1. Xú káʼnii kúwáanʼ índo̱ nakáguabáanʼlú rá.

XÚGIÁANʼ kuaʼdáá xkujndu ga̱jma̱a̱ mambá mbiʼi nuraʼníí. Ma̱ngaa índo̱ nakáguabáanʼlú itháán naʼni gakhii muraʼníí. Rí nakáguabáanʼlú na̱ʼkha̱ mbá nacha̱ índo̱ na̱nguá guáʼthi̱i̱n, xóo mbáa kuʼwáʼ, dí naʼni xákuwáanʼ gagi ga̱jma̱a̱ xaguaʼdáá tsiakii índo̱ gúraʼníí xkujndu. Náa Proverbios 24:10 naʼthí: ‹Á mu nakáguabáanʼ mbiʼi dí narígá gamiéjunʼ mbaʼyáaʼ tsiakii›.

2. a) Ndiéjunʼ ma̱ndoo maʼni rí makáguabáanʼ rá. b) Ndiéjunʼ guʼyáá náa artículo rígi̱ rá.

² Mbaʼa rí ma̱ndoo maʼni makáguabáanʼ. Mbá numuu nindxu̱u̱ dí ni̱ndxu̱lú xa̱bu̱ aʼkhá, índo̱ nduʼyáá náa rí tséjmáan guʼni, índo̱ naʼniulú nandii, índo̱ na̱nguá kánulú asignación rí phú nandulú náa xuajñuu Jeobá o índo̱ na̱jkua̱lú guʼtáruʼún xa̱bu̱ bi̱ tsíñún gudxawíín. Náa artículo rígi̱, mbuʼyáá tikhu xú káʼnii gándoo guʼni mu xakáguabáanʼlú.

3. Ndiéjunʼ gambáyulú mu xakáguabáanlú rá.

³ Numuu rí ni̱ndxu̱lú xa̱bu̱ aʼkhá, ikha jngó nduʼyáá dí raʼkhí ga̱jma̱a̱ dí tséʼngulú guʼni, rúʼko̱ naʼni makumulúʼ dí Jeobá xániñulu matuʼulú náa numbaaʼ nuxi̱ʼ. Dí makumulúʼ xúʼko̱ maʼni gawúnlú wéñuʼ. Ndiéjunʼ gambáyulú mu xakáguabáanlú rá. Gajkhun má rí xúgiáanʼ ni̱ndxu̱lú xa̱bu̱ aʼkhá,  mú Jesús na̱nguá (Rom. 3:23). Jeobá tseʼyoo náa rí najngawáanʼlú. Ikhaa nindxu̱u̱ mbáa Anu̱lú bi̱ nandoo kaʼyulú ga̱jma̱a̱ naʼngo̱o̱ a̱jkiu̱u̱n kaʼyulú. Ndaʼyoo tsiakii rí nuʼni mambáa dí ikháanʼ mu muʼni ñajuunʼ ma̱ngaa xtáa xawii mu mambáyulú (Rom. 7:18, 19).

4, 5. Xó má eʼthí náa 1 Juan 3:19, 20, ndiéjunʼ nimbáñun a̱jmi̱i̱n a̱ngiu̱lú gu̱ʼu̱ mu xákaguabiinʼ rá.

⁴ Guʼyáá xkridoo Deborah ga̱jma̱a̱ María. * Nákha Deborah ninindxu̱u̱ dxáʼgú, na̱nguá nindúún kuyáá ga̱jma̱a̱ tuthán rí májánʼ dí naʼni. Rúʼko̱ niʼniuu mandxaʼwáminaʼ dí raʼkhí ga̱jma̱a̱ dí nda̱a̱ numuu. Índo̱ nanjgawaan mbá chíʼgíʼ, naku̱mu̱u̱ rí nda̱a̱ dí ejmaa mbá kayuuʼ. Xúʼko̱ má kayuuʼ nigíʼnuu María ma̱ngaa. Bi̱ kaʼñún nini gínáa rí asndu nikumu̱u̱ rí nda̱a̱ dí ejmaa. Asndu xóó naku̱mu̱u̱ xúʼko̱ nda̱wa̱á rí nijngún iyááʼ ga̱jma̱a̱ naku̱mu̱u̱ dí rakáʼyoo mani̱ndxu̱u̱ xa̱bi̱i̱ Jeobá.

