1. a) Náa numuu kaʼñún tikhun mudrigú gamajkhu rá. b) Ndiéjunʼ gúʼyáá náa artículo rígi̱ rá.

XÚ KÁʼNII guʼyamajkuíí mbáa xa̱bu̱ rá. Rí muʼniu̱u̱n mbá rí májánʼ ga̱jma̱a̱ mbuʼyamajkún. Mú, nduʼyamajkhún bi̱ nini mbá ñajunʼ o guáʼdáá mbá ñajunʼ kiejunʼ. Náa artículo rígi̱ gúʼyáá tsíin gíʼmaa mudrigú gamajkhu ga̱jma̱a̱ náa numuu.

2, 3. a) Náa numuu rí gíʼmaa muʼni mba̱a̱ Jeobá xóo kaʼyoo rá. (Atayáá timbá xtiʼkhu.) b) Tsáa nindxu̱u̱ Mugu̱ bi̱ naʼthí náa Revelación 5:13, ga̱jma̱a̱ náa numuu gíʼmaa muʼni mba̱a̱ xá.

² Revelación 5:13 naʼthí rí “bi̱ gíiʼ náa trono” ga̱jma̱a̱ Mugu̱ kaʼñún gamajkhu. Bi̱ “gíiʼ náa trono” nindxu̱u̱ Jeobá. Náa capítulo a̱jkhu̱ ndrígóo Revelación naʼthí numuu mbá nguéjmi̱i̱n bi̱ kuwa mekhuíí bi̱ nuthi mbá numuu rí Jeobá kaʼyoo magruigú gamajkhu bi̱ ‹xtáa kámuu mbiʼi‹. Ikhiin nuthi: “Jeobá, mínaʼ ikháánʼ, kaʼyaʼ rí matrigú gloria, gamajkhu ga̱jma̱a̱ tsiakii, numuu rí ikháánʼ nitani̱ xúgíʼ dí rígá, ga̱jma̱a̱ numaʼ ikháánʼ nindoo niguma xúgíʼ” (Rev. 4:9-11).

³ Mugu̱ bi̱ naʼthí náa Revelación 5:13 nindxu̱u̱ Jesucristo. Xú káʼnii eʼyáá rá. Numuu rí índo̱ nixtáa náa Ku̱ba̱ʼ,  Jesucristo nigumbiʼyuu ‹Mugiu̱u̱ Dios bi̱ naʼnijngudi̱i̱ aʼkhá dí rígá náa numbaaʼ› (Juan 1:29). Jesús ninindxu̱u̱ mbáwíi rey bi̱ nindoo maxnáximinaʼ mu maʼni káwíin bi̱ maʼtáñajúúnʼ. Ikha jngó, rígi̱ nindxu̱u̱ mbá májánʼ numuu mu mbuʼyamajkuíí. Ikhaa ma̱ngaa kaʼyoo magruigú gamajkhu numuu rí nindxu̱u̱ “Rey bi̱ naʼtañajunʼ ga̱jma̱a̱ Señor náa nutañajunʼ xóo mbaʼin señor” (1 Tim. 6:14-16). Mbáa nakumulú xóo mbaʼin ángeles bi̱ guáʼdáá tsiakii bi̱ nuni ajmúú ga̱jma̱a̱ nuthi: “Aʼdá mugu̱ tsí nixiyáa kaʼyoo magruigú tsiakii, rí magiʼdoo wéñuʼ, ku̱ma̱, gamajkhu, gloria ga̱jma̱a̱ maguma tsajkurámááʼ” (Rev. 5:12).

4. Ndíjkha rí gíʼdoo numuu muʼni mba̱a̱ Jeobá ga̱jma̱a̱ Cristo rá.

⁴ Juan 5:22, 23 naʼthí rí Jeobá nigíiʼ Cristo mu mani̱ndxu̱u̱ juez náa xúgínʼ xa̱bu̱ numbaaʼ. Rígi̱ nindxu̱u̱ mbá numuu rí gíʼmaa muʼni mba̱a̱ Jesús. Índo̱ nuʼni mba̱a̱ Jesús, ma̱ngaa nuʼni mba̱a̱ Jeobá. Á mu nuʼni mba̱a̱ Jesús ga̱jma̱a̱ Anu̱u̱ ma̱ndoo makuwáanʼ kámuu mbiʼi (atraxnuu Salmo 2:11, 12). *

