Lá nitraxnuu kuduun iwáá i̱yi̱i̱ʼ Bi̱ Nayejngoo rá. Atayáá á mu majmáán matriʼña̱a̱ graxe̱ rígi̱:

Xú káʼnii gíʼmaa muʼniu̱u̱n bi̱ kaxtaʼwíin rá.

Nduʼyáá rí guaʼdáá fe, mú tseʼñún xóo bi̱ guaʼdáá numún. Na̱nguá ni̱ndxu̱lú bi̱ “nuyejxi̱i̱ xóo ni̱ndxu̱ún” (Jud. 16, nota). Tséʼniuu graxe̱ rí xú káʼnii eyáá dí magúun mekhuíí (w20.01, página 29).

Náá numuu nduʼyáá gajkhun rí Jeobá nandoo kaʼyoo mambáa dí ikháanʼlu rá.

Náa Biblia naʼthí rí Jeobá ndiʼyulú asndu nákha xóo tsegumán ma̱ngaa naʼdxawuun rí nuʼtákáñii. Ma̱ngaa ndaʼyoo dí giwánʼ náa a̱jkiu̱lú ga̱jma̱a̱ rí nundxaʼwamíjná. Ma̱ngaa dí xóo nuʼni, naʼni maxtáa gagi o ngíná (1 Crón. 28:9; Prov. 27:11). Rúʼko̱ naʼni dí makuwáánʼ mijngii náa ikhaa (w20.02, ináa 12).

Nguáná gáʼyóoʼ muʼthá ga̱jma̱a̱ nguáná xáʼyóoʼ muʼtá rá.

Dí muʼthá ga̱jma̱a̱ numuu Jeobá naʼni rí makuwáanʼ gagi. Ma̱ngaa gíʼmaa muʼthán mbáa índo̱ nduʼyáá naʼni dí raʼkhí. Bi̱ kuya̱ edxu̱u̱ nuxnún consejo a̱ngiu̱lú índo̱ nda̱ñu̱n. Tserajxu̱u̱n a̱ngiu̱lú xú káʼnii eni náa tséniñuuʼ mutaraʼa. Tseʼthá dí rakaʼyóo mudxawíinʼ eʼwíinʼ (w20.03, ináa 20 ga̱jma̱a̱ 21).

Ndiéjunʼ rí naʼni mixtiʼkuiin tsíʼbu bi̱ naʼthí náa capítulo 2 ndrígóo Joel ga̱jma̱a̱ dí naʼthí náa Apocalipsis capítulo 9 rá.

Joel 2:20-29 naʼthí rí Dios maʼga̱ kagui̱i̱n mitsínguánʼ tsíʼbu, ga̱jma̱a̱ martanga̱a̱ mudalá rí ni̱ʼphu̱. Nda̱wa̱á dí rúʼko̱, naxidíramuuʼ xi̱ʼ ndrígóo. Rígi̱ nimbánúu índo̱ babilonio ninigambáa Israel. Apocalipsis 9:1 asndu 11, naʼthí ga̱jma̱a̱ numún bi̱ kaxtaʼwíin bi̱ kúwá xúgi̱, bi̱ ni̱ndxu̱ún xóo tsíʼbu índo̱ nutaraʼa dí maʼni Dios ga̱jma̱a̱ numbaaʼ xkawiʼ rígi̱, rí naʼni makiʼníin mbaʼin xa̱bu̱ (w20.04, ináa 3 asndu 6).

Tsáa nindxu̱u̱ “rey ndrígóo norte” rí mbiʼi xúgi̱ rá.

Rusia gajmíi̱n xa̱bi̱i̱. Nuni gínáa xuajñuu Dios índo̱ na̱nguá niniñuuʼ mutaraʼa ga̱jma̱a̱ nawiñu̱u̱ kuñún. Rey ndrígóo norte ga̱jma̱a̱ rey ndrígóo sur nagiʼdu̱u̱n má xúʼko̱ (w20.05, ináa 13).

Náa gálatas 5:22, 23 naʼthí mbá 9 cualidad, lá káaʼ i̱ndó rúʼko̱ rígá náa xi̱ʼ kaʼwu rá.

Na̱nguá. Xi̱ʼ kaʼwu ma̱ngaa nambáyulúʼ muguaʼdáá i̱ʼwáʼ cualidad, xóo rí muʼni dí jmbu (Efes. 5:8, 9) (w20.06, ináa 17).

Ndiéjunʼ dí gamíi marigá á mu nuxuʼdanʼ fotiulu, video o dí naʼthí ga̱jma̱á numulú náa internet rá.

Dí nuxuʼdanʼ náa internet rúʼko̱ nasngájma rí nuʼni mbaʼumíjna̱ raʼkháa rí ni̱ndxu̱lú xa̱bu̱ guabaaʼ (w20.07, ináa 6 ga̱jma̱a̱ 7).

Ndiéjunʼ gándoo gajmañulú náa bi̱ najmañún nurawíin májánʼ e̱gi̱ʼ rá.

Bi̱ najmañún nduñíinʼ e̱gi̱ʼ nuñajunʼ náa nduyáá rí kaʼnii muxkamin e̱gi̱ʼ, najmañún najmún rí murugui̱i̱n ga̱jma̱a̱ ma̱ngaa tsémiñún muñajunʼ maski ajndu naʼni gakhii. Xúʼko̱ ma̱ndoo muʼni mangáanʼ náa nuʼtáraʼa (w20.09, ináa 5).

Xóo gumbáyii bi̱ nuʼsngáa mu maʼndoo kaʼyoo itháan Jeobá rá.

Guʼtháán rí maguxnuu Biblia xúgíʼ mbiʼi, gumbáyii mu mandxaʼwáminaʼ rí niguxnuu ga̱jma̱a̱ guʼsngáá xú káʼnii gáʼtájkáan (w20.11, ináa 4).

Tsíin nindoo gaʼthí Pablo índo̱ niʼthí rí bi̱ gúnimbu̱ún “náa Cristo xúgínʼ mbuya” rá. (1 Cor.15:22.)

Apóstol Pablo na̱nguá nindoo gaʼthí rí xúgínʼ xa̱bu̱ matujxiín. Índo̱ niʼthí “xúgínʼ” niʼthí rí bi̱ kaxtaʼwíin, di̱ ‹ikhiin niguma kaʼwiin náa Cristo Jesús› (1 Corintios 1:2; 15:18) (w20.12, ináa 5 ga̱jma̱a̱ 6).

Ndiéjunʼ gúni bi̱ kaxtaʼwíin nda̱wa̱á índo̱ gaxtiʼkhuín xóo, ‹mbá nurmbaʼtaa ga̱jma̱a̱ nurajmii idún índo̱ gáwaan iwáá trompeta rá.› (1 Cor. 15:51-53).

Mumbayíí Jesús mu muñawu̱u̱n xa̱bu̱ ga̱jma̱a̱ xkuíyá rí ki̱ʼni̱ ga̱jma̱a̱ hierro (Apoc. 2:26, 27) (w20.12, ináa 12 ga̱jma̱a̱ 13).