1, 2. Ndiéjunʼ dí mitsaanʼ kuaʼti̱i̱n ikháanʼlu bi̱ ni̱ndxu̱lú xa̱bi̱i̱ Jeobá rá.

NÁA vida ndrígúlú nandulú makuwáánʼ tsímáá. Mbá xkri̱da kúwi̱i̱n tikhun bi̱ nandún makuwíin tsímáá gajmiún bi̱ ndiya̱a̱, dí e̱jñún maʼnii májánʼ, o dí maʼni̱i̱ a̱jkiu̱ún ga̱jma̱a̱ numuu mbá nandii. Mangáanʼ bi̱ ni̱ndxu̱lú cristianos nandulú makuwáánʼ xígi̱. Mú rígá mbá dí itháán mitsaanʼ, ikhaa nindxu̱u̱ dí makuwáanʼ kámuu mbiʼi ga̱jma̱a̱ dí matangáan mbuʼñún a̱ngiu̱lú bi̱ nikháñun.

² Apóstol Pablo niʼthí ajngáa rígi̱ ga̱jma̱a̱ numuu dí magabiín xa̱bu̱: “Ikhúúnʼ gúʼthu̱u̱n náa Dios [...] dí maguaxu̱ún xa̱bu̱ bi̱ nikháñun bi̱ nini rí jmbu xúʼko̱ má bi̱ túni rí jmbu” (Hech. 24:15). Mú nákha ikhaa xóó tséʼthi rígi̱, Job niʼthí dí xtáa gajkhun dí Dios marmáʼáan a̱jkiu̱u̱n kaʼyoo ga̱jma̱a̱ dí maʼni ga̱bi̱i̱ (Job 14:7-10, 12-15).

3. Xú káʼnii embáyulú rí mbuʼyáá dí naʼthí náa 1 Corintios capítulo 15 rá.

³ ‹Dí maguaxu̱ún xa̱bu̱ bi̱ nikháñun› nindxu̱u̱ mbá “rí phú nikumu̱u̱” o dí “nijmañulúʼ ginii” (Heb. 6:1, 2). Pablo niʼtáriyaʼ itháan náa 1 Corintios capítulo 15. Dí niʼthí nixnúún tsiakii a̱ngiu̱lú bi̱ nikúwá nákha siglo timbá ga̱jma̱a̱ naxnúlú tsiakii mangáán dí mbiʼi xúgi̱, rí tséʼniuu asndu nguáthá má mba̱yu̱u̱ʼ kuaʼti̱i̱n rígi̱.

4. Náá numuu nduʼyáá gajkhun rí maguaxu̱ún bi̱ kuʼñúún nda̱wa̱á rá.

⁴ Dí ni̱ga̱bi̱i̱ Jesús, rúʼko̱ naʼni mbuʼyáá rí maguaxu̱ún bi̱ kuʼñún bi̱ nikháñun. Rígi̱ nindxu̱u̱ mbá “ajngáa májánʼ” dí niʼtáruʼun bi̱ corintios Pablo (1 Cor. 15:1, 2). Niʼthúún rí á mu na̱nguá enimbún dí Cristo nitujxi̱i̱, xágiʼdoo numuu fe ndrígu̱ún  (1 Cor. 15:17). Rí ni̱ga̱bi̱i̱ Jesús rúʼko̱ naʼni mbuʼyáá gajkhun maguaxu̱ún bi̱ nikháñúún.

5, 6. Ndiéjunʼ eyoo gaʼthúun náa ikháanʼ ajngáa dí na̱ʼkha̱ náa 1 Corintios 15:3, 4 rá.

⁵ Pablo nigíʼdu̱u̱ niʼthí ga̱jma̱a̱ numuu ajtsú dí nigiʼnuu Cristo: “Dí Cristo nikháñuu ga̱jma̱á numuu aʼkhúnlú”, “rí nijuaʼdi̱i̱” ga̱jma̱a̱ “dí nituxi̱i̱ ajtsú mbiʼi nda̱wa̱á xó má eʼthí náa Escrituras” (atraxnuu 1 Corintios 15:3, 4). *

⁶ Ndiéjunʼ eyoo gáʼthúu̱n náa ikháanʼ dí nikháñuu, nijuaʼdi̱i̱ ga̱jma̱a̱ dí nituxi̱i̱ Jesús rá. Gaʼyee Isaías niʼtáriyaʼ dí Mesías ‹makáñuu náa bi̱ nduya› ga̱jma̱a̱ “majnguáan náa najnguáán bi̱ nuni dí ra̱májánʼ”. Mú niʼthí xóó: Maʼga̱a̱ ka̱gu̱ ‹aʼkhá ndrígu̱ún mbaʼin xa̱bu̱›. Xú káʼnii niʼni rígi̱ xá. Rí nikháñuu ga̱jma̱á ni̱ndxu̱lú (Is. 53:8, 9, 12; Mat. 20:28; Rom. 5:8). Ikha jngó rí nikháñuu, rí nijuaʼdi̱i̱ ga̱jma̱a̱ dí nituxi̱i̱ Jesús naʼni rí maguaʼdáá mbá fe gujkhuʼ, rí makáwáanʼ náa aʼkhá ma̱ngaa rí maguaxu̱ún á mu nakháñulú ga̱jma̱a̱ rí matangáanʼ mbuʼñún mbu̱júu̱ bi̱ kuʼñúún bi̱ nikháñun.

7, 8. Ndiéjunʼ naʼniulú mbuʼyáá dí Jesús ni̱ga̱bi̱i̱ rá.

⁷ Mu makumulúʼ rí gajkhun maguaxu̱ún bi̱ nikháñun ndayóoʼ rí muʼnimbulúʼ dí gajkhun Jesús ni̱ga̱bi̱i̱ índo̱ nikháñuu. Náá numuu ma̱ndoo makuwáánʼ gajkhun rí Jeobá niʼniga̱bi̱i̱ Jesús rá.

⁸ Nikúwi̱i̱n mbaʼin xa̱bu̱ bi̱ ndiyáá rí ni̱ga̱bi̱i̱ Jesús (1 Cor. 15:5-7). Náa timbáa bi̱ náa nisngájmaminaʼ bi̱ niʼthí Pablo ninindxu̱u̱ Cefas, xóo muʼthá apóstol Pedro. Ma̱ngaa mbá nguéjmi̱i̱n discípulo nithi, dí Pedro ndiʼyoo Jesús nda̱wa̱á rí ni̱ga̱bi̱i̱ (Luc. 24:33, 34). Ma̱ngaa ndiyáá apóstol ndrígóo bi̱ mbá “gu̱wa̱ʼ e̱jmi̱i̱n”, “nda̱wa̱á kayuʼ nisngájmaminaʼ náa inún itháan rí mbá witsu ciento a̱ngiu̱lú”. Mateo 28:16-20, naʼthí gagi rí nixtáa índo̱ ndiʼñiín a̱ngui̱i̱n náa Galilea. Ma̱ngaa “nisngájmaminaʼ náa Santiago” bi̱ nindxu̱u̱ giʼtio̱o̱ skojo̱o̱, bi̱ tséʼnimbo̱o̱ rí Jesús nindxu̱u̱ Mesías (Juan 7:5). Asndu nda̱wa̱á rí ndiʼyoo dí ni̱ga̱bi̱i̱ ikhú niʼnimbo̱o̱. Índo̱ Pablo niʼnirámáʼ carta mijngíí tsiguʼ 55, mbaʼin bi̱ ndiyáá rí Jesús ni̱ga̱bi̱i̱ xóó tsékháñún nákha ikhú. Ikha jngó bi̱ tsénimbu̱ún ma̱ndoo muthúún ikhiin.

9. Xó má naʼthí náa Hechos 9:3-5, ndiéjunʼ imbo̱o̱ʼ ma̱ndoo maʼthí Pablo dí gajkhun ni̱ga̱bi̱i̱ Jesús rá.

⁹ Nda̱wa̱á Jesús nisngájmaminaʼ náa mínaʼ Pablo (1 Cor. 15:8). Bi̱ ma̱ngaa mbiʼyuu Saulo, índo̱ xtáa ra̱jkha̱ náa Damasco niʼdxuun aʼwóo Jesús bi̱ ni̱ga̱bi̱i̱ ga̱jma̱a̱ ndiʼyoo Jesús náa mbá visión (atraxnuu Hechos 9:3-5). * Dí nigíʼnuu apóstol Pablo, rúʼko̱ nasngájma gajkhun dí Jesús ni̱ga̱bi̱i̱ (Hech. 26:12-15).

