Mu muniʼnííʼ májánʼ mbáa, gíʼdoo numuu mbuʼyáá rí niʼni. Xúʼko̱ má kayúʼ, á mu nandaʼ matatsiʼniiʼ májánʼ Dios, ndayóoʼ ma̱ta̱ya̱a̱ ndiéjunʼ niʼni. Maʼniaʼ tsiánguá índo̱ gáta̱ya̱a̱ nguáthá embáyulú mbuʼyáá rí niʼni Dios ga̱jma̱a̱ xú káʼnii rígi̱ kagujtuminaʼ ga̱jma̱a̱ rí xóo makuwáanʼ nda̱wa̱á.

Jeobá nindxu̱u̱ bi̱ Niʼniáanʼ, ga̱jma̱a̱ xóo xa̱bu̱ nindxu̱u̱ “nakujmaa kaʼwu asndu nákhi nigíʼdu̱u̱ niʼni numbaaʼ, numuu dí nakujmaa náa xúgíʼ rí niguma” (Romanos 1:20). “Ikhaa nindxu̱u̱ bi̱ Niʼni ku̱ba̱ʼ ga̱jma̱a̱ tsiakii ndrígóo, Ikhaa bi̱ nigíʼ ku̱ba̱ʼ náa kaʼyoo magiʼi náa najma̱a̱ numuu dí najmañuu wéñuʼ, ga̱jma̱a̱ Bi̱ nakro̱ʼo̱o̱ niʼni ma̱ja̱nʼ mekhu” (Jeremías 10:12). Xúgíʼ rí mitsaan rí niguma ma̱ngaa nasngájmulúʼ rí nandoo kaʼyulú wéñuʼ.

Atatsaʼwáminaʼ rí mitsaan wéñuʼ nindxu̱u̱ vida ndrígúlú numuu rí Jeobá niʼniáanʼ xóo “má kaʼnii ikhaa” (Génesis 1:27). Rígi̱ naniñulú musngájma mangáanʼ xóo xa̱bu̱ nindxu̱u̱ ikhaa. Ma̱ngaa niʼniáanʼ mu makru̱ʼu̱lú xóo endxa̱ʼóo edxu̱u̱ ga̱jma̱a̱ xtángoo ndrígóo. Índo̱ nuʼniñámíjná maxná ikhulú kuwáanʼ itháan gagi, ga̱jma̱a̱ nduʼyáá rí gíʼdoo numuu rí kuwáanʼ. Ma̱ngaa ma̱ndoo mambaxúlúʼ gajmiúlú.

Ku̱ba̱ʼ náa kuwáanʼ nasngájma rí Jeobá nandoo kaʼyulú wéñuʼ. Xó má niʼthí apóstol Pablo, Dios “tániñuuʼ rasngájma rí nindxu̱u̱ májánʼ, naʼni maxnúu ruʼwa asndu náa mekhuíí ga̱jma̱a̱ naʼni marigá wéñuʼ xndúu ixi̱, nuphiʼtsu asndu nigiʼmún ga̱jma̱a̱ gagi” (Hechos 14:17). Índo̱ Dios niʼni Ku̱ba̱ʼ, raʼkháa i̱ndó niʼthí maxnúlúʼ rí ndayúlú, rí ma̱ngaa nixnúlú xúgíʼ rí ndayúlú mu makuwáanʼ gagi. Ga̱jma̱a̱ rígi̱ nindxu̱u̱ mbá chíʼgíʼ rí káʼnii gáxnulú nda̱wa̱á.

