¡Itháan má tígo̱o̱ makuwaanʼ náa numbaaʼ nuxi̱ʼ!
Dios niʼni ku̱ba̱ʼ mu makuwá kámuu mbiʼi xa̱bu̱ bi̱ gunimbu̱u̱n náa ikhaa (Salmo 37:29). Ikha jngóo niʼnii timbíin xa̱bu̱ mu makuwa náa ixi̱ ri̱ʼi̱ Edén, bi̱ nindxu̱u̱ Adán ga̱jma̱a̱ Eva ma̱ngaa niʼthúún ikhiin rí gajmiún e̱jñún muñewa̱a̱n Ku̱ba̱ʼ ga̱jma̱a̱ muñejuíínʼ (Génesis 1:28; 2:15).
Náa numbaaʼ rí kuwaanʼ xúgi̱, tsékujmaa nditháan rí xó Dios nindoo marigá. Mú, Dios táriʼkhuu xó rí nindxa̱ʼwáminaʼ maʼni. Ndiéjunʼ gaʼni mu maʼni̱i̱ mbá Ku̱ba̱ʼ mitsaanʼ xá. Xó má ndiʼyáá rí asndu xúgi̱ Dios xáʼni gámbáa numbaaʼ, maʼni rí makuwa xa̱bu̱ bi̱ gunimbu̱u̱n náa ikhaa. Xú kaʼnii gákuwáanʼ náa numbaaʼ índo̱ Dios gaʼnimbánuu rí nakudaminaʼ maʼni rá.
Mbáa xa̱bu̱ ñajunʼ náa xúgíʼ numbaaʼ
Nacha̱ má Xa̱bu̱ Ñajunʼ ndrígio̱o̱ Dios bi̱ xtáa mekhuíí maʼtáñajunʼ náa xúgíʼ numbaaʼ, ga̱jma̱a̱ xúgínʼ xa̱bu̱ makuwa gagi ma̱ngaa makuwa tsímáá, maʼdxúún ga̱jma̱a̱ ñajunʼ ndrígún. Dios nigíiʼ Jesucristo mú maʼtáñajunlú. Ikhaa na̱nguá nindxu̱u̱ xó xa̱bu̱ ñajunʼ bi̱ kúwá náa numbaaʼ rígi̱. Jesús nandoo má xúʼko̱ rí makuwa májánʼ eʼwíinʼ. Maʼtáñajunʼ ga̱jma̱a̱ ngajua, ikhaa mani̱ndxu̱u̱ mbáa rey bi̱ májáanʼ a̱jkiu̱u̱n, jmbii ga̱jma̱a̱ bi̱ nagáwíínʼ a̱jkiu̱u̱n (Isaías 11:4).
Xúgíʼ numbaaʼ makuwá mbá kambájxu̱u̱n
Xúgíinʼ xa̱bu̱ bi̱ makuwá náa numbaaʼ maʼndún kuyáá Dios ga̱jma̱a̱ maʼndún kuyamijná kaníkhiin (Apocalipsis 7:9, 10). Tséʼniuu má náa xuajñún ga̱jma̱a̱ raza ndrígún xurkuajimíjna numuu rí xúgíinʼ makuwa mbá kambájxu̱u̱n. Xúgiáanʼ muñajunʼ mbóó ga̱jma̱a̱ tsímáá mú muʼnimbánii rí nandoo Dios: Rí muñewa̱a̱n Ku̱ba̱ʼ náa makuwáanʼ (Salmo 115:16).
