DON nindxu̱u̱ mbáa xa̱bi̱i̱ Jeobá bi̱ xtáa náa Canadá bi̱ naʼniminaʼ má xúʼko̱ maʼtámíjná gajmíi̱n xa̱bu̱ bi̱ kuwa náa calle. Ikhaa naʼthí dí nirígá ga̱jma̱a̱ mbáa rí ikhiin: “Peter ninindxu̱u̱ mbáa xa̱bu̱ bi̱ itháan tsagaa bi̱ xtáa náa calle. Naʼni gawúunʼ eʼwíínʼ, ga̱jma̱a̱ naʼniminaʼ má xúʼko̱ rí xa̱bu̱ ní xaguwáʼ náa ikhaa. Tséniñuʼ rí xa̱bu̱ muni̱i̱ rí májánʼ”. Maski ajndu xúʼko̱, Don niʼniminaʼ mbá gu̱wa̱ʼ i̱jkhu̱ tsiguʼ mu mani̱ndxu̱u̱ májánʼ xa̱bu̱ ga̱jma̱a̱ ikhaa.

Peter niraxu̱u̱ Don mbá miʼtsú: “Náa numuu rí naxmiéjuanʼ wéñuʼ ga̱jma̱a̱ numuʼ rá. Nimbáa tsixmiéjunʼ eni. Náa numuu rí ikháánʼ naxmiéjuanʼ rá.” Don nindxa̱ʼwáminaʼ májánʼ índo̱ nijmuu ajtsú texto rí na̱ʼkha̱ náa Biblia mu maʼga̱nú náa a̱jkiu̱u̱n. Ginii niraxu̱u̱ á mu ndaʼyoo rí Dios gíʼdoo mbiʼyuu ga̱jma̱a̱ niʼthúu̱n rí maguxnuu Biblia náa Salmo 83:18. Nda̱wa̱á mu masngajmúu Peter rí naxmiéjunʼ kaʼyoo, niʼthúu̱n rí maguxnuu náa Romanos 10:13, 14, náa naʼthí rí “xúgínʼ bi̱ nugríga̱a̱ mbiʼyuu Jeobá makáwíin”. Nda̱wa̱á, Don niguxnuu Mateo 9:36, náa naʼthí: “Rido Jesús ndiʼñu mbaʼin mendaʼko xabo, aʼkue ri puniñahuin akuin-jaʼñu, numu ri ndahua tsi mbaʼyo ri ini, asjndo xo idruʼun [mugu̱] tsi ndahua huaxtin, xkuaʼni idruʼun”. Nda̱wa̱á nindo̱ʼo̱o̱ Peter maguxnuu. Índo̱ niguxnuu, asndu nimbiyaʼ niraxi: “Lá ikhúúnʼ ni̱ndxu̱ʼ mbáa mugu̱ buʼko̱ ráʼ.”

Peter nigíʼdu̱u̱ niriʼkuminaʼ. Niwan ga̱jma̱a̱ niʼda stawunʼ ga̱jma̱a̱ nigúwu̱nʼ xtíin rí Don nixnúu. Asndu nákha ikhú, nixmiéjunʼ rí maʼni kaʼuminaʼ ga̱jma̱a̱ mañeuminaʼ xóo kujmaa.

Peter niʼnirámáʼ mbá diario. Rí niʼnirámáʼ ginii nindxu̱u̱ gíná, mú nda̱wa̱á náa naʼthí ga̱jma̱a̱ numuu Don, nindxu̱u̱ mixtiʼkhu. Mbá rí ikhaa naʼthí: “Mbiʼi rígi̱ nijmañuʼ xú káʼnii mbiʼyuu Dios. Rí xúgi̱ índo̱ natajkáan nandoo na̱thu̱u̱n Jeobá. Mitsaan wéñuʼ matatsiʼnuʼ mbiʼyuu. Don naʼthí rí Jeobá ma̱ndoo mambaxúʼ  ga̱jmu̱ʼ, mbáa bi̱ maguapaa maʼdxun rí gáthúu̱n, tséʼniuu nguáná o rí gáʼndoʼ mathu̱u̱n”.

Iwáá ajngáa rí niʼnirámáʼ na̱jkha̱ náa inún a̱ngui̱i̱n. Niʼnirámáʼ:

“Xúgi̱ na̱nguá xtáá májánʼ. Mbáa tsiguʼ ninújngoo. Mú maski ajndu imbóó mbiʼi rígi̱ xtáá, nda̱yo̱o̱ rí [Don] mba̱yo̱o̱ náa Ku̱ba̱ʼ mitsaan. Á mu kuwaanʼ ruraxnuu rígi̱, nandoo gáʼthi rí nánguá xtáá gajmiála. Mú á mu índo̱ gíʼdiu̱u̱n ndu̱ya̱a̱ mbáa xa̱bu̱ mixtiʼkui, gutha̱a̱nla, ga̱jma̱a̱ mbá péñu, guraxnuu libro miʼñu [nindoo gáʼthi i̱yi̱i̱ʼ rí ma̱ndoo muʼnigajmaa ga̱jma̱a̱ Biblia La verdad que lleva a vida eterna, rí nigruigú tsiguʼ kidíiʼ]. * Naʼthí rí mba̱yo̱o̱ mbu̱júu̱ bi̱ nambáxuʼ ga̱jmu̱ʼ náa Ku̱ba̱ʼ mitsaan. Nanimbooʼ rígi̱ ga̱jma̱a̱ xúgíʼ a̱jkiu̱nʼ. Ndxájuala bi̱ nandoo kaʼyala, Peter”.

Ummi, ndxájuu Peter, niʼthí: “Peter niʼni má a̱jma̱ tsiguʼ rí niʼtámíjná ga̱jma̱á ni̱ndxu̱ʼ. Mba̱yu̱ʼ tsiguʼ na̱nguá e̱yo̱o̱ rí xtáa gagi. Ga̱jma̱a̱ asndu nanduʼwá”. Ni̱thu̱u̱n Don: “Magúxnuu libro numuu dí rígá mbá rí ni̱jkha̱nú asndu náa a̱jkiu̱u̱n ndxájuʼ rí nindxu̱u̱ kiejunʼ”. Ummi ma̱ngaa nindoo rí mbáa xa̱bi̱i̱ Jeobá maʼga̱ gáʼyoo mu maʼnigajmaa ga̱jma̱a̱ libro rí mbiʼyuu Ndiéjunʼ phú eʼsngáa náa Biblia rá.

Mangáanʼ ma̱ndoo mbuʼyáá itháan ki xóo inuu xa̱bu̱, rí maʼndulú kuʼñúún gajkhun xa̱bu̱ ga̱jma̱a̱ maʼngo̱o̱ a̱jkiu̱lú gúní asndu xú káʼnii xa̱bu̱ (1 Tim. 2:3, 4). Á mu xúʼko̱ eʼni, ma̱ndoo muʼni rí muriʼkhumijná xó má Peter, mbáa xánigulúʼ rí xóo ni̱ndxu̱ún, mú guáʼdáá mbá a̱jkiu̱ún májánʼ. Nduʼyáá májánʼ rí Dios “ndaʼyoo a̱jkiu̱u̱n”, maʼni rí mbaja̱a̱ rí gajkhun náa a̱jkiu̱ún xa̱bu̱ bi̱ nandún muxuʼmamijná náa ikhaa (1 Sam. 16:7; Juan 6:44).