1, 2. Ndiéjunʼ endxa̱ʼwa̱a̱ edxu̱ún tikhun xa̱bu̱ índo̱ nudxawíín ajngáa ku̱ba̱ʼ mitsaan rá.

NININDXU̱U̱ mbóo mbiʼi kiejunʼ. Asamblea rí nirígá náa Seúl (Corea) índo̱ niguámbáa ga̱jma̱a̱ mbaʼin wéñuʼ a̱ngiu̱lú coreanos nigimbíin náa kuwa ragájníin tikhun a̱ngiu̱lú bi̱ nayegun edxu̱u̱ náa i̱ʼwáʼ xuajen. Índo̱ kuwa rutangaumijná niʼthí: “Mbuʼyamijná náa ku̱ba̱ʼ mitsaan”. Mú, ndiéjunʼ nindúún guthi xá.

² Rí mbiʼi xúgi̱, ajngáa ku̱ba̱ʼ mitsaan mbaʼin xa̱bu̱ mixtiʼkhu xóo e̱ndxa̱ʼwáá edxu̱ún. Tikhun nuthi rí ragájkhun nindxu̱u̱. Eʼwíínʼ nundxa̱ʼwa̱míjna̱ rí nindxu̱u̱ náa nakujmaa mitsaan ga̱jma̱a̱ naʼgui̱i̱ xóo mbá xkua̱ náa rígá wéñuʼ ri̱ʼi̱. Mbáa bi̱ naxkidxu̱u̱ ma̱ndoo maʼthí rí xtáa náa ku̱ba̱ʼ mitsaan índo̱ gági̱ʼi̱ mikhu mbá ganitsu rí miʼtsí wéñuʼ. Mú, bi̱ nindxúu̱n cristianos gajkhun, ndiéjunʼ nindxu̱u̱ ku̱ba̱ʼ mitsaan rá. Lá nindxu̱u̱ mbá rí naguaʼti̱i̱n marigá nda̱wa̱á rá.

3. Náa minaʼ ejkha̱ raʼthí timbá aʼphu̱ ku̱ba̱ʼ mitsaan náa Biblia rá.

³ Náa Biblia naʼthí ga̱jma̱a̱ numuu mbá ku̱ba̱ʼ mitsaan rí nirígá nákha ginii xó má rí marigá nda̱wa̱á. Gajkhun, ajngáa ku̱ba̱ʼ mitsaan rí na̱ʼkha̱ raʼthí náa Ajngá rawunʼ Dios. Náa Biblia católica Scío de San Miguel, rí nijuiʼtáriyaʼ náa ajngáa latín, Génesis 2:8 naʼthí: “Niʼni Tata Dios mbá ku̱ba̱ʼ mitsaan asndu nákha ginii: Náa nigíwaan xa̱biya̱ bi̱ niʼni”. Náa ajngáa hebreo, versículo rígi̱ naʼthí “ixi̱ ri̱ʼi̱ Edén”. Mú ajngáa Edén nandoo gáʼthúu̱n “mitsaan” o  “naʼgui̱i̱”, naxná xóo egumbiʼyuu. Rígá wéñuʼ ganitsu, mitsaan ekujmaa, ga̱jma̱a̱ kuwa tsímáá xa̱bu̱ majngi̱i̱n xujkhúʼ (Gén. 1:29-31).

4. Náa numuu rí ma̱ndoo muxna mbiʼí ku̱ba̱ʼ mitsaan náa ixi̱ ri̱ʼi̱ Edén rá.

⁴ Náa ajngáa hebreo rí najuiʼtájuíi ixi̱ ri̱ʼi̱ nandoo gáʼthúu̱n parádeisos náa ajngáa griego. Tikhu enciclopedia naʼthí, rí índo̱ mbáa griego naʼdxun ajngáa rígi̱, nandxa̱ʼwáminaʼ náa mbá xkua̱ rí mitsaan wéñuʼ ga̱jma̱a̱ kixtiewa̱a̱n mu xarigá dí ra̱májánʼ, rígá ixi̱ rí naxná mixtiʼkhu xndúu, xó ma mañu kaʼwu, rígá iná maxaʼ náa najnguʼun iña̱ʼ nuphiʼtsu ga̱jma̱a̱ mugu̱ (Cyclopaedia, de M’Clintock y Strong; atani mbríguii ga̱jma̱a̱ Génesis 2:15, 16). Rígi̱ mambáyulúʼ makru̱ʼu̱lú náa numuu rí ma̱ndoo muxnambiʼí ku̱ba̱ʼ mitsaan náa ixi̱ ri̱ʼi̱ Edén.

