Xúniʼñáʼ ruʼyáá rí gíʼdoo itháan numuu
“Mu xa̱bu̱ mbuyáá rí ikháánʼ mbiʼyaʼ Jeobá, i̱ndó ikháánʼ ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ” (SAL. 83:18).
AJMÚÚ 46 GA̱JMA̱A̱ 136
1, 2. a) Ndiéjunʼ xkujndu eraʼníí xúgínʼ xa̱bu̱ rá. b) Ndíjkha jngó gíʼdoo numuu makru̱ʼu̱lú májánʼ rígi̱ rá.
MBAʼIN xa̱bu̱ nduyáá rí mbújkha̱a̱ gíʼdoo itháan numuu. Ikha jngó nuni xó má eʼngu̱u̱n mu muguaʼdáá itháan o rí xúnimbáti̱ga̱ rí guáʼdáá. Mú eʼwíínʼ nduyáá rí itháan gíʼdoo numuu familia, rí xándoo káñun o rí naʼngu̱u̱n nuni.
2 Mú rígá rí itháan gíʼdoo numuu ki xóo rígi̱ ga̱jma̱a̱ dí ragíʼmaa mambumulú: Rí makujmaa rí Jeobá kaʼyoo maʼtáñajunʼ. Á mu tsíñeumíjna, ma̱ndoo maʼni rí xákuwáanʼ xawii ga̱jma̱a̱ rí nuʼni mámbá mbiʼi o maxmiéjunʼlú ga̱jma̱a̱ xkujndu ndrígúlú asndu mbuʼyáá dí ragíʼdoo numuu rígi̱. Mú á mu nakru̱ʼu̱lú itháan rí gíʼdoo numuu rí majmaʼniʼ Jeobá xóo mbáa Xa̱bu̱ Ñajunʼ, makuwáanʼ itháan xawii mu muraʼníí xkujndu dí narígá mámbá mbiʼi ga̱jma̱a̱ mambaxúlúʼ itháan gajmiúlú ikhaa.
NDÍJKHA JNGÓ GÍʼDOO WÉÑUʼ NUMUU RÁ.
3. Ndiéjunʼ niʼni makujmaa Satanás ga̱jma̱a̱ numuu rí Dios naʼtáñajunʼ rá.
3 Satanás niʼni makujmaa rí Jeobá rakáʼyoo maʼtáñajunʼ. Naʼthí rí tséʼtañajunʼ jmbu, tsíyoo rí makuwáanʼ májánʼ ikháanʼ ga̱jma̱a̱ rí xa̱bu̱ makuwa itháan májánʼ á mu nutañajumijná ikhiin (Gén. 3:1-5). Ma̱ngaa niʼni makujmaa rí nimbáa xa̱bu̱ numbaaʼ nindxu̱u̱ jmbii asndu xúgíʼ a̱jkiu̱u̱n náa Dios, rí á mu naguma gíníi xa̱bu̱ nimbáa xándoo rí ikhaa maʼtáñajunʼ (Job 2:4, 5). Ikha jngó, Jeobá naniñuʼ manújngoo mbiʼi mu makujmaa kaʼwu rígi̱: Rí xáʼndulú rí ikhaa maʼtáñajunlú muraʼníí mba̱a̱ gaʼkhu.
4. Náa numuu ndayóoʼ makujmaa tsáa kaʼyoo maʼtáñajunʼ rá.
4 Jeobá ndaʼyoo rí niʼthí Satanás nindxu̱u̱ minduwaʼ. Mú náa numuu rí Dios tséʼnimbánuu xkujndu rígi̱ ga̱jma̱a̱ naniñuʼ makujmaa á mu gajkhun o minduwaʼ rá. Rí gáxti̱ʼña̱a̱ kaʼñúún mbuyáá ángeles ga̱jma̱a̱ xa̱bu̱ numbaaʼ (atraxnuu Salmo 83:18). * Mbaʼin xa̱bu̱ táʼnduun rí Jeobá maʼtáñajunʼ, xó má nini timbíi̱n xa̱bu̱. Rígi̱ maʼni rí tikhun makumún rí Gixa̱a̱ naʼthí rí gajkhun. Á mu ángeles ga̱jma̱a̱ xa̱bu̱ xóó tséyáá kaʼwu rígi̱, marigá xkujndu náa xuajen mba̱ʼu̱, razas, xuajen ma̱jkha̱ʼ, familias ga̱jma̱a̱ xa̱bu̱. Mú nda̱wa̱á rí gákujmaa rí Jeobá kaʼyoo maʼtáñajunʼ, xúgiáanʼ makuwáanʼ kámuu ga̱jma̱a̱ ikhaa maʼtáñajunlú ma̱ngaa náa xúgíʼ numbaaʼ marigá rí tsímáá (Efes. 1:9, 10).