5. Náa numuu rí xúgiáanʼ ndayóoʼ mbuyamajkhulú xá.

⁵ Xúgiáanʼ nigumáanʼ ‹xó má kaʼnii Dios› (Gén. 1:27). Rígi̱ nandoo gáʼthúu̱n rí mbaʼin xa̱bu̱ musngajma xóo káʼnii xa̱bu̱ nindxu̱u̱ Dios. Mbá xkri̱da, ma̱ndoo musngájma ngajua, rí májáánʼ xa̱bu̱ ni̱ndxu̱lú ga̱jma̱a̱ rí nagáwiinʼ a̱jkiu̱lú. Ma̱ngaa, xúgiáanʼ kuaʼdáá conciencia. Nindxu̱u̱ rí naʼthúlúʼ ndiéjunʼ nindxu̱u̱ rí májánʼ ga̱jma̱a̱ dí ra̱májánʼ, rí ñajunʼ jmbu, rí kaʼyoo ma̱ngaa rí na̱nguá (Rom. 2:14, 15). Xúgiáanʼ nanigulúʼ rí kaʼwu, rí nagui̱i̱ ga̱jma̱a̱ nandulúʼ makuwáanʼ tsímáá. Rígi̱ tséʼniulu tsiánguá, numuu rí Jeobá naniguʼ dí tsímáá. Nakujmaa kaʼwu rí xúgiáanʼ nigumáanʼ mu mbuʼyaridáá Dios náa xúgíʼ. Ikha jngó, xúgiáanʼ ndayóoʼ mbuyamajkhulú (Sal. 8:5).

6, 7. Xú káʼnii mixtiʼkhu ñajunʼ xa̱bi̱i̱ Jeobá ga̱jma̱a̱ náa eʼwíínʼ xa̱bu̱ rá.

⁶ Nduʼyáá má rí gíʼmaa mbuʼyamajkún iʼwíínʼ xa̱bu̱, mú mbáa naʼniulú mingíjyúuʼ makru̱ʼu̱lú xú káʼnii gíʼmaa mbuʼyamajkún. Rúʼko̱ rígá numuu rí mbá xúgínʼ xa̱bu̱ nuni xó má naʼni numbaaʼ ndrígóo Satanás. Mbaʼin xa̱bu̱ nduñún xa̱bekha ga̱jma̱a̱ gu̱ʼu̱ xóo xándú, jamí nuni mba̱a̱ xóo mbáa dios. Nduyamajkhún wéñuʼ ga̱jma̱a̱ na̱nguá eyamajkhún xó má Jeobá e̱nda̱ʼa̱. Tikhun nduyaridáá xóo nugíʼ xtíin ga̱jma̱a̱ nuni xó má xa̱bu̱ bi̱ najmaʼnuʼ wéñuʼ. Mbáa nduyaridúún xa̱bu̱ bi̱ kuya̱ edxu̱u̱ náa política o náa guʼwá dxajkun, o bi̱ najmaʼnunʼ náa cine o náa gitsíin.

⁷ Bi̱ cristianos gajkhun nduyáá dí raʼkhí nindxu̱u̱ rí mbuyamajkún me̱ndaʼkho iʼwíínʼ xa̱bu̱. Náa xúgínʼ xa̱bu̱ bi̱ nikuwa, i̱ndó Jesús niniñuʼ mbá májánʼ xkri̱da rí gíʼmaa mbuyaridáá (1 Ped. 2:21). Garmáʼáan a̱jkiu̱lú rí “xúgínʼ nixudami̱jna̱ aʼkhá ga̱jma̱a̱ na̱nguá eʼngu̱u̱n gúxkamaa gloria ndrígóo Dios” (Rom. 3:23). Ikha jngó nimbáa xa̱bu̱ ragíʼmaa maguma mba̱a̱. A mu nduʼyamajkuíí me̱ndaʼkho mbáa xa̱bu̱, nuʼni gawíínʼ Jeobá.

8, 9. a) Xú káʼnii guʼyamajkún xa̱bu̱ Ñajunʼ rá. b) Nguáná tséʼnimbulú kuñún Xa̱bu̱ Ñajunʼ rá.