5, 6. a) Náa numuu rí nindáti̱ga̱ ku̱ba̱ʼ mitsaan rá. b) Ndiéjunʼ graxe̱ gándoo maʼnii mbáa rá.

⁵ Dios nigíwanʼ Adán ga̱jma̱a̱ Eva náa mbá ixi̱ ri̱ʼi̱ xóo rúʼko̱, mú nda̱wa̱á nixkawíin ga̱jma̱a̱ numuu rí túnimbu̱u̱n. Ikha jngó, xó ma ikhiin gajmiún e̱ji̱n xíñúʼ ninimbáti̱ga̱ ku̱ba̱ʼ rúʼko̱ (Gén. 3:23, 24). Náa ku̱ba̱ʼ mitsaan rúʼko̱ na̱nguá nikuwa xa̱bu̱, ga̱jma̱a̱ nindáti̱ga̱ índo̱ nixnúu ruʼwa mbiʼ.

⁶ Mbá maxtáa mbáa xa̱bu̱ bi̱ maraximínáʼ a mu ku̱ba̱ʼ mitsaan rúʼko̱ marigáa mbu̱júu̱ náa tsu̱du̱u̱ numbaaʼ. Ndiéjunʼ esngajma tsinaʼ rígi̱ rá. Lá rígáa mbá numuu mu muguaʼthi̱i̱n makuwáanʼ náa ku̱ba̱ʼ mitsaan gajmiúlú a̱ngiu̱lú bi̱ kuñún rá. Lá majmañulúʼ muriʼña̱a̱ náa numuu rí nuʼnimbulúʼ rí gajkhun marigá mbá ku̱ba̱ʼ mitsaan rá.

7, 8. a) Ndiéjunʼ nikudaminaʼ Jeobá náa Abrahán rá. b) Ndiéjunʼ ni̱jkha̱nú nindxa̱ʼwáminaʼ Abrahán índo̱ Dios niʼnimbánuminaʼ ga̱jma̱a̱ xá.

⁷ Náa Biblia ma̱ndoo mariʼña̱a̱ graxe̱ rí nuʼnilú, libro rígi̱ niʼni Dios bi̱ niʼni Ku̱ba̱ʼ mitsaan rí nirígá nákha ginii. Mbá xkri̱da, ikhí nasngájma rí Jeobá niʼthúu̱n Abrahán rí maʼni mbaʼin e̱ji̱n xíñi “xóo wiʼiʼ dí rígá náa rawunʼ lamáa”. Ma̱ngaa niʼthúu̱n: “Ga̱jma̱a̱ numún e̱jña̱ʼ gaguma tsajkurámááʼ xúgíʼ xuajin mba̱ʼu̱ dí rígá náa tsu̱du̱u̱ ku̱ba̱ʼ numuu rí nitadxawíín rí nitha̱nʼ” (Gén. 22:17, 18). Nguáthá tsiguʼ nda̱wa̱á, Dios nitanga̱a̱ niʼthúu̱n a̱ʼdióo Abraham ga̱jma̱a̱ aʼdá xíñiiʼ (atraxnu Génesis 26:4; * 28:14). *

⁸ Nimbá náa Biblia tséʼthi rí Abrahán mandxaʼwáminaʼ rí xa̱bu̱ numbaaʼ mundrigúu rí magúun mekhuíí. Ikha jngó, índo̱ Dios niʼthúu̱n “xúgíʼ xuajin mba̱ʼu̱ dí rígá náa tsu̱du̱u̱ ku̱ba̱ʼ” maguma tsajkurámíínʼ, mbáa ni̱jkha̱nú nindxa̱ʼwáminaʼ náa tsu̱du̱u̱ Ku̱ba̱ʼ. Lá rígá imbo̱o̱ rí nasngájma náa Biblia rí gajkhun marigá mbá ku̱ba̱ʼ mitsaan nda̱wa̱á ráʼ.