5. Ndiéjunʼ gándoo musngájma ikháanʼ rá.
5 Makujmaa rí Dios naʼtáñajunʼ jmbu ga̱jma̱a̱ tséjmaa rí xú eʼtáñajunʼ Satanás ga̱jma̱a̱ xa̱bu̱, ga̱jma̱a̱ rí maguma gámbáa. Maʼngo̱o̱ mada̱ʼ Xa̱bu̱ Ñajunʼ ndrígóo Dios ga̱jma̱a̱ numuu Reino mesiánico bi̱ ikhaa má nigíʼ. Xa̱bu̱ numbaaʼ bi̱ ni̱ndxu̱ún jmbiin musngajma rí xa̱bu̱ ma̱ndoo muyambáá mu Dios maʼtáñajunʼ (Is. 45:23, 24). Lá nandulúʼ makuwáanʼ mangáanʼ náa xa̱bu̱ bugi̱ ráʼ. Xúʼko̱ kaʼnii. Mu ma̱ndoo maʼni rígi̱, gíʼmaa marmáʼáan a̱jkiu̱lú ga̱jma̱a̱ makru̱ʼu̱lú rí gíʼdoo wéñuʼ numuu xkujndu rígi̱.
RÍ ITHÁAN GÍʼDOO NUMUU KI XÓO RÍ MAGUMA KÁWÁANʼ
6. Lá gíʼdoo numuu mbuʼyáá rí Jeobá kaʼyoo maʼtáñajunʼ ráʼ.
6 Xó má niʼthá, gíʼdoo wéñuʼ numuu náa xa̱bu̱ rí makujmaa rí Jeobá kaʼyoo maʼtáñajunʼ. Itháan gíʼdoo numuu ki xóo rí makuwáanʼ tsímáá ikháanʼ. Lá ragíʼdoo numuu rí maguma káwáanʼ ikháanʼ o rí Jeobá tsixmiéjunʼ kaʼyulú ráʼ. Na̱nguá. Náa numuu rá.
7, 8. Xú káʼnii kagujtuminaʼ rí makujmaa rí Jeobá kaʼyoo maʼtáñajunʼ ga̱jma̱a̱ rí nakudaminaʼ maʼni xá.
7 Jeobá ndaʼyoo rí xa̱bu̱ numbaaʼ guáʼdáá wéñuʼ numuu. Ikhaa nandoo kaʼyulú wéñuʼ, rí asndu nixnáa A̱ʼdióo mu maʼni káwáanʼ ga̱jma̱a̱ maʼni rí makuwáanʼ kámuu mbiʼi (Juan 3:16; 1 Juan 4:9). Á mu Jeobá tséʼnimbánuu rí nikudaminaʼ maʼni, Gixa̱a̱ maʼthí rí Dios naʼni nduwaʼ ga̱jma̱a̱ nindxu̱u̱ mbáa Xa̱bu̱ Ñajunʼ bi̱ tséxnún rí májánʼ xa̱bu̱ numbaaʼ. Xa̱bu̱ sia̱nʼ bi̱ nutsijma ga̱jma̱a̱ nuraximíjna̱ ma̱ngaa makumún rí gajkhun nindxu̱u̱: “Náa xtáa bi̱ nijuiʼthá ma̱ʼkha̱ rá. Numuu rí mbiʼi rí nikháñun xiʼñúxu, ikháá má xtáa rarígá xóo nákha niguma xúgíʼ” (2 Ped. 3:3, 4). Ikha jngó índo̱ xa̱bu̱ numbaaʼ bi̱ nunimbu̱ún maguma káwíin ikhí Jeobá masngájma dí rígi̱ kagujtuminaʼ ga̱jma̱a̱ rí ikhaa kaʼyoo maʼtáñajunʼ (atraxnuu Isaías 55:10, 11). * Ma̱ngaa, rí Jeobá maʼtáñajunʼ ga̱jma̱a̱ ngajua, rúʼko̱ naʼni rí mbuʼyáá gajkhun rí ikhaa ma̱ndoo kaʼyulú má xúʼko̱ ma̱ngaa mangajo̱o̱ kaʼñún má xúʼko̱ xa̱bi̱i̱ bi̱ ni̱ndxu̱ún jmbiin (Éx. 34:6).
