Asndu xúgi̱ na̱jkha̱ rajmañulú tikhu enii rí mambáyulúʼ mbuʼyáá tsáa nindxu̱u̱ Dios. Nijmañulúʼ rí náa Biblia nasngáa rí ikhaa mbiʼyuu Jeobá ga̱jma̱a̱ rí itháan nakujmaa náa ikhaa, nindxu̱u̱ ngajua. Ga̱jma̱a̱ nijmañulúʼ rí mbaʼa niʼni ikhaa ga̱jma̱a̱ rí maʼni náa xa̱bu̱ numbaaʼ. Rí muniʼnííʼ Dios nandoo gáʼthúu̱n itháan, mú mbáa ikháán natraximínáʼ á mu xánindxu̱u̱ ndíí rí matani.

Jeobá nakudaminaʼ rí á mu ikháán natayááʼ, “ikhaa maniñaminaʼ rí mataxkamaa” (1 Crónicas 28:9). Á mú natani tsiakimínáʼ matatsiʼnííʼ, maraʼdáá mbá dí ra̱ʼkhá tháán mitsaan: Rí mambaxáʼ ga̱jma̱ʼ ikhaa (Salmo 25:14). Mú xú káʼnii gándoo gambáyaaʼ rí mambaxáʼ ga̱jma̱ʼ xá.

Majphú gagi gáraxtaa. Náa Biblia naʼthí rí Jeobá nindxu̱u̱ “Dios gagi” (1 Timoteo 1:11). Á mu naraxtaa mijngii náa Dios ga̱jma̱a̱ nanindxa̱ʼ xóo ikhaa majphú gagi gáraxtaa, ga̱jma̱a̱ rúʼko̱ gambayaaʼ xóo xa̱bu̱ nindxa̱a̱ʼ, xóo etatsaʼwáminaʼ ga̱jma̱a̱ xóo ekumaʼ (Salmo 33:12). Ma̱ngaa mambáyaʼ matani gaʼduunʼ rí maʼniaʼ matani dí raʼkhí, mambáyaʼ matani rí májánʼ ga̱jma̱a̱ mambaxáʼ májánʼ gajmiáanʼ eʼwíínʼ. Á mú natani xúʼko̱ mangáán maratha xóo niʼthí salmista: “Ra̱ʼkhá tháán májánʼ rí maʼgá kanuu náa Dios” (Salmo 73:28).

Dios má gáñe̱wa̱nʼ. Jeobá naʼthúún bi̱ nambáxu̱u̱ gajmíi̱n: “Maxtáá rayaʼ índo̱ gaxnaʼ xtágabu” (Salmo 32:8). Rígi̱ nandoo gáʼthúu̱n rí Jeobá nañewu̱u̱n mámbáa xa̱bi̱i̱ ga̱jma̱a̱ naxnúún rí phú nda̱ñúnʼ (Salmo 139:1, 2). Índo̱ gambáxa̱ʼ májánʼ ga̱jma̱ʼ Jeobá, mi̱dxu̱ʼnú matayáá rí ikhaa má gaxtáa mu mambáyaʼ.

Nda̱wa̱á makánaʼ mbá rí mitsaan. Raʼkháa i̱ndó maʼni maraxtaa gagi rí mbiʼi xúgi̱, ma̱ngaa Jeobá maxnáʼ maraxtaa tsímáá nda̱wa̱á (Isaías 48:17, 18). Náa Biblia naʼthí: “Rígi̱ eyoo gáʼthúu̱n rí maraxtaa kámuu mbiʼi, rí muninuwínʼ ikháán, mbáwiin ikháán bi̱ ni̱ndxa̱ʼ Dios gajkhun, ga̱jma̱a̱ Jesucristo bi̱ nitaxúnguanʼ” (Juan 17:3). Rí naʼthí maxnúlúʼ Dios nindxu̱u̱ xóo mbá ancla “gajkhun ga̱jma̱a̱ jmbu” mambáyulúʼ índo̱ kuwáanʼ mbiʼi mingíjyúuʼ (Hebreos 6:19).

Rígi̱ nindxu̱u̱ tikhu rí mambáyulúʼ á mu nuniʼnííʼ májánʼ Dios ga̱jma̱a̱ rí mambáxulúʼ gajmiúlú. Á mu nandaʼ ma̱ta̱ya̱a̱ itháan, nutha̱nʼxu rí maratamíjná ga̱jma̱ʼ mbáa bi̱ naʼtáraʼa numuu Jeobá o mata̱ʼa̱ʼ náa ináa ndrígóo Internet jw.org.