Mu mambaxáʼ ga̱jma̱ʼ mbáa, gíʼdoo numuu mataʼyááʼ xú káʼnii nindxu̱u̱. Ikhaa kayuʼ, mu mambaxáʼ ga̱jma̱ʼ Dios, gíʼdoo numuu rí muniʼniiʼ xóo xa̱bu̱ ni̱ndxu̱ʼ. Índo̱ nuniʼniiʼ májánʼ, itháan nuxuʼmámíjná náa ikhaa. Náa rí xúgíʼ cualidad ndrígóo, rígá a̱jkhu̱ rí itháan nagájnuriyoʼ: Tsiakii, ku̱ma̱, rí jmbu ga̱jma̱a̱ ngajua.

“¡Ikháánʼ Jeobá bi̱ kaʼyaʼ maratañájunʼ! Ikháánʼ nitani̱ mekhu ga̱jma̱a̱ ku̱ba̱ʼ nijmaʼ tsiakii ndrígáʼ ga̱jma̱a̱ ñawánʼ. Nda̱a̱ rí mingíjyúuʼ tayáá ikháánʼ” (JEREMÍAS 32:17).

Rí niʼni Dios nasngájma tsiakii rí gíʼdoo. Mbá xkri̱da, ndiéjunʼ ekumu̱u̱ xuyulúʼ índo̱ kuwáanʼ náa mijkha rá. Rí mijkha rúʼko̱, nasngájma tsiakii ndrígóo Jeobá. Nguáthá tsiakii gíʼdoo A̱jkha̱ʼ rá. Rí mijkha náa tapho̱o̱ a̱jkha̱ʼ naʼni mbá 15,000,000 °C (27,000,000 °F). A̱jkha̱ʼ gíʼdoo tsiakii itháan ki xóo bombas nucleares.

A̱jkha̱ʼ nindxu̱u̱ chíʼgíʼ, mú kúwi̱i̱n eʼwíínʼ A̱jkha̱ʼ bi̱ itháan mba̱ʼu̱u̱n. Científicos nuthi rí a̱jkha̱ʼ UY Scuti, nindxu̱u̱ mbáa a̱jkha̱ʼ bi̱ itháan mba̱a̱, rí naʼni mbá 1,700 ki xóo a̱jkha̱ʼ ndrígúlú. Á mu A̱jkha̱ʼ UY Scuti mariʼkuriyaaʼ a̱jkha̱ʼ ndrígúlú, marugoo xúgíʼ numbaaʼ. Rí mbuʼyáá rígi̱ mbáa mambáyulúʼ makru̱ʼu̱lú májánʼ náa numuu rí Jeremías niʼthí rí Jeobá niʼni mekhu ga̱jma̱a̱ Ku̱ba̱ʼ, xóo muʼthá, numbaaʼ, ga̱jma̱a̱ tsiakii ndrígóo.

 Xú káʼnii embáyulú tsiakii ndrígóo Dios rá. Rí makuwáanʼ ndayóoʼ xúgíʼ rí niʼni Dios, mbáa xkri̱da, A̱jkha̱ʼ ga̱jma̱a̱ xúgíʼ dí rígá náa Ku̱ba̱ʼ. Ma̱ngaa, Dios najmuu tsiakii ndrígóo mu mambáyulúʼ mámbáa rí ikháanʼ. Xú káʼnii rá. Nákha siglo timbá, Dios nixnúu tsiakii Jesús mu maʼni milagros. Muraxnuu: “Xa̱bu̱ bi̱ tsíyexi nuyexi mbu̱júu̱, ga̱jma̱a̱ bi̱ gúʼxúʼ najngruigu̱u̱n mbu̱júu̱, xa̱bu̱ bi̱ guáʼdáá lepra nigumaa kaʼwi̱i̱n, ga̱jma̱a̱ bi̱ tsédxuun nudxuun, ga̱jma̱a̱ xa̱bu̱ bi̱ nikháñun nigabi̱ín” (Mateo 11:5). Ga̱jma̱a̱ ndiéjunʼ erígá mbiʼi rí kuwáanʼ xúgi̱ rá. Náa Biblia naʼthí: “Naxnúu tsiakii bi̱ nánguá eʼngo̱o̱”. Ga̱jma̱a̱ naʼthí xóó: “Mú bi̱ guáʼthi̱i̱n náa Jeobá muguaʼdáá tsiakii” (Isaías 40:29, 31). Dios ma̱ndoo maxnúlúʼ “tsiakii rí itháan mba̱a̱” mú maʼngulú muraʼníí xkujndu ga̱jma̱a̱ rí naʼnii mumíniiʼ o maʼngulú muʼni gajmiúlú (2 Corintios 4:7). Lá na̱nguá ekumulú rí kuwa mijngii náa Dios índo̱ nduʼyáá rí nandoo kaʼyulú wéñuʼ ga̱jma̱a̱ tsiakii ndrígóo mu mambáyulúʼ rá.