Xa̱bu̱ makuwá tsímáá ga̱jma̱a̱ xúgíʼ dí rígá náa ku̱ba̱ʼ
Índo̱ Xa̱bu̱ Ñajunʼ ndrígio̱o̱ Dios gáʼga̱nú maʼtáñajunʼ náa numbaaʼ, ikhú Dios bi̱ niʼniwíi xúgíʼ dí rígá maʼni rí clima mani̱ndxu̱u̱ xúgíʼ májánʼ (Salmo 24:1, 2). Índo̱ Jesús nixtáa náa numbaaʼ ga̱jma̱a̱ niʼthúu̱n giñánʼ mbiʼ rí maʼni wíí, nisngajmá rí majmañuu maʼni ga̱jma̱a̱ tsiakii ndrígóo Dios (Marcos 4:39, 41). Índo̱ Cristo gáʼtá ñajunlú, nimbáa ní xámiñuu rí marigá ruʼwa mbiʼ ga̱jma̱a̱ giñánʼ. Ma̱ngaa, Xa̱bu̱ Ñajunʼ ndrígio̱o̱ Dios maʼgánú maʼni rí xa̱bu̱ makuwá tsímáá gajmiún xujkhú ga̱jma̱a̱ nimbáa ní xáʼni gachúu numbaaʼ (Oseas 2:18).
Ní xáʼniun nandii ga̱jma̱a̱ muguaʼdáá ganitsu xúgíinʼ
Xúgiáanʼ makuwáanʼ májánʼ. Nimbáa ní xáʼniuu nandii, maʼkíi o makhañúu (Isaías 35:5, 6). Makuwáanʼ náa mbá numbaaʼ mitsaanʼ ga̱jma̱a̱ kaʼwu, xó má nixtáa Adán ga̱jma̱a̱ Eva. Náa numbaaʼ nuxi̱ʼ, majmaa wéñuuʼ ganitsu náa xúgíʼ Ku̱ba̱ʼ, ga̱jma̱a̱ xúgiáanʼ muguaʼdáá wéñuʼ ganitsu rí muʼphu, xó má nirígá náa ixi̱ ri̱ʼi̱ Edén (Génesis 2:9). Náa Ku̱ba̱ʼ mitsaanʼ marigá rí Dios niʼthún xa̱bi̱i̱ bi̱ nikúwá nákha wajyúuʼ náa Israel: “Mu̱phu̱ ganitsu ndrígála asndu magiʼmala” (Levítico 26:4, 5).
Tsímáá ga̱jma̱a̱ ní xárígá dí ra̱májánʼ
Índo̱ gáʼtañajunʼ Xa̱bu̱ Ñajunʼ ndrígio̱o̱ Dios, marigá rí tsímáá náa xúgíʼ numbaaʼ, ní xárígá dí ra̱májánʼ ga̱jma̱a̱ xúgíinʼ xa̱bu̱ maʼndún kuyamijná. Ní xárígá guerra, nimbáa ní xáʼni mbamína náa ñajunʼ ndrígóo ga̱jma̱a̱ xúgiáanʼ muguaʼdáá rí ndayúlú. Náa Biblia naʼthí: “Ga̱jma̱a̱ mámbáa xa̱bu̱ magi̱ʼi̱ náa agoo ixu̱u̱ uva ga̱jma̱a̱ náa agoo ixi̱ higo, ma̱ngaa ní xáxtáa nimbáa bi̱ maʼnimiñun” (Miqueas 4:3, 4).
Xúgíinʼ maguáʼdáá guʼwún ga̱jma̱a̱ ñajunʼ májánʼ
Xúgíinʼ xa̱bu̱ gajmiún e̱jñún maguáʼdáá náa makuwá ní xámiñún rí munimbáti̱ga̱ guʼwún, ga̱jma̱a̱ xúgiáanʼ maʼdxulu náa ñajunʼ rí guʼni. Ikha jngóo, náa Biblia naʼthí bi̱ gákúwá náa numbaaʼ nuxi̱ʼ “ni xáʼni néʼngu̱u̱n”, nditháan kayuuʼ (Isaías 65:21-23).
