1-3. a) Ndiéjunʼ nigíʼnuu Evodia ga̱jma̱a̱ Síntique rá. (Atayáá timbá xtiʼkhu.) b) Xú káʼnii gándoo guʼni mu xáguaʼdáá xkujndu gajmiúlú a̱ngiu̱lú rá.

 BI̱ ÑAJUNLÚ cristianos nduʼyáá rí gíʼdoo wéñuʼ numuu Biblia numuu rí nindxu̱u̱ libro ndrígóo Dios. Xtágabu ndrígóo nambáyulúʼ muʼni gaʼduunʼ xkujndu ga̱jma̱a̱ naxprígulú índo̱ nakiéʼkulu. Xú káʼnii eriʼña índo̱ nakhánulú xtágabu rígi̱ rá. Gundxaʼwamíjna̱ rí niguáʼniin a̱jmi̱i̱n a̱ngiu̱lú bi̱ kaxtaʼwíin nákha timbá siglo bi̱ nigumbiʼñún Evodia ga̱jma̱a̱ Síntique. Náa Biblia naʼthí rí niguáʼdáá mbá xkujndu mu tséʼthi náa numuu. Gundxaʼwamíjna̱ rí nirígá.

² Mbáa Evodia niʼthún tikhun a̱ngiu̱lú magún guphiʼtsu náa goʼwóo, mú táʼthúu̱n Síntique maʼga̱. Nda̱wa̱á, índo̱ Síntique niʼdxuun rí a̱ngiu̱lú nithi dí nikuwa tsímáá náa goʼwóo Evodia, nikiʼnáa wéñuʼ. Mbáa nindxa̱ʼwáminaʼ: “Náa numuu rí táʼthunʼ maʼgá náa goʼwóo Evodia. ¡Niku̱mu̱ʼ rí nambáxuxu májánʼ!”. Mbáa Síntique nindxa̱ʼwáminaʼ rí Evodia nakiʼnáa kaʼyoo ga̱jma̱a̱ rí tsíyoo mbaʼyoo. Ikha jngó niʼthún ikhiin  má a̱ngiu̱lú mu magún guphiʼtsu náa goʼwóo mu táʼthúu̱n Evodia. Mbáa xkujndu rígi̱ tánigunʼ eʼwíínʼ a̱ngiu̱lú náa congregación. Náa Biblia naʼthí rí Pablo nixprígún a̱ngiu̱lú ga̱jma̱a̱ niʼthún rí gíʼmaa muni mba̱a̱ a̱jkiu̱ún kuyamíjna̱. Mbáa ikhiin ninimbu̱ún rí niʼthún ga̱jma̱a̱ túniñaʼ runi mbá tsímáá ñajunʼ Jeobá (Filip. 4:2, 3).

³ Rí mbiʼi xúgi̱ mangáanʼ mbáa kuaʼdáá xkujndu gajmiúlú mbáa ndxájulú náa congregación. Mú ma̱ndoo muʼnimbánii ga̱jma̱a̱ muʼni rí xáguáʼdáá xkujndu rúʼko̱. Xú káʼnii gúʼni rá. Rí muʼnimbulúʼ xtángoo rí na̱ʼkha̱ náa Biblia. Índo̱ nuʼnimbulúʼ rígi̱, nusngajmá rí nduʼyamajkuíí libro ndrígóo Dios rí ñajunʼ Biblia (Sal. 27:11).

4, 5. Xú káʼnii xtágabu exná Ajngá rawunʼ Dios mu muñewa̱a̱n rí nakumulú rá.

⁴ Nguáná mingíjyúuʼ eʼni muxpriguíí ku̱ma̱ ndrígúlú. Mbá xkri̱da, mbáa kuwáanʼ gíná wéñuʼ o nakiʼnáanʼ índo̱ mbáa naʼni gawúnlú o naʼniulú dí ra̱májánʼ ga̱jma̱a̱ numuu xóo kuwáanʼ, raza o xóo kaʼniáanʼ. Rígi̱ maʼni gawúnlú wéñuʼ á mu nindxu̱u̱ mbáa bi̱ xtáa náa congregación. Xú káʼnii xtágabu ndrígóo Ajngá rawunʼ Dios ma̱ndoo mambáyulúʼ muraʼníí rígi̱ rá.

