Índo̱ naku̱ma̱a̱ʼ rí nánguá kaʼnii maʼnga̱a̱ʼ itháan
LÁ NIRAXTAA gíná wéñuʼ rí asndu nindaaʼ mataxíyaminaʼ rá. Á mu xúʼko̱, nakruaʼaaʼ xú káʼnii nikumu̱u̱ Adriana. Ikhaa xtáa gíná wéñuʼ ga̱jma̱a̱ naxmiéjuunʼ, nda̱wa̱á ndiyáá rí gíʼdoo mbá nandii.
Atayáá rí nigíʼnuu Kaoru bi̱ na̱ʼkha̱ náa Japón ikhaa niñewu̱u̱n aniu̱u̱ bi̱ guanii ga̱jma̱a̱ nandoo kañún. Ikhaa naʼthí: “Tsiguʼ rúʼko̱ nixtáá gíná wéñuʼ. Nguáthá mbiʼi nda̱wa̱á nánguá xki̱dxu̱ʼ ga̱jma̱a̱ nánguá eyoo gígú. Asndu nindoʼ rí makhañúʼ, mu xáminuuʼ itháan”.
Mbáa xa̱bu̱ bi̱ na̱ʼkha̱ náa Nigeria bi̱ mbiʼyuu Ojebode naʼthí: “Xúgíʼ mbiʼi xtáá gíná, ga̱jma̱a̱ nambiyaʼ asndu xú káʼnii má rí egíʼnuʼ. Asndu nindoʼ maxíyaminaʼ”. Mú Ojebode, Kaoru ga̱jma̱a̱ Adriana na̱nguá niradímíjná, mú, náa mbá xúgíʼ tsiguʼ mbaʼin wéñuʼ xa̱bu̱ nuradímíjná ga̱jma̱a̱ numuu rúʼko̱.
NÁA MATAMBÁYUMINAʼ
Bi̱ nuradímíjná itháán ni̱ndxu̱ún xa̱bekha, ga̱jma̱a̱ mbaʼin rí ikhiin tsendaʼa rí mixtambañúún numuu rí natiñu̱u̱ʼ. Mú, Jesucristo niʼthí rí xa̱bu̱ bi̱ naʼniún nandii ndaʼyóoʼ rí maguma thanún (Lucas 5:31). Á mu ikháán naku̱ma̱a̱ʼ xúʼko̱ kaʼnii xátiya̱a̱ʼ marathu̱u̱n eʼwíínʼ rí mumbayáaʼ. Mbaʼin xa̱bu̱ niʼni̱i̱ a̱jkiu̱ún numuu rí nigún náa guʼwá thana. Ojebode, Kaoru ga̱jma̱a̱ Adriana ikhiin xúgi̱ kuwa májánʼ numuu rí nigún náa guʼwá thana.
Rí ma̱ndoo matani mu xájmaaʼ wéñuʼ, tikhun doctor nuxna thana o rí maratamíjná ga̱jma̱a̱ mbáa ma̱ndoo mambáyaaʼ. Ma̱ngaa bi̱ kuwa xúgi̱ kaʼnii ndayóoʼ rí bi̱ kuñún mumbañún ga̱jma̱a̱ bi̱ nambáxu̱u̱n gajmiún. Jeobá Dios nindxu̱u̱ bi̱ itháán májaanʼ bi̱ ma̱ndoo mambaxú gajmiúlú numuu rí ikhaa ma̱ndoo mambáyulúʼ ga̱jma̱a̱ rí naʼthí náa Biblia rí nindxu̱u̱ Ajngá rawuunʼ.
LÁ RÍGÁ MBÁ RÍ MAMBÁYÁAʼ MU MAʼNI̱I̱ A̱JKIA̱A̱Nʼ MBÁJKHU RÁʼ.
Bi̱ kúwi̱i̱n ga̱jmá ndañúunʼ rí mixtambañúún má xúʼko̱, ga̱jma̱a̱ ndayóoʼ muriʼkhu̱u̱ xóo endxaʼwamíjna̱ mu ma̱ndoo maʼni̱i̱ a̱jkiu̱ún. Á mu ikháán xtaa xúgi̱ kaʼnii, atayáá gajkhun rí nda̱wa̱á ní xárígá rí maʼni maraxtaa gíná. Ojebode naʼthí: “Naniguʼ mba̱yo̱o̱ xóo gambánuu rí naʼthí náa Isaías 33:24, náa naʼthí rí maʼga̱nú mbiʼi dí nímba̱a̱ xa̱bu̱ numbaaʼ xáʼthi: ‹Nandoo káñú›”. Ikháán mangáán maʼni̱i̱ a̱jkia̱a̱nʼ índo̱ gáta̱ya̱a̱ rí Dios nikudaminaʼ maʼni̱i̱ mbá ‹ku̱ba̱ʼ nuxi̱ʼ› náa ni xárígá “gaʼkhu” ni má rí maʼni makuwáanʼ gíná o rí maxmiéjunlú (Revelación [Apocalipsis] 21:1, 4). Rí naʼni maraxtaa gíná xúgi̱ mandáti̱ga̱a̱ kámuu ga̱jma̱a̱ ni xátanga̱a̱ marigá (Isaías 65:17).