8 Rí mbuʼyáá dí gíʼdoo numuu rí Jeobá kaʼyoo maʼtáñajunʼ na̱nguá eyoo gáʼthi rí na̱nguá gíʼdoo numuu rí maguma káwáanʼ o rí na̱nguá kuaʼdáá numulúʼ náa inuu Dios. Rí a̱jma̱ rígi̱, rí maʼtáñajunʼ Jeobá ga̱jma̱a̱ rí maguma káwáanʼ mámbá nduʼyáá náa kaʼyoo. Gíʼmaa mbuʼyáá májánʼ rígi̱ mu xúʼko̱ xámbumulú rí gíʼdoo numuu mumbayíí rí maʼtáñajunʼ Jeobá.
JOB NARIʼKHUU RÍ XÓO ENDXA̱ʼÓO EDXU̱U̱
9. Ndiéjunʼ niʼthí Satanás ga̱jma̱a̱ numuu Job rá. (Atayáá timbá xtiʼkhu.)
9 Libro ndrígóo Job, nindxu̱u̱ mbá libro ndrígóo Biblia rí nirígá itháan wajyúúʼ, nisngájma kaʼwu rí ndayóoʼ mundxaʼwáá májánʼ edxu̱lúʼ. Ikhí nuraxnuu rí Satanás niʼthí rí Job maniñuʼ Dios á mu namínuʼ wéñuʼ. Nindo̱ʼo̱o̱ Jeobá rí ikhaa gáʼni rí mamínuʼ Job. Dios na̱nguá niʼni rígi̱, maski ajndu niniñuʼ rí magruiga̱ tsáʼkhá náa xa̱bi̱i̱. “Xúgíʼ rí gíʼdoo rígá náa ñawanʼ”, niʼthúu̱n (atraxnuu Job 1:9-12). * Job tájyúuʼ niʼnimbáti̱gi̱i̱n xa̱bi̱i̱, xúgíʼ rí gíʼdoo ga̱jma̱a̱ mbá gu̱wi̱nʼ e̱ji̱i̱n. Satanás niʼni makujmaa rí Dios gíʼdoo aʼkhúun ga̱jma̱a̱ tsingíná rí niraʼnuu (Job 1:13-19). Nda̱wa̱á niʼni rí Job magiʼdoo mbá nandii rí na̱ʼkhu̱ wéñuʼ ga̱jma̱a̱ xkawiʼ wéñuʼ (Job 2:7). Mú itháan gakhi̱i̱ niʼniuu índo̱ a̱ʼgiu̱u̱ gajmíi̱n bi̱ nimbáxu̱u̱ gajmíi̱n nini rí maxtáa itháan gíná (Job 2:9; 3:11; 16:2).
10. a) Xú káʼnii nisngájma Job rí niwi̱ji̱ jmbu náa Dios rá. b) Ga̱jma̱a̱ ndiéjunʼ rí táʼngo̱o̱ gáʼni xá.
10 Lá gajkhun rí niʼthí Satanás ráʼ. Na̱nguá, táʼthi rí jmbu, numuu Job tániñuʼ Jeobá (Job 27:5). Mú mbá nguáthá mbiʼi Job nimbúmuu rí itháan gíʼdoo numuu. Rí phú niʼni, nisngájma rí ikhaa nindxu̱u̱ itháan jmbii ga̱jma̱a̱ asndu nindoo muthán náa numuu rí xtáa ramínuuʼ (Job 7:20; 13:24). Mbáa nundxa̱ʼwa̱míjna̱ rí kaʼyoo maku̱mu̱u̱ xúʼko̱ kaʼnii ga̱jma̱a̱ numuu xúgíʼ rí nixtáa ramínuuʼ, mú Dios ndiʼyoo rí ndiyóoʼ mariʼkhuu xóo nindxa̱ʼóo edxu̱u̱. Ndiéjunʼ niʼthúu̱n xá.
