1. Ndíjkha jngó na̱nguá eʼni mbríguáanʼ gajmiúlú eʼwíinʼ Jeobá rá.

JEOBÁ naniguuʼ rí mixtiʼkhu enii. Numáá guʼyáá dí ikhaa niʼniwíi xó má xa̱bu̱. Nda̱wi̱i̱n a̱jmi̱i̱n xa̱bu̱ bi̱ nindxúu̱n ikhiin ma kayuuʼ, ikha rúʼko̱ numuu jngóo Jeobá nditháan tséʼni mbríguáanʼ gajmiúlú eʼwíinʼ. Ikhaa nayejxu̱u̱ a̱jkiu̱lú ga̱jma̱a̱ ndaʼyoo xóo phú kaʼniáánʼ (1 Sam. 16:7). Ma̱ngaa ndaʼyoo náa najmáánʼ, náa tséʼngulú ga̱jma̱a̱ xóo nikuwáanʼlu nákha ginii. Ga̱jma̱a̱ tséndu̱ʼu̱lú muxnáa itháan rí xáʼngulú gúʼni. Ndayóoʼ mbuʼyaridáá ga̱jma̱a̱ mbuʼyamijná xó má ikhaa eʼyulú. Á mu nuʼnilú xúʼko̱ nusngajmá dí ‹nundxaʼwamíjna̱lú májánʼ› ga̱jma̱a̱ rúʼko̱ gaʼni dí xundxaʼwamíjna̱lú rí ikháanʼ najmáánʼ itháan o rí tsejmáanʼlu mbá kayuuʼ (Rom. 12:3).

2. Ndíjkha jngó ragíʼmaa muʼni mbrígumíjná gajmiúlú eʼwíinʼ rá.

² Gajkhun má dí ndaa nimbá dí raʼkhí dí mbuʼyaridáá xkri̱da̱ ndrígóo mbáa ndxájulú bi̱ najmañuu naʼtáraʼa májánʼ (Heb. 13:7). Rúʼko̱ gambáyulú mu manindxu̱lúʼ mbáa bi̱ naʼsngáa májánʼ (Filip. 3:17). Dí mbuʼyaridáálú mbá májánʼ xkri̱da̱ ndrígóo mbáa na̱nguá nindxu̱u̱ ikháá ma xóo mbuʼyáá á mu ikháanʼ najmáanʼlú itháán o rí tsejmáanʼlú mbá kayuuʼ. Dí muʼni mbrígumíjná gajmiúlú eʼwíinʼ, maʼni rí maxiʼgúlú, makáguabáanʼ o asndu makumulúʼ dí nditháan na̱nguá kuaʼdáá numulú. Xó má nijmañulúʼ náa artículo dí ninújngoo rí á mu nuʼni mbrígumíjná gajmiúlú a̱ngiu̱lú bi̱ kúwi̱i̱n náa nagimbáanʼ ma̱ngaa migamíi maʼni gachúu xóo embáxulú gajmiúlú Jeobá. Ikha jngó ikhaa naʼthúlú rígi̱: “Mú mámbáa gáʼyoo rí naʼni, mu xúʼko̱ maʼdxuu ga̱jma̱a̱ rí niