1. Ndiéjunʼ ni̱jkha̱ kayáa Caín maʼni dí ra̱májánʼ, ga̱jma̱a̱ ndiéjunʼ nigíʼnuu xá.

CAÍN ndiyóoʼ maraʼwíí mbá dí nigiʼdoo numuu. Ikhaa nigiʼdoo a̱jma̱ rí maʼni. Ma̱ndoo maraʼwíí maʼni rí májánʼ, ga̱jma̱a̱ maxtáa májánʼ. O maʼni rí naʼthúu̱n a̱jkiu̱u̱n maʼni, ga̱jma̱a̱ magíʼnuu dí raʼkhí. Náa Biblia naʼthí rí Caín niraʼwíí maʼni dí ra̱májánʼ. Ikha jngó nixíyáa Abel giʼtio̱o̱ ga̱jma̱a̱ nindáti̱go̱o̱ rí mambaxúu ga̱jma̱a̱ Jeobá (Gén. 4:3-16).

2. Ndíjkha rí gíʼdoo numuu muraʼwíí muʼni dí májánʼ rá.

² Xúgiáanʼ ndayóoʼ muraʼwíí rí muʼni. Tikhuu gíʼdoo wéñuʼ numuu mú tikhuu na̱nguá. Mú mbaʼa rí guraʼwíí muʼni ma̱ndoo maʼni gawúnlú. Á mu nuraʼwíí rí májánʼ, rígi̱ gáʼni xúraʼníí mbaʼa xkujndu ga̱jma̱a̱ makuwáanʼ itháan májánʼ. Mú á mu nuraʼwíí muʼni dí ra̱májánʼ, mbáa maguaʼdáá wéñuʼ xkujndu rí maʼni gawúnlú (Prov. 14:8).

3. a) Náa gándoo maguaʼdáá fe á mu nandulúʼ muraʼwíí rí májánʼ rá. b) Xú káʼnii graxe̱ guriʼña̱a̱ rá.

³ Ndiéjunʼ gambáyulú muraʼwíí muʼni dí májánʼ rá.  Rí maguaʼdáá fe náa Dios. Gíʼmaa muʼnimbulúʼ kuʼyáá ikhaa ga̱jma̱a̱ maxnúlúʼ ku̱ma̱ rí gáʼyulúʼ. Mbá rí ma̱ngaa mambáyulúʼ rí maguaʼdáá fe náa Ajngá rawunʼ Dios ga̱jma̱a̱ rí muʼnimbulúʼ náa xtágabu rí naxnúlú (atraxnuu Santiago 1:5-8). * Á mu nambáxulúʼ itháan gajmiúlú Jeobá ga̱jma̱a̱ nandulúʼ kuʼyáá itháan Ajngá rawunʼ, mbuʼyáá májánʼ rí ikhaa ndaʼyoo rí itháan májánʼ náa ikháanʼlu. Rígi̱ gáʼni rí mbuʼyáaʼ ikha ndrígóo Ajngá rawunʼ nákha xóó tsíraʼwíí rí muʼni. Mú xú káʼnii gajmañulú muraʼwíí rí májánʼ rá. Ga̱jma̱a̱ á mu niraʼwíí mbá rí muʼni, lá nandoo gáʼthúu̱n rí xándoo muriʼkhuíí rí muʼni ráʼ.

4. Ndiéjunʼ ndiyóoʼ maraʼwíí maʼni Adán, ga̱jma̱a̱ ndiéjunʼ nigíʼnuu xá.

⁴ Xa̱bu̱ ndiyóoʼ muraʼwíí rí muni asndu nákha Dios niʼnii timbáa xa̱biya̱, Adán. Mbá xkri̱da, Adán ndiʼyoo maraʼwíí á mu maʼnimbo̱o̱ náa Dios o náa a̱ʼgiu̱u̱, Eva. Adán niraʼwíí maʼnimbo̱o̱ kaʼyoo Eva, ga̱jma̱a̱ ikhaa ni̱jkha̱ kayáa Adán mu maʼni dí ra̱májánʼ. Rí nirígá, Jeobá nixkriyaʼ Adán náa Edén, ga̱jma̱a̱ nda̱wa̱á nikháñu. Rí mbiʼi xúgi̱ kuwáanʼ rumíniʼ ga̱jma̱a̱ numuu rí taraʼwíí maʼni rí májánʼ Adán.