Kisngáa rí itháan májánʼ
Náa Biblia naʼthí: “Numuu rí náa ku̱ba̱ʼ marigá wéñuʼ ku̱ma̱ ndrígóo Jeobá” (Isaías 11:9). Bi̱ ni̱ndxu̱lú xa̱bu̱ numbaaʼ majmañulú ku̱ma̱ ndrígóo Jeobá bi̱ niʼniáanʼlu, ga̱jma̱a̱ xúgíʼ rí mitsaanʼ dí ikhaa niʼniwíi. Makuwáanʼ tsímáá ga̱jma̱a̱ muñewa̱a̱n Ku̱ba̱ʼ, ma̱ngaa xájmulú rí najmañulú mú muʼniwií ajua̱nʼ o rí muʼni gawúúnʼ eʼwíinʼ (Salmo 37:11; Isaías 2:4).
Makuwáanʼlu kámuu mbiʼi
Dios ndiʼyoo májánʼ xú kaʼnii maʼni mújúnʼ Ku̱ba̱ʼ numuu rí nandoo makuwáanʼ kámuu mbiʼi ikhí ga̱jma̱a̱ makuwáanʼ asndu xó má eʼngo̱o̱ náa xúgíʼ mbiʼi (Salmo 37:29; Isaías 45:18). Mú makánulu rígi̱, Dios “maʼni gámbáa kámuu mbiʼi rí nakháñulú” (Isaías 25:8). Ga̱jma̱a̱ náa Biblia naʼthí “rí nakháñulú ní xarigá itháan, ní xarigá tsingíná, ni xtambiyaʼ asndu má gaʼkhu” (Apocalipsis 21:4). Dios maniñuuʼ rí makuwá asndu kámuu mbiʼi xa̱bu̱ bi̱ makáwíin náa numbaaʼ nuxi̱ʼ, xóo muʼthá bi̱ ikhaa gaʼni káwíin índo̱ ga̱ʼkha̱ fin ga̱jma̱a̱ ra̱ʼkhá tháán mbaʼin wéñuʼ xa̱bu̱ magabiín (Juan 5:28, 29; Hechos 24:15).
Rí mbiʼi xúgi̱, mbaʼin wéñuʼ xa̱bu̱ bi̱ kúwá náa xúgíʼ numbaaʼ kúwíin runiratamijná mu makuwá náa mbá numbaaʼ nuxi̱ʼ índo̱ Xa̱bu̱ Ñajunʼ ndrígio̱o̱ Dios gáʼtañajunʼ. Maski má ni̱ndxu̱ún xa̱bu̱ aʼkhá, nuni tsiakimijna rí mani̱ndxu̱ún xa̱bu̱ bi̱ Dios nandoo makuwá náa numbaaʼ nuxi̱ʼ. Xú káʼnii e̱ni̱ xá. Nuniʼniiʼ Jeobá Dios ga̱jma̱a̱ Jesucristo bi̱ ikhaa nikunguanʼ (Juan 17:3).
Itháan má tígo̱o̱ mambá rí xkawiiʼ dí rígá náa numbaaʼ rígi̱. Á mu nandaaʼ matayaa rí gíʼmaa matani mu makríñanʼ ga̱jma̱a̱ maraxtaa náa mbá numbaaʼ rí itháan májánʼ, atandrigú dí mbáa xa̱bi̱i̱ Jeobá masngáaʼ ga̱jma̱a̱ Biblia majmuu libro ¡Araxtaa gagi kámuu mbiʼi!
Puede que también le interese
BI̱ NAYEJNGOO
Rí gáʼni Reino ndrígóo Dios
Jesús ndiʼyoo rí i̱ndó Reino ndrígóo Dios nindxu̱u̱ mbáa Xa̱bu̱ Ñajunʼ bi̱ maʼngo̱o̱ maʼnimbánuu xkujndu. Ndiéjunʼ niʼni má mu makumulúʼ kuʼyáá xá.
BI̱ NAYEJNGOO
Reino ndrígóo Dios: Mbáa Xa̱bu̱ Ñajunʼ náa nda̱a̱ dí ra̱májánʼ
Atayáá majun enii rí xú káʼnii ní xarigá dí ra̱májánʼ náa Xa̱bu̱ Ñajunʼ bugi̱.
