“Á mu rígá rí nunda̱ʼa̱a̱ Anu̱ʼ ga̱jma̱a̱ mbiʼyuuʼ, ikhaa maxnála” (Juan 16:23).

Rí niʼthí Jesús naʼsngúlúʼ rí gíʼmaa muʼtákáñii mínaaʼ Jeobá, raʼkháa náa xándú, ángeles o náa a̱ngiu̱lú bi̱ nikháñun, ikhaa nandoo rí majmulú mbiʼyuu Jesucristo índo̱ guʼtájkáan. Índo̱ nuʼtájkáan ga̱jma̱a̱ mbiʼyuu Jesús, nusngajmáá Dios rí nuxnáa núma̱aʼ numuu rí nduʼyáá dí naʼdxawunlú ga̱jma̱a̱ numuu rí niʼni Jesús ga̱jma̱á ni̱ndxu̱lú. Jesús niʼthí: “Nimbáa xándoo maʼga̱nú náa Anu̱ʼ á mu raʼkháa ga̱jma̱a̱ numuʼ ikhúúnʼ” (Juan 14:6).

“Náa inuu ikhaa guxnaxí a̱jkia̱la” (Salmo 62:8).

Índo̱ guʼtákañii Jeobá, gíʼmáanʼ muʼni asndu xóo kuwáanʼ ruʼtháán anu̱lú bi̱ nandoo kaʼyulú. Gíʼmaa muʼtákáñii Dios ga̱jma̱a̱ gamajkhu ma̱ngaa gíʼmaa magajnúu asndu náa a̱jkiu̱lú, raʼkháa rí muraxnuu náa mbá libro o rí gidáʼ náa edxu̱lú.

“Ma̱ndoo munda̱ʼa̱a̱ asndu ndiéjúúnʼ má rí kuajtuminaʼ ga̱jma̱a̱ rí ikhaa nandoo ga̱jma̱a̱ ikhaa naʼdxawúnlu” (1 Juan 5:14).

Náa Biblia naʼthí ndiéjunʼ gáʼni Dios ga̱jma̱á ni̱ndxu̱lú, ma̱ngaa ndiéjunʼ rí gíʼthúu̱n muʼni ikháanʼ. Mú magruigú rí guʼtakáñii, gíʼmaa muʼthán “rí kuajtuminaʼ ga̱jma̱a̱ rí ikhaa nandoo”. Mu muʼni rígi̱, ndayóoʼ muʼnigajmaa Biblia mu xúʼko̱ muniʼnííʼ itháan májánʼ, ga̱jma̱a̱ ikhaa manigu̱u̱ʼ maʼdxawunlú rí guʼtakáñii.

Guʼtájkáan ga̱jma̱a̱ numuu rí ndayúlú. Ma̱ndoo munda̱ʼa̱a̱ Dios rí mambáyulú mu maguaʼdáá ganitsu, xtíin o mbá guʼwá náa ma̱ndoo makuwáanʼ. Ma̱ngaa ma̱ndoo muʼthán rí mambáyulú muraʼwíí májánʼ rí muʼni ga̱jma̱a̱ rí maxnúlú tsiakii mu maʼngulú muraʼníí mbá gamiéjunʼ. O munda̱ʼa̱a̱ rí maʼni mba̱a̱ a̱jkiu̱u̱n kaʼyulú, rí maxnúlúʼ itháan fe ga̱jma̱a̱ rí mañewu̱nlú (Lucas 11:3, 4, 13; Santiago 1:5, 17).

Guʼtájkáan ga̱jma̱a̱ numún eʼwíinʼ. Xabuanii nanigu̱u̱nʼ rí e̱jñún maʼndún kuyamijná. Jeobá nindxu̱u̱ Anu̱lú ga̱jma̱a̱ nandoo rí muñeumíjna̱lú. Májánʼ gáʼni rí muʼtájkáan ga̱jma̱a̱ numún bi̱ kúwá náa guʼwúlú o bi̱ nambáxú májánʼ gajmiúlú. Discípulo Santiago niʼthí: “Gutajkháan ga̱jma̱a̱ numún eʼwíínʼ” (Santiago 5:16).

Guxnáa núma̱aʼ Dios. Náa Biblia naʼthí rí Dios niʼni mbaʼa rí májánʼ ga̱jma̱a̱ numulú: “Naʼni maxnúu ruʼwa asndu náa mekhuíí ga̱jma̱a̱ naʼni marigá wéñuʼ xndúu ixi̱, nuphiʼtsu asndu náa nagiʼmún ga̱jma̱a̱ gagi” (Hechos 14:17). Á mu nundxaʼwamíjná náa xúgíʼ rí niʼni Dios ga̱jma̱a̱ ni̱ndxu̱lú, maʼndulú muxnáa núma̱aʼ. Mú ma̱ngaa nusngajmá rí nuxnáa núma̱aʼ índo̱ nuʼnimbulúʼ xtángoo ndrígóo (Colosenses 3:15).

