Diana, bi̱ niʼthá ga̱jma̱a̱ numuu náa artículo ginii, nikumu̱u̱ rí gamiéjunʼ ni̱jkha̱ kayáa mu maga̱a̱n itháan iya najnga̱a̱. Náa Biblia tséʼthi dí ra̱májánʼ nindxu̱u̱ rí muʼwa̱a̱n má chíʼgíʼ iya najnga̱a̱, mú naʼthí: “Xadxuʼnú maraxtaa gajmiáanʼ bi̱ naʼwa̱a̱n wéñuʼ vino” (Proverbios 23:20). Rí migi̱i̱n wéñuʼ iya najnga̱a̱ naʼni rí maraʼdáá nandii gakhii, xa̱bu̱ gajmii naguáʼdáá xkujndu o nuniñami̱jna̱, ga̱jma̱a̱ mbaʼin e̱ji̱n nakháñun nákha xóó tséjkha̱nú mbiʼi magumii. Á mu xa̱bu̱ nunimbánii consejos ndrígóo Biblia, ma̱ndoo munigaʼduunʼ mbaʼa dí ra̱májánʼ.

Ikhaa rúʼko̱ niʼni Diana, bi̱ naʼthí xúgi̱: “Ni̱jkhánú ndi̱yo̱o̱ rí iya najnga̱a̱ tséʼnimbánuu gamiéjunʼ rí gúʼdoo. Niʼgíʼ ninimbánuu consejo rí naʼthí náa Filipenses 4:6, 7: ‹Xaxmiéjuanʼla ga̱jma̱a̱ numuu nimbá, [...] gunda̱ʼa̱a̱ Dios xúgíʼ rí eyála›. Xúgíʼ mbruʼun, índo̱ na̱ʼkha̱ mbaʼa rí nandxa̱ʼwa̱mínáʼ, natakáñuu Jeobá ga̱jma̱a̱ na̱thu̱u̱n xú káʼnii ku̱mu̱ʼ: Rí nakásngañuʼ, rí naʼni gawúunʼ, rí nánguá eʼngoʼ... ga̱jma̱a̱ na̱ndo̱ʼo̱o̱ rí mambáyuʼ mu mandxa̱ʼwa̱mínáʼ májánʼ. Imbo̱o̱ mbiʼi, nani xó má eʼngoʼ mu ní xándxa̱ʼwo̱o̱ edxu̱ʼ dí ra̱májánʼ. Rí matakháñuu Jeobá nambáyuʼ mu mandxa̱ʼwa̱mínáʼ rí gúʼdoo raʼkháa dí ragúʼdoo. Nitha rí ní xága̱nʼ iya najnga̱a̱ numuu rí nangajoʼ tsímáá rí nixkamaa ga̱jma̱a̱ nánguá nindoʼ manimbáti̱ga̱”.

Rígá tikhuu rí naʼni gawúnlú ga̱jma̱a̱ rí mumíniiʼ xóo rí muʼbúlú gajmiúlú mbáa. Mú, ikha rí na̱ʼkha̱ náa Biblia ma̱ndoo mambáyulúʼ mu muʼni gaʼduunʼ xúgíʼ rí naʼni gawúnlú, numuu rí ikhí naʼthí ga̱jma̱a̱ numuu rí matasnga̱jmá rí nanigia̱ʼ mbáa o ga̱jma̱a̱ numuu náa timii xa̱bu̱ bi̱ nda̱a̱ xtíñún. Mbáa xa̱bu̱ bi̱ mbiʼyuu Samuel naʼthí: “Rí matasnga̱jmá rí nanigia̱ʼ xtayáá mbáa na̱nguá mingíjyúuʼ... Nguáná tsinigiuʼ ka̱yo̱o̱ xa̱bu̱, mú nda̱yo̱o̱ rí ikhaa naniguʼ kaʼyoʼ, ga̱jma̱a̱ rúʼko̱ eʼni rí manigu̱ʼ mani rúʼko̱”. Nda̱wa̱á, numuu rí nutháán má xúʼko̱ rí ikhaa nasngájma rí nanigiuʼ eʼwíínʼ, maski ajndu ikhaa na̱nguá nikumu̱u̱ xúʼko̱, Samuel nindoo maʼni gajunʼ mú ku̱ma̱ ndrígóo naʼni gawúunʼ. Rí xúgi̱ naʼthí: “Rí matasnga̱jmá rí nanigia̱ʼ mbáa nindxu̱u̱ ra̱májánʼ, naʼni rí matatsaʼwamínáʼ i̱ndó ga̱jma̱a̱ numaʼ”.