⁵ Maski ajndu xúʼko̱ a̱jmi̱i̱n a̱ngiu̱lú bugi̱, na̱nguá niniñanʼ runi ñajuunʼ Jeobá. Ndiéjunʼ nimbáñun xá. Numuu rí nitakáñii Jeobá ga̱jma̱a̱ xúgíʼ a̱jkiu̱ún dí naʼni maxmiéjúnʼ (Sal. 55:22). Nijmañún rí anu̱lú Jeobá bi̱ xtáa mekhuíí, ndaʼyoo dí niguaʼníí nákha ginii ga̱jma̱a̱ dí rúʼko̱ naʼni makuwá gíná. Ikhaa ndaʼyoo dí májánʼ dí rígá náa a̱jkiu̱lú, dí ikháanʼ tséʼngulú guʼyáá (atraxnuu 1 Juan 3:19, 20). *

6. Ndiéjunʼ dí naku̱mu̱u̱ mbáa índo̱ natanga̱a̱ naʼni dí raʼkhí rá.

⁶ Índo̱ mbáa xtáa raʼni tsiakimínáʼ mu maniñuuʼ raʼni dí raʼkhí, mú natanga̱a̱ naxpátriguii mbu̱júu̱, rúʼko̱ naʼni rí makáguabaaʼ. Gajkhun má índo̱ nuʼni mbá aʼkhá naʼni dí makuwáanʼ ngíná (2 Cor. 7:10). Mú ragíʼmaa makumulúʼ rí nda̱a̱ dí ejma̱ánʼ ga̱jma̱a̱ mundxaʼwamíjna̱: “Jeobá xáʼni mba̱a̱ a̱jkiu̱u̱n kaʼyoʼ”. Raʼkhí dí makumulúʼ xúʼko̱ ma̱ngaa gamíi maʼni rí muniʼñááʼ ru̱ʼni̱ ñajuunʼ Jeobá. Garmáʼáan a̱jkiu̱lú dí naʼthí náa Proverbios 24:10: Á mu nakáguabáanʼ mbaʼyulú tsiakii. Itháán májánʼ gaʼni rí “guʼnimbánii xkujndu” náa Jeobá. Guʼtákáñii mu maʼni mba̱a̱ a̱jkiu̱u̱n kaʼyulú (Is. 1:18). Á mu natangáanʼ ga̱jma̱a̱ xúgíʼ a̱jkiu̱lú ikhaa maʼni mba̱a̱ a̱jkiu̱u̱n kaʼyulú. Ma̱ngaa guʼthúún bi̱ kuya̱ edxu̱u̱, numuu rí ikhiin mumbayulúʼ mu mambájxi̱i̱ gajmiúlú Dios (Sant. 5:14, 15).

7. Náá numuu dí ragíʼmaa makáguabáanʼ índo̱ kúwáanʼ ru̱ʼni̱ tsiakimijna muʼni dí májánʼ rá.

 ⁷ Mbáa ndxájulú bi̱ kayá edxu̱u̱ bi̱ mbiʼyuu Jean-Luc bi̱ xtáa náa Francia, naʼthúún naʼthí rígi̱: “Mbáa xa̱bu̱ bi̱ nawi̱ji̱ jmbu náa Jeobá, índo̱ najngawaan natanga̱a̱ a̱jkiu̱u̱n ga̱jma̱a̱ naʼni tsiakimínáʼ mu mariʼkuminaʼ” (Rom. 7:21-25). Ikha jngó xákumulú rí nda̱a̱ dí ejma̱ánʼ. Garmáʼáan a̱jkiu̱lú rí xúgiáanʼ najngawánʼ, ikha jngó ndayúlú rí maʼni mba̱a̱ a̱jkiu̱u̱n kaʼyulú Jeobá numuu rí nikháñuu A̱ʼdióo (Efes. 1:7; 1 Juan 4:10).

8. Índo̱ nakáguabáanʼlú, tsíin gándoo muʼthúún mu mumbáyulú rá.