11, 12. a) Ndiéjunʼ rí Jeobá nimbáyúu makro̱ʼo̱o̱ Job rá. b) Xú káʼnii niriʼña̱a̱ Job rá.
11 Nuxkamaa rí niʼthí náa capítulos 38 asndu 41 náa libro ndrígóo Job, mú tséxkamaa nditháan náa naʼthí náa numuu xtáa ramínuuʼ. Rí phú nindoo Jeobá raʼkháa mu maʼthúu̱n Job náa numuu rí nimínuuʼ, numuu rí ikhaa tséyóoʼ masngájma rí na̱nguá gíʼdoo aʼkhúun. Dios nindoo mambáyúu Job makro̱ʼo̱o̱ rí nindxu̱u̱ chíʼgíʼ wéñuʼ ga̱jma̱a̱ xóo rí nindxu̱u̱ ikhaa. Ga̱jma̱a̱ nimbáyúu makro̱ʼo̱o̱ dí rígá i̱ʼwáʼ rí gíʼdoo itháan numuu (atraxnuu Job 38:19-21). * Ga̱jma̱a̱ numuu rígi̱, Job niriʼkhu̱u̱ xóo nindxa̱ʼóo edxu̱u̱.
12 Lá Jeobá ra̱májánʼ a̱jkiu̱u̱n índo̱ niʼthúu̱n ajngáa gujkhuʼ Job nda̱wa̱á rí nimínuuʼ wéñuʼ ráʼ. Na̱nguá, ma̱ngaa Job táʼyoo xúʼko̱. Ga̱jma̱a̱ xúgíʼ rí nirígá, nda̱wa̱á ni̱jkha̱nú nikro̱ʼo̱o̱. Asndu niʼthí: “Nagáwiinʼ a̱jkiu̱nʼ rí nitha, ga̱jma̱a̱ natanga̱a̱ a̱jkiu̱nʼ náa yujndaʼ ga̱jma̱a̱ idiʼ”. Ikha jngó rí niʼthí Jeobá májánʼ ga̱jma̱a̱ niʼni rí maʼni̱i̱ a̱jkiu̱u̱n (Job 42:1-6). Nákha ginii, ma̱ngaa mbáa dxámá bi̱ mbiʼyuu Elihú nixprígúu (Job 32:5-10). Jeobá ndiʼyoo rí Job niriʼña májánʼ ga̱jma̱a̱ niʼthí rí niniguuʼ numuu niʼni rí jmbu (Job 42:7, 8).
13. Xú káʼnii nimbáyúu Job ajngóo Jeobá nda̱wa̱á rí ninújngoo gaʼkhu rá.
13 Ajngóo Jeobá nimbáyúu má xúʼko̱ Job nimbáyúu ma̱ngaa nda̱wa̱á rí ninújngoo gaʼkhu. Gajkhun má rí Jeobá “niʼni tsajkurámááʼ Job itháan ki xóo rí nigiʼdoo ginii”, mú táʼni̱i̱ nacha̱. Ninújngoo mba̱yu̱ʼ índo̱ “ni̱jkha̱nú nigiʼdiin mbá juwiin jiáma ga̱jma̱a̱ mbá ajtsíin wa̱ʼxa̱ʼ” (Job 42:12-14). Mbáa Job nirmáʼáan a̱jkiu̱u̱n kaʼñún e̱ji̱i̱n bi̱ nikháñun numuu aʼkhúun Satanás. Ga̱jma̱a̱ mbáa nirmáʼáan a̱jkiu̱u̱n má xúʼko̱ xúgíʼ rí nimínuuʼ. Maski ajndu ni̱jkha̱nú nikro̱ʼo̱o̱ náa numuu ni̱ʼkha̱nú tsáʼkhá inuu, mbáa nguáná niraximínáʼ náa numuu ndiyóoʼ maraʼnuu wéñuʼ tsingíná. Tséʼniuu asndu xú káʼnii má, nindoo nindxa̱ʼwáminaʼ rí Dios niʼthúu̱n. Rúʼko̱ nimbáyúu mu mandxaʼwáminaʼ májánʼ ga̱jma̱a̱ maʼni̱i̱ a̱jkiu̱u̱n (Sal. 94:19).