5. Náa numuu gíʼmaa majmulúʼ rí najmañulúʼ mu muraʼwíí muʼni rí májánʼ rá.

⁵ Tikhun xa̱bu̱ nundxa̱ʼwa̱míjna̱ rí maʼni itháan ra̱mingíjyúuʼ makuwíin á mu xáʼyóoʼ muraʼwíí rí muni. Lá mangáanʼ nundxa̱ʼwa̱míjna̱ xúʼko̱ káʼnii ráʼ. Májánʼ marmáʼáan a̱jkiu̱lú rí Jeobá táʼnianʼ xóo robots, bi̱ tséndxaʼwamíjna̱ ní má tsíraʼwíí rí muni. Ikhaa nixnúlú Ajngá rawunʼ náa naʼsngúlú muraʼwíí rí muʼni. Ma̱ngaa, Dios nandoo muraʼwíí rí muʼni ga̱jma̱a̱ rígi̱ nindxu̱u̱ mbá ñajunʼ mba̱a̱. Guʼyáá mbá xkri̱da rígi̱.

6, 7. a) Ndiéjunʼ ndiyóoʼ muni israelitas rá. (Atayáá timbá xtiʼkhu.) b) Náa numuu niʼniún mingíjyúuʼ muni xá.

⁶ Índo̱ kuwa má náa Ku̱ba̱ʼ rí nijuiʼthá makhánun, bi̱ israelitas ndiyóoʼ muraʼwíí mbuyamajkuíí Jeobá o mbuyamajkún eʼwíínʼ dios (atraxnuu Josué 24:15). * Rí niraʼwíí muni nikujmaa asndu xóo ragíʼdoo numuu. Mú rí guraʼwíí muni maʼni rí makuwá o makhañún. Nákha mbiʼi rí jueces nixnúún ikha israelitas, ikhiin niraʼwíí muni má xúʼko̱ dí ra̱májánʼ. Niniñaaʼ ruyamajkuíí Jeobá ga̱jma̱a̱ ndiyamajkhún eʼwíínʼ dioses bi̱ ragájkhun (Juec. 2:3, 11-23). Nda̱wa̱á, mbiʼi rí nixtáa gaʼyee Elías, israelitas ndiyóoʼ muraʼwíí mbuyamajkuíí Jeobá o dioses ndrígóo Baal (1 Rey. 18:21). Mbáa nikumulú dí rígi̱ nindxu̱u̱ ra̱mingíjyúuʼ muʼni, numuu rí nduʼyáá rí muʼni ñajunʼ Jeobá nindxu̱u̱ itháan májánʼ. Mbáa xa̱bu̱ bi̱ ndaʼyoo xáʼyamajkuu mbáa dios bi̱ ragájkhun. Mú israelitas niʼniún mingíjyúuʼ muraʼwíí rí muni.  Náa Biblia naʼthí rí kuwa runi ‹a̱jma̱ a̱jkiu̱ún›. Elías nigiʼdoo ku̱ma̱ ga̱jma̱a̱ niʼthúún rí mbuyamajkuíí Jeobá Dios bi̱ nindxu̱u̱ gajkhun.

⁷ Náa numuu niʼniún mingíjyúuʼ israelitas muraʼwíí muni rí májánʼ rá. Timbá, numuu rí taguáʼdáá fe náa Jeobá ga̱jma̱a̱ taʼndun gúdxawiin. Túnimbu̱ún kuyáá ikhaa ga̱jma̱a̱ nánguá niriyaʼ awan mu muniʼnííʼ ní má túnimbu̱ún xtágabu ndrígóo. Á mu nini, majmañún muraʼwíí muni dí májánʼ (Sal. 25:12). Raga̱jma̱, na̱nguá niraʼwíí muni rí májánʼ numuu rí nini rí nundxa̱ʼwa̱a̱ edxu̱ún bi̱ kuwa náa i̱ʼwáʼ xuajen. Asndu niniñaaʼ rí xa̱bu̱ bugi̱ mutún ndiéjunʼ guni. Rí nirígá, bi̱ israelitas nigíʼdi̱i̱ ndiyaridúún ga̱jma̱a̱ ndiyamajkhún dioses tsí ragájkhun. Jeobá niʼthún mba̱yu̱ʼ tsiguʼ kidíiʼ rí xúʼko̱ má gugíʼníín (Éx. 23:2).