“¡Oh Jeobá ra̱ʼkhá tháán mbaʼa rí nitani̱! Ra̱ʼkhá tháán májánʼ nitani̱ xúgíʼ” (SALMO 104:24).

Índo̱ itháan ejkua rajmañulú ga̱jma̱a̱ numuu rí niʼnii Dios, itháan nanigulúʼ ku̱ma̱ ndrígóo. Ikha jngó, kuwa nguéjmi̱i̱n científico bi̱ nunigajmaa rí mbiʼyuu biomimética, mu muniʼnuʼ rí niʼni Jeobá ga̱jma̱a̱ rúʼko̱ eʼni rí majmañún muniwíi tikhu xtiʼkhu, mú xúʼko̱ muni mbá rí chíʼgíʼ asndu mbá itháan mba̱a̱ xóo avión.

Ikha jngó, nda̱a̱ imbo̱o̱ ku̱ma̱ rí itháan májánʼ ki xóo ndrígóo Dios índo̱ niʼnii xa̱bu̱. Gundxaʼwamíjna̱ xú káʼnii eguma mbáa ada̱. Xúgíʼ nagi̱ʼdu̱u̱ ga̱jma̱a̱ mbá célula náa naʼthí tsáa gágumaa. Célula rígi̱ nakuíʼtóo i̱ʼwáʼ rí nakujmaa ikhaa kayuʼ. Ikhú célula rúʼko̱ nagi̱ʼdu̱u̱ nariʼkuminaʼ, ga̱jma̱a̱ naʼni itháan mbaʼa xóo célula ndrígóo eʼdi, xóo níjthú ga̱jma̱a̱ itsu̱. Nda̱wa̱á na̱jkha̱ raguma chámbá ga̱jma̱a̱ nagíʼdu̱u̱ nañejunʼ. Káaʼ mbáa míjna gu̱wa̱ʼ igu̱nʼ, célula rúʼko̱ naʼni rí magutaxi̱i̱ mbáa ada̱ rí gíʼdoo mbaʼa célula. Índo̱ nduʼyáá ku̱ma̱ ndrígóo Dios rí xú káʼnii niʼnii mbáa xa̱bu̱, mbaʼin naguanu nduyáá rí xúʼko̱ má nindxu̱u̱, xó má eʼthí náa Biblia: “Mani mba̱a̱n numuu rí asndu xóo migamíi rí xú káʼnii mitsaan wéñuʼ kiʼniu̱u̱n” (Salmo 139:14).

Xú embáyulú ku̱ma̱ ndrígóo Dios rá. Bi̱ Niʼniáanʼlú ndaʼyoo májánʼ rí ndayúlú mu makuwáanʼ gagi. Numuu rí nindxu̱u̱ bi̱ najmañuu wéñuʼ, ma̱ndoo maxnúlúʼ consejo rí na̱ʼkha̱ náa ajngá rawunʼ, rí nindxu̱u̱ Biblia. Mbá xkri̱da, naʼtulúʼ: “Guni mba̱a̱ a̱jkia̱la kuyamíjna̱ má xúʼko̱” (Colosenses 3:13). Lá naku̱ma̱ʼ rí nindxu̱u̱ mbá consejo májánʼ rá. Xa̱bu̱ bi̱ najmañún niguánu ndiyáá rí matani mba̱a̱ a̱jkia̱nʼ ma̱ndoo mambáyaʼ minuuʼ májánʼ ga̱jma̱a̱ mbi̱ya̱a̱ xa̱a̱ʼ. Ma̱ngaa mambáyaʼ mu xájmaaʼ wéñuʼ ga̱jma̱a̱ nandii. Dios nindxu̱u̱ xóo mbáa bi̱ nambáxa̱ʼ ga̱jma̱ʼ bi̱ naxmiéjunʼ kaʼyaʼ ga̱jma̱a̱ naxnúlú má xúʼko̱ consejo rí nindxu̱u̱ májánʼ (2 Timoteo 3:16, 17). Lá manigua̱ʼ mambaxáʼ ga̱jma̱ʼ mbáa bi̱ xúʼko̱ kaʼnii ráʼ.