⁸ Tikhun xa̱bu̱ kaʼñún mudrigú gamajkhu  ga̱jma̱a̱ numuu ñajunʼ rí kuwa runi. Mbá xkri̱da, gundxaʼwamíjna̱ rí nuni Xa̱bu̱ Ñajunʼ. Ikhiin nuñajunʼ mu xa̱bu̱ makuwá májánʼ ga̱jma̱a̱ muxnún rí nda̱ñúnʼ xa̱bu̱. Xúgiáanʼ nambáyulúʼ ñajunʼ rí kuwa runi. Apóstol Pablo niʼthí rí cristianos gíʼmaa mbuʼñún xóo “Xa̱bu̱ Ñajunʼ” ga̱jma̱a̱ rí gíʼmaa muʼnimbulúʼ xtángoo. Ikha niʼthí rí “guxnu̱u̱n xúgínʼ rí kaʼñún” Mbá xkri̱da, Bi̱ na̱nda̱ʼa̱ impuesto guxna̱a̱ impuesto”, ga̱jma̱a̱ “bi̱ na̱nda̱ʼa̱ gamajkhu, guxna̱a̱ gamajkhu” (Rom. 13:1, 7).

⁹ Xa̱bi̱i̱ Jeobá nunimíjna̱xu mu mbuyamajkúnxu Xa̱bu̱ Ñajunʼ. Mú mámbá xuajen gíʼdoo costumbre ndrígu̱ún. Ikha jngó mbáa Xa̱bu̱ Ñajunʼ ma̱ndoo manda̱ʼa̱ mbá rí imba̱a̱ Xa̱bu̱ Ñajunʼ tsínda̱ʼa̱. Tséʼniuu ma náa kuwáanʼ, bi̱ ñajunlú xa̱bi̱i̱ Dios numbáñuun Xa̱bu̱ Ñajunʼ. Á mu ikhiin nundu̱ʼu̱lú muʼni mbá rí maʼni dí xunimbulú náa Dios, tséʼnilú. Ikhú nuʼnimbulúʼ ga̱jma̱a̱ nduʼyamajkuíí Jeobá, raʼkhíin xa̱bu̱ (atraxnuu 1 Pedro 2:13-17). *

10. Xú káʼnii májánʼ xkri̱da niniñaaʼ xa̱bi̱i̱ Jeobá rá.

¹⁰ Náa Biblia nuxkamaa májánʼ xkri̱da ndrígu̱ún xa̱bi̱i̱ Jeobá bi̱ ndiyamajkhún ga̱jma̱a̱ ninimbu̱ún kuñún Xa̱bu̱ Ñajunʼ. Guʼyáá xkri̱da ndrígóo José ga̱jma̱a̱ María. Índo̱ Xa̱bu̱ Ñajunʼ romanos nindúún mbuyáá nguáthi̱i̱n xa̱bu̱ kuwa náa nutañajunʼ, ikhiin nigún asndu Belén mu magumaraʼmáʼ mbiʼñún maski ajndu María inuu magumaa a̱ʼdióo (Luc. 2:1-5). Apóstol Pablo ma̱ngaa nigíʼ xkri̱da májánʼ numuu rí ndiʼyamajkhún Xa̱bu̱ Ñajunʼ. Índo̱ nini tsu̱di̱i̱ rí niʼni mbá dí ra̱májánʼ, nimbáyuminaʼ ga̱jma̱a̱ gamajkhu náa inuu rey Herodes Agripa ga̱jma̱a̱ náa Festo, gobernador náa Roma rí kaʼyoo Judea (Hech. 25:1-12; 26:1-3).

11, 12. a) Ndíjkha rí tséʼyamajkhún wéñuʼ Xa̱bu̱ ede̱ rá. b) Ndiéjunʼ nirígá índo̱ mbáa ndxájulú náa Austria ndiʼyamajkuu mbáa Xa̱bu̱ Ñajunʼ rá.

¹¹ Rí mbiʼi xúgi̱, lá gíʼmaa mbuʼyamajkún wéñuʼ xa̱bu̱ ede̱ náa guʼwá ndxajkun ráʼ. Na̱nguá. Gíʼmaa mbuʼñún xó má eʼwíínʼ xa̱bu̱. Maski ajndu ikhiin guáʼthi̱i̱n rí mbuyamajkún wéñuʼ, ra̱májánʼ muʼni. Náa numuu rá. Numuu rí tsésngáa rí gajkhun ga̱jma̱a̱ numuu Dios ma̱ngaa numuu Biblia. Jesús niʼthá numún xa̱bu̱ ede̱ náa guʼwá ndxajkun numuu rí tsésngúún rí gajkhun xa̱bu̱ ga̱jma̱a̱ niʼthún rí a̱jma̱ inún (Mat. 23:23, 24). Mú na̱nguá nindxu̱u̱ ra̱májánʼ rí mbuyamajkún Xa̱bu̱ Ñajunʼ. Nguáná numbayúlú índo̱ nduyáá rí nduʼyamajkhún.