⁵ Jeobá ndaʼyoo rí erígá á mu tsíñewa̱a̱n rí nakumulú. Índo̱ nigawúnlú o nakiʼnáanʼ, ma̱ndoo muʼthá o muʼni mbá rí nda̱wa̱á maʼni magáwíinʼ a̱jkiu̱lú. Náa Biblia, Jeobá naxnúlú xtágabu rí guñewa̱a̱n rí nakumulú. Naʼthúlúʼ: “Xáʼchaʼ rí makiʼnán”. Gundxaʼwamíjna̱ náa xúgíʼ xkujndu rí muʼni gaʼduunʼ á mu nuʼnimbánii xtágabu rígi̱ ga̱jma̱a̱ á mu tsegaúnlú mbá nacha̱ (atraxnuu Eclesiastés 7:9 * ga̱jma̱a̱ Proverbios 16:32). * Náa Biblia ma̱ngaa naʼthí rí gíʼmaa muʼni mba̱a̱ a̱jkiu̱lú kuʼñúún eʼwíínʼ. Jesús niʼthí rí á mu tséʼnilú, Jeobá xáʼni mba̱a̱ a̱jkiu̱u̱n kaʼyulú (Mat. 6:14, 15). Lá ndayóoʼ maʼngo̱o̱ itháan a̱jkiu̱lú ga̱jma̱a̱ muʼgíʼ muʼni mba̱a̱ a̱jkiu̱lú ráʼ.

6. Ndiéjunʼ gamíi marigá á mu tsíñewa̱a̱n rí nakumulú rá.

⁶ Á mu tsíñewa̱a̱n rí nakumulú, mbáa makiʼnáanʼ má xúʼko̱ ga̱jma̱a̱ asndu maguiyulúʼ kuʼyáá mbáa. Asndu ma̱ndoo muʼni rí eʼwíínʼ a̱ngiu̱lú náa congregación makumún xúʼko̱ kaʼnii. Mbáa muʼgíʼ murkaʼwu sia̱nʼ rí kuaʼdáálu. Mú nda̱wa̱á eʼwíínʼ mbuyáá ga̱jma̱a̱ mutsíngunʼ náa ikháanʼ (Prov. 26:24-26). Á mu xúʼko̱ gagíʼnulú, bi̱ kuya̱ edxu̱u̱ mugíʼ mumbayúlú ga̱jma̱a̱ Biblia mu xákumulú xúʼko̱ kaʼnii ga̱jma̱a̱ muʼni mba̱a̱ a̱jkiu̱lú kuʼñúún eʼwíínʼ (Lev. 19:17, 18; Rom. 3:11-18). Á mu kuwáanʼ raguáʼnii rígi̱, lá muʼnimbulúʼ xtágabu rí na̱ʼkha̱ náa Biblia ráʼ.

7, 8. a) Xú káʼnii exnúu ikha xuajñu Jeobá rá. b) Xú káʼnii ikha exnúlú Biblia ga̱jma̱a̱ náa numuu gíʼmaa muʼnimbulúʼ rá.