“Jeobá nandoo kaʼyoo rí jmbu” (SALMO 37:28).

Dios naʼni má xúʼko̱ rí jmbu. Ikha jngó, na̱nguá xóo maʼni dí ra̱májánʼ bi̱ gíʼdoo xúgíʼ tsiakii (Job 34:10). Naʼni má xúʼko̱ rí jmbu, xó má niʼthí salmista rí ‹maʼnimbánuu numún xa̱bu̱ xuajen ga̱jma̱a̱ jmbu› (Salmo 67:4). Numuu rí nda̱yo̱o̱ rí gíwanʼ náa a̱jkiu̱lú, ra̱ʼkha̱ xóo kiexulú, ikha jngó ndaʼyoo rí phú nindxu̱u̱ gajkhun ga̱jma̱a̱ naʼni rí jmbu (1 Samuel 16:7). Dios ndaʼyoo xúgíʼ dí ra̱májánʼ dí rígá náa numbaaʼ, ga̱jma̱a̱ naʼthí rí xa̱bu̱ ra̱míjínʼ magumaa ‹gámbíin náa tsu̱du̱u̱ ku̱ba̱ʼ› (Proverbios 2:22).

Raʼkháa rúʼko̱ rí nandoo gáʼthi rí Dios nindxu̱u̱ mbáa juez xkawiiʼ bi̱ naniguʼ maʼni gíníi xa̱bu̱. Mú índo̱ ndayóoʼ, nasngájmaa rí nagáwíínʼ a̱jkiu̱u̱n. Náa Biblia naʼthí rí Jeobá “naʼni mba̱a̱ a̱jkiu̱u̱n ga̱jma̱a̱ májánʼ wéñuʼ a̱jkiu̱u̱n”, asndu náa xa̱bu̱ ra̱míjínʼ bi̱ gajkhun natanga̱a̱ a̱jkiu̱ún. Lá xárata ikháán dí rúʼko̱ nindxu̱u̱ jmbu rí phú gajkhun ráʼ. (Salmo 103:8; 2 Pedro 3:9.)

Xú káʼnii embáyulú jmbu ndrígóo Dios rá. Apóstol Pedro niʼthí: “Dios tsiraʼwíin xa̱bu̱, ikhaa nagruiguíin bi̱ namiñun kuyáá ga̱jma̱a̱ bi̱ nuni rí jmbu náa xúgíʼ xuajen” (Hechos 10:34, 35). Numuu rí Dios tsiraʼwíin xa̱bu̱, ga̱jma̱a̱ xúgiáanʼ nambáyulúʼ jmbu ndrígóo. Ikhaa nagruiguáanʼ tséʼniuu xú káʼnii raza ndrígúlú o náa xuajñulú, náa niʼnigajmaa̱ o mu kuaʼdáá mbújkha̱a̱, ikhaa naniñuʼ rí mbuʼyamajkuíí.

Bi̱ Niʼniáanʼ nandoo rí makru̱ʼu̱lú jmbu ndrígóo ga̱jma̱a̱ rí mambáyulúʼ, ikha jngó nixnúlú mbóo ku̱ma̱. Náa Biblia naʼthí rí ku̱ma̱ nindxu̱u̱ xóo mbá xtángoo rí kiʼniraʼmáʼ náa a̱jkiu̱lú rí mambáyulúʼ mbuʼyáá á mu kuwáanʼ ru̱ʼni̱ rí májánʼ o dí ra̱májánʼ (Romanos 2:15). Xú káʼnii embáyulú rígi̱ rá. Mbá ku̱ma̱ rí nijuiʼsngáá májánʼ naʼni gaʼduunʼ mú xúʼni̱ dí ra̱májánʼ o dí maʼni gawúunʼ a̱jkiu̱lú. Ga̱jma̱a̱, á mu nuʼni dí ra̱májánʼ, mbáa maʼni rí mata̱nga̱a̱ a̱jkiu̱lú ga̱jma̱a̱ muniʼñáʼ ruʼni dí ra̱májánʼ.  Gajkhun rí makru̱ʼu̱lú jmbu ndrígóo Dios nambáyulúʼ ga̱jma̱a̱ nakuwáanʼ mijngii náa ikhaa.