¹² Mbáa Xa̱bu̱ Ñajunʼ bi̱ nimbáyulúʼ ninindxu̱u̱ Heinrich Gleissner, doctor náa Derecho ga̱jma̱a̱ político ndrígóo Austria. Nákha Raga̱jma̱ Guerra náa xúgíʼ Numbaaʼ, bi̱ nazis nirugua̱a̱ ga̱jma̱a̱ nigún kuya̱a̱ ga̱jma̱a̱ tren náa mbá guʼwá e̱jua̱nʼ. Náa tren nininiʼ Leopold Engleitner, mbáa xa̱bi̱i̱ Jeobá náa Austria. Ndxájulú Engleitner niʼthúu̱n Cleissner ga̱jma̱a̱ gamajkhu ndiéjunʼ rí nuʼnimbulúʼ, ikhaa niʼdxuun májánʼ wéñuʼ. Índo̱ rí niguámbá guerra, Xa̱bu̱ Ñajunʼ bugi̱ nijmuu mbaʼa  nuthu ñajunʼ ndrígóo mu mambáñun xa̱bi̱i̱ Jeobá náa Austria. Ikháanʼ nduʼyáá i̱ʼwáʼ xú káʼnii Xa̱bu̱ Ñajunʼ numbayúlú índo̱ nduʼyamajkhún.

13. Tsíin gíʼmaa mbuʼyamajkún itháan ga̱jma̱a̱ náa numuu rá.

¹³ Xúgínʼ a̱ngiu̱lú gíʼma mbuʼyamajkún. Mú itháan a̱ngiu̱lú bi̱ kuya̱ edxu̱u̱ náa congregación, xóo superintendentes ndrígóo circuito, Comités ndrígóo Sucursal ga̱jma̱a̱ Cuerpo Gobernante (atraxnuu 1 Timoteo 5:17). * Xúgínʼ a̱ngiu̱lú bugi̱ nuñewa̱a̱n xuajñu Dios. Náa Biblia naʼthí rí ni̱ndxu̱ún xóo regalo náa congregación (Efes. 4:8). Ikha jngó ndayóoʼ mbuʼyamajkún tséʼniuu má náa xuajen eguwaʼ, nguáthá estudio guáʼdáá ga̱jma̱a̱ nguáthá mbújkha̱a̱ guáʼdáá (atayáá kúgumaʼá “Ndiéjunʼ eyoo gáʼthúu̱n”). Cristianos bi̱ timbá siglo nixnulú mbá májánʼ xkri̱da. Ikhiin ndiyamajkhún a̱ngiu̱lú bi̱ ndi̱ya̱ edxu̱u̱, ikháanʼ mangáanʼ nuʼni xúʼko̱ kaʼnii. Ikha jngó, índo̱ kuwáanʼ gajmiúlú a̱ngiu̱lú bugi̱, tséʼñún xóo ángeles o dí ra̱ʼkhá tháán guáʼdáá numún. Mú, nduʼyamajkhún ga̱jma̱a̱ numuu ñajunʼ gakhi̱i̱ rí nuni ga̱jma̱a̱ rí ni̱ndxu̱ún xa̱bu̱ gua̱bi̱nʼ (atraxnuu 2 Corintios 1:24 * ga̱jma̱a̱ Revelación 19:10). *

14, 15. Xú káʼnii mixtiʼkhu ni̱ndxu̱ún bi̱ kuya̱ edxu̱u̱ náa congregación ga̱jma̱a̱ náa mbaʼin xa̱bu̱ ede̱ rá.