⁷ Rí mbiʼi xúgi̱, Jeobá naxnún ikha ga̱jma̱a̱ naxprígún bi̱ kuwa náa xuajñu rí rígá náa tsu̱du̱u̱ Ku̱ba̱ʼ. Xú káʼnii eʼni rígi̱ xá. Nigíiʼ Cristo mu mbayá “edxu̱u̱ náa congregación” (Efes. 5:23). Ga̱jma̱a̱  Cristo nigíiʼ “ñumba tsi jmbi, tsi majan indxaʼhuaminaʼ” mu maʼsngáa ga̱jma̱a̱ maxnúu ikhaa xuajñuu Dios (Mat. 24:45-47). Numuu rí Biblia nindxu̱u̱ Ajngá rawunʼ Dios, ñumbáá bugi̱ nduyamajkuíí wéñuʼ. Rígi̱ má nini cuerpo gobernante nákha siglo timbá (atraxnuu 1 Tesalonicenses 2:13). * Xú káʼnii nindxu̱u̱ ikha rí naxnúlú Biblia rá.

⁸ Náa Biblia naʼtúlú rí xúniʼñáʼ rajkua náa Guʼwá nagimbáanʼ (Heb. 10:24, 25). Naxkaxáanʼ xúgiáanʼ mu mbóó rí guʼnimbulúʼ (1 Cor. 1:10). Ma̱ngaa naʼthúlúʼ rí muʼgíʼ ginii reino› (Mat. 6:33). Ga̱jma̱a̱ naʼthúlúʼ rí muʼtáraʼa mámbá guʼwá, ga̱jma̱a̱ náa kuwa mbaʼin xa̱bu̱ (Mat. 28:19, 20; Hech. 5:42; 17:17; 20:20). Naxnún ikha bi̱ kuya̱ edxu̱u̱ mu xárígá dí ra̱májánʼ náa congregación (1 Cor. 5:1-5, 13; 1 Tim. 5:19-21). Ga̱jma̱a̱ naʼthúlú rí gíʼmaa maʼni mikaʼwáanʼ ga̱jma̱a̱ muʼni gaʼduunʼ ku̱ma̱ ma̱ngaa rí naguʼwunlú nuʼni rí Jeobá naguiyuʼ kaʼyoo (2 Cor. 7:1).

9. Tsáa ejmiuu Jesús mu mambáyulúʼ makru̱ʼu̱lú Ajngáa rawunʼ Dios ráʼ.

⁹ Tikhun xa̱bu̱ nundxa̱ʼwa̱míjna̱ rí tséʼñúnʼ mutún rí naʼsngáa náa Biblia. Mú asndu nákha tsiguʼ 1919, Jesús najmiuu “ñumba tsi jmbi, tsi majan indxaʼhuaminaʼ” mu mambáñun xa̱bi̱i̱ Dios makru̱ʼu̱u̱n Biblia ga̱jma̱a̱ rí munimbu̱ún. Índo̱ nuʼnimbulúʼ xtágabu ndrígóo Biblia, nuʼni rí congregación maʼni kaʼwu, makuwá mbá jnduʼ ga̱jma̱a̱ tsímáá. Guraximíjna̱: “Lá mani̱ndxu̱ʼ jmbii náa Jesús ga̱jma̱a̱ manimbánuu ikha ndrígóo ñumbáá tsí jmbii ráʼ.”

10. Xú káʼnii esngájma libro ndrígóo Ezequiel xuajñu Jeobá dí rígá mekhuíí rá.

¹⁰ Náa Biblia naʼsngúlú rí xa̱bi̱i̱ bi̱ kuwa mekhuíí mangiin kuwa organizados. Mbá xkri̱da, Ezequiel ndiʼyoo mbá visión náa ndiʼyoo Jeobá náa mbá carro rí nagáyúu nacha̱ wéñuʼ ga̱jma̱a̱ na̱jkha̱ asndu náa má nandoo ikhaa (Ezeq. 1:4-28). Carro rígi̱ nandoo gáʼthúu̱n xuajñu Dios dí rígá mekhuíí. Xuajin rígi̱ xtáa má xúʼko̱ xawii mu maʼnimbánuu rí naʼthí Jeobá. Ga̱jma̱a̱ ma̱ngaa naxnúu ikha xuajñu Dios dí rígá náa tsu̱du̱u̱ Ku̱ba̱ʼ. Gundxaʼwamíjna̱ ga̱jma̱a̱ numuu xúgíʼ rí nixtiʼkhuu náa awúu̱n xuajñu Dios náa gu̱wa̱ʼ tsiguʼ rí ninújngoo. Garmáʼáan a̱jkiu̱lú rí Jeobá naxná ikha náa xuajñu mu mariʼkhuu rúʼko̱. A̱ʼdióo Cristo ga̱jma̱a̱ ángeles inu muni gámbáa numbaaʼ xkawiʼ rígi̱. Xúʼko̱ xúgínʼ mbuyamajkuíí Jeobá, mbiʼyuu ga̱jma̱a̱ rí ikhaa kaʼyoo maʼtáñajunʼ.

