TIKHUN NUTHI RÍ NA̱NGUÁ. Mbáa médico niʼthí rí majmulúʼ Biblia mu mbuʼyáaʼ ikha nindxu̱u̱ xóo majmulúʼ mbá libro dí nirígá tsiguʼ 1920 mu miʼsngáa ga̱jma̱a̱ numuu Química. Xa̱bu̱ bi̱ na̱nguá eʼnimbo̱o̱ mbáa asndu maraxaʼ á mu ikháánʼ majmaʼ i̱yi̱i̱ʼ rí na̱ʼkha̱ raʼthí xóo ejmaa computadora rí nánguá ejmaa mu ma̱ta̱ya̱a̱ xú káʼnii gájma̱ʼ imbo̱o̱ rí nuxi̱ʼ. Xóo muʼthá, tikhun nundxa̱ʼwa̱míjna̱ rí Biblia nánguá ejmaa mbá kayuʼ.

Tsáa gándoo majmuu mbá ikha rí nirígá nákha wajyúúʼ xúgi̱ dí rígá mbaʼa rí nuxi̱ʼ ga̱jma̱a̱ tecnología rá. Numuu rí xúgi̱ rígá mbaʼa ináa ndrígóo Internet ga̱jma̱a̱ blogs náa naxnáraʼa wéñuʼ consejos ga̱jma̱a̱ naʼtháanʼ xóo matani. Ma̱ngaa rígá programas náa naguma graxe̱ náa kuwa psicólogos bi̱ najmañún wéñuʼ, ga̱jma̱a̱ bi̱ nuniraʼmáʼ i̱yi̱i̱ʼ. Ga̱jma̱a̱ náa naguma libro nurawíi mbaʼa i̱yi̱i̱ʼ rí mambáyaʼ mu ma̱ta̱ya̱a̱ xóo matani, rí naʼni magiʼdoo itháan mbújkha̱a̱ empresa.

Ga̱jma̱a̱ xúgíʼ ku̱ma̱ dí rígá xúgi̱, náa numuu gándoo ma̱ta̱ya̱a̱ Biblia, mbá libro rí nigumaraʼmáʼ itháan maʼni a̱jma̱ mil tsiguʼ rá. Lá gajkhun rí nuthi xa̱bu̱ bi̱ tsénimbu̱ún índo̱ nuthi rí Biblia nindxu̱u̱ xóo mbá libro ndrígóo Química rí nánguá ejmaa o mbá i̱yi̱i̱ʼ rí naʼtháanʼ xóo majmaʼ computadora rí nánguá ejmaa ráʼ. Rí gajkhun, tsembánii rígi̱. Ciencia ga̱jma̱a̱ tecnología naxtiʼkhuu nacha̱ wéñuʼ, mú lá naxtiʼkhuu xóo kuwa xa̱bu̱ ráʼ. Xa̱bu̱ nandún makuwa itháan gagi, makuwá májánʼ ga̱jma̱a̱ marigá mbá numuu náa vida ndrígu̱ún, makuwa mbá jnduʼ mbá guʼwíin ga̱jma̱a̱ maguaʼdíin bi̱ mambaxúún májánʼ gajmiún.

Maski ajndu niʼníí má rígá, Biblia naʼthí ga̱jma̱a̱ numuu rí ndayúlú ga̱jma̱a̱ i̱ʼwáʼ. Ma̱ngaa naʼthí rí ni̱ʼkha̱ náa bi̱ Niʼniáanʼ. Naxná mbaʼa consejo náa xúgíʼ rí nuʼni náa vida ndrígúlú ga̱jma̱a̱ naʼniratáanʼ mu muraʼníí xkujndu rí gíʼdoo numuu (2 Timoteo 3:16, 17). Ma̱ngaa naʼthí rí consejos ndrígóo mayambáá kámuu, ga̱jma̱a̱ nditháan xándáti̱ga̱a̱. Náa Biblia má naʼthí: “Ajngá rawunʼ Dios ndaʼya” (Hebreos 4:12).

Lá gajkhun nindxu̱u̱ rúʼko̱ ráʼ. Lá nánguá ejmaa Biblia, o nindxu̱u̱ mbá libro rí nayambáá wéñuʼ, xóo muʼthá, mbá libro rí ndaʼya ráʼ. Número rígi̱ ndrígóo Bi̱ Nayejngoo na̱ʼkha̱ mbaʼa números kiejunʼ, mu mambáyaʼ mataxkamaa rí naxtiʼña̱a̱ náa graxe̱ rúʼko̱.