 ¹⁴ Bi̱ kuya̱ edxu̱u̱ náa congregación ni̱ndxu̱ún xóo báxtúu bi̱ májánʼ a̱jkiu̱ún. Ikhiin tsíñún mbiʼyamajkún xóo bi̱ itháan najmaʼnunʼ. Na̱nguá ni̱ndxu̱ún xóo xa̱bu̱ ede̱ náa guʼwá dxajkun rí mbiʼi xúgi̱. Ma̱ngaa na̱nguá ni̱ndxu̱ún xóo xa̱bu̱ ede̱ bi̱ nikuwa nákha nixtáa Jesús. Jesús niʼthí ga̱jma̱a̱ numún ikhiin: “Asjndo naʼ xili ri huajun guini-jayi iñu matriguin naʼ ri napeʼtsohuañu xabo, jame xuʼkue-ma naʼ xili ri huajun guini-jayi itriguin naʼ sinagoga. Mapu-nandun ri mapu-gamaku guitraxin xua” (Mat. 23:6, 7).

¹⁵ Bi̱ kuya̱ edxu̱u̱ nunimbánii ajngáa rígi̱ rí niʼthí Jesús: “Indo ikanʼla maxaniguaʼlala ri miʼtanʼla Rabí, numu ri mbahui tsi ñajun Xabo Idi naʼ inaʼla, tsi ñajun Cristo, xoma ikanʼla mba xuguianʼla ñajuanʼla dxaju. Asjndo nimbala xabo maxutanla padre naʼ tsudu numba, numu ri mbahui Anaʼla, tsi xta mikui. Ni maxaniguaʼla miʼtanʼla xabo idi, numu ri mbahui Xabo Idi xta tsi ñajun Cristo. Tsi guini naʼ inaʼla, ganindxu tsi maʼne ñajuanʼla. Numu ri xabo tsi makuximinaʼ, tsuʼkue tsi mixrigüi, indo xabo tsi maxriguminaʼ, tsuʼkue tsi mixuxi” (Mat. 23:8-12). Índo̱ bi̱ kuya̱ edxu̱u̱ náa congregación bi̱ kuwa xúgíʼ numbaaʼ ni̱ndxu̱ún xa̱bu̱ gua̱bi̱nʼ ga̱jma̱a̱ nuni rí niʼthí Jesús, a̱ngiu̱lú nandún kuñún ga̱jma̱a̱ nduyamajkhún.

16. Náa numuu gíʼmaa muʼnimi̱jna̱ mbuʼyamajkún eʼwíínʼ rá.

¹⁶ Mbáa mangajyulú majmañulúʼ mbuʼyamajkún eʼwíínʼ xó má gíʼmaa. Cristianos bi̱ nikuwa nákha siglo timbá mangiin niʼniún mingíjyúuʼ (Hech. 10:22-26; 3 Juan 9, 10). Mú gíʼdoo numuu muʼnimi̱jna̱ muʼni. Mú a mu nduʼyamajkhún eʼwíínʼ xó má Jeobá eyoo, maguma tsajkurámáánʼ wéñuʼ.

17. Xú káʼnii gambáyulú rí mbuyamajkún Xa̱bu̱ Ñajunʼ rá.

¹⁷ Índo̱ nduʼyamajkhún Xa̱bu̱ Ñajunʼ bi̱ kuwa náa xuajñulú, mbáa xúʼko̱ mumbayúlú mu muniñu̱lúʼ muʼtáraʼa. Mbáa asndu nuthi rí májánʼ ga̱jma̱a̱ numuu ñajunʼ rí kuwáanʼ ru̱ʼni̱. Rígi̱ rí nirígá nákha niʼníín náa Alemania. Mbáa precursora bi̱ mbiʼyuu Birgit ni̱jkha̱ náa niguámbóo escuela a̱ʼdióo. Maestras nitháán Birgit rí ninigu̱nʼ maguaʼdiin e̱ji̱i̱n bi̱ ni̱ndxu̱ún Testigos mámbá tsiguʼ. Ma̱ngaa nitháán rí e̱ji̱i̱n Testigos nuyambáá mu marigá tsímáá náa escuela. Birgit niʼthúún rí anu̱ún nusngúún e̱jñún rí gíʼmaa muni xó má eyoo Dios, rí ma̱ngaa mbuyamajkún maestros. Mbáa maestra niʼthí rí á mu xúgínʼ e̱ji̱i̱n ni̱ndxu̱ún Testigos, phú maniguuʼ maʼsngúún. Maestras bugi̱ nuthi rí májánʼ ga̱jma̱a̱ numún e̱jñún Testigos, mbáa rí ikhiin ni̱jkha̱ náa asamblea mbaʼa xmáná nda̱wa̱á.