11, 12. Ndiéjunʼ rí eʼngo̱o̱ eʼni xuajñu Jeobá náa iwáá mbiʼi rígi̱ rá.

¹¹ Gundxa̱ʼwámi̱jna̱ náa xúgíʼ rí niʼni xuajñu Jeobá náa iwáá mbiʼi rígi̱. Timbá, rí naguma guʼwá. Mbaʼin a̱ngiu̱lú xa̱bekha ga̱jma̱a̱ gu̱ʼu̱ nuñajunʼ wéñuʼ náa naguma guʼwá nuxi̱ʼ náa nuxna ikha bi̱ nutaraʼa numuu Jeobá, náa Warwick (Nueva York, Estados Unidos). Eʼwíínʼ bi̱ nuyambáá kuwa runi Guʼwá náa nagimbáanʼ ga̱jma̱a̱ sucursal náa xúgíʼ numbaaʼ. Ikhiin naxná ikhúún Departamento náa nuriyaʼ awan xóo maguma guʼwá. Lá ragájkhun rí nuxnáa núma̱aʼ  numuu tsiakii rí nuni xúgínʼ a̱ngiu̱lú bugi̱ ráʼ. Nandoo naguma guʼwá rígi̱ ga̱jma̱a̱ numuu mbújkha̱a̱ rí nunimi̱jna̱ muxna xa̱bi̱i̱ Jeobá náa xúgíʼ numbaaʼ. Jeobá naʼni tsajkurámááʼ xuajñu numuu rí nayambáá májánʼ wéñuʼ (Luc. 21:1-4).

¹² Raga̱jma̱, guʼyáá rí niʼngo̱o̱ niguma náa náa najuiʼsngáa. Jeobá naniguʼ maʼsngóo xuajñu (Is. 2:2, 3). Gundxaʼwamíjna̱ ga̱jma̱a̱ numuu escuela rí najmuu mu maʼsngúlú. Kuaʼdáá náa Nawaʼsngúúnʼ itháan bi̱ ñajúnʼ precursor, Náa najuiʼsngúún bi̱ nutaraʼa numuu Reino, Galaad náa nawaʼsngáa, Náa najuiʼsngúún Betelitas Nuxi̱nʼ, náa najuiʼsngúún Superintendentes ndrígóo Circuito gajmiún Guʼñún, náa Najuiʼsngúún bi̱ Kuya̱ edxu̱u̱ náa Congregación, náa Najuiʼsngúún ga̱jma̱a̱ numuu Reino ga̱jma̱a̱ Nawaʼsngúún bi̱ kuya̱ edxu̱u̱ náa Betel gajmiún Guʼñún. Ma̱ngaa kuaʼdáá ináa ndrígúlú náa Internet jw.org, náa ma̱ndoo muxkamaa Biblia ga̱jma̱a̱ i̱ʼwáʼ i̱yi̱i̱ʼ náa mbaʼa ajngáa. Ma̱ngaa náa ináa rígi̱ na̱ʼkha̱ rí mambáñun e̱ji̱n, bi̱ kuwa mbá guʼwíin ga̱jma̱a̱ náa na̱ʼkha̱ noticias. Lá kuwáanʼ rajmulú  ináa ndrígóo Internet jw.org índo̱ nuʼtáraʼa ga̱jma̱a̱ índo̱ nuʼnigajmaa mbá guʼwáanʼ ráʼ.

