Á MU ikháán nikháñuu mbáa bi̱ xtayáá, mbáa mangáán nagawáanʼ wéñuʼ ga̱jma̱a̱ numuu rígi̱. Mbáa asndu nakiʼnán xtayaminaʼ, naku̱ma̱a̱ʼ rí ikháán xtaʼdáá aʼkháanʼ, namíñaaʼ ga̱jma̱a̱ mbáa asndu natraximínáʼ á mu xóó gíʼdoo numuu maraxtaa.

Rí matambiyaʼ na̱nguá eyoo gáʼthúu̱n rí nindxa̱a̱ʼ mbáa xabendi̱i̱. Rí matambiyaʼ nasngájma rí nindaaʼ xtayáá wéñuʼ xa̱bu̱ buʼko̱. Mú, ndiéjunʼ gándoo matani mu maʼni̱i̱ a̱jkia̱a̱nʼ rá.

Maski ajndu nakujmaa rí nda̱a̱ nimbá rí mambáyáaʼ maʼni̱i̱ a̱jkia̱a̱nʼ, mbáa rígi̱ ma̱ndoo mayambáá.

ATAMBIYAʼ MU MAʼNI̱I̱ A̱JKIA̱A̱Nʼ

Raʼkháa xúgínʼ xa̱bu̱ nagawúnʼ ikháá índo̱ nakháñuu mbáa bi̱ kuyáá. Mú, rí matambiyaʼ nindxu̱u̱ mbá rí xóo ma̱ndoo magajnáa mbá rí gíwanʼ na̱ʼkhu̱ awún. Vanessa, bi̱ niʼthá ga̱jma̱a̱ numuu náa kutriga̱ timbá, naʼthí: “I̱ndó rí na̱ni̱ nindxu̱u̱ rí nambiyaʼ, numuu rí xúʼko̱ naku̱mu̱ʼ rí naʼni̱i̱ a̱jkiu̱nʼ”. Sofía, bi̱ nikháñuu ndxájuu, naʼthí: “Índo̱ narmáʼáan a̱jkiu̱nʼ eʼni, nagawúnʼ wéñuʼ. Nindxu̱u̱ asndu xóo mujñáa náa nithíín. Maski ajndu na̱ʼkhu̱ wéñuʼ mú ndaʼyóoʼ maguma mu maʼni̱i̱ náa nithu”.

 ARATHÁ RÍ NAKUMAAʼ

Gajkhun má rí índo̱ nagíʼnáa xúgi̱ kaʼnii tsíyaaʼ maraxtaa ga̱jma̱a̱ nimbáa, mú rí maratha nayambáá wéñuʼ. Jared, mbáa dxámá bi̱ gíʼdoo 17 tsiguuʼ nikháñuu anu̱u̱, ikhaa naʼthí: “Maski ajndu na̱nguá gíʼdoo numuu rí natha, mú, rí ni̱thu̱u̱n eʼwíínʼ xóo naku̱mu̱ʼ nimbáyuʼ wéñuʼ”. Janice, bi̱ niʼthá ga̱jma̱a̱ numuu náa timbá artículo, niʼthí imbo̱ʼ rí nayambáá rí maratha̱a̱n mbáa rí naku̱ma̱a̱ʼ: “Rí matamíjná ga̱jmu̱ʼ mbáa nimbáyuʼ mu maʼni̱i̱ a̱jkiu̱nʼ ga̱jma̱a̱ ndi̱yo̱o̱ rí na̱nguá xtáá mbáwun”.

ATSIÑÁN RÍ MUMBAYÁAʼ

Mbáa a̱ʼgu̱ bi̱ naʼni thana naʼthí: “Bi̱ naniñaminaʼ rí mumbayíí bi̱ kuwa náa goʼwóo ga̱jma̱a̱ bi̱ nambáxu̱u̱ gajmíi̱n, xa̱bu̱ buʼko̱ tséxtáa gíná wéñuʼ”. Arathún bi̱ nambáxa̱a̱ʼ gajmiáanʼ ndiéjunʼ gáʼyóoʼ muni mu mumbayáaʼ. Mbáa ikhiin nandún mumbayáaʼ mú tséyáá xóo gúni (Proverbios 17:17).

GA̱KU̱MA̱A̱ʼ XTAYÁÁ ITHÁÁN DIOS

Tina naʼthí: “Índo̱ ajmbioʼ nixiyáa cáncer, ikhú ninimbátiga̱a̱ mbáa xa̱bu̱ bi̱ naku̱mu̱ʼ ka̱yo̱o̱ wéñuʼ numuu rí i̱ndó ikhaa nindxu̱u̱ bi̱ nandoo na̱thu̱u̱n asndu ndiéjunʼ má, ikhú nigíʼdu̱u̱ ni̱thu̱u̱n xúgíʼ Dios rí naku̱mu̱ʼ. Índo̱ nagúxúunʼ na̱ndo̱ʼo̱o̱ rí maxnúʼ tsiakii mu maxtáá mambá mbiʼi. Dios mbaʼa rí xóo nimbáyuʼ...”. Tarsha, bi̱ gíʼdoo 22 tsiguuʼ índo̱ nikháñuu ru̱dúu̱, ikhaa naʼthí: “Naxnúʼ tsiakii rí maguxnuu Biblia xúgíʼ mbiʼi. Naʼni rí mandxa̱ʼwa̱mínáʼ rí májánʼ”.

ATATSAʼWÁMINAʼ NÁA BI̱ MAGABIÍN

Tina naʼthí xóó: “Nákha ginii, índo̱ nandxa̱ʼwa̱mínáʼ náa rí magabiín xa̱bu̱, tséʼni rí maʼni̱i̱ a̱jkiu̱nʼ. Ikhúún nandoʼ rí ajmbioʼ maxtáá ga̱jmu̱ʼ xúgi̱, ga̱jma̱a̱ e̱ji̱nʼ ndu̱ya̱a̱ʼ anu̱ún. Mú xúgi̱ rí ninújngoo má a̱jkhu̱ tsiguʼ. Rí magabiín xa̱bu̱ rúʼko̱ nambáyuʼ mu xáxtáá gíná wéñuʼ. Índo̱ nandxa̱ʼwa̱mínáʼ mbiʼi rí matangu̱ún mba̱ya̱a̱ naʼni rí maxtáá májánʼ”.

Mbáa ikháán tsíyoo gáʼni̱i̱ a̱jkia̱a̱nʼ nacha̱, mú ajngáa ndrígóo Vanessa ma̱ndoo mambáyaaʼ mu maʼni̱i̱ a̱jkia̱a̱nʼ. Ikhaa naʼthí: “Nakumaaʼ rí nditháan xáʼni̱i̱ a̱jkia̱a̱nʼ, mú ga̱ʼkhu̱, rúʼko̱ nanújngoo”.

Garmáʼáan a̱jkia̱a̱nʼ: Maski ajndu nimbáa tséʼngo̱o̱ gaʼni rí maʼni̱i̱ a̱jkia̱a̱nʼ, mú gíʼdoo numuu rí maraxtaa. Ga̱jma̱a̱ tsiakii ndrígóo Dios, ikháán ma̱ndoo maraxtaa tsímáá gajmiáanʼ bi̱ xtañún. Imbá chíʼgíʼ má tígo̱o̱ rí Dios makuxiín bi̱ nikháñún. Ikhaa nandoo rí matangaán maraxtaa gajmiáanʼ a̱ngia̱a̱nʼ ga̱jma̱a̱ gaʼkhu rí xtaa ranújngáaʼ xúgi̱, mandáti̱ga̱a̱ mbá kayuuʼ.