ATATSAʼWÁMINAʼ rí ni̱dxu̱ʼ gáta̱ya̱a̱ museo o guʼwá náa naxtagixi̱i̱ rí nirígá wajyúúʼ. Xúgíʼ tima iñúʼ ga̱jma̱a̱ niguuʼ. Tikhuu ndayóoʼ xíʼtóo mba̱a̱. Mú rígá mbá rí kañiʼ. Rí xóo kiʼni nakujmaa xúgíʼ. Ikháánʼ natraxi̱i̱ bi̱ na̱jkha̱ kañán: “Lá itháan nuxi̱ʼ ki xóo i̱ʼwáʼ ráʼ.” “Na̱nguá, nindxu̱u̱ rí itháan wayuu ga̱jma̱a̱ nimbá miʼtsú taguma̱a̱”, eriʼña̱a̱ ikhaa. Ikhú natraxi̱ ikháánʼ: “Lá nixtagixi̱i̱ májánʼ jngóo ráʼ.” Xa̱bu̱ nariʼña̱a̱: “Na̱nguá, rígi̱ nindxu̱u̱ rí niʼngo̱o̱ náa giñánʼ mbiiʼ ga̱jma̱a̱ náa ruʼwa, ga̱jma̱a̱ xa̱bu̱ nindúún muni gámbáa”. Mbáa ikhú ikháánʼ natatsaʼwáminaʼ: “Mú, ndiéjunʼ lá niguma ga̱jma̱a̱ rá.”

Xúʼko̱ má nindxu̱u̱ Biblia. Nindxu̱u̱ mbá libro rí niʼni má rígá, itháan ki xóo i̱ʼwáʼ. Gajkhun má dí rígá i̱ʼwáʼ rí niguma wajyúúʼ, mú ikháá má xóo guádááʼ náa guʼwá náa naxtagixi̱i̱ rí nirígá wajyúúʼ rí niguuʼ, mbaʼa rí ikhaa ni̱jkha̱ raguámbáa índo̱ ninújngoo tsiguʼ. Mbá xkri̱da, rí nithi científicos nákha ginii, ní raʼkháa ikháá xúgi̱ numuu dí rígá ku̱ma̱ nuxi̱ʼ rí nasngájma rí gajkhun nindxu̱u̱. Consejos ndrígóo thana xóo itháan migamíi ki xóo rí mambáyaʼ. Ga̱jma̱a̱ mbaʼa rí nigumaraʼmáʼ nákha ginii i̱ndó naguanúu nguáthá xíʼtóo, numuu rí tikhuu nindáti̱ga̱a̱ o nichúu wéñuʼ.

Biblia, nindxu̱u̱ mixtiʼkhu wéñuʼ. Gíʼdoo itháan rí 3,500 tsiguʼ rí niguma, mú nda̱a̱ rí nigíʼnuu. Ga̱jma̱a̱, maski ajndu niraʼnuu má xúʼko̱ xkujndu mba̱yu̱ʼ tsiguʼ, nikha̱a̱, túniñanʼ rí muraxnuu ga̱jma̱a̱ nitha numáá wéñuʼ, rí naʼthí niʼngo̱o̱ nikríyaʼ. Táguanúu wayuu maski ajndu rígá wéñuʼ ku̱ma̱ nuxi̱ʼ, náa Biblia nasngájma rí asndu nákha ginii ndaʼyoo rí marigá nda̱wa̱á (atayáá kúgumaʼá “Lá nánguá ejmaa o xóó najmaa dxe̱ʼ”).

Maski ajndu xúʼko̱, mbáa ikháánʼ natraximínáʼ: “Lá gajkhun xóó nayambáá consejos ndrígóo Biblia ráʼ.” Mu ma̱ta̱ya̱a̱ rí naxtiʼña̱a̱, atatsaʼwáminaʼ ga̱jma̱a̱ numuu xkujndu gakhi̱i̱ rí kuwa ruraʼníí xa̱bu̱ numbaaʼ. Xú káʼnii nindxu̱u̱ rí itháan migamíi rá. Mbáa ikháánʼ natatsaʼwáminaʼ ga̱jma̱a̱ numuu guerra, rí najnííʼ wéñuʼ gúní, rí nuradímíjná xa̱bu̱ o rí nuni kuʼwáʼ. Rí xúgi̱ atayáá tikhuu kiʼsngáa rí na̱ʼkha̱ náa Biblia ga̱jma̱a̱ atraximínaʼ: “Lá marigá rí májánʼ náa numbaaʼ rígi̱ á mu xúgiáanʼ guʼnimbánii rí májánʼ ráʼ.”