13. Ndiéjunʼ rí eyóoʼ muʼni bi̱ ni̱ndxu̱lú xa̱bi̱i̱ Jeobá rá.

¹³ Ra̱ʼkhá tháán májánʼ rí makuwáanʼ náa xuajñu Jeobá ga̱jma̱a̱ rí mbuʼyáá káʼnii eyoo muʼni. Numuu rí nduʼyáá rí naniguʼ, gíʼmáanʼ muʼnimbulúʼ ga̱jma̱a̱ muʼni rí májánʼ. Mbaʼin xa̱bu̱ nanigu̱nʼ muni dí raʼkhí. Mú ikháanʼ gíʼmáanʼ maguiyulúʼ kuʼyáá dí ra̱májánʼ, xó má Jeobá naguiyuʼ kaʼyoo (Sal. 97:10). Ragíʼmaa manindxu̱lúʼ xóo bi̱ nundxa̱ʼwa̱míjna̱ “dí ra̱májánʼ nindxu̱u̱ májánʼ” (Is. 5:20). Nandulúʼ muʼni rí naniguʼ Jeobá. Ikha jngó nandulúʼ makuwáanʼ mikaʼwu ikháanʼ ga̱jma̱a̱ rí nundxa̱ʼwáá edxu̱lúʼ ma̱ngaa rí xóo nambáxulúʼ gajmiúlú Dios (1 Cor. 6:9-11). Nduʼyáá rí Jeobá naʼthúlúʼ náa Biblia mu mambáyulúʼ ikháanʼ. Ma̱ngaa, nandulúʼ kuʼyáá Jeobá ga̱jma̱a̱ nandulúʼ muguajún jmbu náa ikhaa. Ikha jngó nuʼnimbulúʼ xtángoo náa guʼwúlú, náa congregación, náa ñajunʼ, náa guʼwá nusngáa o i̱mba̱ níʼkhá (Prov. 15:3). Guʼyáá tikhu náa mbaʼyóoʼ muguajún jmbu náa Jeobá.

14. Xú káʼnii gándoo gusngajma xa̱bu̱ bi̱ guáʼdiin e̱jñún rí ni̱ndxu̱ún jmbiin náa Jeobá rá.

¹⁴ Índo̱ nuxprigún e̱ji̱n. Náa Biblia, Jeobá naʼthúún xa̱bu̱ xóo gíʼmaa muxprigún e̱jñún. Xa̱bu̱ bi̱ guáʼdiin e̱ji̱n nusngajma rí ni̱ndxu̱ún jmbiin náa Jeobá índo̱ nunimbu̱ún. Ikhiin gíʼmaa muñewa̱a̱n rí xundxa̱ʼwa̱míjna̱ xóo xa̱bu̱ bi̱ kuwa náa numbaaʼ rígi̱ (Efes. 2:2). Mbá xkri̱da, náa tikhu xuajen tikhun xa̱bekha nuthi rí guʼñún gíʼmaa muxprigún e̱jñún. Mú náa Biblia naʼthí kaʼwu rí xa̱biya̱ gíʼmaa maʼsngóo a̱ʼdióo ga̱jma̱a̱ numuu Jeobá (Efes. 6:4). Xa̱bekha ga̱jma̱a̱ gu̱ʼu̱ bi̱ nandún kuyáá Jeobá nandún rí e̱jñún mambaxúún májánʼ gajmiún ikhaa, xó má Samuel niʼni asndu nákha chíʼgíʼ (1 Sam. 3:19).

