Náa 2 Corintios 12:2, 3, Pablo niʼthí ga̱jma̱a̱ numuu mbáa xa̱bu̱ “bi̱ ni̱jkha̱ kiʼyáa náa ragajtsú mekhu”. Tsáa eʼthí ga̱jma̱a̱ numuu rá. Náa carta rígi̱, Dios nikujmaa náa inún a̱ngiu̱lú bi̱ kuwa náa corintos, ikhaa niʼthí rí nijmiuu xóo apóstol (2 Cor. 11:5, 23). Ikhú niʼthí ga̱jma̱a̱ numuu ‹visión ga̱jma̱a̱ rí nisngájmuʼ mba̱yo̱o̱ Señor›. Náa ajngáa rígi̱, táʼthi ga̱jma̱a̱ numuu eʼwíínʼ a̱ngiu̱lú. Ikha jngó ma̱ndoo muʼthá rí xa̱bu̱ bi̱ nigruigú vision ga̱jma̱a̱ bi̱ nisngájmuʼ mba̱yo̱o̱, ikhaa má nindxu̱u̱ (2 Cor. 12:1, 5).

Ikha jngó xa̱bu̱ bi̱ “ni̱jkha̱ kiʼyáa” náa “ragajtsú mekhu” ga̱jma̱a̱ náa “Ku̱ba̱ʼ mitsaan” ninindxu̱u̱ Pablo (2 Cor. 12:2-4). Índo̱ nijmuu ajngáa ‹revelación› nindoo gáʼthi rí nigruigú ajngáa rí marigá nda̱wa̱á.

Ndiéjunʼ ninindxu̱u̱ “ragajtsú mekhu” rí Pablo ndiʼyoo rá.

Náa Biblia, ajngáa mekhu mbaʼa xóo eyoo gáʼthúu̱n. Mbáa xkri̱da, nandoo gáʼthúu̱n xóo rí nduʼyáá dí rígá mekhuíí (Gén. 11:4; 27:28; Mat. 6:26). Nguáná, nandoo gáʼthúu̱n Xa̱bu̱ Ñajunʼ bi̱ kuwa náa numbaaʼ (Dan. 4:20-22). Ma̱ngaa nandoo gáʼthu̱u̱n Xa̱bu̱ Ñajunʼ ndrígóo Dios, xóo muʼthá Reino ndrígóo Dios (Rev. 21:1).

Mú, ndiéjunʼ nindoo gáʼthi Pablo ajngáa “ragajtsú mekhu” rá. Nguáná, náa Biblia natanga̱a̱ naʼthí ajtsú nuthu mu maʼthí rí itháan numuu (Is. 6:3; Ezeq. 21:27; Rev. 4:8). Índo̱ Pablo nijmuu ajngáa “ragajtsú mekhu”, nindoo gáʼthi rí nindxu̱u̱ mbáa Xa̱bu̱ Ñajunʼ bi̱ itháan mba̱a̱: Jesucristo gajkuáa ñawúunʼ náa Reino mesiánico gajmíi̱n 144,000 bi̱ kixtaʼwíín mu maʼtáñajunʼ gajmíi̱n. Rígi̱ rí nindoo gaʼthí apóstol Pedro, rí kuaʼti̱i̱n “nuxi̱ʼ mekhu” rí Dios niʼthí (2 Ped. 3:13).

Ndiéjunʼ nindxu̱u̱ “ku̱ba̱ʼ mitsaan” rí niʼthí Pablo rá.

Ajngáa ku̱ba̱ʼ mitsaan mbaʼa rí eyoo gáʼthúu̱n. Timbá, ninindxu̱u̱ náa nixtáá timbá xa̱bu̱, rí nandoo gáʼthúu̱n ku̱ba̱ʼ mitsaan rí marigá náa tsu̱du̱u̱ ku̱ba̱ʼ. Raga̱jma̱, nandoo gáʼthúu̱n rí makuwa tsímáá xa̱bi̱i̱ Dios náa numbaaʼ nuxi̱ʼ. Ga̱jma̱a̱ ragajtsú, “paraíso ndrígóo Dios” nandoo gáʼthúu̱n mitsaan wéñuʼ rí marigá mekhuíí rí naʼthí náa Revelación 2:7 (atayáá náa Bi̱ Nayejngoo 1 ñajunʼ gu̱nʼ julio tsiguʼ 2015, ináa 13, kutriga̱ 8).

Mbáa Pablo nindoo gáʼthi ajtsú enii rígi̱, índo̱ niʼnirámáʼ ndiéjunʼ nigíʼnuu náa 2 Corintios 12:4.

Resumen:

“Ajtsú mekhu” rí naʼthí náa 2 Corintios 12:2 mbáa nindxu̱u̱ Reino mesiánico rí Jesucristo gajkuáa ñawúunʼ gajmíi̱n 144,000, xóo muʼthá, “mekhu nuxi̱ʼ” (2 Ped. 3:13).

Nagumbiʼyuu “ragajtsú mekhu” numuu rí Reino nindxu̱u̱ mbáa Xa̱bu̱ Ñajunʼ bi̱ itháan mba̱a̱.

Mbáa “ku̱ba̱ʼ mitsaan” rí “ni̱jkha̱ kiʼyáa” Pablo náa mbá visión nandoo gáʼthi: 1) Ku̱ba̱ʼ mitsaan rí marigá náa tsu̱du̱u̱ numbaaʼ, 2) tsímáá rí marigá náa xa̱bi̱i̱ Dios ga̱jma̱a̱ marigá kámuu, raʼkháa xóo kuwáanʼ xúgi̱ ga̱jma̱a̱ 3) “paraíso ndrígóo Dios” marigá mekhuíí; xúgíʼ rígi̱ marigá mbóó mbiʼi náa numbaaʼ nuxi̱ʼ.

Ikha jngó, “mekhu nuxi̱ʼ” ga̱jma̱a̱ “ku̱ba̱ʼ nuxi̱ʼ” mani̱ndxu̱u̱ mbóo numbaaʼ nuxi̱ʼ. Xó má xa̱bu̱ numbaaʼ ga̱jma̱a̱ Reino rí marigá mekhuíí mbóó gúʼni ñajunʼ Jeobá.