10. Índo̱ Pablo ndiʼyoo dí Jesús gajkhun ni̱ga̱bi̱i̱, ndiéjunʼ dí nixtáa xawii maʼni xá.

¹⁰ Kúwi̱i̱n tikhun bi̱ niʼniún tsiánguá dí Pablo naʼtáraʼa, numuu rí ikhaa nákha ginii nixkúún cristiano. Mú índo̱ ni̱jkha̱nú ndiʼyoo gajkhun dí Jesús ni̱ga̱bi̱i̱, niʼni tsiakimínáʼ dí maʼtáruʼun eʼwíinʼ. Ga̱jma̱a̱ náa nijkha gaʼtáraʼa nimínuuʼ numuu rí nixnáá ga̱jma̱a̱ ixi̱, niʼngo̱o̱ índo̱ nixu̱da̱a̱ʼ náa guʼwá e̱jua̱nʼ ma̱ngaa nimínuuʼ índo̱ nigu̱ʼwi̱i̱ (1 Cor. 15:9-11; 2 Cor. 11:23-27). Ndiʼyoo gajkhun rí Jesús ni̱ga̱bi̱i̱, ikha jngó nixtáa xawii makhañúu ga̱jma̱a̱ numuu rúʼko̱. Ga̱jma̱a̱ numuu rígi̱, rúʼko̱ naʼniulú mbuʼyáá mangáanʼ dí gajkhun Jesús ni̱ga̱bi̱i̱. Ma̱ngaa naʼni itháán gujkhuʼ fe ndrígúlú dí magabiín xa̱bu̱ bi̱ nikháñúún.

11. Náá numuu rí cristiano bi̱ nikúwá náa corinto na̱nguá enimbu̱ún rí maguaxu̱ún xa̱bu̱ rá.

¹¹ Tikhun cristianos bi̱ nikúwá náa xuajen griega Corinto na̱nguá enimbu̱ún dí maguaxu̱ún xa̱bu̱ nda̱wa̱á, rí asndu tsíñún gúyáá ga̱jma̱a̱ numuu kiʼsngáa rígi̱ ( 1 Cor. 15:12). Náá numuu rá. Numuu rí xuajen Atenas dí gíʼ mijngii ikhí, kúwi̱i̱n tikhun xa̱bu̱ bi̱ ninigajmaa ga̱jma̱a̱ numuu vida, ikhiin na̱nguá enimbu̱ún dí Jesús ni̱ga̱bi̱i̱, mbáa ga̱jma̱a̱ numuu rúʼko̱ dí tikhun cristiano bi̱ Corinto nindxa̱ʼwa̱míjna̱ xúʼko̱ kaʼnii (Hech. 17:18, 31, 32). Eʼwíinʼ cristiano ndiyáá dí maguaxu̱ún xa̱bu̱, nindxu̱u̱ káaʼ xóo mbá xkri̱da. Numuu rí nakumu̱ún dí nákha xóó tsenindxu̱ún cristiano ga̱jma̱a̱ rí ni̱ndxu̱ún xa̱bu̱ aʼkhá, nakumu̱ún rí asndu xóo nikháñúún má. Mú índo̱ nanindxu̱ún cristiano ikhú natangiín nakúwá, numuu dí niguma mba̱a̱ a̱jkiún kuñún ga̱jma̱a̱ numuu aʼkhá. Mixtiʼkhu xóó nakumu̱ún, á mu na̱nguá enimbu̱ún rí maguaxu̱ún xa̱bu̱, fe ndrígu̱ún nda̱a̱ numuu. Ndiéjunʼ gárígá á mu Dios na̱nguá niʼniga̱bi̱i̱ Jesús rá. Na̱nguá nijuiʼtsiwíin náa aʼkhá ga̱jma̱a̱ na̱nguá má niʼni mba̱a̱ a̱jkiu̱u̱n kaʼñún Dios. Ikha jngó bi̱ na̱nguá ekumu̱ún rí maguaxu̱ún xa̱bu̱, nda̱a̱ rí guáʼthi̱i̱n nda̱wa̱á (1 Cor. 15:13-19; Heb. 9:12, 14).