Jeobá niʼni Ku̱ba̱ʼ mu xa̱bu̱ numbaaʼ makuwáanʼ  ikhí kámuu mbiʼi. Náa Biblia naʼthí rí “ku̱ba̱ʼ nixnúún mu makuwá xa̱bu̱” ga̱jma̱a̱ rí “táʼni marigá i̱ndó ku̱ba̱ʼ, ikhaa niʼni mu makuwá xa̱bu̱” (Salmo 115:16; Isaías 45:18). Tsáa gáxtáa ikhí ga̱jma̱a̱ nguáthá mbiʼi rá. Náa Biblia nariʼña̱a̱: “Xa̱bu̱ bi̱ nuni rí jmbu makuwá kámuu mbiʼi náa tsu̱du̱u̱ ku̱ba̱ʼ” (Salmo 37:29).

Jeobá niʼnii Adán ga̱jma̱a̱ Eva mu makuwá kámuu. Niʼni makuwá timbíi̱n xa̱bu̱ náa ku̱ba̱ʼ mitsaan ‹mu mudu ga̱jma̱a̱ muñewa̱a̱n› (Génesis 2:8, 15). Dios nixnúún mbá ñajunʼ rí nagui̱i̱ wéñuʼ: “Gaguaʼdíin e̱jña̱la, gaʼni mbaʼánʼ, gakuwáanʼ náa xúgíʼ tsu̱du̱u̱ ku̱ba̱ʼ ga̱jma̱a̱ gutañájunʼ” (Génesis 1:28). Ikha jngó, Adán ga̱jma̱a̱ Eva ma̱ndoo makuwá tsímáá kámuu mbiʼi náa tsu̱du̱u̱ Ku̱ba̱ʼ. Mú gíná ninindxu̱u̱ numuu rí ikhiin niraʼwíí rí xúnimbu̱ún kuyáá Dios ga̱jma̱a̱ nánguá makuwá náa majñúnʼ xa̱bu̱ bi̱ “nuni rí jmbu” bi̱ “makuwá kámuu mbiʼi náa tsu̱du̱u̱ ku̱ba̱ʼ”. Mú, xó má mbuʼyáá, rí nini tariʼkhuu rí nindxa̱ʼóo edxu̱u̱ Jeobá maʼni ga̱jma̱a̱ numún xa̱bu̱ numbaaʼ ga̱jma̱a̱ náa Ku̱ba̱ʼ. Mú ginii guʼyáá imbo̱o̱ rí niʼni Dios.

Náa numuu rí Jeobá nixnúlú Ajngóo, rí nindxu̱u̱ Biblia rá. Numuu rí nandoo muniʼnííʼ (Proverbios 2:1-5). Gajkhun ná rí Biblia tseriʼña̱a̱ xúgíʼ graxe̱ rí nuʼnilú ga̱jma̱a̱ numuu Dios, nimbá libro xándoo maʼni (Eclesiastés 3:11). Mú xúgíʼ rí naʼthí náa Biblia nambáyulúʼ muniʼnííʼ. Ma̱ndoo mbuʼyáá xú káʼnii nindxu̱u̱ Dios índo̱ nduʼyáá xú káʼnii eʼniún xa̱bu̱ numbaaʼ. Guʼyáá tsíin xa̱bu̱ bi̱ Dios nandoo kaʼñún (Salmo 15:1-5). Najmañulúʼ xú káʼnii eyoo mbuʼyamajkuíí, xú káʼnii nindxu̱u̱ xtángoo ndrígóo ga̱jma̱a̱ rí nandxa̱ʼwáminaʼ ga̱jma̱a̱ numuu rí maraʼdáá wéñuʼ. Ma̱ngaa Biblia nambáyulúʼ muniʼnííʼ májánʼ bi̱ Niʼniáanʼ náa xúgíʼ rí niʼthí ga̱jma̱a̱ rí niʼni A̱ʼdióo, Jesucristo (Juan 14:9).

