ATATSAʼWÁMINAʼ rí nadxuʼ kruigaʼ náa mbá kamba̱a̱ mikína wéñuʼ. Maski ajndu niʼni má mba̱yu̱ʼ rí nirámáʼ A̱jkha̱ʼ, ikháánʼ na̱nguá míñaʼ numuu rí jchá mbá lámpara rí nambiʼi májánʼ. Índo̱ naskámariga mbayííʼ nakujmaa dí rígá náa nadxuʼ. Ga̱jma̱a̱ índo̱ nataskámaa náa nadxuʼ agiuʼ nambiʼiti̱ga̱ mitsínguánʼ náa kamba̱a̱.

Xúʼkhíin má nindxu̱u̱ Biblia xóo lámpara rúʼko̱. Xó má ndiʼyáá náa artículo ginii Ajngá rawunʼ Dios nambáyulúʼ muraʼníí rí wíji̱ náa inulú, xkujndu rí narígá tsejtsí mbiʼi rí xúgiáanʼ nuraʼníí náa numbaaʼ rígi̱. Mú nayambáá itháan xóó. Ma̱ngaa mambiʼiti̱ga̱ mu mbuʼyáá xú káʼnii gakuwáanʼ nda̱wa̱á, numuu rí nambáyulúʼ mu mu̱ʼgua̱ ruʼyáá náa kamba̱a̱ rí maʼni makuwáanʼ tsímáá kámuu mbiʼi ga̱jma̱a̱ nambáyulúʼ mu mu̱ʼgua̱ ikhí (Salmo 119:105). Xú káʼnii eʼni rá.

Guʼyáá a̱jma̱ enii rí xú káʼnii Biblia nayambáá mu makuwáanʼ itháan májánʼ: 1 Naʼni rí vida ndrígúlú magiʼdoo numuu ga̱jma̱a̱ 2 naʼsngúlú mambaxúlúʼ kámuu gajmiúlú bi̱ Niʼniáanʼ.

Náa Biblia naxnúlú májánʼ xtágabu rí mambáyulúʼ muraʼníí xkujndu rí gáʼkha̱, mu nindxu̱u̱ itháan májánʼ ki xóo i̱ʼwáʼ libro rí káaʼ nayambáá. Naʼsngúlú rí xundxaʼwamíjna̱ indó rí naʼni maxmiéjunʼlú, ma̱ngaa náa maxmiéjunʼlú kuʼñúún eʼwíínʼ. Á mu nuʼni xúʼko̱ maguáʼnu mbuʼyáá rí vida ndrígúlú gíʼdoo numuu.

Atatsaʼwáminaʼ ga̱jma̱a̱ numuu ikha rígi̱ rí na̱ʼkha̱ náa Biblia: “Ihua gagui xta tsi naxna raʼka xo ri majana” (Hechos 20:35). Lá nitambáyii mbá miʼtsú mbáa bi̱ nda̱a̱ mbújkha̱a̱ eʼni xáʼ. O nitadxawíín mbáa bi̱ nambáxaʼ ga̱jma̱ʼ bi̱ nitambáyii ga̱jma̱a̱ numuu gamiéjunʼ rí gíʼdoo xáʼ. Lá ragájkhun rí nidxaaʼ numuu rí nitambáyii mbáa xa̱bu̱ ráʼ.

Kuwáanʼ itháan gagi índo̱ nuxná rí kuaʼdáá ga̱jma̱a̱ na̱nguá kuaʼti̱i̱n mundrígúu. Mbáa bi̱ naʼnirámáʼ naʼthí: “Á mu nuxná ga̱jma̱a̱ na̱nguá guáʼthi̱i̱n rí  mundrígúu. Ikhú makhánulú itháan rí guʼnilú Mú índo̱ nuʼnimi̱jna̱ mu mumbáñuun eʼwíínʼ, mú itháan bi̱ nda̱a̱ rí guáʼdáá rí muxnaʼlú, rígá mbá rí nakánulúʼ. Na̱jkuánu nakuwáanʼ náa mbá rí gíʼdoo itháan numuu. Kuwáanʼ ruñajunʼ mbóó gajmiúlú bi̱ Niʼniáanʼ, numuu rí ikhaa ndaʼyoo rí gíʼmaa náa ikháanʼ numuu rí májánʼ a̱jkiu̱lú (Proverbios 19:17). Dios nangajo̱o̱ wéñuʼ rí nuʼni ga̱jma̱a̱ numún bi̱ numíniiʼ ga̱jma̱a̱ naʼthí rí maʼni numaaʼ rí makuwáanʼ kámuu mbiʼi náa tsu̱du̱u̱ Ku̱ba̱ʼ mitsaan. ¡Ra̱ʼkhá tháán májánʼ rí kuaʼti̱i̱n! (Salmo 37:29; Lucas 14:12-14). *