Lá ma̱ndoo mbuʼyáá rí gíʼdoo itháan numuu maski ajndu nuraʼníí xkujndu ráʼ. (Atayáá kutriga̱ 14.)
14. Ndiéjunʼ ejmañuluʼ ga̱jma̱a̱ numuu rí nigíʼnuu Job rá.
14 Mangáanʼ ma̱ndoo mambáyulúʼ rí nigíʼnuu Job mu mundxaʼwamíjna̱ májánʼ ga̱jma̱a̱ maʼni̱i̱ a̱jkiu̱lú. Jeobá niʼni magumaraʼmáʼ “mu maxnulú ikha, mu maʼngo̱o̱ a̱jkiu̱lú ga̱jma̱a̱ maʼni a̱jkiu̱lú rí naʼthí náa Escrituras rí nda̱wa̱á kuaʼti̱i̱n rí májánʼ” (Rom. 15:4). Rí phú naʼsngúlú dí ragíʼmaa mundxaʼwamíjna̱ wéñuʼ ga̱jma̱a̱ numulúʼ rí asndu mambumulú kuʼyáá rí gíʼdoo wéñuʼ numuu: Rí makujmaa kaʼwu rí Jeobá kaʼyoo maʼtáñajunʼ. Garmáʼáan a̱jkiu̱lú rí á mu naguajún jmbu xó má Job maski ajndu nuraʼníí xkujndu gakhi̱i̱ kuwáanʼ rumbaʼyíí Dios mu ikhaa maʼtáñajunʼ.
15. Á mu ikháanʼ nuguajún jmbu maski ajndu nuraʼníí xkujndu, ndiéjunʼ rí gáʼni Jeobá ga̱jma̱á ni̱ndxu̱lú rá.
15 Náa numuu naxnúlú tsiakii mundxaʼwamíjna̱ rí ndayóoʼ manindxu̱lúʼ mbáa xa̱bu̱ jmbii rá. Numuu rí naʼni marmáʼáan a̱jkiu̱lú dí raʼkháa mbaaʼ numíniiʼ. Tsáʼkhá tsíyoo gáʼthi rí Dios nakiʼnáa kaʼyulú, rígi̱ naniñulú musngajmá rí nandulúʼ maʼtáñajunlú (Prov. 27:11). Á mu naʼngulú, Jeobá maʼdxuu kaʼyulú ga̱jma̱a̱ muʼnimbulúʼ itháan rí gajkhun marigá rí kuaʼti̱i̱n (atraxnuu Romanos 5:3-5). * Rí nigíʼnuu Job nasngájma rí “Jeobá nandoo kaʼyulú wéñuʼ ga̱jma̱a̱ naʼni mba̱a̱ a̱jkiu̱u̱n kaʼyulú” (Sant. 5:11). Ikha jngó nduʼyáá májánʼ rí Jeobá maʼni tsajkurámiinʼ xúgínʼ bi̱ numbayíí mu ikhaa maʼtáñajunʼ. Rí mbuʼyáá rígi̱ nambáyulúʼ mu maʼngulú muraʼníí xkujndu ga̱jma̱a̱ gagi (Col. 1:11).
XÚNIʼÑÁʼ RUʼYÁÁ RÍ GÍʼDOO ITHÁAN NUMUU
16. Ndíjkha jngó ndayóoʼ marmáʼáan a̱jkiu̱lú rí gíʼdoo wéñuʼ numuu makujmaa kaʼwu rí Jeobá kaʼyoo maʼtáñajunʼ rá.
16 Gajkhun má rí na̱nguá nindxu̱u̱ guabaaʼ mbuʼyáá rí Jeobá kaʼyoo maʼtáñajunʼ, itháan índo̱ kuwaanʼ náa awúu̱n xkujndu. Asndu mbá xkujndu chíʼgíʼ ma̱ndoo maʼni rí maxmiéjunʼlú á mu nundxa̱ʼwa̱míjna̱ wéñuʼ ga̱jma̱a̱ numuu ikhaa. Ikha jngó májánʼ gaʼni rí marmáʼáan má xúʼko̱ a̱jkiu̱lú rí gíʼdoo wéñuʼ numuu mumbayíí Jeobá rí maʼtáñajunlú índo̱ nuraʼníí xkujndu gakhi̱i̱.