Jeobá ma̱ngaa nixnúlú Ajngóo mu mbuʼyáá xú káʼnii gakuwáanʼ tsímáá ga̱jma̱a̱ muguaʼdáá mbá numuu mu makuwáanʼ. Ikhí naʼthúlú ndiéjunʼ gíʼmaa muʼni mu makuwáanʼ tsímáá mbá guʼwáanʼ ga̱jma̱a̱ rí xaxmiéjunlú wéñuʼ. Xó má gúʼyáá nda̱wa̱á, náa Biblia nariʼña̱a̱ graxe̱ rí itháan gíʼdoo numuu, mbáa xkri̱da, náa numuu dí rígá wéñuʼ tsingíná rá. Ga̱jma̱a̱ xú káʼnii gakuwáanʼ nda̱wa̱á rá. Ma̱ngaa naʼthúlúʼ rí niʼni Dios mu mambanúu rí nandoo maʼni.

Rígá mbaʼa rí Biblia naʼni mani̱ndxu̱u̱ mbá libro mitsaan ga̱jma̱a̱ rí nasngájma rí na̱ʼkha̱ náa Dios. Maski ajndu niniráʼmáʼ mbá 40 xa̱bekha náa mbá 1,600 tsiguʼ, ikháá ma eʼthí náa xúgíʼ i̱yi̱i̱ʼ, numuu rí bi̱ niʼni nindxu̱u̱ Dios (2 Timoteo 3:16). Libro rígi̱ mixtiʼkhuu nindxu̱u̱ ki xóo i̱ʼwáʼ numuu rí tsixtiʼkhuu rí gíwánʼ raʼthí, xó má esngájma mbaʼa i̱yi̱i̱ʼ rí nigumaraʼmáʼ wajyúúʼ. Ma̱ngaa, Biblia nikríyaʼ maski ajndu xa̱bu̱ tsíñún rí miʼtájuíii, rí mixnáraʼa ga̱jma̱a̱ rí migixnuu. Xúgi̱ libro rígi̱ naxtango̱jo̱o̱ itháan ga̱jma̱a̱ nutajuíi itháan náa numbaaʼ. Rí kuaʼdaa Biblia rí mbiʼi xúgi̱, nasngájmaa rí Ajngáa rawunʼ Dios “mbajyúuʼ asndu kámuu mbiʼi” (Isaías 40:8).

Imbo̱o̱ rí niʼni Dios mu masngájma rí maʼnimbánuu rí nikudaminaʼ maʼni nindxu̱u̱ mbá regalo kiejunʼ. Xó má niʼthá ginii, Dios nindoo rí xa̱bu̱ numbaaʼ makuwá kámuu náa tsu̱du̱u̱ Ku̱ba̱ʼ. Mú índo̱ Adán niraʼwíí rí xáʼnimbo̱o̱ kaʼyoo Dios ga̱jma̱a̱ nikudaminaʼ aʼkhá, niʼnimbáti̱ga̱ rí maxtáa kámuu mbiʼi, ga̱jma̱a̱ rígi̱ niʼni rí asndu e̱ji̱i̱n xákuwa kámuu mangiin. “Ikha jngó, ga̱jma̱a̱ numuu mbáwíi xa̱bu̱ nito̱ʼo̱o̱ aʼkhá náa numbaaʼ. Ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, rí nakháñulú nigadráʼa náa xúgínʼ xa̱bu̱ numuu rí xúgínʼ xa̱bu̱ nixuda̱mi̱jna̱ aʼkhá” (Romanos 5:12). Nikujmaa rí numuu rí túnimbu̱ún xambánuu rí nindoo maʼni Dios. Mú ndiéjunʼ niʼni Jeobá rá.

Rí xóo niʼni nisngájma xóo nindxu̱u̱. Niʼni rí jmbu ga̱jma̱a̱ nixnúu castigo Adán ga̱jma̱a̱ Eva numuu rí túnimbu̱ún, mú ma̱ngaa, numuu rí nigiʼdoo ngajua, ndiyáaʼ xóo maʼni mu makuwá májánʼ nda̱wa̱á xa̱bu̱ numbaaʼ. Jeobá nijmuu ku̱ma̱ ndrígóo mu mbayáaʼ xóo maraʼnuu xkujndu rúʼko̱ ga̱jma̱a̱ núkhu má ikhú niʼthí rí maʼni (Génesis 3:15). Majmiuu A̱ʼdióo Jesucristo mu maʼni káwáanʼ  náa aʼkhá ga̱jma̱a̱ rí nakháñulú. Ndiéjunʼ gáʼni xá.

