigú rí mani̱ndxu̱ún precursor especial. Ikhiin nithi: “Índo̱ natatsiñaʼ mbá rí nanigua̱ʼ wéñuʼ, gajkhun naraxtaa gíná. Mú xándoo maraxtaa má xúʼko̱”. Ikhú nacha̱ nitaraʼa gajmiún bi̱ kuwa náa congregación. Ma̱ngaa nuthi: “Nutakáñiixu Jeobá mbájmbu. Índo̱ nduyaxu rí xú káʼnii Jeobá eriʼña rí nitha̱a̱nxu, nakumuxu rí nakuwaxu gagi wéñuʼ ga̱jma̱a̱ nadxuxu. Nguáthá mbiʼi nda̱wa̱á, eʼwíínʼ a̱ngiu̱lú ninindxu̱ún precursor. Ma̱ngaa, niguaʼdiinxu a̱jmi̱i̱n xa̱bu̱ bi̱ nisngúúnxu, bi̱ nacha̱ nijmañún ga̱jma̱a̱ numuu Biblia”.

Gajkhun má rí mingíjyúuʼ maraxtaa gagi má xúʼko̱. Maʼga̱nú mbóo mbiʼi rí makuwáanʼ gíná. Mú Jeobá naʼni̱i̱ a̱jkiu̱lú ga̱jma̱a̱ ajngáa rí na̱ʼkha̱ Salmo 64:10. Maski ajndu kuwáanʼ gíná, ma̱ndoo makumulúʼ kuʼyáá rí “xa̱bu̱ jmbii maxtáa gagi náa Jeobá”. Xóo muʼthá, maski ajndu xú káʼnii má gúgiʼnii, ma̱ndoo makuwáanʼ gagi á mu naguajún jmbu náa Jeobá. Ga̱jma̱a̱ maguáʼthi̱i̱n mbiʼi rí nikudaminaʼ maʼnimbánuu rí marigá “mbá nuxi̱ʼ mekhu ga̱jma̱a̱ mbá ku̱ba̱ʼ nuxi̱ʼ”. Ikhú xa̱bi̱i̱ Jeobá mani̱ndxu̱ún jmbiin ga̱jma̱a̱ makuwá ‹gagi kámuu› ga̱jma̱a̱ xúgíʼ rí Jeobá maʼni (Is. 65:17, 18).

Gundxa̱ʼwámi̱jna̱ rí nandoo gáʼthúu̱n: Rí xáʼniulu nandii ga̱jma̱a̱ xúgíʼ mbiʼi maguaʼdáá tsiakii. Xúgíʼ rí niʼnii mumíniiʼ nákha ginii o rí niʼni gawunlú ninújngoo má gáʼni mbiʼi rúʼko̱. Jeobá naʼthulú rí “nimbáa ní xarmáʼáan a̱jkiu̱u̱n dí nirígá nákha ikhú”. Rí magabiín xa̱bu̱, rígi̱ gáʼni rí makuwáanʼ mbu̱júu̱ gajmiúlú a̱ngiu̱lú bi̱ nikháñun. Mbaʼin wéñuʼ xa̱bu̱ ra̱ʼkhá tháán gagi gakuwa rí xándoo gundxaʼwamíjna̱ xú káʼnii garigá, ikhaa kayuʼ xóo niguaʼnii anu̱u̱ ga̱jma̱a̱ ru̱dúu̱ ndxáʼgú bi̱ nigiʼdoo 12 tsiguʼ bi̱ Jesús niʼniga̱bi̱i̱ (Mar. 5:42). Ga̱jma̱a̱ maʼga̱nú mbiʼi rí xúgínʼ xa̱bu̱ bi̱ gakuwa náa ku̱ba̱ʼ mani̱ndxu̱ún jmbiin ga̱jma̱a̱ makuwa “gagi náa Jeobá” kámuu mbiʼi.