Maski ajndu Biblia na̱nguá nindxu̱u̱ mbóoʼ libro dí na̱ʼkha̱ raʼthí ga̱jma̱a̱ numuu thana, mu naxnúlú májánʼ consejo dí ma̱ndoo mambáñún bi̱ guaʼdáá mbá nandii náa ngáñúúʼ. Atayáá tikhu xkri̱da.

“Xa̱bu̱ bi̱ tséʼniún nandii tséñúúnʼ má xa̱bu̱ bi̱ naʼni thana, mú bi̱ naʼniún nandii, nda̱ñúúnʼ” (MATEO 9:12).

Náa Biblia naʼthí dí nguáná ndayóoʼ mbuʼyáaʼ mbá xa̱bu̱ bi̱ nakro̱ʼo̱o̱ mu maʼni thanulú. Mbaʼin xa̱bu̱ bi̱ guaʼdáá nandii náa ngáñúúʼ naʼni̱i̱ a̱jkiu̱ún índo̱ nduyáá ndiéjunʼ xkujndu guaʼdáá ga̱jma̱a̱ nagún náa mbáa xa̱bu̱ bi̱ nakro̱ʼo̱o̱ ga̱jma̱a̱ numuu nandii dí guaʼdáá.

“Rí matani̱ ejercicio nambáyaaʼ maraxtaa májánʼ” (1 TIMOTEO 4:8, Traducción en lenguaje actual).

Gajmulú mbiʼi ndrígúlú ga̱jma̱a̱ tsiaki̱i̱ dí kuaʼdáá mu makuwáanʼlu májánʼ, rígi̱ gámbáyulú mu maʼngulú muʼni gajmiúlú nandii dí kuaʼdáá náa edxu̱lúʼ. Tikhu dí ikha nindxu̱u̱ dí muʼni ejercicio xúgííʼ mbiʼi, mu̱ʼphu̱ ganitsu dí mambáyúlú ga̱jma̱a̱ munuʼ májánʼ.

“Mbáa bi̱ nadxuu a̱jkiu̱u̱n nindxu̱u̱ mbá thana dí májánʼ, mú índo̱ mbáa xtáa ngíná nándáa tsiakii”. (PROVERBIOS 17:22).

Dí muraxnuu versículo ndrígóo Biblia dí naxnúlú tsiaki̱i̱ ga̱jma̱a̱ mambáyúlú muraʼwíí muʼni dí májmááʼ makuwáanʼlu gagi. Á mu nundxaʼwamíjna̱ má  xúʼko̱ dí májánʼ, mbáa rígi̱ gámbáyulú mu maʼngulú muʼni gajmiúlú dí naʼni mundxaʼwáá edxu̱lúʼ.

‹Guaʼdáá ku̱ma̱ xa̱bu̱ bi̱ nu̱ni̱ wabamijná› (PROVERBIOS 11:2).

Mbáa nda̱yáaʼ dí eʼwíinʼ mumbayáaʼ mu matani tikhu ñajunʼ, ikha jngóo atatsiñááʼ dí mumbayáaʼ. Mbáa bi̱ natambajxáaʼ gajmiáanʼ ga̱jma̱a̱ bi̱ xtañún nandún mumbayáaʼ, mú tséyáá xóo gándoo gúmbáyáaʼ. Arathún mbájmbu ndiéjuunʼ eyáaʼ, gakrua̱ʼa̱a̱ʼ xtañún ga̱jma̱a̱ xámbumaaʼ maraxníin núma̱aʼ dí gúni ga̱jma̱á nindxa̱a̱ʼ.

“Ni̱jkhánú ndi̱yo̱o̱ dí na̱nguá xtáá májánʼ ikha jngóo ndiyóoʼ maʼgá náa médico. Ikhí doctora niʼthún ndiéjunʼ gúʼdoʼ rúʼko̱ nimbáyúʼ mba̱yo̱o̱ ndíjkha dí xúʼko̱ egíʼnuʼ. Ma̱ngaa niʼthún ndiéjunʼ thana ndayóoʼ maniminaʼ” (Nicole, a bi̱ ndayóoʼ maʼniminaʼ ga̱jma̱a̱ xóo ku̱mu̱u̱ náa ajngáa xtílóo najmaʼnuuʼ xóo trastorno bipolar).

“Dí maguxnuu Biblia ga̱jmu̱ʼ a̱ʼgiu̱ʼ xúgííʼ mbiʼi nambáyuʼ wéñuuʼ, rígi̱ naʼni dí mámbá miʼcha̱ mandxaʼwáminaʼ dí májánʼ ga̱jma̱a̱ magíʼdu̱u̱ mañajunʼ tsímáá. Nijkhánú ndi̱yo̱o̱ dí índo̱ naxtáá ngíná naxkamaa má xúʼko̱ mbá versículo dí na̱jkha̱nú asndu náa a̱jkiu̱nʼ” (Peter, bi̱ naxmiéjuunʼ wéñuuʼ náa ajngáa xtílóo najmaʼnuuʼ xóo depresión).

“Nákha ginii nati̱yu̱ʼ gáthu̱u̱n eʼwíinʼ nandii rí gúʼdoo. Mú nixtáa mbáa bi̱ nimbaxúʼ gajmúʼ bi̱ nikro̱ʼo̱o̱ kaʼyoʼ, ra̱ʼkhá tháán májáanʼ xa̱bu̱ nindxu̱u̱, rúʼko̱ nimbáyúʼ maʼni̱i̱ a̱jkiu̱nʼ dí nánguá niku̱mu̱ʼ rí xtáá mbáwún” (Ji-yoo, bi̱ tsíyóo gakuiʼtsu náa ajngáa xtílóo najmaʼnuuʼ xóo trastorno alimentario).

“Núma̱a̱ ma ga̱jma̱a̱ numuu Biblia nimbáyúʼ mu awa̱án gañajunʼ ga̱jma̱a̱ mbaya xu̱ʼ. Consejo dí kagu̱ ikhí nimbáyúʼ mu manimbánuu xkujndu dí gúʼdoʼ” (Timothy, bi̱ gíʼdoo nandii dí naxmiéjunʼ wéñuʼ ma̱ngaa ga̱jma̱a̱ numuu rí nandxa̱ʼwa̱mínáʼ wéñuʼ náa ajngáa xtílóo najmaʼnuuʼ xóo trastorno obsesivo-compulsivo).