XA̱BU̱

Ndiéjunʼ eʼthí náa Biblia rá. Dios “táʼni mu marigá i̱ndó Ku̱ba̱ʼ, niʼni mu makuwá xa̱bu̱” (ISAÍAS 45:18).

KU̱BA̱ʼ

Ndiéjunʼ eʼthí náa Biblia rá. “Tikhun xa̱bu̱ nagúun eʼwíinʼ naguwáʼ, mú ku̱ba̱ʼ ndajyúuʼ kámuu mbiʼi” (ECLESIASTÉS 1:4).

NDIÉJUNʼ EYOO GÁʼTHÚU̱N RÁ. Náa Biblia naʼthí rí Ku̱ba̱ʼ nditháan xámbáa ga̱jma̱a̱ makuwíin má xúʼko̱ xa̱bu̱. Mú, ndiéjunʼ eyoo gáʼthúu̱n índo̱ naʼthí rí numbaaʼ magiʼdoo fin rá.

ATATSAʼWÁMINAʼ RÍGI̱. Índo̱ náa Biblia naʼthí dí numbaaʼ magiʼdoo fin, dí marigá ikháá má xóo nákha nixtáa Noé. Nákha ikhú xa̱bu̱ “nuxmijná wéñuuʼ” (Génesis 6:13). Noé ninindxu̱u̱ mbáa xa̱bu̱ bi̱ naʼnimbo̱o̱ kaʼyoo Dios ga̱jma̱a̱ Dios niʼnikríya̱a̱ʼ ikhaa gajmíi̱nʼ familia ndrígóo, mú xa̱bu̱ xkawi̱i̱nʼ niʼni gámbíin náa ruʼwa mbiʼ. Náa Biblia naʼthí xóo nirígá: “Ikha jngóo numbaaʼ dí nirígá nákha ikhú, niguma gámbáa índo̱ nijnííʼ iyaʼ” (2 Pedro 3:6). Rúʼko̱ ninindxu̱u̱ fin ndrígóo numbaaʼ nákha ikhú. Mú ndiéjunʼ niguámbáa rá. Raʼkháa ku̱ba̱ʼ xa̱bu̱ xkawi̱i̱nʼ niguámbíin. Ikha jngóo, índo̱ náa Biblia naʼthí dí numbaaʼ magiʼdoo fin, na̱nguá eyoo gáʼthúu̱n dí mambáa numbaaʼ. Rí nandoo gáʼthúu̱n dí mambíin xa̱bu̱ xkawi̱i̱nʼ ga̱jma̱a̱ xúgíʼ rí nini.

XKUJNDU GA̱JMA̱A̱ DÍ XKAWIʼ

Ndiéjunʼ eʼthí náa Biblia rá. “Mbá chíʼgíiʼ má tígo̱o̱ dí xa̱bu̱ xkawiinʼ ní xákúwá; matiexi náa nikúwá, ga̱jma̱a̱ ndáwi̱i̱n ikhí. Mú xa̱bu̱ bi̱ májánʼ a̱jkiu̱ún makuwá náa tsu̱du̱u̱ ku̱ba̱ʼ, ga̱jma̱a̱ makuwá tsímáá wéñuuʼ” (SALMO 37:10, 11).

NDIÉJUNʼ EYOO GÁʼTHÚU̱N RÁ. Nda̱wa̱á dí nixnúu ruʼwa mbiʼ, nigi̱ʼdu̱u̱ nikúwá mbu̱júu̱ xa̱bu̱ xkawiinʼ ga̱jma̱a̱ nini gíníin eʼwíinʼ. Ruʼwa dí nixnúu nákha mbiʼi rí nixtáa Noé, na̱nguá niʼni gámbáa mbájkhu dí xkáwíʼ mú, nánguá má mba̱yu̱u̱ʼ tígo̱o̱ dí Dios maʼni gámbíin mbá kayuuʼ. Xó má niʼthí bi̱ niʼnirámáʼ Salmo, “xa̱bu̱ xkawiinʼ ní xákúwá” Dios majmiuu Xa̱bu̱ Ñajunʼ ndrígióo mu maʼni gámbáa rí xkawiʼ, mbáa Xa̱bu̱ Ñajunʼ bi̱ xtáa mekhuíí ga̱jma̱a̱ maʼtáñajúúnʼ xa̱bu̱ numbaaʼ rí munimbu̱ún kuyáá Dios.

