Bi̱ Niʼniáanʼ naxmiéjunʼ ga̱jma̱a̱ nandoo kaʼyulú
1. NAʼNI RÍ MAGAJNÚU A̱JKHA̱ʼ
Lá natatsaʼwáminaʼ xóo gákuwáanʼ á mu nda̱wa̱a̱ A̱jkha̱ʼ ráʼ. Ga̱jma̱a̱ numuu A̱jkha̱ʼ ixi̱ nagu̱ inúu najmi̱di̱ riʼyu̱u̱ naxná xndúu ga̱jma̱a̱ tsígoʼ. Ma̱ngaa naʼni rí ixi̱ maxúmuu iyaʼ náa ajmu̱u̱ na̱jkha̱ asndu náa inúu ga̱jma̱a̱ ikhí naʼni yu̱u̱.
2. NAʼNI MAXNÚU RUʼWA
Dios namínáanʼlu ruʼwa, ikha jngó Ku̱ba̱ʼ naxná ganitsu. Dios naʼni rí maxnúu ruʼwa, naʼni rí ma̱jma̱a̱ wéñuʼ ganitsu ga̱jma̱a̱ naʼni rí makuwáanʼlu gagi.
3. NAXNÚLÚ GANITSU GA̱JMA̱A̱ XTÍIN
Mbaʼin xa̱bu̱ naxmiéjunʼ muxkamaa ganitsu ga̱jma̱a̱ xtíin rí nda̱ñúnʼ bi̱ kúwi̱i̱n náa guʼwún. Náa Biblia naʼthí: “Guñu̱u̱n tsumáá ñu̱ʼu̱ bi̱ ngruigu̱u̱n rijma̱a̱. Tsédu ni má tséraxi̱i̱ náa xtagaʼu, mú Anu̱ún bi̱ xtáa mekhuíí naxníʼtsún. Lá raguáʼdáá itháan numala ikháanʼ ki xóo ikhiin xáʼ.” (Mateo 6:25, 26.)
“Guyexi̱i̱ ri̱ʼi̱ lirio [...;] nathala rí asndu [rey] Salomón táguwu̱nʼ mbá xtíin xóo rúʼko̱ náa xúgíʼ rí nigiʼdoo. Ikha jngó, á mu Dios naʼniratoo iná dí rígá xanáá, [...] lá raʼkháa itháan maxnála rí maguʼwánla ikháanʼ [...] ráʼ.” (Lucas 12:27, 28.)
Xó má Dios naxnúlú ganitsu ga̱jma̱a̱ xtíin, ma̱ngaa maʼngo̱o̱ maxnúlúʼ xúgíʼ rí i̱ʼwáʼ. Índo̱ nuʼgími̱jna̱ nu̱ʼni̱ rí nandoo Dios ikhaa naʼni tsajkurámuuʼ tsiakii rí nu̱ʼni̱ mu muxkamaa ganitsu o mambáyulú mu muguaʼdáá mbá ñajunʼ mu ma̱ndoo mu̱ʼtsi̱ rí ndayúlú (Mateo 6:32, 33).
Índo̱ nundxa̱ʼwa̱míjna̱ ga̱jma̱a̱ numuu A̱jkha̱ʼ, ruʼwa, ñu̱ʼu̱ ga̱jma̱a̱ ri̱ʼi̱. Xúgíʼ rígi̱ naʼni maʼndulú kuʼyáá Dios. Náa imbo̱o̱ artículo gúʼyáá xú káʼnii bi̱ Niʼniáanʼ niʼtámíjná gajmíi̱n xa̱bu̱ numbaaʼ.