12. Xó má naʼthí náa 1 Pedro 3:18, 22, ndiéjunʼ rí naʼni mixtiʼkhu náa rí ni̱ga̱bi̱i̱ Jesús ga̱jma̱a̱ eʼwíinʼ rá.

¹² Mínaʼ má Pablo ndiʼyoo dí Cristo “ni̱ga̱bi̱i̱ náa xa̱bu̱ bi̱ nikháñun”. Ga̱jma̱a̱ rí xóo ni̱ga̱bi̱i̱ ikhaa ninindxu̱u̱ itháán májánʼ ki xóo bi̱ nigabiín nákha ginii, numuu rí ikhiin nikháñun mbu̱júu̱. Pablo niʼthí rí Jesús “ni̱ga̱bi̱i̱ ginii náa xúgínʼ bi̱ nunuʼ náa nikháñun”. Ndíjkha jngó nuʼthá dí Jesús ni̱ga̱bi̱i̱ ginii rá. Numuu rí ikhaa ninindxu̱u̱ timbáa xa̱bu̱ bi̱ ni̱ga̱bi̱i̱ xóo espiritu, ga̱jma̱a̱ bi̱ ni̱jkha̱a̱ mekhuíí (1 Cor. 15:20; Hech. 26:23; atraxnuu 1 Pedro 3:18, * 22). *

13. Ndiéjunʼ rí naʼni mixtiʼkhu dí nikháñuu Jesús ga̱jma̱a̱ rí nikháñuu Adán dí niʼthí Pablo rá.

¹³ Xú káʼnii gáʼngo̱o̱ dí nikháñuu mbáwíi xa̱bu̱ maʼni káwíin mbaʼin rá. Pablo niʼthí kaʼwu rígi̱. Ikhaa niʼthí rí naʼni mixtiʼkhu rí Adán niʼni, ma̱ngaa rí naʼngo̱o̱ naʼni dí nikháñuu Cristo. Índo̱ niʼthí rí niʼni Adán ‹dí nakháñulú nito̱ʼo̱o̱ ga̱jma̱a̱ numuu mbáwíi xa̱biya̱›. Índo̱ Adán nikudaminaʼ aʼkhá nixiyaminaʼ má ikhaa ga̱jma̱a̱ e̱ji̱i̱n bi̱ gáguwáʼ nda̱wa̱á. Asndu ikháanʼlu rí mbiʼi xúgi̱ numíniiʼ ga̱jma̱a̱ numuu dí ikhaa na̱nguá niʼnimbo̱o̱. Mú núma̱aʼ má Dios rí niʼniga̱bi̱i̱ A̱ʼdióo náa rí nikháñuu, ikha jngó rígá dí kuaʼti̱i̱nlú nda̱wa̱á. Pablo niʼthí: “Rí magabiín bi̱ nikháñúún ma̱ngaa na̱ʼkha̱ ga̱jma̱a̱ numuu mbáa xa̱biya̱. Ga̱jma̱a̱ numuu Adán xúgínʼ nakháñúún, xúʼko̱ ma̱ngaa náa Cristo xúgínʼ mbuya” (1 Cor. 15:21, 22).

14. Náá numuu nduʼyáá rí Adán xagabíi rá.

¹⁴ Tsíin bi̱ nindoo gáʼthí Pablo rí bi̱ gaguwá náa Adán xúgíinʼ makhañún rá. Nandoo gáʼthúu̱n rí e̱ji̱i̱n bi̱ gáguwáʼ náa ikhaa, numuu rí náa ikhaa nindrígúlú aʼkhá ga̱jma̱a̱ rí nakháñulú (Rom. 5:12). Adán xakánaa rí maxtáa ‹kámuu mbiʼi›. Ikhaa xámbáyuu dí nikháñuu Cristo, numuu rí ninindxu̱u̱ mbáa xa̱bu̱ jmbii ga̱jma̱a̱ niʼni kajúun má rí Dios na̱nguá niʼthún maʼni. Ikhaa nigruigú rí mundrígú bi̱ ni̱ndxu̱ún xóo tsu̱jtuunʼ bi̱ niʼthí ‹A̱ʼdióo xa̱biya̱›  xóo muʼthá rí ‹mambíin mbá kayúʼ› (Mat. 25:31-33, 46; Heb. 5:9).