9, 10. Ndiéjunʼ i̱ʼwáʼ esngájma mu muʼnimbulúʼ rí gajkhun marigá mbá ku̱ba̱ʼ mitsaan nda̱wa̱á rá.

⁹ David, bi̱ ninindxu̱u̱ aʼdá xíñiiʼ Abrahán, niʼthí ga̱jma̱a̱ numuu rí marigá nda̱wa̱á náa rí xákuwa xa̱bu̱ bi̱ ra̱míjínʼ (Sal. 37:1, 2, 10). Niʼthí rí “xa̱bu̱ bi̱ májánʼ a̱jkiu̱ún makuwá náa tsu̱du̱u̱ ku̱ba̱ʼ, ga̱jma̱a̱ makuwá tsímáá wéñuʼ”. Ma̱ngaa xi̱ʼ kaʼwu nimbáyúu mu maʼtáriyaʼ: “Xa̱bu̱ bi̱ nuni rí jmbu makuwá kámuu mbiʼi náa tsu̱du̱u̱ ku̱ba̱ʼ” (Sal. 37:11, 29; 2 Sam. 23:2). Xú káʼnii nimbáñun rí nikudaminaʼ maʼni Dios bi̱ nandún muni rí naniguʼ ikhaa xá. Niʼni rí munimbu̱ún rí nda̱wa̱á marigá mbá ku̱ba̱ʼ mitsaan ikhaa kayúʼ xóo náa ixi̱ ri̱ʼi̱ Edén, mu índo̱ xa̱bu̱ míjínʼ makuwa náa tsu̱du̱u̱ Ku̱ba̱ʼ.

¹⁰ Nda̱wa̱á, mbaʼin israelitas bi̱ nuthi rí nduyamakuíí Dios niniñaaʼ ruyamajkuíí. Ikha jngó, Jeobá niniñuʼ rí babilonios muni  gámbáa xuajñún ga̱jma̱a̱ magún kudiin mú mani̱ndxu̱ún ñumbáá (2 Crón. 36:15-21; Jer. 4:22-27). Mú gaʼyee ndrígóo Dios niʼtáriyaʼ rí mbá ajtsú skíñúʼ gu̱wa̱ʼ tsiguʼ nda̱wa̱á matangi̱i̱n mbu̱júu̱ náa nikúwi̱i̱n. Kiʼtáriyaʼ rígi̱ nimbánuu má, mú ma̱ngaa mambanúu náa ikháanʼ. Mbuʼyáá tikhu xú káʼnii nirígá ga̱jma̱a̱ mbuʼyáá xú káʼnii gambriguii rí marigá nda̱wa̱á náa Ku̱ba̱ʼ mitsaan.

11. a) Xú káʼnii nimbánuu rí niʼtáriyaʼ Isaías 11:6-9 rá. b) Ndiéjunʼ graxe̱ eguanúu maxtiʼña̱a̱ rá.

¹¹ (Atraxnuu Isaías 11:6, 9). * Dios niʼtáriyaʼ náa Isaías rí marigá tsímáá náa ku̱ba̱ʼ náa matangi̱i̱n israelitas ga̱jma̱a̱ xámiñuun gúni xujkhú xáná bi̱ najmangu̱nʼ ni má xa̱bu̱ bi̱ nuxnún a̱ngiu̱ún. Xó má e̱jñún ga̱jma̱a̱ xa̱bu̱ guanii nda̱a̱ rí gugíʼníín. Lá ragájkhun dí rúʼko̱ naʼni mundxaʼwáá edxu̱lúʼ xú káʼnii nindxu̱u̱ náa ixi̱ ri̱ʼi̱ Edén ráʼ. (Is. 51:3). Rí nijuiʼtáriyaʼ nimbánuu nákha ikhú, ma̱ngaa, mambanúu náa xúgi̱ tsu̱du̱ʼ ku̱ba̱ʼ, raʼkháa i̱ndó náa xuajen Israel, “marigá wéñuʼ ku̱ma̱ ndrígóo Jeobá xó má iyaʼ kajníʼ náa lamáa”. Mú nguáná gambánuu ajngáa rúʼko̱ rá.