“Dios nandoo kaʼñúún xúgínʼ” (1 JUAN 4:8).

Náa Biblia tséʼthi rí Dios nindxu̱u̱ tsiakii, ku̱ma̱ o rí jmbu. Mú, naʼthí rí Dios nindxu̱u̱ ngajua. Náa numuu rá. Maski ajndu gajkhun nindxu̱u̱ rí tsiakii ndrígóo naniñuʼ maʼni ga̱jma̱a̱ rí jmbu ma̱ngaa ku̱ma̱ ndrígóo naxná ikhoo rí naʼni, rí naniñuʼ maʼni nindxu̱u̱ ngajua. Xúgíʼ rí naʼni, naʼni ga̱jma̱a̱ ngajua.

Maski ajndu Jeobá nda̱a̱ rí eʼyoo, ngajua ndrígóo nixkaxi̱i̱ maʼni bi̱ makuwa náa mekhu ga̱jma̱a̱ náa numbaaʼ, mu xúʼko̱ mbuyáá rí nandoo kaʼñúún ga̱jma̱a̱ nañewu̱u̱n. Ikhaa niʼnii mújúnʼ ku̱ba̱ʼ mu makuwa xa̱bu̱. Ga̱jma̱a̱ xúgi̱, nasngájma ngajua ndrígóo náa xa̱bu̱ numbaaʼ, numuu rí “naʼni magajnúu a̱jkha̱ʼ náa xa̱bu̱ ra̱míjínʼ ga̱jma̱a̱ bi̱ míjínʼ ga̱jma̱a̱ xúʼko̱ má eʼni maxnúu ruʼwa náa xa̱bu̱ bi̱ nuni rí jmbu ga̱jma̱a̱ bi̱ tseni rí jmbu” (Mateo 5:45).

Ma̱ngaa, “Jeobá gíʼdoo wéñuʼ ngajua, ga̱jma̱a̱ nagáwiinʼ a̱jkiu̱u̱n” (Santiago 5:11). Nasngájmaa rí nandoo kaʼñúún gajkhun bi̱ nandoo muniʼniiʼ ga̱jma̱a̱ bi̱ nuxuʼmamijná náa ikhaa. Dios naninúnʼ mámbíin xa̱bu̱ buʼko̱. Gajkhun, ‹na̱nguá xtáa mitsínguánʼ náa mámbáa dí ikháanʼ› (Hechos 17:27).

Xú káʼnii embáyulú ngajua ndrígóo Dios rá. Mixtiʼkhu xóo esngajma ngajua ndrígóo Dios, mbá xkri̱da, nanigulúʼ muʼdxawíín mbá xnduʼwá ndrígóo ada̱, rí nandún kuyulúʼ bi̱ kuwa náa guʼwúlú o índo̱ narámaaʼ a̱jkha̱ʼ. Mú ra̱ʼkha̱ i̱ndó rúʼko̱ eʼni rí magiʼdoo numuu náa vida ndrígúlú, mú naʼni makuwáanʼ gagi.

I̱mba̱ rí nambáyulúʼ ngajua ndrígóo Dios índo̱ nuʼtájkáan. Náa Biblia naʼthí: “Xaxmiéjuanʼla ga̱jma̱a̱ numuu nimbá, gutajkháan ga̱jma̱a̱ gutakáñii Dios ma̱ngaa guxna̱a̱ núma̱aʼ, gunda̱ʼa̱a̱ xúgíʼ rí eyála”. Anu̱lú Jeobá nandoo kaʼyulú ga̱jma̱a̱ nandoo rí muʼthán xúgíʼ rí naʼni maxmiéjunʼlú. Ikhaa naʼthúlúʼ, ‹ikhú tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkiu̱lú ga̱jma̱a̱ rí nundxaʼwamíjna̱› (Filipenses 4:6, 7).

Náa artículo rígi̱, niʼthá ga̱jma̱a̱ numuu cualidad ndrígóo Dios: Tsiakii, ku̱ma̱, jmbu, ga̱jma̱a̱ ngajua. Mú ma̱ta̱ya̱a̱ rí nandoo kaʼyaʼ Dios, rí xúgi̱ nutaxu rí matraxnuu má xúʼko̱, mú ma̱ta̱ya̱a̱ ndiéjunʼ niʼni Dios ga̱jma̱á numaaʼ ga̱jma̱a̱ ndiéjunʼ gáʼni.