⁸ Ma̱ndoo mbuʼñíinʼ a̱ngiu̱lú bi̱ kúwá náa congregación mu muxnulú tsiakii. Ikhiin muni̱i̱ a̱jkiu̱lú ga̱jma̱a̱ mudxawunlú (Prov. 12:25; 1 Tes. 5:14). Mbáa ndxájulú a̱ʼgu̱ bi̱ mbiʼyuu Joy bi̱ xtáa náa Nigeria, rí niʼni ikhaa índo̱ nikaguabaaʼ naʼthí: “Xáyóo dí mani á mu nda̱wi̱i̱n a̱ngiu̱lú, numuu dí Jeobá najmiuu ikhiin mu mariʼñaa dí natakáñuu. Nimbayúʼ wéñuʼ, mu mbayóo xóo gaxnúu tsiakii bi̱ kúwi̱i̱n gíná.” Gajkhun má dí a̱ngiu̱lú xúyáá á mu ndayúlú tsiakii. Ikha jngó ndayóoʼ dí ikháanʼ muʼthán mbáa ndxájulú mu maʼdxawunlú mu xúʼko̱ maxnúlú tsiakii.

9. Xú káʼnii exnulú tsiakii Salmo 41:3 ga̱jma̱a̱ 94:19 rá.

⁹ Gumbáyumijná náa Jeobá. Índo̱ mbáa naʼniu nandii, naʼni gakhii mandxaʼwáminaʼ májánʼ. Gajkhun má Jeobá xáʼni mbá milagru mu marigu̱u̱ nandii, mu naxnúlú tsiakii rí ndayúlú mu maʼngulú ga̱jma̱a̱ naʼni̱i̱ a̱jkiu̱lú (atraxnuu Salmo 41:3; * 94:19). * Xú káʼni eʼni xá. Najmiuu a̱ngiu̱lú mu maguwáʼ gúyulú mu muni tikhu ñajunʼ rí ndayúlú o magún gutsi. Ma̱ngaa ma̱ndoo maʼni rí mutajkáan ga̱jma̱á ni̱ndxu̱lú. Asndu ma̱ndoo muni marmáʼáan a̱jkiu̱lú ajngáa dí naxnúlú tsiakii dí niraxnuu náa Biblia, mbá dí ikhaa nindxu̱u̱ dí nda̱wa̱á náa numbaaʼ nuxi̱ʼ nánguá maʼniulú nandii (Rom. 15:4).

10. Ndiéjunʼ nimbáyúu Isang mu maʼni má xúʼko̱ ñajuunʼ Dios nda̱wa̱á rí nikambiyuuʼ rá.

¹⁰ Ndxájulú bi̱ mbiʼyuu Isang bi̱ xtáa náa Nigeria, ikhaa nikambiyuuʼ ga̱jma̱a̱ niʼni xa̱a̱ʼ. Doctor niʼthúu̱n rí ikhaa nánguá ma̱ndoo maʼga̱. Ikhaa naʼthí: “Nijmúʼ wéñuʼ ga̱jma̱a̱ ra̱ʼkhá tháán nikáguabunʼ”. Ndiéjunʼ nimbáyúu xá. Ikhaa naʼthí: “Ikhúún ga̱jmu̱ʼ a̱ʼgiu̱ʼ tuniʼñáá rutakáñinxuʼ Jeobá ma̱ngaa ninigajmaxu Biblia. Ma̱ngaa niʼgímijnaxu muxnáa núma̱aʼ Jeobá ga̱jma̱a̱ numuu xúgíʼ rí májánʼ rí kuaʼdááxu, xóo rí makuwáanʼ náa ku̱ba̱ʼ mitsaanʼ”.