12. a) Xú káʼnii niguma tsajkurámíínʼ bi̱ nitangi̱ín náa Babilonia rá. b) Ndiéjunʼ esngajma Isaías 35:5-9 dí rígá mambanúu nda̱wa̱á rá.

¹² (Atraxnuu Isaías 35:5, 6, 8, 9). * Isaías nithi rí bi̱ gagutangi̱i̱n náa Babilonia ni xákuwa xa̱bu̱ bi̱ muxnún a̱ngiu̱ún ni má xujkhú bi̱ najmangu̱nʼ, ku̱ba̱ʼ maxná wéñuʼ ganitsu ga̱jma̱a̱ numuu dí marigá wéñuʼ iyaʼ xó má nirígá náa ixi̱ ri̱ʼi̱ Edén (Gén. 2:10-14; Jer. 31:12). Lá i̱ndó rúʼko̱ gambanúu rí nijuiʼtáriyaʼ ráʼ. Guʼyáá dí eʼthí ga̱jma̱a̱ numún xa̱bu̱ bi̱ tsíyexi, bi̱ gúʼxúʼ ga̱jma̱a̱ bi̱ tsédxuun magumatanún. Mú tárígá rígi̱ ga̱jma̱a̱ numún Israelitas, milagro rígi̱ nasngájma rí marigá nda̱wa̱á.

13, 14. Xú káʼnii ndiyáá nimbánuu Isaías 65:21,22 israelitas bi̱ nitangi̱i̱n náa Babilonia, mú ndiéjunʼ xóo ndayóoʼ mambanúu náa profecía rúʼko̱ rá. (Atayáá timbá xtiʼkhu).

¹³ (Atraxnuu Isaías 65:21, 22). * Índo̱ judíos nitangi̱i̱n, na̱nguá nixkamaa mbá guʼwá májánʼ ni má mbaaʼ náa muʼdu uva. Ga̱jma̱a̱ rúʼko̱ gáʼni rí Jeobá maʼni tsajkurámiinʼ. Mú, ikhiin ra̱ʼkhá tháán nidxún rí muʼni guʼwún ga̱jma̱a̱ makuwa ikhí, mudu mbaaʼ ga̱jma̱a̱ mu̱phu̱ rí gájma̱a̱ ikhí.

¹⁴ Nduʼyáá rí náa kiʼtáriyaʼ rígi̱, mbiʼi dí makuwa mani̱ndxu̱u̱ “xóo mba̱yu̱ʼ rígá mbóo ixi̱”. Tikhu ixi̱ ndajyúuʼ mba̱yu̱ʼ tsiguʼ. Mú, xóo xa̱bu̱ numbaaʼ mbaʼyúlú rí xáʼniulu nandii mu ma̱ndoo makuwáanʼ kámuu. Rí niʼtáriyaʼ Isaías rí maraxtaa kámuu ma̱ndoo mani̱ndxu̱u̱ xóo mbá xnuʼndaa. Mú raʼkháa xúʼko̱ nindxu̱u̱. Rí nijuiʼtáriyaʼ rígi̱ mambanúu tsiakii.

