Rí xúgi̱ mbá “ruʼwa mbiiʼ” na̱ʼkha̱ náa ikháanʼ. Jesús naxná mbiʼyuu ‹majphú mba̱a̱ gaʼkhu› (Mateo 24:21). Maski ajndu xúgiáanʼ muraʼníí gamiéjunʼ rígi̱, mú rígá rí ma̱ndoo muʼni. Ndiéjunʼ rá.

Náa discurso rí nixná Jesús náa Kúbá niʼthí rí ma̱ndoo muʼni: “Guʼyáʼ ginii rí naʼtáñajunʼ Dios ga̱jma̱a̱ xúgíʼ rí májánʼ rí na̱ʼkha̱ náa ikhaa” (Mateo 6:33). Ndiéjunʼ eyoo gáʼthi rígi̱ rá.

“Guʼyáʼ ginii rí naʼtáñajunʼ Dios”. Rígi̱ nandoo gáʼthúu̱n dí Reino ndrígóo Dios gíʼmaa magiʼdoo itháan numuu ki xóo i̱ʼwáʼ (Mateo 6:25, 32, 33). Ndíjkha rí gíʼmaa mbuʼyáá xígi̱ rá. Numuu rí ikháanʼ xáʼngulú guʼnimbánii xkujndu dí rígá náa numbaaʼ. I̱ndó Dios maʼngo̱o̱ maʼni rígi̱.

Guʼyáʼ má xúʼko̱ “rí májánʼ rí na̱ʼkha̱ náa ikhaa”. Rígi̱ nandoo gáʼthúu̱n rí gíʼmaa muʼnimbulúʼ xtángoo ga̱jma̱a̱ ikha ndrígóo Dios. Á mu tséʼnimbulúʼ ga̱jma̱a̱ ikháanʼ nuraʼwíí rí nindxu̱u̱ májánʼ o ra̱májánʼ maʼga̱ kaguáanʼ náa tsingíná (Proverbios 16:25). Ma̱ngaa á mu nuʼnimbulú xtángoo ndrígóo Jeobá, muʼni rí maʼdxuu ga̱jma̱a̱ makuwáanʼlu májánʼ (Isaías 48:17, 18).

Náa numuu niʼthí Jesús “Guʼyáʼ ginii rí naʼtáñajunʼ Dios ga̱jma̱a̱ xúgíʼ rí májánʼ rí na̱ʼkha̱ náa ikhaa” rá. Numuu rí tikhun ma̱ndoo majngawi̱i̱n ga̱jma̱a̱ makumún rí makuwá májánʼ á mu  guáʼdáá wéñuʼ mbújkha̱a̱. Eʼwíinʼ maxmiéjunʼ wéñuʼ rí mbuyáʼ rí makuwá ga̱jma̱a̱ rí asndu xáguapiin mu mbuyáʼ ginii Reino ndrígóo Dios (Mateo 6:19-21, 25-32).

Jesús niʼthí rí bi̱ gumbayíí Reino ndrígóo Dios maguaʼdáá xúgíʼ rí gáʼñúnʼ mu makuwá ga̱jma̱a̱ ma̱ngaa mba̱a̱ rí gaguma tsajkurámiinʼ nda̱wa̱á (Mateo 6:33).

Índo̱ xa̱bi̱i̱ Jesús ndiyááʼ ginii Reino ga̱jma̱a̱ rí májánʼ rí naʼni Dios, túyáá rí niguambáa tsingíná mú nixkamaa náa mumbáyumíjná. Náa nixkamaa xá.

Xtángoo ndrígóo Dios niñewu̱u̱n náa xkujndu rí guáʼdáá bi̱ tsénimbu̱ún kuyáá Jeobá. Fe rí niguáʼdáá náa Reino nimbáñun mu muraʼníí xkujndu rí itháan gakhii. Ga̱jma̱a̱ Dios nixnúún “tsiakii rí itháan mba̱a̱” mu maʼngu̱u̱n (2 Corintios 4:7-9).

Cristianos bi̱ nikúwá nákha siglo timbá ninimbu̱ún rí niʼthí Jesús rí mbuyáʼ ginii Reino ndrígóo Dios. Nitaraʼa ajngáa rí májánʼ ga̱jma̱a̱ numuu Reino náa nikúwá (Colosenses 1:23). Lá kúwá bi̱ nuni ñajunʼ rúʼko̱ mbiʼi xúgi̱ ráʼ.

¡Xúʼko̱! Xa̱bi̱i̱ Jeobá nduyáá rí inu má Reino ndrígóo Dios maʼni gámbáa dí rígá náa kuwáanʼ. Ikha jngó nunimi̱jna̱ munimbu̱ún rí niʼtáñajunʼ Jesús: “Majuiʼtáraʼa ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios náa xúgíʼ tsu̱du̱u̱ ku̱ba̱ʼ mu mudxawíín xúgíinʼ xa̱bu̱, ga̱jma̱a̱ ikhú martumuu mbiʼi” (Mateo 24:14).

Ndiéjunʼ gátani ikháán índo̱ gátadxuun ajngáa rí májánʼ rúʼko̱ rá. Nutha̱nʼxu rí matayaridáá rí nini xa̱bu̱ bi̱ nikúwá náa xuajen Macedonia rí kaʼyoo Berea nákha siglo timbá. Índo̱ nidxawíín ajngáa rí májánʼ rí niʼtáráʼa apóstol Pablo ga̱jma̱a̱ numuu Reino, nindrigú “májánʼ wéñuʼ”, ga̱jma̱a̱ ninigajmaa “tsumáá Ajngóo Dios” mu mbuyáá á mu gajkhun rí nidxawíín ga̱jma̱a̱ “mbaʼin rí ikhiin ninindxu̱ún xa̱bi̱i̱ Jesús” (Hechos 17:11, 12).

Ikháán mangáán ma̱ndoo matani. Á mu natayáʼ ginii Reino ndrígóo Dios ga̱jma̱a̱ rí májánʼ, mataxkamaa náa matambáyuminaʼ rí mbiʼi xúgi̱ ga̱jma̱a̱ nda̱wa̱á maraxtaa tsímáá ma̱ngaa nda̱a̱ rí gáʼni mamiñáʼ.