8. Ndiéjunʼ rí phú gíʼdoo numuu eʼsngúlúʼ xkridún israelitas rá.

⁸ Xkri̱da ndrígu̱ún israelitas naʼsngúlú rí ndayúlú ikha ndrígóo Ajngá rawunʼ Dios mu muraʼwíí rí májánʼ. Gálatas 6:5 naʼthí rí mámbáa xa̱bu̱ mariʼña̱a̱ ga̱jma̱a̱ rí naʼni. Ikha jngó ragíʼmaa muniʼñáʼ rí eʼwíínʼ xa̱bu̱ muraʼwíí ga̱jma̱a̱ numulúʼ. Rí iwáá májánʼ, gíʼmaa majmañulúʼ rí Dios naʼthí rí nindxu̱u̱ májánʼ ga̱jma̱a̱ muʼni.

9. Ndíjkha rí migamíi muniʼñáʼ rí eʼwíínʼ guraʼwíí ga̱jma̱a̱ numulúʼ rá.

⁹ Ndiéjunʼ gáʼni rí muniʼñáʼ rí eʼwíínʼ muraʼwíí ga̱jma̱a̱ numulúʼ rá. Rí mutsudáanʼ muraʼwíí dí ra̱májánʼ (Prov. 1:10, 15). Índo̱ nuniʼñánʼ rí eʼwíínʼ xa̱bu̱ muraʼwíí ga̱jma̱a̱ numulúʼ phú gamíi. Gíʼmaa muʼnimbulúʼ ikha rí naxnúlú conciencia ndrígúlú, rí nijuiʼsngáá ga̱jma̱a̱ Biblia. Á mu nuniʼñánʼ rí eʼwíínʼ guraʼwíí rí muʼni, muʼni rí ikhiin muxnulu ikha. Ga̱jma̱a̱ rígi̱ ma̱ʼkha̱ kayóo dí ra̱májánʼ kayuʼ.

10. Ndiéjunʼ niʼthún Pablo cristianos bi̱ kuwa náa Galacia rá.

¹⁰ Apóstol Pablo niʼthúu̱n cristianos bi̱ kuwa náa congregación ndrígóo Galacia rí xúniñami̱jna̱ rí eʼwíínʼ guraʼwíí rí muni (atraxnuu Gálatas 4:17). * Tikhun cristianos ndrígóo congregación rúʼko̱ kuwa runimíjna̱ muraʼwíí rí muni eʼwíínʼ. Xa̱bekha ra̱míjínʼ nindúún rí a̱ngiu̱ún munimbu̱ún rí nuthi ikhiin, raʼkháa rí nuthi apóstoles. Nunimbaʼumíjna̱ ga̱jma̱a̱ na̱nguá eyamajkhún a̱ngiu̱ún índo̱ nuraʼwíí rí muni.

11. Xú káʼnii gándoo gumbañúún eʼwíínʼ índo̱ guraʼwíí rí muni rá.

¹¹ Xúgiáanʼlú ma̱ndoo majmañulúʼ ga̱jma̱a̱ numuu xkridoo apóstol Pablo. Ikhaa ndiʼyamajkhún a̱ngui̱i̱n índo̱ ikhiin niraʼwíí rí muni (atraxnuu 2 Corintios 1:24). * Rí mbiʼi xúgi̱,  bi̱ nuyegun edxu̱u̱ náa congregación ma̱ndoo mbuyaridáá rí niʼni índo̱ guxnáá xtágabu mbáa ndxájulú bi̱ ndayóoʼ maraʼwíí rí maʼni. Nusngajmáá rí májánʼ dí naʼthí Ajngá rawunʼ Dios. Mú nuñewa̱a̱n wéñuʼ rí xúraʼwíí ga̱jma̱a̱ numuu, numuu rí ikhaa má gádáʼ rí gaʼni. Ndiéjunʼ ejmañuluʼ ga̱jma̱a̱ numuu rígi̱ rá. Rí ma̱ndoo musngajmúún xtágabu rí naxná náa Biblia. Mú ikhiin kaʼñún muraʼwíí rí muni. Índo̱ nuni rígi̱ nambáñun wéñuʼ. Nimbá miʼtsú gíʼmaa mundxaʼwamíjna̱ rí ikháanʼ ma̱ndoo muraʼwíí ndiéjunʼ rí gíʼmaa muni a̱ngiu̱lú.