Samuel niguxnuu mbá i̱yi̱i̱ʼ rí naʼthí ga̱jma̱a̱ numún jiáma náa Internet jw.org. Ma̱ngaa nindxa̱ʼwáminaʼ rí naʼthí náa Proverbios 20:11, náa naʼthí: “Asndu dxámá najmaʼniiʼ ga̱jma̱a̱ xóo rí naʼni, á mu naʼni rí kaʼwu ga̱jma̱a̱ rí jmbu”. Xú káʼnii nimbáyúu consejo rígi̱ xá. Samuel ni̱jkha̱nú ndiʼyoo rí matasnga̱jmá rí nanigiaʼ mbáa na̱nguá nindxu̱u̱ jmbu ga̱jma̱a̱ na̱nguá nindxu̱u̱ májánʼ. Ikhaa naʼthí xóó: “Nijmañuʼ rí bi̱ naʼni xúʼko̱ xánindxu̱u̱ mbáa májánʼ xa̱biya̱. Nindxa̱ʼwa̱mínáʼ rí gákumu̱u̱ a̱ʼgu̱ bi̱ gáyáa á mu ndaʼyoo rí nasngajmá rí nanigiuʼ ka̱yo̱o̱ imba̱a̱ a̱ʼgu̱. Rúʼko̱ niʼni mba̱yo̱o̱ dí ra̱májánʼ nindxu̱u̱ rígi̱. Rí matasnga̱jmá rí nanigiaʼ mbáa tséʼni rí mani̱ndxu̱u̱ májánʼ”. Samuel niriʼkuminaʼ, ga̱jma̱a̱ rúʼko̱ nimbáyúu mu xájpatríguíi náa rí mabóoʼ ga̱jma̱a̱ mbáa.

Migamíi wéñuʼ ninindxu̱u̱ vida ndrígóo Antonio: Naniguʼ wéñuʼ mbaʼyoo náa timii xa̱bu̱ bi̱ nda̱a̱ xtíñún. Maski asndu nandoo kaʼyoo wéñuʼ a̱ʼgiu̱u̱, najpátriguíi má xúʼko̱ náa tsáʼkhá rúʼko̱. Ni̱jkha̱nú ndiʼyoo rí nimbáyúu wéñuʼ ikha rí naʼthí náa 1 Pedro 5:8: “Gajmañala mundxaʼwáá májánʼ edxa̱la, gakuwáanʼ xawii. Gixa̱a̱ bi̱ sia̱nʼ gajmiála, jngruigo̱o̱ mbájndi xóo i̱ndi̱i̱ʼ bi̱ nandxaʼwá, bi̱ nda̱yáaʼ mikhu̱u̱ mbáa”. Antonio naʼthí: “Kuwáanʼ náa rígá wéñuʼ xtiʼkhu náa timii xa̱bu̱ bi̱ nda̱a̱ xtíñún, rígi̱ ma̱ndoo maguanúu náa edxu̱lúʼ. Versículo rúʼko̱ nimbáyuʼ mu mba̱yo̱o̱ náa nikumu̱u̱ tsáʼkhá rúʼko̱. Ndiyóoʼ maʼngo̱ʼ mani rí edxu̱ʼ mandxaʼwáminaʼ ga̱jma̱a̱ numuu bi̱ xkawiiʼ bi̱ niʼni ku̱ma̱a̱ rígi̱ índo̱ gáʼkhá edxu̱ʼ xtiʼkhu rí tsaga. Rí xúgi̱ nda̱yo̱o̱ rí i̱ndó Jeobá ma̱ndoo mambáyuʼ mu mandxa̱ʼwa̱mínáʼ májánʼ ga̱jma̱a̱ maxtáá xawii mu mañewu̱u̱n edxu̱ʼ, a̱jkiu̱nʼ ga̱jma̱a̱ mañewu̱nʼ ikhúúnʼ ga̱jmu̱ʼ a̱ʼgiu̱ʼ”. Antonio nixtambáyii índo̱ ndiyóoʼ ga̱jma̱a̱ nda̱wa̱á niʼngo̱o̱ niniñuʼ dí ra̱májánʼ rúʼko̱. Núma̱aʼ má rúʼko̱, niʼngo̱o̱ niraʼnuu xkujndu rí itháan mba̱a̱.

Nakujmaa kaʼwu rí náa Biblia na̱ʼkha̱ consejos rí nayambáá mu munigaʼduunʼ xkujndu rí gakhi̱i̱. Mú á mu xkujndu naʼni itháan gakhi̱i̱ ga̱jma̱a̱ tséʼyáá xú káʼnii guʼnimbánii rá. Guʼyáá xú káʼnii Ajngá rawunʼ Dios ma̱ndoo mambáyulúʼ muʼnimbánii rúʼko̱.