Xúgiáanʼ niguwaʼlú náa Adán, timbáa xa̱bu̱ numbaaʼ. Rúʼko̱ eyoo gáʼthúu̱n rí kaníkháanʼ. Maski ajndu kuaʼti̱i̱n rí xúgínʼ bi̱ kúwi̱i̱n mbá guʼwíin maʼndún kuyamijná ga̱jma̱a̱ mbuyamajkumijná, mú náa numbaaʼ na̱nguá rígá ngajua rígi̱. Dios tsénigu̱u̱ʼ rí marigá rígi̱.

“Gaʼndaaʼ xtayáá ndxájuaʼ xó má eyaʼ xtayaminaʼ” (LEVÍTICO 19:18).

“Gaʼndala ku̱ñu̱u̱n bi̱ nakiʼníin kuyala” (MATEO 5:44).

Náa 1 Corintios 13:4-7 Dios naʼtúlú xú káʼnii nindxu̱u̱ ngajua.

“Rí maʼndulú kuʼñúún eʼwíínʼ gáʼni rí maʼngulú xúgíʼ ga̱jma̱a̱ mu’ni rí májánʼ”.

Atatsaʼwáminaʼ rígi̱. Xóo ku̱ma̱ʼ índo̱ mbáa naʼngo̱o̱ a̱jkiu̱u̱n ga̱jma̱a̱ májáanʼ xa̱bu̱ nindxu̱u̱ ma̱ngaa tsékiʼnáa índo̱ najngawa̱a̱n rá.

“Rí maʼndulú kuʼñúún eʼwíínʼ maʼni rí xaxígulúʼ”.

Atatsaʼwáminaʼ rígi̱. Xú káʼnii ku̱ma̱ʼ índo̱ mbáa tsékumu̱u̱ kaʼyaʼ o naxígúu kaʼyaʼ rá.

Rí maʼndulú kuʼñúún eʼwíinʼ naʼni rí xúʼyáaʼ “i̱ndó rí ndayúlú ikháanʼ”.

Atatsaʼwáminaʼ rígi̱. Xú káʼnii ku̱ma̱ʼ índo̱ mbáa ndaʼyamajkuu rí naku̱ma̱ʼ ga̱jma̱a̱ tséʼni i̱ndó rí nandoo xá.

‹Ngajua tséjkha̱ kayóo sia̱nʼ›.

Atatsaʼwáminaʼ rígi̱. Dios xtáa xawii mu maʼni mba̱a̱ a̱jkiu̱u̱n kaʼñún bi̱ natanga̱a̱ a̱jkiu̱ún. “Ikhaa xaʼthuluʼ nangi eʼni rí nakiéʼkuluʼ, asndu má xakíʼnáa kámuu mbiʼi” (Salmo 103:9). Nadxulú wéñuʼ índo̱ mbáa bi̱ niʼni̱i̱ dí raʼkhí naʼni mba̱a̱ a̱jkiu̱u̱n kaʼyulú. Ikha jngó, mangáanʼlú gíʼmaa makuwáanʼ xawii mu mu̱ʼni̱ mba̱a̱ a̱jkiu̱lú kuʼñúún bi̱ nuniulú dí raʼkhí (Salmo 86:5).

Ngajua “tsédxuu ga̱jma̱a̱ numuu dí ra̱májánʼ rí narígá”.

Atatsaʼwáminaʼ rígi̱. Índo̱ nugíʼniinlú mbá dí raʼkhí, tsénigulú rí eʼwíinʼ maʼdxúún. Ikha jngó mangáanʼ tsédxulú índo̱ eʼwíinʼ numíniiʼ maski ajndu niniulú mbá dí raʼkhí.

Á mu nandulú rí Dios maʼni tsajkurámáanʼ, gíʼmáanʼ maʼndulú kuʼñúún eʼwíinʼ tséʼniuu má nguáthá tsiguúnʼ, náa eguwáʼ o náá religión ndrígu̱ún. Mbá rí xóo musngajmá rí nandulú kuʼñúún eʼwíinʼ nindxu̱u̱ rí mumbáñún ga̱jma̱a̱ rí nda̱ñúnʼ.