12, 13. Ndíjkha rí migamíi muraʼwíí rí muʼni índo̱ nakiʼnáanʼlú o kuwáanʼ gíná rá.

¹² Mbiʼi xúgi̱ mbaʼin xa̱bu̱ nunimbu̱ún rí naʼthí a̱jkiu̱ún índo̱ nuraʼwíí rí muni (atayáá náa kúgumaʼá “Ndiéjunʼ eyoo gáʼthúu̱n”). Mú rígi̱ phú migamíi. Náa Biblia naʼthúlúʼ rí xándoo muraʼwíí muʼni rí gáʼthúu̱n a̱jkiu̱lú o rí nakumulú, numuu rí ni̱ndxu̱lú xa̱bu̱ aʼkhá (Prov. 28:26). Ragíʼmaa muʼnimbulúʼ kuʼyáá a̱jkiu̱lú numuu rí “maʼni nduwánʼ itháan [...] ga̱jma̱a̱ ra̱ʼkhá tháán echo̱o̱” (Jer. 17:9). Náa Biblia naʼthí ga̱jma̱a̱ numún mbaʼin xa̱bu̱ tsí niguaʼnii dí ra̱májánʼ numuu rí ninimbu̱ún kuyáá a̱jkiu̱ún (1 Rey. 11:9; Jer. 3:17; 13:10). Ndiéjunʼ guguáʼníí á mu nuniʼñámi̱jna̱ rí a̱jkiu̱lú garaʼwíí rí muʼni rá.

¹³ Phú gíʼdoo numuu a̱jkiu̱lú numuu rí Jeobá naʼthúlúʼ rí maʼndulú kuʼyáá ga̱jma̱a̱ xúgíʼ a̱jkiu̱lú ga̱jma̱a̱ rí maʼndulú kuʼñúún eʼwíínʼ xó má nandulúʼ kuʼyamijná ikháanʼ (Mat. 22:37-39). Mú gíʼmaa muñeumíjna̱. Textos ndrígóo Biblia rí na̱ʼkha̱ náa kutriga̱ kidíiʼ nasngájma rí gamíi nindxu̱u̱ muniñaʼ rí a̱jkiu̱lúʼ maʼtáñajunʼ rí nakumulú ga̱jma̱a̱ rí muʼni. Mbá xkri̱da, ragíʼmaa  muraʼwíí rí muʼni índo̱ nakiʼnáanʼlu (Prov. 14:17; 29:22). Ma̱ngaa ragíʼmaa muraʼwíí rí muʼni índo̱ kuwáanʼ gíná (Núm. 32:6-12; Prov. 24:10). Gíʼmaa muniʼñáʼ rí xtángoo ndrígóo Dios maxnúlúʼ ikha (Rom. 7:25). Ikha jngó, índo̱ guraʼwíí rí gíʼdoo numuu muʼni, xúniʼñámíjná muʼni rí naʼthí a̱jkiu̱lú.

