Rosi naʼthí: “Naʼni maxmiéjunʼ tikhuu xkujndu numuu rí tséníñúʼ randxaʼwamínaʼ ga̱jma̱a̱ nandxaʼwamínáʼ rí maʼni itháan gakhi̱i̱”. Káʼnii texto ndrígóo Biblia nimbáyúu xá. Mbá rí ikhaa nindxu̱u̱ Mateo 6:34: “Ikajngo maxuxnamijna-güeñaʼla gaʼko gajma numu mbiʼi ri gatsi manga. Mbajndi-ma gaʼko ri jaya mbamba mbiʼi”. Rosi naʼthí rí ajngáa ndrígóo Jesús nimbáyúu mu ní xaxmiéjunʼ dí marigá i̱mba̱ néjtsuu. Ga̱jma̱a̱ xóó naʼthí: “Gúʼdoo má wéñuʼ xkujndu mu maxmiéjunʼ ga̱jma̱a̱ numuu mbá rí xóó tárígá ga̱jma̱a̱ mbáa nditháan xáʼga̱nú marigá”.

Yasmín ma̱ngaa nikumu̱u̱ rí nánguá eʼngo̱o̱ gátsiji rí naxmiéjunʼ. Ikhaa naʼthí: “Nambiyaʼ xúgíʼ xmáná ga̱jma̱a̱ nguáná tsíyóóʼ gígú. Ku̱ma̱ dí ra̱májánʼ naʼni rí xáxtáá gagi”. Xú káʼnii versículo ndrígóo Biblia nimbáyúu xá. Ikhaa naʼthí rí nimbáyúu 1 Pedro 5:7, náa naʼthí: “Gutha̱a̱n xúgíʼ Dios rí naxmiéjuanla, numuu rí ikhaa naxmiéjunʼ jaʼyala”. Yasmín xóó naʼthí: “Nitakáñuu má xúʼko̱ Jeobá ga̱jma̱a̱ nda̱wa̱á ikhaa niriʼña̱a̱ rí nitajkháan. Niku̱mu̱ʼ rí nirígúu mbá rí mikiwu̱n wéñuʼ náa tsu̱du̱ʼ. Nguáná xóó nandxa̱ʼwa̱mínáʼ dí ra̱májánʼ, mú xúgi̱ nda̱yo̱o̱ xóo mani”.

Mbáa a̱ʼgu̱ bi̱ mbiʼyuu Isabella naʼthí: “Mbáa rí maniʼñúʼ xúgíʼ mu mani nda̱wa̱á nani numuu rí xúʼko̱ má eʼni anu̱ʼ ma̱ngaa. Nguáná naniʼñúʼ rí gíʼdoo itháan numuu mu mba̱yo̱o̱ televisión o mu mba̱ya̱a̱ xu̱ʼ. Raʼkhí nindxu̱u̱ rúʼko̱ numuu rí nda̱wa̱á naʼni maxmiéjuanʼ itháan ga̱jma̱a̱ tsegájnuu májánʼ rí natani”. Mbá ikha ndrígóo Biblia rí nimbáyúu wéñuʼ nindxu̱u̱ 2 Timoteo 2:15, náa naʼthí: “Atani asndu xó má eʼngaʼ mu matasnga̱jmá rí natani ñajunʼ Dios, bi̱ nañajunʼ májánʼ ga̱jma̱a̱ bi̱ nda̱a̱ mbá numuu mu matiyuʼ”. Isabella naʼthí: “Táʼndoʼ rí Jeobá matiyuʼ ga̱jma̱a̱ numuu ñajunʼ ndrígóʼ numuu rí niníñúʼ xúgíʼ mu mani asndu nda̱wa̱á kayuʼ”.

Ma̱ngaa, Kelly naʼthí: “Índo̱ gúʼdoo mbá ñajunʼ maxnáxi̱i̱, naniʼñúʼ mu mani asndu nda̱wa̱á. Ikhú naʼgúnʼ nambiyaʼ, nánguá egú májánʼ ga̱jma̱a̱ naxmiéjunʼ wéñuʼ. Tambáyuʼ rúʼko̱”. Consejo ndrígóo Proverbios 13:16 nimbáyúu wéñuʼ: “Rí naʼni xa̱bu̱ bi̱ gíiʼ a̱jkiu̱u̱n naʼni ga̱jma̱a̱ ku̱ma̱. Mú bi̱ skágunʼ nasngájma rí skágunʼ nindxu̱u̱”. Ikhaa naʼthí rí nijmañuu índo̱ nindxa̱ʼwáminaʼ náa versículo rígi̱: “Májánʼ nindxu̱u̱ muríyaʼ awan asndu nákha wapháá. Rí xúgi̱ gúʼdoo mbá cuaderno náa escritorio mu maríyaʼ májánʼ awan rí mani. Rígi̱ nambáyuʼ mu mba̱yo̱o̱ káʼnii gáni mámbá mbiʼi ga̱jma̱a̱ rí xániñuʼ xúgíʼ mu mani nda̱wa̱á kayuʼ”.