15. Ndiéjunʼ nindxu̱u̱ tikhu rí nijuiʼtáriyaʼ marigá rí nuxkamaa náa libro ndrígóo Isaías rá.

¹⁵ Gundxaʼwamíjna̱ ga̱jma̱a̱ xúgíʼ rí nijuiʼthá marigá náa ku̱ba̱ʼ mitsaan. Dios maʼni tsajkurámiinʼ xúgínʼ xa̱bu̱ numbaaʼ. Nánguá gákuwá xujkhúʼ bi̱ najmangu̱nʼ ni má xa̱bu̱ bi̱ muxnún a̱ngiu̱ún. Ni má xa̱bu̱ bi̱ tsíyexi, bi̱ tsédxuun ga̱jma̱a̱ gúʼxúʼ xúgínʼ magumatanún. Xa̱bu̱ muʼni guʼwún ga̱jma̱a̱ muʼdu ganitsu rí májánʼ.  Xa̱bu̱ makuwa itháan mba̱yu̱ʼ ki xóo mbá ixi̱. Gajkhun, náa Biblia naʼthí dí rúʼko̱ gíʼthu̱lú nda̱wa̱á. Mú, makuwa tikhun xa̱bu̱ bi̱ ma̱ndoo muthi rí profecía rígi̱ ragájkhun nindxu̱u̱ rí marigá mbáa ku̱ba̱ʼ mitsaan náa numbaaʼ, ndiéjunʼ gatriʼñún á mu xúʼko̱ gúthanʼ xá. Ndíjkha jngó nuʼnimbulúʼ rí gajkhun marigá mbá ku̱ba̱ʼ mitsaan rá. Jesús niʼthí rí gajkhun marigá rígi̱.

16, 17. Nguáná phú niʼthí Jesús ga̱jma̱a̱ numuu Ku̱ba̱ʼ mitsaan rá.

¹⁶ Maski ajndu Jesús tágiʼdoo aʼkhúun, nirajkaa náa ixi̱ gajmíi̱n xa̱bu̱ bi̱ nuni dí ra̱májánʼ ga̱jma̱a̱ nikháñu. Mbá dí ikhaa, ni̱jkha̱nú ndiʼyoo rí Jesús nindxu̱u̱ rey, ikhú niʼthúu̱n índo̱ inuu makhañúu: “Garmáʼáan a̱jkia̱nʼ xta̱yo̱ʼ índo̱ gáta̱ʼa̱ʼ náa reino ndrígáʼ” (Luc. 23:39-42). Rí niriʼña Jesús, na̱ʼkha̱ náa Lucas 23:43, rí kuaʼti̱i̱n xúgiáanʼ marigá nda̱wa̱á. Mixtiʼkhu xóo endxaʼwamíjna̱ edxu̱ún xóo phú gíʼmaa magumaraʼmáʼ náa versículo rúʼko̱. Tikhun xa̱bu̱ bi̱ nutajuíi Biblia rí mbiʼi xúgi̱, nudramaʼ ginii mbá coma o a̱jma̱ punto nákha xóo tsegiʼma ajngáa “xúgi̱”, ikha jngó náa texto naʼthí: “Gajkhun natha̱nʼ: Xúgi̱ maraxtaa ga̱jma̱á ni̱ndxu̱ʼ náa ku̱ba̱ʼ mitsaanʼ”. Mu, lá rúʼko̱ rí nindoo gáʼthi Jesús ráʼ.

¹⁷ Náa mbaʼa ajngáa dí rígá xúgi̱, najmaa coma mu mambáyaʼ makruaʼaʼ ndiéjunʼ eyoo gáʼthúu̱n mbá ajngáa. Náa ajngáa griego rí nigumaraʼmáʼ nákha ginii, na̱nguá nijmuu wéñuʼ punto. Ikha jngó, rígá wéñuʼ graxe̱ ga̱jma̱a̱ numuu rí nindoo gáʼthi Jesús: Gajkhun rí natha̱nʼ: Xúgi̱ maraxtaa ga̱jma̱á ni̱ndxu̱ʼ náa ku̱ba̱ʼ mitsaan, o gajkhun rí natha̱nʼ xúgi̱: Maraxtaa ga̱jma̱a̱ ni̱ndxu̱ʼ náa ku̱ba̱ʼ mitsaan. Xa̱bu̱ bi̱ nutajuíi ajngáa nuniraʼmáʼ xó má rí nakumu̱ún ikhiin rí nindoo gáʼthi Jesús. Ga̱jma̱a̱ xúʼko̱ exkamaa náa mixtiʼkhu Biblia.