RÍ MANIGULÚʼ WÉÑUʼ RÍ TSÍMÁÁ

“Juhua gagui xabo tsi tsinigun xkujndu, numu ri ikin magu mbiʼñu ‹ijin Dios›” (Mateo 5:9). “Á mu nandoo, xó má kaʼnii munila, xákiʼnáanʼ gajmiála xúgínʼ xa̱bu̱” (Romanos 12:18).

RÍ MAGÁWÍINʼ A̱JKIU̱LÚ GA̱JMA̱A̱ RÍ MUʼNI MBA̱A̱ A̱JKIU̱LÚ

“Juhua gagui xabo tsi nañahuin akuin-juñu iʼhuin, numu ri xuʼkue mañahuin akuin Dios-jaʼñu manguin” (Mateo 5:7). “Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱ á mu mbáa naxiéʼkhá ga̱jma̱a̱ numuu imba̱a̱. Xó má Jeobá * niʼni mba̱a̱ a̱jkiu̱u̱n kaʼyalá má xúʼko̱, xúʼko̱ má gúni mangáanʼ” (Colosenses 3:13).

RÍ MAKUWÁANʼ MBÁA KAMBÁXULÚ

Dios “niʼnii mbáwíi xa̱bu̱ rí maruiʼti̱i̱n mbá xúgínʼ xa̱bu̱ mu makuwá náa xúgíʼ tsu̱du̱u̱ ku̱ba̱ʼ” (Hechos 17:26). “Tsi’ne huajin xabo Dios, ri asjndo na numba ri mbaʼo juhua tsi namiñu-juya Dios, jame nuni ri jmbu, tsuʼkue tsi nagruigun Dios” (Hechos 10:34, 35).

MBUʼYAMAJKUÍÍ KU̱BA̱ʼ NÁA KUWÁANʼ

“Jeobá Dios nigíwanʼ xa̱biya̱ náa ixi̱ ri̱ʼi̱ Edén mu maʼdu ga̱jma̱a̱ mañewu̱u̱n” (Génesis 2:15). Dios maʼni “gámbíin bi̱ nuni gámbáa ku̱ba̱ʼ” (Revelación [Apocalipsis] 11:18).

XÁʼNDULÚ MUGUAʼDÁÁ WÉÑUʼ GA̱JMA̱A̱ RÍ MUXUʼDÁMÍJNÁ AʼKHÁ

“Guyala, guñahuamijnala, maxaniguaʼ güeñaʼla ri maguaʼda-güiñiʼla ri riga. Raʼka numu ri guiʼdo güeño xabo ikajngo guiʼdo ri ndaʼya gajma” (Lucas 12:15). “Ni má xa̱bu̱ bi̱ nubúnʼ gajmiún bi̱ xóo tsediin ma̱ngaa xúgíʼ dí mitsaga wéñuʼ, o rí maʼndala maguaʼdáá wéñuʼ, asndu nditháan xútha rúʼko̱, guni xó má kaʼyoo maʼni mbáa xa̱bu̱ kaʼwii” (Efesios 5:3).

MUʼTHÁ RÍ GAJKHUN GA̱JMA̱A̱ GUÑAJUNʼ GAKHI̱I̱

“Nanduxu mutaxu rí gajkhun o munixu rí jmbu náa xúgíʼ” (Hebreos 13:18). “Bi̱ naʼni kúwáʼ, ní xáʼni kúwáʼ itháan, rí phú gíʼmaa maʼni, rí mañajunʼ wéñuʼ” (Efesios 4:28).

GUMBÁÑUUN BI̱ NDA̱ÑÚNʼ

“Guthu̱u̱n ajngáa rí maxnún tsiakii bi̱ kuwa gíná, gumbáñuun bi̱ gua̱bi̱nʼ, gaʼngo̱o̱ a̱jkia̱la ku̱ñu̱u̱n xúgínʼ” (1 Tesalonicenses 5:14). Gíʼmáanʼ muñewu̱u̱n “e̱ji̱n xuáʼa̱ ga̱jma̱a̱ gu̱ʼú xuáʼa̱ índo̱ kúwi̱i̱n rumíniʼ” (Santiago 1:27).

Náa Biblia raʼkháa i̱ndó na̱ʼkha̱ raʼthúlú ndiéjunʼ rí gíʼmaa muʼni, ma̱ngaa naʼsngúlú mangajulú ga̱jma̱a̱ muʼgíʼ muʼni náa vida ndrígúlú. Á mu itháan xa̱bu̱ gúni rí májánʼ náa vida ndrígu̱ún, lá raʼkháa ma̱ngaa mayambáá náa xkujndu rí itháan mba̱ʼu̱ rí naraʼnuu xa̱bu̱  numbaaʼ ráʼ. Gajkhun má rí consejos rí na̱ʼkha̱ náa Biblia nayambáá itháan xúgi̱. Mú, ndiéjunʼ gáʼni Biblia ga̱jma̱a̱ numaaʼ rá.