11. Ndiéjunʼ niʼni rí Cindy maxtáa gagi índo̱ nindoo kháñuu rá.

¹¹ Cindy bi̱ xtáa México, nitháán rí gíʼdoo mbá nandii rí asndu migamíi makháñuu. Mú ndiéjunʼ niʼni mu maʼngo̱o̱ maraʼnuu xá. Índo̱ nixtáa náa guʼwá thana, ikhaa niriyaʼ mbiʼi mu maʼtáraʼa. Ikhaa naʼthí: “Dí nini xúʼko̱, niʼni rí xándxaʼwaminaʼ índo̱ gúniuʼ operar ma̱ngaa rí mikhu wéñuʼ. Niniminaʼ dí mataraʼa itháán, índo̱ nataruʼún médico ga̱jma̱a̱ enfermera naniguʼ mathu̱u̱n xú káʼnii kúwá bi̱ kuñún. Ga̱jma̱a̱ xúʼko̱ nandoo na̱thu̱u̱n náa numuu rí ikhiin niraʼwi̱i̱ muni ñajunʼ gakhii xóo rúʼko̱. Índo̱ nda̱yo̱o̱ náá numuu, xúʼko̱ tséʼniuʼ gakhii mbaʼyaʼ ndiéjunʼ rí manigu̱u̱nʼ mudxawíín. Mbaʼin rí ikhiin niʼniún tsiánguá rí mbáa bi̱ nandoo kháñuu maraxi̱: Xú káʼnii xtáa. Ga̱jma̱a̱ mbaʼin rí ikhiin nixnáaʼ  wéñuʼ núma̱a̱ numuu dí nixmiéjunʼ ka̱ñu̱u̱n. Asndu mbaʼin dí ikhiin nixnuʼ número ndrígu̱ún mu mataruʼún. Náa mbiʼi gakhii rí nixtáa, Jeobá nimbáyuʼ ga̱jma̱a̱ niʼni maxtáa tsímáá” (Prov. 15:15).

12, 13. a) Xú káʼnii etaraʼa a̱ngiu̱lú bi̱ nandoo kháñuun rá. b) Ndiéjunʼ rí naʼngo̱o̱ nuni xá.

¹² Mbaʼin a̱ngiu̱lú naʼniún nandii o guanii má, ikha jngó nánguá eʼngu̱u̱n gutaraʼa itháan ga̱jma̱a̱ naʼni makuwá gíná. Maski ajndu xúʼko̱ mbaʼin nduyáʼ xóo mutaraʼa. Mbáa ndxájulú a̱ʼgu̱ bi̱ mbiʼyuu Laurel bi̱ xtáa náa Estados Unidos, ikhaa ndiyóoʼ rí maxtáa náa awúu̱n mbá aparato rí nimbáyúu mu mbayá xi̱ʼ mbá 37 tsiguʼ. Ndiyóo cáncer, nigumaa operar mbaʼa nuthu ga̱jma̱a̱ ndiyóo i̱ʼwáʼ nandii. Maski má nandii rí ndiyóo ninindxu̱u̱ mbiiʼ wéñuʼ, mú tániñuuʼ raʼtáraʼa. Niʼtáruʼun enfermera ga̱jma̱a̱ bi̱ naguwáʼ guyáá. Ikha nimbáñun itháan rí 17 xa̱bu̱ mu mani̱ndxu̱ún xa̱bi̱i̱ Jeobá. *

¹³ Mbáa ndxájulú bi̱ kayá edxu̱u̱ bi̱ xtáa náa Francia bi̱ mbiʼyuu Ricardo, ikhaa naʼthí xóo ma̱ndoo mixtambáñún bi̱ tséndoo magajnún náa guʼwún o bi̱ kúwá náa guʼwá rí naxtiewuun bi̱ nandoo kháñuun. “Nathala rí ma̱ndoo maguaʼdáá mbá carrito náa ma̱ndoo majti i̱yi̱i̱ʼ. Mú xúʼko̱ índo̱ ganújngún xa̱bu̱, ma̱ndoo mbuyáá ga̱jma̱a̱ muraxi̱. Rí mutamijná gajmiún xa̱bu̱ nambáñun wéñuʼ a̱ngiu̱lú bi̱ tséʼngo̱o̱ gágun gutaraʼa mámbá guʼwá”. Ma̱ngaa ma̱ndoo muni carta o muni llamada náa teléfono bi̱ tsíyoo gágajnún.

14. Xú káʼnii xkri̱da niniñuuʼ rey David rá.

¹⁴ Mbáa nandulú mundrígú ñajunʼ náa congregación o náa circuito. Mú rígá mbaʼa numuu rí nguáná xákanulú, mbá xkri̱da, ga̱jma̱a̱ numuu tsigulú, nandoo káñulú o i̱ʼwáʼ. Á mu xúʼko̱ eguaʼníí, ma̱ndoo majmañulú wéñuʼ náa xkridoo rey David. Índo̱ ikhaa nitháán dí xáʼni templo ndrígóo Dios, mbá dí ikhaa nigi̱ʼthu̱u̱n maʼni. Mú nimbáyúu xa̱bu̱ bi̱ Dios niríyaaʼ mu maʼni templo, nixná oro ga̱jma̱a̱ plata. ¡Nindxu̱u̱ mbá májánʼ xkri̱da! (2 Sam. 7:12, 13; 1 Crón. 29:1, 3-5).

