Gaʼyee Moisés niʼthí rí Dios maʼni tsajkurámáanʼ á mu nuʼnimbulú rí naʼtáñajunʼ (Deuteronomio 10:13; 11:27). Tséʼnimbulú kuʼyáá Dios numuu rí namíñulú maxnúlú castigo. Nuʼnimbulú kuʼyáá numuu rí májáanʼ xa̱bu̱ nindxu̱u̱, ga̱jma̱a̱ rúʼko̱ naʼni rí maʼndulú kuʼyáá ga̱jma̱a̱ rí xáʼndulú mu̱ʼni̱ maxtáa gíná. “Rígi̱ eyoo gáʼthi rí maʼndulú kuʼyáá Dios: Rí muʼnimbulúʼ rí naʼtáñajunʼ” (1 Juan 5:3).

Mú, xú káʼnii gáguma tsajkurámáanʼ á mu nuʼnimbulú kuʼyáá Dios rá. Guʼyáá a̱jma̱.

“Ikhúúnʼ, Jeobá, ni̱ndxu̱ʼ Dios ndrígáʼ, bi̱ naʼsngáaʼ mu maraxtaa májánʼ, bi̱ naʼtháanʼ náa kamba̱a̱ gíʼmaa majngruigaaʼ” (ISAÍAS 48:17).

Jeobá Dios bi̱ Niʼniáanʼ, naniniáanʼ ga̱jma̱a̱ naxnúlú ikha rí ndayúlú. Á mu nandulú rí consejo ndrígóo mambáyulú mu muraʼwíí májánʼ rí mu̱ʼni̱, gíʼmáanʼ muraxnuu Biblia náa naʼthí rí Dios nandoo mu̱ʼni̱ ga̱jma̱a̱ rí muʼgími̱jna̱ mu̱ʼni̱.

“¡Gagi kuwa xa̱bu̱ bi̱ nudxawíín ajngóo Dios ga̱jma̱a̱ nunimbaníí!” (LUCAS 11:28).

Rí mbiʼi xúgi̱, mbaʼin wéñuʼ xa̱bu̱ bi̱ nunimbu̱ún Ajngá rawunʼ Dios nakúwá gagi. Guʼyáá mbá xkri̱da. Guʼyáá rí nigíʼnuu mbáa xa̱bu̱ bi̱ xtáa náa España, bi̱ tséjyúuʼ kiʼnáa ga̱jma̱a̱ naʼniún dí raʼkhí eʼwíinʼ, ma̱ngaa asndu a̱ʼgiu̱u̱. Mbá mbiʼi niguxnuu rí niʼnirámáʼ gaʼyee Moisés náa naʼthí xú káʼnii májáanʼ xa̱bu̱ ninindxu̱u̱ José, a̱ʼdióo Jacob. José nigujua̱a̱ xóo yumbáá ga̱jma̱a̱ mbaaʼ nixuda̱a̱ʼ náa guʼwá e̱jua̱nʼ, maski ajndu xúʼko̱ tániñuʼ ranindxu̱u̱ mbáa májáanʼ xa̱bu̱, tsikiʼnáa nacha̱ ga̱jma̱a̱ nigáwiinʼ a̱jkiu̱u̱n (Génesis, capítulos 37 asndu 45). Xa̱bu̱ bi̱ xtáa náa España ni̱jkha̱nú ndiʼyoo: “Rí mandxa̱ʼwa̱mínáʼ náa xkri̱da ndrígóo José nixkaxu̱u̱n mu mani̱ndxu̱ʼ májáanʼ xa̱bu̱, mu mani rí májánʼ ga̱jma̱a̱ mu maxpríguminaʼ. Ga̱jma̱a̱ rí xúgi̱ xtáá gagi gajmíi̱nʼ bi̱ kúwá náa goʼwóoʼ”.

Náa Ajngá rawunʼ Dios nuxkamaa itháan consejo xú káʼnii gíʼmaa muʼniu̱u̱n eʼwíinʼ. Guʼyáá rígi̱ náa i̱mba̱ artículo.