14. Ndíjkha rí májánʼ muriʼkhui̱i̱ rí nandulúʼ muʼni rá.

¹⁴ Xúgiáanʼ ndayúlú muraʼwíí májánʼ rí gúʼni. Maski ajndu xúʼko̱, mbáa xa̱bu̱ bi̱ nandxa̱ʼóo edxu̱u̱ ndaʼyoo rí nguáná mbaʼyóoʼ mariʼkhu̱u̱ rí maraʼwíí maʼni. Guʼyáá xkri̱da májánʼ rí nigíʼ Jeobá rí niʼni gajmíi̱n xa̱bu̱ Nínive bi̱ nikuwa mbiʼi ndrígóo Jonás. Náa Biblia naʼthí: “Dios gajkhun ndiʼyoo rí nini ikhiin, rí ikhiin nitangi̱i̱n náa kambu̱ún dí ra̱májánʼ; ikha jngó Dios gajkhun nigáwiinʼ a̱jkiu̱u̱n ga̱jma̱a̱ numuu gamiéjunʼ rí niʼthí ma̱ʼkha̱ kayóo náa ikhiin, ga̱jma̱a̱ táʼkha̱ kayóo” (Jon. 3:10). Jeobá niriʼkhuu rí endxa̱ʼóo edxu̱u̱ maʼni gajmíi̱n xa̱bu̱ Nínive índo̱ niriʼkumijná ga̱jma̱a̱ niniñaaʼ dí xkawiiʼ. Xúʼko̱ nisngájma rí nandxa̱ʼóo májánʼ edxu̱u̱, rí nindxu̱u̱ xa̱bu̱ guabaaʼ ga̱jma̱a̱ naʼni̱i̱ a̱jkiu̱u̱n kaʼyulú. Raʼkháa xóo mbaʼin xa̱bu̱, Jeobá nandxa̱ʼóo májánʼ edxu̱u̱ índo̱ naraʼwíí rí maʼni, itháan índo̱ rí nakiʼnáa.

15. Nguáná gáʼyóóʼ muriʼkhui̱i̱ rí muʼni rá.

¹⁵ Nguáná mbaʼyóoʼ magutangaánʼ mundxaʼwamíjna̱ á mu niraʼwíí muʼni rí májánʼ. Mbáa mbaʼyóoʼ mundxa̱ʼwa̱a̱ edxu̱lúʼ índo̱ gaxtíʼkhuu xóo kuwáanʼ. Garmáʼáan a̱jkiu̱lú rí Jeobá nariʼkhuu rí xóo endxa̱ʼwáminaʼ maʼni (1 Rey. 21:20, 21, 27-29; 2 Rey. 20:1-5). Mbáa mangáanʼ mbaʼyóoʼ muriʼkhu̱u̱ rí niraʼwíí muʼni índo̱ nundrígú ikha nuxi̱ʼ. Guʼyáá ndiéjunʼ niʼni rey David. Ikhaa niraʼwíí rí maʼni ga̱jma̱a̱ numuu aʼdá xíñiiʼ Saúl índo̱ rí niguaʼtháán dí raʼkhí eni xa̱bu̱. Mú índo̱ niguaʼtháán rí phú gajkhun, niriʼkhu̱u̱ rí maʼni (2 Sam. 19:24-29). Nguáná mbaʼyóoʼ muʼni xúʼko̱ mangáanʼ.

16. a) Ndiéjunʼ ikha gambáyulú mu muraʼwíí mbá rí muʼni rá. b) Náa numuu gíʼmaa mundxaʼwamíjna̱ mbu̱júu̱ʼ ga̱jma̱a̱ numuu rí niraʼwíí muʼni, ga̱jma̱a̱ ndiéjunʼ gúʼni rá.

¹⁶ Náa Biblia naʼthí dí ragíʼmaa maʼchu̱lú muraʼwíí mbá rí gíʼdoo numuu (Prov. 21:5). Gíʼmaa mundxaʼwáá májánʼ edxu̱lúʼ, mú xúʼko̱ muraʼwíí májánʼ rí muʼni (1 Tes. 5:21). Mbá xkri̱da, bi̱ kuya̱ edxu̱u̱ náa mbá guʼwá gíʼmaa muriyaʼ mbiʼi mu mbuyáaʼ ikha ndrígóo Biblia ga̱jma̱a̱ rí na̱ʼkha̱ náa i̱yu̱lúʼ nákha xóó tsíraʼwíí rí muʼni. Ma̱ngaa májánʼ gáʼni rí muʼdxun rí guthi eʼwíínʼ bi̱ kuwa náa guʼwún. Garmáʼáan a̱jkiu̱lú rí Dios nixnúu xtágabu Abrahán rí gaʼdxuun rí gáʼthúu̱n a̱ʼgiu̱u̱ (Gén. 21:9-12). Bi̱ kuya̱ edxu̱u̱ gíʼmaa muriyaʼ mbiʼi mu munigajmaa. Índo̱ nuxkamaa mbá ikha nuxi̱ʼ náa nasngájma rí gíʼmaa muriʼkhu̱u̱  rí niraʼwíí muni, nuʼni maski ajndu eʼwíínʼ xánigunʼ. Bi̱ kuya̱ edxu̱u̱ nundxa̱ʼwa̱a̱ májánʼ edxu̱ún ga̱jma̱a̱ ñajúnʼ xa̱bu̱ gua̱bi̱nʼ, gíʼmaa maʼndún muriʼkhuíí rí endxa̱ʼwa̱a̱ edxu̱ún ga̱jma̱a̱ rí niraʼwíí muni á mu ndayóoʼ. Májánʼ gáʼni xí xúgiáanʼ nduʼyaridáá xkri̱da ndrígu̱ún, numuu dí rígi̱ maʼni rí marigá tsímáá náa congregación ma̱ngaa makuwáanʼ mbá jnduʼ (Hech. 6:1-4).