15. Xú káʼnii niʼni Hugues mu xákaguabaaʼ rá.

¹⁵ Mbáa ndxájulú bi̱ mbiʼyuu Hugues, bi̱ xtáa náa Francia, niniñuuʼ ranindxu̱u̱ bi̱ kayá edxu̱u̱ ga̱jma̱a̱ nánguá ejmaa maʼni ñajunʼ náa goʼwóo. Ikhaa naʼthí: “Nákha ndiyóoʼ nandii nikáguabunʼ wéñuʼ rí asndu niku̱mu̱ʼ rí nda̱a̱ dí ejmúún. Mú nda̱wa̱á  ni̱jkhánú ndiyóo rí xáʼngo̱ʼ má maʼni xúgíʼ ga̱jma̱a̱ nixtáa gagi rani ñajuunʼ Jeobá maski ajndu nandoo káñuʼ. Xó má Gedeón gajmíin xa̱bi̱i̱ mbá 300, índo̱ niʼni neʼngu̱u̱n, xúʼko̱ má mangún ndayóo rí mani tsiákiminaʼ” (Juec. 8:4).

16. Ndiéjunʼ gándoo gajmañulú náa xkridún ángeles rá.

¹⁶ Mangiin ángeles niniñanʼ mbá májánʼ xkri̱da. Índo̱ niʼtáñajunʼ rey Acab, Jeobá nigimbíin mbaʼin ángeles mu muthi xú káʼnii gúni gajmiún rey bi̱ xkawiiʼ buʼko̱. Mbaʼin ángeles nithi rí nakumu̱ún. Mú Dios niʼnimbo̱o̱ rí niʼthí mbáwíi ángel numuu dí rúʼko̱ magajnúu májánʼ (1 Rey. 22:19-22). Lá nikáguabiinʼ eʼwíinʼ ángel numuu rí tájmaa rí nithi xáʼ. Na̱nguá, nduʼyáá kaʼwu rí na̱nguá. Ángel ni̱ndxu̱ún guabiinʼ ga̱jma̱a̱ nandún rí gamajkhu maʼga náa Jeobá (Juec. 13:16-18; Apoc. 19:10).

17. Ndiéjunʼ gíʼmaa muʼni á mu kúwáanʼ gíná numuu rí na̱nguá kuaʼdáá mbá asignación rá.

¹⁷ Ra̱ʼkhá tháán mitsaanʼ nindxu̱u̱ rí manindxu̱lú xa̱bi̱i̱ Dios ga̱jma̱a̱ rí muʼtáraʼa numuu Reino. Asignación ndrígáaʼ xáʼni rí makujmáán májánʼ náa inuu Dios ga̱jma̱a̱ ma̱ndoo mani̱ndxu̱u̱ káaʼ mbá xngaa. Á mu ni̱ndxu̱lú xa̱bu̱ májánʼ ga̱jma̱a̱ xa̱bu̱ guabaaʼ ma̱ngaa rí numbañún a̱ngiu̱lú, rúʼko̱ rí gíʼdoo numuu náa Jeobá. Ikha jngó guʼtákañii Jeobá rí manindxu̱lú xa̱bu̱ guabaaʼ ma̱ngaa xa̱bu̱ májáanʼ. Atatsaʼwáminaʼ ga̱jma̱a̱ numún xa̱bu̱ bi̱ naʼthí náa Biblia bi̱ niguaʼdáá cualidad xóo rúʼko̱. Atambáñuun a̱ngia̱nʼ xóo má eʼngo̱o̱ (Sal. 138:6; 1 Ped. 5:5).

18, 19. Ndiéjunʼ gándoo gambáyulú mu muʼtáraʼa má xúʼko̱ maski ajndu xa̱bu̱ tsíñún gudxuun rá.