Mú náa Biblia naʼsngúlú rí ma̱ndoo muʼni rí vida ndrígúlú magiʼdoo numuu gíʼmaa mbuʼyamajkuíí mbáwíi Jeobá Dios bi̱ gajkhun. Ajngá rawunʼ naxnúlú tsiakii mu muʼni mba̱a̱, mbuʼyamajkuíí ga̱jma̱a̱ muʼnimbulúʼ xó má ikhaa kaʼyoo magruigú (Eclesiastés 12:13; Revelación 4:11). Índo̱ nuʼni, nakhánulú mbá rí májánʼ wéñuʼ: Nuʼni gaʼdxíí bi̱ Niʼniáanʼ. Ikhaa na̱ndu̱ʼu̱lú muʼni rígi̱: “A̱ʼdióoʼ, gani̱ndxa̱ʼ mbáa xa̱bu̱ bi̱ ndaʼyoo, atani rí maxtáa gagi a̱jkiu̱nʼ” (Proverbios 27:11). Lá nitatsaʼwáminaʼ mbá miʼtsú xóo rígi̱ ráʼ. Índo̱ nuraʼwíí mbá rí májánʼ muʼni xó má e̱ʼkha̱ raʼthí náa Biblia, nuʼni maxtáa gagi Anu̱lú bi̱ xtáa mekhuíí. Náa numuu rá. Numuu rí ikhaa naxmiéjunʼ kaʼyulú ga̱jma̱a̱ nandoo mu̱ʼgua̱ kidxuuʼ ikhaa ndrígóo mu makuwáanʼ májánʼ (Isaías 48:17, 18). Náa imbo̱o̱ rí maʼni magiʼdoo numuu náa vida ndrígúlú ki xóo rí mbuʼyamajkuíí bi̱ kaʼyoo maʼtáñajunʼ ga̱jma̱a̱ rí muʼni gaʼdxíí a̱jkiu̱u̱n.

Náa Biblia ma̱ngaa naʼsngúlú xú káʼnii ma̱ndoo mambaxúlúʼ gajmiúlú bi̱ Niʼniáanʼ. Mbá xkri̱da, naʼthí: “Guxu̱ʼmámíjná náa Dios ga̱jma̱a̱ ikhaa makuʼmaminaʼ náa ikháanʼ” (Santiago 4:8). Mbáa maʼniulú mingíjyúuʼ muʼnimbulúʼ rí ma̱ndoo mambaxúlúʼ gajmiúlú bi̱ Niʼniáanʼ bi̱ gíʼdoo xúgíʼ tsiakii. Mú náa Biblia naʼthúlúʼ rí á mu nduʼyááʼ Dios muxkamaa, numuu rí “ratsinguaʼ xta naʼ mbamba tsi ikanlo” (Hechos 17:27). Rí muʼni xó má eʼthí consejo ndrígóo Biblia rí mambaxúlúʼ gajmiúlú Dios nindxu̱u̱ mbá rí mambáyulúʼ muʼniratamijná náa rí marigá nda̱wa̱á. Náa numuu rá.

Atatsaʼwáminaʼ ga̱jma̱a̱ numuu rígi̱: Maski ajndu ra̱ʼkhá tháán eʼnimi̱jna̱, xáʼngo̱o̱ gákáwáanʼ náa bi̱ gíʼdáanʼ sia̱nʼ, ikhaa má rí nakháñulú (1 Corintios 15:26). Mú, Dios xtáa kámuu mbiʼi. Ikhaa nditháan xákhañuu ga̱jma̱a̱ nandoo rí bi̱ nambáxu̱u̱ gajmíi̱n mangiin makuwá kámuu. Jeobá naʼthí rí eyoo maʼni ga̱jma̱a̱ numún bi̱ nduyááʼ ga̱jma̱a̱ ajngáa mitsaan rígi̱: “Gaxtáa mbá kámuu a̱jkia̱la” (Salmo 22:26).

Ga̱jma̱a̱ xú káʼnii ikháánʼ gándoo mambaxáʼ kámuu ga̱jma̱ʼ Dios rá. Gajmañaaʼ má xúʼko̱ ga̱jma̱a̱ numuu náa Ajngá rawunʼ rí nindxu̱u̱ Biblia (Juan 17:3; 2 Timoteo 3:16). Atanda̱ʼa̱a̱ rí mambáyaʼ mu makruaʼaʼ. Náa Biblia naʼsngúlú rí á mu nunda̱ʼa̱a̱ má xúʼko̱ ku̱ma̱ ndrígóo Dios ga̱jma̱a̱ xúgíʼ a̱jkiu̱lú ikhaa maxnúlúʼ * (Santiago 1:5). Nda̱wa̱á kayuʼ, ataniminaʼ matanimbánii rí ejmañaʼ; xúʼko̱ Ajngá rawunʼ Dios mani̱ndxu̱u̱ “mbóo lámpara” rí nambiʼiti̱ga̱ náa nadxuʼ xúgi̱ ga̱jma̱a̱ “mbóo aguʼ” rí nambiʼiti̱ga̱ kámuu mbiʼi (Salmo 119:105).