Mú maʼni̱i̱ ga̱jma̱a̱ numuu rí táʼnimbo̱o̱ Adán, Jeobá nikunguanʼ Jesús náa tsu̱du̱u̱ Ku̱ba̱ʼ mu maʼsngúún xa̱bu̱ náa kamba̱a̱ rí maʼni makuwáanʼ ga̱jma̱a̱ rí maxnáxi̱i̱ “vida ndrígóo mu maʼtsiwíin mbaʼin xa̱bu̱” a (Mateo 20:28; Juan 14:6). Jesús nindoo rí niʼtsiwáanʼ numuu rí ninindxu̱u̱ jmbii xóo Adán, mú Jesús niʼnimbo̱o̱ kaʼyoo má xúʼko̱ Dios, asndu índo̱ nikháñuu. Numuu rí na̱nguá kaʼyoo makhañúu, Jeobá nikuxi̱i̱ ga̱jma̱a̱ niniñuʼ maʼga̱a̱ mekhuíí. Xúʼko̱ Jesús ma̱ndoo maʼni rí xa̱bu̱ numbaaʼ makuwá kámuu, mbá rí Adán tándoo maʼni. “Xó má rí táʼnimbo̱o̱ mbáa xa̱biya̱ mbaʼin ninindxu̱ún xa̱bu̱ aʼkhá, xúʼko̱ má ma̱ngaa, ga̱jma̱a̱ numuu rí mbáa xa̱bu̱ niʼnimbo̱o̱ mbaʼin mani̱ndxu̱ún jmbiin” (Romanos 5:19). Ga̱jma̱a̱ numuu tsigijñaʼ ndrígóo Jesús, Dios maʼnimbánuu rí niʼthí maxnún xa̱bu̱ numbaaʼ rí makuwá kámuu mbiʼi náa tsu̱du̱u̱ Ku̱ba̱ʼ.

Rí xóo Jeobá niʼnimbánuu xkujndu rí Adán nikudaminaʼ rígi̱ ma̱ndoo mambáyulúʼ muniʼniiʼ itháan májánʼ. Najmañulúʼ rí naʼthí maʼnii ‹manimbánuu tsiakii› (Isaías 55:11). Ma̱ngaa nasngájma rí nandoo kaʼyulú. “Ikha jngó rí nandoo kaʼyulúʼ Dios nikujmaa náa ikháanʼ, numuu rí Dios nikuʼmaa bi̱ mbáwíi A̱ʼdióo náa numbaaʼ mu ikháanʼ ma̱ndoo makuwáanʼ ga̱jma̱a̱ numuu ikhaa. Rí nandoo kaʼyulúʼ nandoo gáʼthúu̱n raʼkháa rí ikháanʼ nindulúʼ kuʼyáá Dios, rí ikhaa nindoo kaʼyulúʼ ga̱jma̱a̱ nikuʼmaa A̱ʼdióo xóo mbá tsigijñaʼ ga̱jma̱a̱ numuu aʼkhálú” (1 Juan 4:9, 10).

Dios nindoo maxnáa A̱ʼdióo aʼdá giʼnii ga̱jma̱á numulúʼ. Rígi̱ nasngájmulúʼ rí ‹máxnulú ga̱jma̱a̱ numuu ikhaa xúgíʼ i̱ʼwáʼ› rí niʼthí maxnúlúʼ (Romanos 8:32). Ndiéjunʼ imbo̱o̱ niʼthí maxnúlúʼ xá. Guʼyáá.