15. Tsíin mangiin ni̱ndxu̱ún bi̱ “xúgínʼ mbuya” rá.

¹⁵ Nduʼyáá dí Pablo niʼthí rí bi̱ gúnimbu̱ún “náa Cristo xúgínʼ mbuya”. (1 Cor. 15:22.) Niʼnirámáʼ carta rígi̱ mu maʼga̱ inún cristiano bi̱ kúwá náa Corinto bi̱ kaxtaʼwíin bi̱ magúun mekhuíí. Numuu rí ‹ikhiin niguma kaʼwiín náa Cristo Jesús› ga̱jma̱a̱ ‹nigumbiʼñún kaʼwiin›. Pablo ma̱ngaa niʼthí ‹bi̱ nikháñúún ga̱jma̱a̱ numuu Cristo› (1 Cor. 1:2; 15:18; 2 Cor. 5:17). Ga̱jma̱a̱ náa i̱mba̱ carta dí niʼnirámáʼ niʼthí: “Á mu kuwáanʼ gajmiúlú ikhaa xó má índo̱ nikháñuu, gajkhun rí mangáanʼ makuwáanʼ gajmiúlú ikhaa índo̱ gágabi̱i̱” (Rom. 6:3-5). Jesús ni̱ga̱bi̱i̱ xóo espiritu ga̱jma̱a̱ ni̱jkha̱a̱ mekhuíí. Rúʼko̱ má dí guáʼthi̱i̱n xúgíinʼ ‹bi̱ gajmiún cristo›, xóo muʼthá xúgíinʼ bi̱ kaxtaʼwíin.

16. Ndiéjunʼ nindoo gaʼthí Pablo índo̱ niʼthí dí Jesús ni̱ga̱bi̱i̱ ginii rá.

¹⁶ Pablo niʼnirámáʼ dí Cristo “ni̱ga̱bi̱i̱ ginii náa xúgínʼ bi̱ nunuʼ náa nikháñun”. Jesús ninindxu̱u̱ timbáa bi̱ ni̱ga̱bi̱i̱ xóo espiritu ga̱jma̱a̱ nikhánáá rí maxtáa kámuu. Mú nda̱wa̱á nikúwi̱i̱n eʼwíinʼ xa̱bu̱ bi̱ nigabiín, xó má Lázaro. Xóo muʼthá rí ninindxu̱u̱ xóo xndú rí nindrigúu ginii kayuuʼ israelita rí nuxnajxi̱ náa Dios. Ikha jngó Jesús ninindxu̱u̱ ‹ginii bi̱ ni̱ga̱bi̱i̱›. Pablo ma̱ngaa niʼthí rí makuwi̱i̱n eʼwíinʼ bi̱ matuxi̱ín bi̱ magúun mekhuíí. Ga̱jma̱a̱ rí makuwi̱i̱n ‹gajmiún Jesús› ikhiin ni̱ndxu̱ún apóstol bi̱ magúun mekhuíí xó má Jesús.

17. Nguáná gágúun mekhuíí “bi̱ nikháñun ga̱jma̱a̱ numuu Cristo” rá.

¹⁷ Índo̱ Pablo niʼnirámáʼ carta náa inún a̱ngiu̱lú bi̱ kúwá náa Corinto. ‹Bi̱ kúwi̱i̱n mbóó gajmiún Cristo› xóo tséjkha̱nú mbiʼi rí magúun mekhuíí. Ga̱jma̱a̱ niʼthí rí xájyúuʼ má rí magúun mekhuíí. Niʼthí: “Mámbá gáʼga rarígá xó má kaʼyoo: Cristo ginii kayuʼ, nda̱wa̱á bi̱ ndrígio̱o̱ Cristo índo̱ ikhaa gáʼkha̱a̱” (1 Cor. 15:23; 1 Tes. 4:15, 16). Xó má eʼyáá, apóstol mangiin bi̱ kaxtaʼwíin ndayóoʼ rí muguaʼthi̱i̱n asndu índo̱ gáʼkha̱a̱ Cristo mu ikhiin magúun mekhuíí ga̱jma̱a̱ rí ‹makuwi̱i̱n mbóó gajmiún ikhaa›. Rí xúgi̱ kúwáanʼ má mbiʼi rúʼko̱, dí gítháán má “ma̱ʼkha̱a̱” Cristo.

