Ndíjkha rí ndayúlú Reino ndrígóo Dios rá.
Asndu nákha nigi̱ʼdu̱u̱ nikúwá xa̱bu̱ numbaaʼ, Jeobá bi̱ Niʼniáanʼ, i̱ndó ikhaa eʼtáñajunʼ ma̱ngaa naʼtáñajunʼ ga̱jma̱a̱ ngajua. Ikha jngó, niʼni mújúunʼ mbá ixi̱ ri̱ʼi̱ mitsaanʼ náa Edén mu ikhí makuwá xa̱bu̱, náa marigá wéñuʼ ganitsu. Ga̱jma̱a̱ nixnúún mbá ñajunʼ mitsaanʼ muni̱ (Génesis 1:28, 29; 2:8, 15). Á mu niniʼñáʼ rí Dios maʼtáñajunlú, makuwáanʼ tsímáá.
Timbíin xa̱bu̱ táʼndúún rí Dios maʼtáñajúúnʼ.
Náa Biblia naʼthí rí mbáa ángel bi̱ nikuximínáʼ, bi̱ nindxu̱u̱ Satanás ga̱jma̱a̱ Gixa̱a̱, niʼthí rí Dios rakáʼyoo maʼtáñajunʼ. Ga̱jma̱a̱ niʼthí rí itháan májánʼ gákuwá xa̱bu̱ á mu xáʼtáñajúúnʼ Dios. Mú gíná niʼni rí timbíin xa̱bu̱, Adán ga̱jma̱a̱ Eva, niraʼwi̱i̱ munimbu̱ún xtujtaa ndrígóo Gixa̱a̱ ga̱jma̱a̱ túnimbu̱u̱n kuyáá Dios (Génesis 3:1-6; Apocalipsis 12:9).
Índo̱ túnimbu̱u̱n kuyáá Jeobá ga̱jma̱a̱ táʼndún rí ikhaa mani̱ndxu̱u̱ Xa̱bu̱ Ñajunʼ ndrígu̱ún, ikhú Adán ga̱jma̱a̱ Eva ninimbáti̱ga̱ rí makuwá náa ku̱ba̱ʼ mitsaanʼ ga̱jma̱a̱ rí xáʼniún nandii (Génesis 3:17-19). Asndu e̱jñún tákúwá májánʼ ga̱jma̱a̱ rí niraʼwi̱i̱ muni. Náa Biblia naʼthí rí índo̱ Adán nikudaminaʼ aʼkhá ikhú “nito̱ʼo̱o̱ aʼkhá náa numbaaʼ. Ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá” (Romanos 5:12). Ga̱jma̱a̱ rúʼko̱ niʼni marigá imbo̱o̱ʼ xkujndu: “Xa̱biya̱ naʼtáñajunʼ xa̱biya̱ mu maʼniuu dí raʼkhí” (Eclesiastés 8:9). Xóo muʼthá, índo̱ xa̱bu̱ nutañajumijná narígá xkujndu asndu náá.
NAGÍʼDU̱U̱ NAʼTÁÑAJUNʼ XA̱BU̱ NUMBAAʼ
Nemrod nikuxi̱minaʼ náa Jeobá.
Náa Biblia naʼthí rí timbáa xa̱bu̱ bi̱ niʼtáñajunʼ náa numbaaʼ nigumbiʼyuu Nemrod, ga̱jma̱a̱ nikuximinaʼ náa Dios. Asndu nákha ikhú Xa̱bu̱ Ñajunʼ tsétañajunʼ májánʼ. Ikha jngó naʼni má ajtsú míi tsiguʼ dí rey Salomón niʼnirámáʼ: “Ndi̱yo̱o̱ iyoʼ idún bi̱ naguma gíníi, ga̱jma̱a̱ nda̱wa̱a̱ mbáa bi̱ maʼni̱i̱ a̱jkiu̱ún. Bi̱ nuni gíníi guáʼdáá tsiakii” (Eclesiastés 4:1).
Ikháá má rígá rí mbiʼi xúgi̱. Mbá informe dí nixná Naciones Unidas nákha tsiguʼ 2009 niʼthí rí mámbá mbiʼi itháan xa̱bu̱ nundxa̱ʼwa̱míjna̱ rí xa̱bu̱ tsétañajunʼ májánʼ ga̱jma̱a̱ “rúʼko̱ naʼni maku̱mu̱u̱ dí ra̱májánʼ”.
MBIʼI RÍ MAMBANÚU
Xa̱bu̱ nda̱ñúunʼ bi̱ mutañajunʼ májánʼ. Ga̱jma̱a̱ rúʼko̱ rí nikudaminaʼ maʼni bi̱ Niʼniáanʼ.
Asndu Xa̱bu̱ Ñajunʼ bi̱ itháan míjíinʼ tséʼngu̱u̱n gunimbánii xkujndu dí guáʼdáá xa̱bu̱ numbaaʼ.
Dios nigíʼ mbá Reino, xóo muʼthá, mbáa Xa̱bu̱ Ñajunʼ bi̱ mariʼkuwíin xúgínʼ Xa̱bu̱ Ñajunʼ náa numbaaʼ, “ga̱jma̱a̱ i̱ndó ikhaa maxtáa asndu kámuu mbiʼi” (Daniel 2:44). Reino bugi̱ bi̱ nunda̱ʼa̱ mbaʼin xa̱bu̱ náa tsajkhun rí padrenuestro (Mateo 6:9, 10). Mú Dios xánindxu̱u̱ Rey náa Reino rúʼko̱, ikhaa nigíiʼ mbáa bi̱ nixtáa náa tsu̱du̱u̱ numbaaʼ. Tsáa rá.