17. Ndiéjunʼ gambáyulú muraʼwíí muʼni dí májánʼ rá.

¹⁷ Tikhuu rí niʼthá muʼni gíʼdoo itháan numuu ki xóo i̱ʼwáʼ. Mbá xkri̱da, rí muʼthá á mu muniʼgúnʼ o munujúnʼ ga̱jma̱a̱ tsáa gúʼyáa gíʼdoo wéñuʼ numuu. Ma̱ngaa gíʼdoo wéñuʼ numuu muraʼwíí nguáná gugíʼdi̱i̱ muʼni káxi̱ ñajunʼ Jeobá. Nákha xóó tsíraʼwíí muʼni rígi̱, gíʼmaa mundxaʼwáá májánʼ edxu̱lúʼ ga̱jma̱a̱ munda̱ʼa̱a̱ Jeobá rí maxnúlúʼ ikha. Mbáa rígi̱ maʼni ngajyulú. Mú á mu nandulúʼ muraʼwíí rí májánʼ, gíʼmaa makumulúʼ kuʼyáá Jeobá, muʼdxawíín rí gáʼthulúʼ ga̱jma̱a̱ muʼnimbánii ikha ndrígóo (Prov. 1:5). Jeobá naxnúlú májánʼ xtágabu náa Ajngá rawunʼ. Ikha jngó gíʼdoo numuu muʼnigajmaa ga̱jma̱a̱ munda̱ʼa̱a̱ ikha ndrígóo Jeobá. Ikhaa ma̱ndoo maxnúlúʼ rí ndayúlú mu muraʼwíí muʼni rí nandoo ikhaa. Nákha xóó tsíraʼwíí rí muʼni, gíʼmaa muraximíjna̱lú: “Lá masngájma rígi̱ rí nandoʼ ka̱yo̱o̱ Jeobá ráʼ. Lá maʼni rí náa goʼwóoʼ marigá gagi ga̱jma̱a̱ tsímáá ráʼ. Ga̱jma̱a̱ lá masngájma rí ñajunʼ mbáa xa̱bu̱ bi̱ naʼngo̱o̱ a̱jkiu̱u̱n ga̱jma̱a̱ rí nandoo kaʼñún xáʼ.”

18. Náa numuu gíʼthu̱u̱n Jeobá rí ikháanʼ má guraʼwíí rí muʼni rá.

¹⁸ Jeobá tséʼniulu tsiakii mu maʼndulú kuʼyáá o muʼni ñajunʼ. Ikha naniñulú muraʼwíí rí muʼni. Ikhaa ndaʼyamajkuu ñajunʼ rí nuʼni ga̱jma̱a̱ rí muraʼwíí á mu mbuʼyamajkuíí o na̱nguá (Jos. 24:15; Ecl. 5:4). Ikhaa gíʼthu̱u̱n rí muʼnimbánii xó má ikha ndrígóo Ajngá rawunʼ. Á mu kuaʼdáá fe náa Jeobá ga̱jma̱a̱ nuʼnimbánii ikha rí naʼsngúlú, ikhú muraʼwíí muʼni rí májánʼ. Ma̱ngaa musngajmá rí ni̱ndxu̱lú xa̱bu̱ bi̱ najmañuu naraʼwíí rí májánʼ (Sant. 1:5-8; 4:8).