18, 19. Ndiéjunʼ gíʼmaa marmáʼáan a̱jkiu̱lú índo̱ nduʼyamajkhún bi̱ kuya̱ edxu̱u̱ rá.

 ¹⁸ Ikha ndrígóo Ajngáa Rawunʼ Dios ma̱ndoo mambáyulúʼ makruʼulú xú káʼnii guʼyamajkún bi̱ kuya̱ edxu̱u̱ náa congregación (atraxnuu Hebreos 13:7, 17) * (atayáá kúgumaʼá “Ndiéjunʼ eyoo gáʼthúu̱n”). Ikháanʼ gíʼmaa muʼthúún rí májánʼ kuwa rúni ñajunʼ ndrígu̱ún. Ma̱ngaa gíʼmaa mumbáñún rí muʼnimbulúʼ ikha rí gúxnulú. Mú xúʼko̱ ikhiin muni ga̱jma̱a̱ gagi ñajunʼ ndrígu̱ún. Ma̱ngaa náa Biblia naʼthí rí gíʼmaa mbuʼyaridáá fe ndrígu̱ún. Mú rígi̱ tsíyoo gáʼthúu̱n rí gíʼmaa mbuʼyaridáá xú káʼnii egíʼ xtíin, xóo ethi ga̱jma̱a̱ xóo esngáa tikhun bi̱ kuya̱ edxu̱u̱ bi̱ najmaʼnunʼ wéñuʼ. Á mu nuʼni xúʼko̱, makujmaa xóo rí nduʼyaridúún xa̱bu̱ ga̱jma̱a̱ raʼkháa náa Cristo. Xámbumulú rí bi̱ kuya̱ edxu̱u̱ ni̱ndxu̱ún xa̱bu̱ aʼkhá xó má ikháanʼ.

¹⁹ Á mu nduʼyamajkhún bi̱ kuya̱ edxu̱u̱ ga̱jma̱a̱ tséʼñún xóo xa̱bu̱ bi̱ najmaʼnuʼ wéñuʼ, xúʼko̱ ikháanʼ mumbáñún mú mani̱ndxu̱ún má xúʼko̱ xa̱bu̱ gua̱bi̱nʼ ga̱jma̱a̱ xundxa̱ʼwa̱míjna̱ rí ni̱ndxu̱ún itháan míjínʼ ki xóo eʼwíínʼ o rí tsíjgawiin.

20. Xú káʼnii embáyulú índo̱ nduʼyamajkhún eʼwíínʼ rá.

²⁰ Rí mbuʼyamajkún eʼwíínʼ mambáyulúʼ mu xundxa̱ʼwa̱míjna̱ i̱ndó numulúʼ ikháanʼ ga̱jma̱a̱ manindxu̱lúʼ xa̱bu̱ guabaaʼ á mu eʼwíínʼ nduyamajkulú wéñuʼ. Ma̱ngaa nañewu̱nlú. Nambáyulúʼ mu xúniʼñáanʼ Jeobá á mu mbáa bi̱ nduʼyamajkuíí wéñuʼ naʼni mbá rí tséniguluʼ. Ma̱ngaa nayambáá mu makuwáanʼ mbáa jnduʼ náa xuajñu Jeobá. Náa xuajñu Dios tséʼyamajkhuu wéñuʼ nimbáa xa̱bu̱.

21. Xú embáyulú rí mbuʼyamajkún eʼwíínʼ rá.

²¹ Rí itháan nambáyulúʼ rí mbuʼyamajkún eʼwíínʼ nindxu̱u̱ rí Dios nandoo kaʼyulú. Ma̱ngaa, índo̱ nduʼyamajkhún eʼwíínʼ nusngájma rí nuʼnimbulúʼ náa Dios ga̱jma̱a̱ naguáju̱n jmbu náa ikhaa. Xúʼko̱ Jeobá ma̱ndoo mariʼñuu Satanás, bi̱ niʼthí rí nimbáa xáwiji̱ jmbu náa Dios (Prov. 27:11). Mbaʼin xa̱bu̱ na̱nguá eyáá xú káʼnii guyamajkún eʼwíínʼ xóo gíʼmaa. Guxnáa núma̱aʼ Jeobá rí naʼsngúlú xú káʼnii guʼyamajkún eʼwíínʼ xó má eyoo ikhaa.