“Ajmbioʼ niniñuʼ gajmíi̱nʼ a̱jkhui̱i̱n e̱ji̱nʼ majkhinʼ”, eʼthí Cristina. Ndiéjunʼ ikha ndrígóo Biblia nimbáyúu xá. Proverbios 17:17 naʼthí: “Mbáa bi̱ gajkhun nambáxa̱ʼ ga̱jma̱ʼ ma̱ndoo kaʼyaʼ xúgíʼ mbiʼi, ga̱jma̱a̱ nindxu̱u̱ xóo mbáa ndxájuaʼ bi̱ nigumaa mu mambáyaʼ índo̱ narígá gamiéjunʼ”. Ikhaa ndiyáaʼ rí xa̱bi̱i̱ Dios mumbayíí. “Bi̱ nambáxuʼ gajmíi̱nʼ niguwáʼ mu mumbayúʼ. Tikhun nidégun ganitsu ga̱jma̱a̱ ri̱ʼi̱. Ajtsú nuthu rí ndiyóoʼ muriʼkhui̱i̱ náa kuwáanʼxu, mbaʼin bi̱ nimbáxuʼ gajmíi̱nʼ nimbayúʼ gajmíi̱nʼ e̱ji̱nʼ. Ma̱ngaa mbáa rí ikhiin ndiyáaʼ mbá ñajunʼ mani. Bi̱ nimbáxuʼ gajmíi̱nʼ nikuwa ga̱jma̱á ni̱ndxu̱ʼ”.

Diana, bi̱ niʼthá ga̱jma̱a̱ numuu nákha ginii, ma̱ngaa nixtáa mbáwíi. Ikhaa narmáʼáan a̱jkiu̱u̱n xú káʼnii nikumu̱u̱ nda̱wa̱á rí nigíʼnuu mbaʼa gamiéjunʼ: “Ninindxu̱u̱ asndu xóo mbá película ga̱jma̱a̱ ikhúúnʼ i̱ndó xtáá ra̱yo̱o̱. Niku̱mu̱ʼ rí xtáá mbáwun”. Mbá texto ndrígóo Biblia rí nimbáyúu nindxu̱u̱ Salmo 68:6: “Dios naxnún náa makuwá bi̱ ndajkuíin”. Diana naʼthí: “Nda̱yo̱o̱ rí versículo rúʼko̱ tsíyoo gáʼthúu̱n dí raʼkháa i̱ndó Dios naxnúlú mbá guʼwá náa makuwáanʼ. Nikroʼoʼ rí Dios nixnúlú náa makuwáanʼ rí na̱ʼkha̱ náa ikhaa, náa rí ma̱ndoo makuwáanʼ májánʼ, ga̱jma̱a̱ mbá kambáxulú gajmiúlú bi̱ nandún kuyáá Jeobá. Mú nda̱yo̱o̱ rí á mu ma̱ndoo maxtáá mijngii náa eʼwíínʼ ginii mbaʼyóoʼ maxtáá mijngii náa Dios. Ikha jngó Salmo 37:4 nimbáyuʼ mba̱yo̱o̱ rúʼko̱. Ikhí naʼthí: ‹Atayááʼ rí maʼdxuu a̱jkia̱nʼ náa Jeobá, ga̱jma̱a̱ ikhaa maxnáʼ rí nandoo a̱jkia̱nʼ›”.

Diana niguámbóo raʼthí: “Ni̱jkhánú ndi̱yo̱o̱ rí ndayóoʼ makuʼmáminaʼ itháan náa Jeobá. Nda̱wa̱a̱ imba̱a̱ bi̱ itháan májánʼ ki xóo ikhaa. Nini mbá lista rí ma̱ndoo mani gajmíi̱nʼ mbá grupo xa̱bu̱ mu mambaxúʼ gajmíi̱nʼ bi̱ nundxa̱ʼwa̱míjna̱ ikháá xó má ikhúúnʼ. Nijmañuʼ mba̱yo̱o̱ rí májánʼ rí eni eʼwíínʼ ga̱jma̱a̱ xáyóo rí nakiéʼkhun”.

Gajkhun má rí bi̱ nuni ñajunʼ Dios mangiin ni̱ndxu̱ún xa̱bu̱ aʼkhá. Xa̱bi̱i̱ Jeobá guáʼdáá ikháá má xkujndu xóo rí guáʼdáá eʼwíínʼ xa̱bu̱, mú, bi̱ nugíʼ nuni rí naʼsngáa náa Biblia nunimíjna̱ mu mumbañún eʼwíínʼ índo̱ nandoo. Rí mambaxúlúʼ gajmiúlú bi̱ xúʼko̱ kaʼnii, nindxu̱u̱ májánʼ wéñuʼ. Mú, lá ma̱ndoo mambáyulúʼ ikha ndrígóo Biblia mu maʼngulú muraʼníí xkujndu rí na̱nguá xú káʼnii mambanúu rí mbiʼi xúgi̱, xóo mbá nandii rí nda̱a̱ thanuu o rí índo̱ nakháñuu mbáa bi̱ kuʼyáá ráʼ.