18, 19. Ndiéjunʼ embáyulú makru̱ʼu̱lú ga̱jma̱a̱ numuu rí nindoo gáʼthi Jesús rá.

¹⁸ Garmáʼáan a̱jkiu̱lú a̱jma̱ numuu rí niʼthúún Jesús nákha guapháá xa̱bi̱i̱: “A̱ʼdióo xa̱biya̱ maxtáa náa a̱jkiu̱u̱n ku̱ba̱ʼ ajtsú mbiʼi ga̱jma̱a̱ ajtsú mbruʼun” ga̱jma̱a̱: “A̱ʼdióo xa̱biya̱ katsíñanʼ rí mixnáxi̱i̱ náa ñawúúnʼ xa̱bu̱, ga̱jma̱a̱ muxiyáa, ma̱ngaa rí maʼni ajtsú mbiʼi magabi̱i̱” (Mat. 12:40; 16:21; 17:22, 23; Mar. 10:34). Apóstol Pedro niʼthí rí xúʼko̱ má nirígá (Hech. 10:39, 40). Ikha jngó, Jesús ga̱jma̱a̱ xa̱bu̱ ra̱májánʼ na̱nguá nikuwa náa ku̱ba̱ʼ mitsaan, nákha mbiʼi má rí nikháñu. Ikhaa nixtáa mba̱yu̱ʼ mbiʼi náa “Iñá wa̱jinʼ”, asndu índo̱ Jeobá niʼnigabi̱i̱ (Hech. 2:31, 32). *

¹⁹ Xó má eʼyáá, Jesús niʼnimbánuminaʼ ga̱jma̱a̱ xa̱bu̱ ra̱májánʼ índo̱ niʼthúu̱n “xúgi̱ natha̱nʼ gajkhun”. Ajngáa rúʼko̱ najmuu nákha mbiʼi rí nixtáa Moisés. Mbáa xkri̱da, mbóo mbiʼi niʼthí: “Ga̱jma̱a̱ ajngáa rí xtáá ratha̱nʼ xúgi̱ gíʼmaa magiwa̱nʼ náa a̱jkia̱nʼ” (Deut. 6:6; 7:11; 8:1, 19; 30:15).

20. Xú káʼnii comentario embáyúu rí xóo nakru̱ʼu̱lú rí niʼthí Jesús rá.

²⁰ Mbáa bi̱ naʼtájuíi Biblia bi̱ na̱ʼkha̱ náa xuajen rí nixtáa Jesús niriʼña: “Náa ajngáa rígi̱, ‹xúgi̱› nagájnuriyoʼ itháan, ga̱jma̱a̱ xúgi̱ kaʼnii phú gíʼmaa maʼthí ‹gajkhun rí natha̱nʼ xúgi̱: Maraxtaa ga̱jma̱a̱ ni̱ndxu̱ʼ náa ku̱ba̱ʼ mitsaan›. Nákha ikhú nimbánuun, ga̱jma̱a̱ mambanúu nda̱wa̱á. Xa̱bu̱ bi̱ kuwa náa xuajen rúʼko̱ nuthi, rí mbiʼi rúʼko̱ nimbánuu ga̱jma̱a̱ mambanúu tsiakii”. Ikha jngó náa Biblia siríaca dí nirígá nákha tsiguʼ 1,600, naʼtájuíi xúgi̱ káʼnii rí niʼthí Jesús: “Gajkhun rí natha̱nʼ xúgi̱ rí maraxtaa ga̱jma̱a̱ ni̱ndxu̱ʼ náa ixi̱ ri̱ʼi̱ Edén”. Gajkhun dí rígi̱ naʼni maʼni a̱jkiu̱lú xúgiáanʼ.