Marígá nguáná rí maʼni makuwáanʼlu gíná ga̱jma̱a̱ numuu rí Dios na̱nguá niriʼñulúʼ nacha̱. Lá nandoo gáʼthúu̱n rúʼko̱ rí tsixmiéjunʼ kaʼyulú Dios ráʼ. ¡Na̱nguá! Guʼyáá tikhu dí nasngájma rí nguáná i̱ndó ndayóoʼ rí muʼtájkáan má xúʼko̱.

Náa timbá artículo niʼthá ga̱jma̱a̱ numuu Steve. Ikhaa naʼthúlú xóó: “Á mu tatajkáan má xúʼko̱, niniʼñáminaʼ asndu nákha niʼníí”. Ndiéjunʼ nimbáyúu xá. Ikhaa nigíʼdu̱u̱ niʼnigajmaa Biblia ga̱jma̱a̱ nijmañuu rí ndayóoʼ maʼtájkáan má xúʼko̱. Rí xúgi̱ Steve naʼthí: “Naxna̱a̱ wéñuʼ núma̱aʼ Dios numuu rí numbayúʼ bi̱ nambáxuʼ gajmíi̱nʼ. Xúgi̱ xtáá itháán gagi”.

Ndiéjunʼ nigíʼnuu Jenny, bi̱ nikumu̱u̱ rí Dios rakáʼyoo maʼdxawun xá. Ikhaa naʼthí: “Índo̱ nixtáá gíná, nindo̱ʼo̱o̱ Dios rí mambáyúʼ mba̱yo̱o̱ náá numuu rí naku̱mu̱ʼ xúʼko̱ káʼnii”. Xú káʼnii nimbáyúu rí niʼtájkáan xá. “Rí mathu̱u̱n Dios nimbáyuʼ mba̱yo̱o̱ xóo eʼyoʼ ikhaa. Maski ajndu a̱jkiu̱nʼ naʼni maxtáá gíná, mú Dios na̱nguá eʼni. Ma̱ngaa nimbáyuʼ mu xákaguabúnʼ”. Ndiéjunʼ nirígá nda̱wa̱á rá. “Rí nitakáñuu Jeobá nimbáyuʼ mba̱yo̱o̱, rí nindxu̱u̱ bi̱ nambáxuʼ ga̱jmu̱ʼ, mbáa Anu̱ʼ bi̱ nandoo kaʼyoʼ ga̱jma̱a̱ mbáa Dios bi̱ gajkuwiin. Ga̱jma̱a̱ maxtáa má xúʼko̱ ga̱jma̱á ni̱ndxu̱ʼ ma̱ngaa mambáyuʼ á mu nanimínáʼ mani rí nanigu̱u̱ʼ”.

Rí xúgi̱ mbuʼyáá rí nigíʼnuu Isabel. Índo̱ kaguewáan ada̱, doctor nitháán rí a̱ʼdióoʼ xáxtáa májánʼ. Ikhú nikumu̱u̱ rí xáʼngo̱o̱ nditháan. Nikúwá tikhun bi̱ nitháán rí maxíyáa a̱ʼdióo. Ikhaa naʼthí: “Ikhú niku̱mu̱ʼ rí makhañúʼ ga̱jma̱a̱ gamiéjunʼ rí nigúʼdoo”. Ndiéjunʼ niʼni xá. “Nitakáñuu Dios mbaʼa nuthu mu mambáyúʼ”. Nda̱wa̱á nixtáa a̱ʼdióo bi̱ mbiʼyuu Gerard, bi̱ na̱nguá nigumaa májánʼ. Lá nikumu̱u̱ Isabel rí niriʼñuu Dios índo̱ niʼtákáñuu xáʼ. ¡Xúʼko̱! Ndiéjunʼ niʼni xá. “Ninújngoo mbá 14 tsiguʼ rí Jeobá nixniúʼ a̱ʼdióoʼ Gerard. Índo̱ nda̱yo̱o̱ rí a̱ʼdióoʼ xtáa gagi maski ajndu tágumaa májánʼ, nindxu̱u̱ xóo nijuixtiʼña̱a̱ rí nitajkáan.

Ajngáa rígi̱ naʼni marmáʼáan a̱jkiu̱lú rí niʼthí salmista: “Jeobá, ikháán natadxawún xa̱bu̱ guabiin. Natani̱i̱ a̱jkiu̱ún ga̱jma̱a̱ xtaa xawii mu matambáñun” (Salmo 10:17). kuaʼdáá mbaʼa numuu mu xúniʼñáʼ ruʼtájkáan.

Náa Biblia ma̱ndoo muxkamaa mbaʼa tsajkhun rí niʼni Jesús. Rí itháan najmaʼnuʼ nindxu̱u̱ rí niʼsngúún xa̱bi̱i̱. Ndiéjunʼ ejmañulú ga̱jma̱a̱ numuu ruʼko̱ rá.