17. Náa numuu rí muʼni ma xúʼko̱ ñajuunʼ Jeobá mambáyulúʼ mbuʼyáá rí ikhaa kaʼyoo maʼtáñajunlú xá.
17 Rí muʼni má xúʼko̱ ñajunʼ rí Jeobá nixnúlú ma̱ndoo mambáyulúʼ mbuʼyáá rí gíʼdoo itháan numuu. Guʼyáá mbá xkri̱da. Mbáa xa̱bi̱i̱ Jeobá bi̱ mbiʼyuu Renee nixnúu mbá derrame cerebral, na̱ʼkhu̱ má xúʼko̱ edxu̱u̱ ga̱jma̱a̱ nigiʼdoo cáncer. Índo̱ nakhánáa thana, naʼtáruʼun xa̱bu̱ bi̱ nuñajunʼ náa hospital, eʼwíínʼ xa̱bu̱ bi̱ naʼniún nandii ga̱jma̱a̱ bi̱ nagún gúyáá. Mbóo miʼtsú, niʼni mbá a̱jkhu̱ skiñúʼ hora rí niʼtáraʼa a̱jma̱ xmáná tikhu rí nixtáa náa hospital. Nirmáʼáan a̱jkiu̱u̱n má xúʼko̱ rí Jeobá kaʼyoo maʼtáñajunʼ asndu inuu makhañúu. Rúʼko̱ ma̱ngaa niʼni rí xáminuʼ wéñuʼ.
18. Ndiéjunʼ gundrigu á mu numbáyii Jeobá rí ikhaa maʼtáñajunʼ xóo nigíʼnuu mbáa ndxájulú rá.
18 Gajkhun ma rí xúgíʼ mbiʼi nuraʼníí xkujndu rí ra̱mingíjyúuʼ, ga̱jma̱a̱ náa xúgíʼ rígi̱ nandulúʼ mundxaʼwamíjna̱ má xúʼko̱ rí Jeobá kaʼyoo maʼtáñajunʼ. Jennifer nixtáa ajtsú mbiʼi náa aeropuerto nigíʼthu̱u̱n mbá avión mu maʼga̱a̱ goʼwóo. Mámbá avión rí kaʼyoo magajnúu na̱nguá egájnuu. Ra̱mingíjyúuʼ dí ikhaa maxmiéjunʼ kaʼyaminaʼ numuu rí xtáa mbáwíi ga̱jma̱a̱ néʼngo̱o̱. Mú tháʼni xúʼko̱ kaʼnii. Nindo̱ʼo̱o̱ Jeobá rí maxnúu ikha mu mambáñún eʼwíínʼ. Xú káʼnii nirígá rá. Niʼtáruʼun mbaʼin xa̱bu̱ ga̱jma̱a̱ niniñuʼ mbaʼa i̱yi̱i̱ʼ. Ikhaa naʼthí: “Maski ajndu ninindxu̱u̱ gakhi̱i̱ wéñuʼ, niku̱mu̱ʼ rí Jeobá niʼni tsajkurámuʼ ga̱jma̱a̱ nixnúʼ tsiakii mu maʼgá ka̱yo̱ʼ mbiʼyuu xó má kaʼyoo”. Támbumuu rí gíʼdoo itháan numuu.
19. Xú káʼnii eʼyoo xuajñu Jeobá ga̱jma̱a̱ numuu rí ikhaa kaʼyoo maʼtáñajunʼ rá.
19 Xuajñu Jeobá nakro̱ʼo̱o̱ rí gíʼdoo wéñuʼ numuu makujmaa rí Jeobá kaʼyoo maʼtáñajunʼ ga̱jma̱a̱ nambáyúu. Rúʼko̱ naʼni mixtiʼkuii náa religión dí ragájkhun. Mámbáa rí ikháanʼ mbaʼyóoʼ muʼni xúʼko̱ kaʼnii, numuu rí numbayíí rí mbuʼyamajkuíí Jeobá.