ATATSAʼWÁMINAʼ RÍGI̱. Ndiéjunʼ gugíʼníí xa̱bu̱ ñajunʼ bi̱ kúwá náa numbaaʼ rá. Lá mambáñún Xa̱bu̱ Ñajunʼ ndrígióo Dios xáʼ. Náa Biblia naʼthí dí na̱nguá. Rí phú itháán raʼkhí dí muni ikhiin nindxu̱u̱ dí magi̱ʼdu̱u̱n gajmiún Dios (Salmo 2:2). Índo̱ ganújngoo xúgíʼ rígi̱, ndiéjunʼ gárígá ikhú rá. Xa̱bu̱ Ñajunʼ ndrígióo Dios mariʼkuwíín xúgíinʼ xa̱bu̱ ñajunʼ bi̱ kúwá náa numbaaʼ ga̱jma̱a̱ “i̱ndó ikhaa maxtáa asndu kámuu mbiʼi” (Daniel 2:44). Mú náá numuu rí ndayóoʼ muniña̱a̱ʼ rutañajunʼ xa̱bu̱ numbaaʼ rá.

Ndiéjunʼ eʼthí náa Biblia rá. “Xa̱bu̱ numbaaʼ asndu rakáʼyoo maʼthí xú káʼnii maxtáa” (JEREMÍAS 10:23).

NDIÉJUNʼ EYOO GÁʼTHÚU̱N RÁ. Xa̱bu̱ numbaaʼ na̱nguá nigumiin mu mutañajumijná. Ikha jngóo tséjmiin gutañajúún xa̱bu̱ ga̱jma̱a̱ tséjmiin gunimbaníí xkujndu ndrígu̱ún.

ATATSAʼWÁMINAʼ RÍGI̱. Náa enciclopedia Britannica Academic naʼthí dí xa̱bu̱ ñajunʼ bi̱ kúwá náa mixtiʼkhu país tséʼngu̱u̱n “gúni gajmiún xa̱bu̱ sia̱nʼ ndrígu̱ún xóo muʼthá, rí tsingíná, ewiʼ, nandii, índo̱ narígá gamiéjunʼ, guerras ga̱jma̱a̱ i̱ʼwáʼ dí xkawiʼ”. Naʼthí xóó: “Tikhun [...] nakumu̱ún dí i̱ndó mbáa xa̱bu̱ ñajunʼ bi̱ xtáa náa xúgíʼ numbaaʼ maʼngo̱o̱ maʼni gámbáa rígi̱ mbá kayuʼ”. Mú, maski ajndu xúgíinʼ xa̱bu̱ ñajunʼ bi̱ kúwá náa numbaaʼ gúwíin, mú makuwíin má rutañajunʼ xa̱bu̱ aʼkhá ga̱jma̱a̱ na̱nguá guaʼdáá tsiakii rí muni gámbáa xkujndu rí niʼthálu nángii. I̱ndó Xa̱bu̱ Ñajunʼ ndrígióo Dios gíʼdoo tsiakii mu maʼni gámbáa mbá kayuʼ xkujndu dí rígá náa xúgíʼ numbaaʼ.

Ikha jngóo, náa Biblia naʼthí rí xa̱bu̱ bi̱ nuni rí májánʼ ragíʼmaa mamiñún gaʼni fin ndrígóo numbaaʼ, xóo muʼthá numbaaʼ xkawiʼ rígi̱ náa kuwáanʼ. Numuu rí nindxu̱u̱ mbá rí nanigulúʼ wéñuʼ, numbaaʼ rígi̱ maʼga̱nú maxtiʼkhu̱u̱ ga̱jma̱a̱ mbá numbaaʼ mitsaanʼ, numbaaʼ ndrígóo Dios.

Nguáná gárígá rígi̱ rá. Náa i̱mba̱ artículo ma̱ʼkha̱ dí naʼthí náa Biblia.