15. Xú káʼnii esngajmáá Jeobá rí ni̱ndxu̱lú jmbii índo̱ guraʼwíí mbá rí gíʼdoo numuu muʼni rá.

¹⁵ Índo̱ gúraʼwíí rí muʼni. Índo̱ gúraʼwíí mbá rí gíʼdoo wéñuʼ numuu muʼni, gíʼmaa mbuʼyáá rí endxa̱ʼwáminaʼ Jeobá. Xú káʼnii rá. Mbuʼyáaʼ ikha rí naxná náa Biblia ga̱jma̱a̱ náa xuajñu. Xúʼko̱ nusngajmáá Jeobá rí ni̱ndxu̱lú jmbii náa ikha. Mbá xkri̱da, tikhun xa̱bu̱ bi̱ nagún guñajunʼ náa i̱ʼwáʼ xuajen mba̱ʼu̱ ga̱jma̱a̱ guáʼdiin e̱jñún ikhí, mú nuxuʼmiin e̱jñún bi̱ ndiʼkhún nigumiin náa phú xuajñún mu munimbanuu a̱ngiu̱ún. Xúʼko̱ anu̱ún ma̱ndoo muñajunʼ ikhí. Mú rígi̱ kaʼyoo maraʼwíí mámbáa. Mú bi̱ guáʼdiin e̱ji̱n gíʼmaa muraximíjna̱ xóo eʼyoo Jeobá rí gúraʼwíí muni (atraxnuu Romanos 14:12). * Garmáʼáan a̱jkiu̱lú rí nákha xóó tsíraʼwíí muʼni rí gíʼdoo numuu ga̱jma̱a̱  numuu bi̱ kuwa náa guʼwúlú ma̱ngaa numuu ñajunʼ, gíʼmaa mundxaʼwamíjna̱ rí naʼthí náa Biblia. Ndayóoʼ rí Anu̱lú bi̱ xtáa mekhuíí mambáyulúʼ muraʼwíí rí muʼni (Jer. 10:23).

16. Ndiéjunʼ rí niraʼwíí maʼni mbáa a̱ʼgu̱ índo̱ nigumaa a̱ʼdióo rá. Ndiéjunʼ nimbáyúu mu maraʼwíí maʼni rí májánʼ xá.

¹⁶ Xa̱bu̱ gajmii nigún gakuwa i̱mba̱ níʼkhá ga̱jma̱a̱ ikhí niguáʼdáá mbáa ada̱. Nithi muxuʼmaa aʼdiún mu maʼga̱ gáxtáa gajmíi̱n xiʼñúuʼ náa xuajñún. Mú ikhú, a̱ʼgu̱ nigíʼdu̱u̱ niʼnigajmaa Biblia ga̱jma̱a̱ mbáa xa̱bi̱i̱ Jeobá (Sal. 127:3; Prov. 22:6). Ikha jngó ndiyóoʼ maraʼwíí á mu makuʼmaa ada̱ gajmíi̱n xiʼñúuʼ o na̱nguá. Xó má eʼthí náa Biblia, a̱ʼgú niʼthá kháñuu Jeobá rí mambáyúu maraʼwíí maʼni rí májánʼ (Sal. 62:7, 8). Ma̱ngaa niʼthúu̱n xkujndu ndrígóo ndxájulú bi̱ naʼsngóo ga̱jma̱a̱ eʼwíínʼ a̱ngiu̱lú náa congregación. A̱ngui̱i̱n ga̱jma̱a̱ bi̱ nambáxu̱u̱ gajmíi̱n nutháán má xúʼko̱ rí gakuʼmáa ada̱ náa xiʼñúnʼ. Mú ikhaa nikro̱ʼo̱o̱ dí ra̱májánʼ nindxu̱u̱ rúʼko̱. Ajmbio̱o̱ ndaʼyoo rí a̱ngiu̱lú numbayíí a̱ʼgiu̱u̱ ga̱jma̱a̱ a̱ʼdióo. Rígi̱ niʼniuʼ tsiánguá ga̱jma̱a̱ nigíʼdu̱u̱ niʼnigajmaa Biblia ma̱ngaa ni̱jkha̱ náa guʼwá nagimbáanʼ gajmíi̱n bi̱ kuwa náa goʼwóo. Ra̱ʼkhá tháán gagi nixtáa a̱ʼgu̱ bugi̱ índo̱ ndiʼyoo rí Jeobá niriʼña̱a̱ rí niʼtájkáan.