18. a) Náá numuu nduʼyáá kaʼwu rí nda̱wa̱á rí bi̱ magabiín mu magúun mekhuíí marigá ímbo̱ʼ rá. b) Xó má naʼthí náa 1 Corintios 15:24-26, ndiéjunʼ garigá mekhuíí rá.

¹⁸ Ndiéjunʼ guáʼthi̱i̱n Cristiano bi̱ xagúun mekhuíí mu makuwá gajmiún Cristo rá. Ikhiin mangiin rígá mbá rí guáʼthi̱i̱n. Nduʼyáá kaʼwu  numuu rí náa Biblia naʼthí dí Pablo ga̱jma̱a̱ eʼwíinʼ bi̱ magúun mekhuíí nambáñun rí ‹maguaxu̱ún ikhiin ginii náa majñúnʼ bi̱ nikháñun› (Filip. 3:11). Rígi̱ naʼni mbuʼyáá rí maguaxu̱ún xa̱bu̱ nda̱wa̱á. Rígi̱ nambánii ga̱jma̱a̱ rí niʼthí Job (Job 14:15). “Bi̱ kaʼñún náa Cristo”, makuwi̱i̱n gajmiún ikhaa náa mekhuíí índo̱ gaʼni gámbíin ‹xúgínʼ Xa̱bu̱ Ñajunʼ ga̱jma̱a̱ guʼwá ñajunʼ ma̱ngaa tsiakii rí guáʼdáá›. Ikhú ‹iwáá kayuuʼ dí mambáa nindxu̱u̱ rí nakháñulú›. Gi̱i̱ na̱jkua̱nú nduʼyáá gajkhun rí bi̱ magúun mekhuíí nánguá makhañún. Mú ndiéjunʼ gugiʼníí bi̱ makuwá náa tsu̱du̱u̱ ku̱ba̱ʼ rá. (Atraxnuu 1 Corintios 15:24-26.) *

19. Ndiéjunʼ guáʼthi̱i̱n bi̱ makuwá náa tsu̱du̱u̱ ku̱ba̱ʼ rá.

¹⁹ Bi̱ guáʼthi̱i̱n makuwá náa tsu̱du̱u̱ ku̱ba̱ʼ ma̱ndoo muthi xó má Pablo: “Ikhúúnʼ [...] dí maguaxu̱ún xa̱bu̱ bi̱ nikháñun bi̱ nini rí jmbu xúʼko̱ má bi̱ túni rí jmbu” (Hech. 24:15). Gi̱i̱ nduʼyáá kaʼwu rí xándoo magúun mekhuíí xa̱bu̱ bi̱ nuni rí xkawiʼ, ikhiin makuwá náa tsu̱du̱u̱ ku̱ba̱ʼ.

20. Rí ndiʼyáá náa artículo rígi̱, xú káʼnii eʼyáá rí maguaxu̱ún nda̱wa̱á rá.

²⁰ Phú gajkhun rí ‹maguaxu̱ún xa̱bu̱ bi̱ nikháñúún›. Bi̱ maguaxu̱ún náa tsu̱du̱u̱ ku̱ba̱ʼ ikhiin makuwi̱i̱n kámuu mbiʼi. Ma̱ndoo maguaʼdáá mbá fe gujkhuʼ rí gajkhun mambanúu rúʼko̱. Índo̱ gaʼtáñajunʼ “mbá mil tsiguʼ” Cristo gajmíi̱n bi̱ kaxtaʼwíin, ikhú maguaxu̱ún bi̱ nikháñun. Ga̱jma̱a̱ rúʼko̱ naʼni maʼni̱i̱ a̱jkiu̱lú (Apoc. 20:6). Á mu nakháñulú xúgi̱, ma̱ndoo makuwáanʼ gajkhun rí índo̱ gaʼni mbá mil tsiguʼ, maguaxu̱ún mbu̱júu̱. Rí ‹guaʼthi̱i̱nlú rígi̱›, nambáyulúʼ má xúgi̱ ga̱jma̱a̱ naʼni rí makuwáanʼ gagi ru̱ʼni̱ ñajuunʼ Dios (Rom. 5:5). Náa i̱mba̱ artículo, mbuʼyáá ndiéjunʼ gándoo gajmañulú itháán dí naʼthí náa capítulo 15 ndrígóo 1 Corintios.