¹⁸ Lá nikáguabaanʼ numuu rí tsíñún gudxawíín xa̱bu̱ náa nadxuʼ gárataráʼa o na̱nguá etaxkamiin xáʼ. Mú ndiéjunʼ gándoo gátani mu xákaguabáanʼ ga̱jma̱a̱ rí maʼdxáanʼ má xúʼko̱ rá. Tikhu rí mambáyaʼ na̱ʼkha̱ náa kúgumáʼa “ Xóo marataráʼa ga̱jma̱a̱ gagi”. Ma̱ngaa rí mambáyaʼ nindxu̱u̱ rí matayaa rí májánʼ náa nadxuʼ gárataráʼa. Ndiéjunʼ eyoo gáʼthúu̱n rúʼko̱ rá.

¹⁹ Atanimina̱ʼ marataráʼa xó má eʼngo̱o̱ Reino ndrígóo Dios. Jesús niʼthí kaʼwu nguáthi̱i̱n bi̱ gágun kidxuuʼ (Mat. 7:13, 14). Índo̱ nuʼtáraʼa kuwáanʼ gajmiúlú Jeobá, Jesús mangiin ángeles (Mat. 28:19, 20; 1 Cor. 3:9; 14:6, 7). Jeobá na̱ʼkha̱ kagui̱i̱n xa̱bu̱ bi̱ nandún mudxawíín (Juan 6:44). Á mu mbáa xa̱bu̱, tsíyoo gaʼdxawun nákha timbá miʼtsú,  mbáa índo̱ guʼgua̱ guʼyáá imbo̱o̱ mbiʼi madxawun.

20. Ndiéjunʼ eʼsngúlú Jeremías 20:8, 9 mu xájmulú rá.

²⁰ Ma̱ndoo majmañulú wéñuʼ náa xkridoo Jeremías. Ikhaa nikhánáá mbá asignación dí maʼga̱ gaʼtáraʼa. Xa̱bu̱ na̱nguá nindúún guyáá ga̱jma̱a̱ nitsijmaa xúgíʼ mbiʼi (atraxnuu Jeremías 20:8, 9). * Nikáguabaaʼ wéñuʼ dí asndu nikumu̱u̱ dí maniñuuʼ raʼtáraʼa. Mú na̱nguá niʼni. Náá numuu rá. Numuu rí naku̱mu̱u̱ rí ajngóo Jeobá nindxu̱u̱ xó mbá aguʼ dí nakha rí gíwáánʼ náa a̱jkiu̱u̱n ga̱jma̱a̱ tséʼngo̱o̱ garikoo dí maʼthí má xúʼko̱ ga̱jma̱a̱ numuu mbiʼyuu Jeobá. Xúʼko̱ má gagiʼnulú mangáanʼ á mu nigiwánʼ náa a̱jkiu̱lú Ajngá rawuunʼ Dios. Rúʼko̱ gíʼmaa maxkaxánʼ mu muʼnigajmaa Biblia tsejtsi mbiʼi ma̱ngaa rí mundxaʼwamíjna̱. Á mu nuʼnilú, maʼdxulu ga̱jma̱a̱ mbuʼyáá májánʼ ñajunʼ rí muʼtáraʼa (Jer. 15:16).

21. Xú káʼnii gándoo guʼni gajmiúlú rí naʼni makáguabáanʼ rá.

²¹ “Ga̱jmá nindxu̱u̱ xóo mbá ajua̱nʼ dí najmuu Gixa̱a̱”. Xúʼko̱ niʼthí Deborah, bi̱ niʼthá nákha náa kutriga̱ a̱jkhu̱. Mú Jeobá gíʼdoo itháán tsiakii ki xóo Gixa̱a̱ ga̱jma̱a̱ ajua̱nʼ rí najmuu. Atanda̱ʼa̱a̱ Jeobá rí mambáyaʼ, mu maʼngaaʼ matanigajmaaʼ rí naʼni makáguabáanʼ ga̱jma̱a̱ nandii. Ma̱ngaa mu matayaa awan asignación rí xtaʼdáá, mambáyaʼ mu mi̱dxu̱ʼ gárataráʼa ga̱jma̱a̱ maʼngaaʼ matanigajmaʼ rí naʼni makáguabáanʼ.