17. Xú káʼnii ikhaa mbaʼyóoʼ mbuʼyáá índo̱ nuʼsngáa ga̱jma̱a̱ numuu Biblia rá.

¹⁷ Índo̱ nundrígú ikha. Mbáa rí xóo ma̱ndoo musngajmá rí ni̱ndxu̱lú jmbii náa Dios nindxu̱u̱ rí muʼnimbulúʼ ikha rí nundrígú náa xuajñu Dios. Mbá xkri̱da, gundxaʼwamíjna̱ rí gíʼmaa muʼni nda̱wa̱á rí nigíʼdi̱i̱ niʼsngáá xa̱bu̱ ga̱jma̱a̱ libro Dí naʼsngáa náa Biblia. Nijuiʼthúlú rí gíʼmaa muríyaʼ nguáthá minutos índo̱ gámbulúʼ ruʼsngáa mu mumbayíí maninuʼ itháan májánʼ xuajñu Jeobá. Ma̱ndoo mumbáñuun ga̱jma̱a̱ video Káʼnii erígá náa guʼwá nagimbáanʼ rá. Ga̱jma̱a̱ folleto Tsíin lá eni rí nandoo Jeobá rí mbiʼi xúgi̱ rá. Najuiʼtúlú rí índo̱ gámbulúʼ ruʼnigajmaa libro Dí naʼsngáa náa Biblia muʼnigajmaa gajmiúlú libro “Guni rí Dios ma̱ndoo kaʼyala”, maski ajndu nijngún má iyááʼ. Xúʼko̱ mumbáñún ‹muguaʼdáá itháan fe› (Col. 2:7). Lá nuʼnimbulúʼ ikha rígi̱ rí naxnúlú xuajñu Jeobá ráʼ.

18, 19. Náa numuu rí gíʼmaa muxnáa núma̱aʼ Jeobá rá.

¹⁸ Rígá mbaʼa numuu rí ndayóoʼ muxnáa núma̱aʼ Jeobá. Timbá, “ga̱jma̱a̱ numuu ikhaa nduʼyáálú, nuʼbañimijna ga̱jma̱a̱ kuwáanʼlu” (Hech. 17:27, 28). Raga̱jma̱, numuu rí ikhaa nixnúlú libro ndrígóo rí ñajunʼ Biblia. Xó má cristianos náa xuajen Tesalónica, mangáanʼ nduʼyamajkuíí regalo rígi̱ numuu rí nindxu̱u̱ “ajngá rawunʼ Dios” (1 Tes. 2:13).

¹⁹ Ragajtsú, gíʼmaa muxnáa núma̱aʼ Jeobá numuu rí naʼsngúlú náa Biblia xú káʼnii gambáxulúʼ gajmiúlú (Sant. 4:8). Ga̱jma̱a̱ rí maʼni a̱jkhu̱, gíʼmaa muxnáa núma̱aʼ rí naniñulú makuwáanʼ náa xuajñu. Nakumulú xóo bi̱ niʼnirámáʼ Salmo 136, bi̱ niʼthí: “Guxna̱a̱ núma̱aʼ Jeobá numuu rí ikhaa nindxu̱u̱ májánʼ: Numuu rí nandoo kaʼyulú kámuu mbiʼi” (Sal. 136:1). Náa mámbá versículo ndrígóo salmo natanga̱a̱ naʼthí “numuu rí nandoo kaʼyulú kámuu mbiʼi”. Á mu naguáju̱n jmbu náa Jeobá ga̱jma̱a̱ nuʼnimbánii ikha rí naxná xuajñu, ikhaa ma̱ndoo kaʼyulú asndu kámuu mbiʼi.