Índo̱ natagíʼníí mbá gamiéjunʼ
LÁ NITAGÍʼNÍÍ xúʼko̱ kaʼnii mangáán ráʼ. Á mu xúʼko̱, mbáa nakrua̱ʼa̱a̱ xú káʼnii kuwa bi̱ niguáʼníí gamiéjunʼ rígi̱: Kuwa gíná, naxmiéjúúnʼ, namiñun, tséyáa rí muni. Mbaʼin bi̱ naguáʼníí mbá gamiéjunʼ nakuwa gíná wéñuʼ rí asndu nakumu̱ún rí nánguá gíʼdoo numuu makuwá.
Á mu mangáán nindáti̱ga̱a̱ʼ xúgíʼ ga̱jma̱a̱ numuu mbá gamiéjunʼ, mbáa rúʼko̱ naʼni rí maraxtaa gíná wéñuʼ. Mbáa asndu na̱dxu̱ʼnú natatsaʼwáminaʼ rí nánguá gíʼdoo numuu maraxtaa. Mú, náa Biblia naʼthí rí gíʼdoo numuu maraxtaa numuu rí nda̱wa̱á makuwáanʼ tsímáá.
RÍ MATAYAA RÍ NAʼTHÍ NÁA BIBLIA, MAʼNI RÍ MANIGUA̱A̱ʼ MARAXTAA
Eclesiastés 7:8 naʼthí: ‹Itháan májánʼ índo̱ naguámbáa mbá gamiéjunʼ ki xóo índo̱ nagi̱ʼdu̱u̱›. Á mu ikháán nitagíʼníín mbá gamiéjunʼ ga̱jma̱a̱ ndayóoʼ matagíʼdi̱i̱ matani̱i̱ xúgíʼ rí niguámbáa, mbáa asndu makuma̱a̱ʼ rí nánguá gíʼdoo numuu matani̱i̱. Mú, á mu naʼngo̱o̱ a̱jkia̱a̱nʼ ga̱jma̱a̱ tsiakii rí gátani. Xúgíʼ magajnúu májánʼ.
Náa Biblia naʼthí rí maʼga̱nú mbiʼi dí “ní xáwáán itháan rí numbiyaʼ ga̱jma̱a̱ aʼwá rí numíniiʼ” (Isaías 65:19). Ajngáa rígi̱ mambanúu índo̱ Reino ndrígóo Dios maʼtáñajunʼ náa tsu̱du̱u̱ Ku̱ba̱ʼ (Salmo 37:11, 29). Ni xátanga̱a̱ marigá gamiéjunʼ ga̱jma̱a̱ xúgíʼ rí naʼni mumíʼniiʼ mambáa mbá kayuuʼ. Numuu rí Dios bi̱ gíʼdoo xúgíʼ tsiakii naʼthí: “Nimbáa ní xarmáʼáan a̱jkiu̱u̱n dí nirígá nákha ikhú” (Isaías 65:17).
Atatsaʼwáminaʼ rígi̱: Anu̱lú bi̱ niʼniáanʼ ikhaa rígá má mbá rí niʼni ga̱jma̱a̱ ni̱ndxu̱lú mu ma̱ndoo “makuwáanʼ májánʼ nda̱wa̱á” (Jeremías 29:11). Lá ajngáa rígi̱ ma̱ndoo mambáyulúʼ ráʼ. Sally, bi̱ niʼthá ga̱jma̱a̱ numuu náa timbá artículo, naʼthí: “Dí mundxaʼwamíjná ga̱jma̱a̱ numuu xúgíʼ rí mitsaanʼ maʼni Reino ndrígóo Dios ma̱ndoo mambáyulúʼ muniʼñáʼ rundxa̱ʼwa̱míjna̱ dí niguáʼníí nákha ginii ga̱jma̱a̱ mbuʼyáá xóo makuwáanʼ mámbá mbiʼi”.
Ndiéjunʼ i̱ʼwáʼ gáʼni Reino ndrígóo Dios rá. Nanduxu rí ikháán minaʼ gáta̱ya̱a̱ ndiéjunʼ gáʼni. Ikhú ma̱ta̱ya̱a̱ rí gíʼdoo numuu maraxtaa maski ajndu natamíni̱i̱ʼ mbá gamiéjunʼ ga̱jma̱a̱ rí imbá chiʼgííʼ tígo̱o̱ rí xúgíʼ gamiéjunʼ dí narígá xúgi̱ mambáa. Mú rí mbiʼi xúgi̱, xtágabu rí na̱ʼkha̱ náa Biblia ma̱ndoo mambáyáaʼ náa gamiéjunʼ rí xtaʼdáá.