20. Xú káʼnii eʼyoo Jeobá rí nuʼni mu mumbáyii mu ikhaa maʼtáñajunʼ xá.
20 Nduʼyáá májánʼ rí Jeobá nangajo̱o̱ tsiakii rí nuʼni mu numbáyii ga̱jma̱a̱ ñajunʼ rí nuʼni ma̱ngaa naʼngulú nuguájun jmbu mu ikhaa maʼtáñajunʼ (Sal. 18:25). Náa imbo̱o̱ artículo mbuʼyáá itháan ga̱jma̱a̱ numuu rí Jeobá kaʼyoo maʼtáñajunʼ ga̱jma̱a̱ xú káʼnii gándoo gumbayíí.
[Mbaʼa nota]
^ párr. 4 Salmo 83:18: “Mu xa̱bu̱ mbuyáá rí ikháánʼ mbiʼyaʼ Jeobá, i̱ndó ikháánʼ ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ”.
^ párr. 7 Isaías 55:10, 11: “Xó má ruʼwa ga̱jma̱a̱ idiʼ rí najngutígú mekhuíí ga̱jma̱a̱ na̱nguá tanga̱a̱ ikhí asndu índo̱ gamajan ku̱ba̱ʼ, maʼni rí makráʼáan ga̱jma̱a̱ majma̱a̱, ga̱jma̱a̱ naxnúu tsígáʼ bi̱ naʼdu ga̱jma̱a̱ pan bi̱ na̱ʼkhu̱, xúʼko̱ ganindxu̱u̱ ajngóoʼ rí nagájnuu náa rawunʼ. Xátanga̱a̱ xúʼkhiín, gajkhun mani rí phú nandoʼ, ga̱jma̱a̱ mambanúu gajkhun rí nitañájunʼ maguma”.
^ párr. 9 Job 1:9-12: “Ikhú, Satanás niriʼñuu Jeobá, ga̱jma̱a̱ niʼthúu̱n: “Rígá dí naraxnaa ikha jngó ndaʼyamajkuaʼ. Lá tatani mbóo gúláa mbajndi náa ikhaa ga̱jma̱a̱ náa goʼwóo ga̱jma̱a̱ náa xúgíʼ dí gíʼdoo xáʼ. Ikháánʼ nitani tsajkuramáʼ ñajunʼ dí gíʼdoo, ga̱jma̱a̱ xujkiúu ninindxu̱u̱n mbaʼin wéñuʼ náa tsu̱du̱u̱ ku̱ba̱ʼ. Atrigú kaʼyííʼ dí niraxnáá, ma̱ta̱ya̱a̱ á mu xaʼta wéñaʼ, náa inaaʼ”. Ikhú, Jeobá niʼthúu̱n Satanás: “¡Atayáá! Xúgíʼ rí gíʼdoo rígá náa ñawanʼ. ¡Mú nda̱a̱ rí gata̱ni̱i̱ ikhaa!”. Ikhú Satanás nigájna̱a̱ náa xtáa Jeobá”.
^ párr. 11 Job 38:19-21: “Náa rígá kamba̱a̱ náa rígá aguʼ rá. Ga̱jma̱a̱ rí mikríná náa minaʼ rígá”. mu mi̱dxu̱ʼ jchááʼ náa má kaʼyoo, ga̱jma̱a̱ makruaʼaʼ kamba̱a̱ rí na̱jkha̱ náa goʼwóoʼ ráʼ. Lá nitayáá má rígi̱ numuu rí nákha ikhú nigumáán má, ga̱jma̱a̱ niʼni má mba̱yu̱ʼ tsiguʼ má xtaa ráʼ.”
^ párr. 15 Romanos 5:3-5: “Raʼkháa i̱ndó rúʼko̱, rí gaʼdxulú índo̱ nuraʼníí gamiéjunʼ numuu dí rúʼko̱ naʼni rí maʼngulú itháan; rí maʼngulú itháan, naʼni rí mixtriguáanʼ; rí mixtriguáanʼ naʼni rí muguaʼthi̱i̱n, ga̱jma̱a̱ rí muguaʼthi̱i̱n tséʼni rí majmáa a̱jkiu̱lú; numuu rí ngajua ndrígóo Dios rígá náa a̱jkiu̱lú ga̱jma̱a̱ numuu xi̱ʼ kaʼwu rí nijuixnúlú”.