21. Ndíjkha jngó rí tajuixtiyáʼ xa̱bu̱ bi̱ ra̱májánʼ, ga̱jma̱a̱ náa numuu rí nduʼyáá rá.

²¹ Xa̱bu̱ bi̱ ra̱májánʼ buʼko̱ na̱nguá nixtiyáaʼ  mu maʼga̱a̱ mekhuíí. Ikhaa na̱nguá ndiʼyoo rí Jesús niʼnimbánuminaʼ gajmíi̱n apóstol ndrígóo mu maʼtáñajunʼ gajmíi̱n mekhuíí (Luc. 22:29). Ma̱ngaa, na̱nguá nijngúun iyááʼ (Juan 3:3-6, 12). Ikha jngó, nakru̱ʼu̱lú rí Jesús nixtáa raʼthí ga̱jma̱a̱ numuu mbá ku̱ba̱ʼ mitsaan dí marigá náa numbaaʼ. Nguáthá tsiguʼ nda̱wa̱á, apóstol Pablo niʼthí ga̱jma̱a̱ numuu mbá visión rí ndiʼyoo mbáa xa̱bu̱ “bi̱ ni̱jkha̱ kiʼyáa náa paraíso” (2 Cor. 12:1-4). Mú mixtiʼkhu ninindxu̱u̱ náa xa̱bu̱ ra̱májánʼ, Pablo ga̱jma̱a̱ eʼwíínʼ apostól nixtaʼwíin mu magúun mekhuíí ga̱jma̱a̱ mutañajunʼ gajmiún Jesús. Pablo niʼthí ga̱jma̱a̱ numuu mbá “ku̱ba̱ʼ mitsaan” rí marigá nda̱wa̱á. * Lá marigá náa tsu̱du̱u̱ Ku̱ba̱ʼ rá. Lá ma̱ndoo makuwa ikháanʼ ikhí ráʼ.

22, 23. Ndiéjunʼ gaʼndoo guguaʼthi̱i̱n rá.

²² Garmáʼáan a̱jkiu̱lú rí David niʼtáriyaʼ rí maʼga̱nú mbóo mbiʼi rí “xa̱bu̱ bi̱ nuni rí jmbu makuwá kámuu mbiʼi náa tsu̱du̱u̱ ku̱ba̱ʼ” (Sal. 37:29; 2 Ped. 3:13). Nindoo gáʼthi, rí índo̱ xúgínʼ xa̱bu̱ míjínʼ gúnimbu̱ún xtángoo ndrígóo Dios. Náa Isaías 65:22 naʼthí: “Numuu dí xóo mba̱yu̱ʼ rígá mbóo ixi̱ xúʼko̱ má mba̱yu̱ʼ gáxtáa xuajñuʼ”. Rígi̱ eyoo gáthúu̱n rí xa̱bu̱ numbaaʼ makuwá kámuu. Lá gajkhun nindxu̱u̱ rí marigá xúʼko̱ rá. Xúʼko̱, náa Revelación 21:1-4 nasngájma rí nakháñulú ni xarigá itháan náa numbaaʼ nuxi̱ʼ, Dios maʼni tsajkurámiinʼ xa̱bi̱i̱ bi̱ gaguajún jmbu.

²³ Náa Biblia naʼthí kaʼwu, rí ku̱ba̱ʼ mitsaan rí nirígá nákha ginii nindáti̱ga̱, mú maʼni mbu̱júu̱ ku̱ba̱ʼ mitsaan. Dios nikudaminaʼ rí maʼni tsajkurámiinʼ xa̱bu̱ numbaaʼ. David niʼthí rí xábú míjínʼ makuwa náa tsu̱du̱u̱ ku̱ba̱ʼ ma̱ngaa asndu kámuu mbiʼi. Mú, rí niʼtáriyaʼ Isaías naʼni maguáʼthi̱i̱n ga̱jma̱a̱ gagi rí marigá índo̱ gambanúu rí Jesús niʼthún xa̱bu̱ bi̱ ra̱májánʼ. Ikháán ma̱ndoo maraxtaa náa Ku̱ba̱ʼ mitsaan rúʼko̱. Índo̱ gáʼga̱nú mbiʼi rúʼko̱, marigá xóo rí nithi a̱ngiu̱lú bi̱ nikuwa náa asamblea dí nirígá náa Corea: “Mbuʼyamijná náa Ku̱ba̱ʼ mitsaan”.