Xa̱bu̱ bi̱ itháan najmañuu náa xúgíʼ numbaaʼ niʼthí: “Mú Dios ndaʼyoo rí á mu nuʼni rí jmbu, manindxu̱lúʼ xa̱bu̱ májáánʼ” (Mateo 11:19). Lá ragájkhun rí á mu nandaʼ ma̱ta̱ya̱a̱ á mu mbá consejo nindxu̱u̱ májánʼ o na̱nguá ndayóoʼ matanimbánii mu ma̱ta̱ya̱a̱ káʼnii gárígá ráʼ. Ikha jngó ikháánʼ matraximínaʼ: “Á mu Biblia gajkhun nayambáá, lá xambayuuʼ consejos náa vida ndrígóʼ ráʼ. Lá gajkhun ma̱ndoo mambayuuʼ náa xkujndu rí gúʼdoo xúgi̱ ráʼ.” Guʼyáá mbá xkri̱da.

Diana * gíʼdoo wéñuʼ ñajunʼ, xtáa tsímáá ga̱jma̱a̱ xtáa májánʼ, mú mbá nacha̱ niriʼkhuu xúgíʼ. Mbaʼa tsingíná niraʼnuu: Wáxioo nikháñuu, niniñamijna̱a̱ ikhaa ga̱jma̱a̱ ajmbio̱o̱ ga̱jma̱a̱ nda̱a̱ mbújkha̱a̱. Ikhaa naʼthí: “Nánguá e̱yo̱o̱ tsáa ni̱ndxu̱ʼ. Ní nda̱wa̱a̱ wáxioʼ, ni má ajmbioʼ ga̱jma̱a̱ nda̱a̱ goʼwóoʼ. Nánguá e̱yo̱o̱ tsáa ni̱ndxu̱ʼ, nándáa tsiakii ga̱jma̱a̱ nándáa rí gúʼthu̱u̱n”.

Ikhú Diana nikro̱ʼo̱o̱ májánʼ ajngáa rígi̱: “Rí makuwáanʼ nindxu̱u̱ 70 tsiguʼ, ga̱jma̱a̱ á mu mbáa gíʼdoo wéñuʼ tsiakii maxtáa mbá 80 tsiguʼ. Mú nuraʼníí gamiéjunʼ ga̱jma̱a̱ gaʼkhu, ga̱jma̱a̱ nacha̱ enújngoo xúgíʼ ga̱jma̱a̱ ní ndawáanʼ” (Salmo 90:10).

 Diana niʼnigajmaa náa Biblia mu maʼngo̱o̱ maraʼnuu xúgíʼ xkujndu rúʼko̱, ga̱jma̱a̱ nimbáyúu wéñuʼ. Xó má gúʼyáá náa ajtsú artículos rí na̱ʼkha̱, mbaʼin xa̱bu̱ nduyáá rí munimbánii consejos rí na̱ʼkha̱ náa Biblia mu munimbánii xkujndu náa vida ndrígu̱ún, ga̱jma̱a̱ ninindxu̱u̱ mbá rí májánʼ rí niraʼwíí muni. Niguánu ndiyáá rí Biblia nindxu̱u̱ xóo rí nigixi̱i̱ náa museo rí niʼthá ga̱jma̱a̱ numuu náa artículo rígi̱. Tsímbriguii ga̱jma̱a̱ nimbá libro rí índo̱ nanújngoo tsiguʼ nánguá ejmaa. Lá, numuu rí Biblia nindxu̱u̱ mbá libro mixtiʼkhu ráʼ. Lá gajkhun rí bi̱ niʼni Biblia nindxu̱u̱ Dios, raʼkhíin xa̱bu̱ ráʼ. (1 Tesalonicenses 2:13.)

Mbáa ikháánʼ mangáán natatsaʼwáminaʼ rí nakuwáanʼ mbá nguáthá mbiʼi ga̱jma̱a̱ rígá wéñuʼ xkujndu. Tsáa tayááʼ mu maʼni̱i̱ a̱jkia̱nʼ, mambáyaʼ ga̱jma̱a̱ maxnáʼ consejo índo̱ naʼni maʼni néʼngaʼ xkujndu rá.

Guʼyáá ajtsú enii rí xú káʼnii Biblia mambáyaʼ wéñuʼ náa vida ndrígáʼ. Ma̱ndoo maʼsngááʼ:

1. Matani gaʼduunʼ xkujndu índo̱ nandoo.

2. Matanimbánii xkujndu índo̱ narígá.

3. Mataʼgíʼ matraʼníí xúgíʼ rí xándoo matriʼkhu̱u̱.

Náa i̱ʼwáʼ artículo gúʼyáá ajtsú enii rígi̱.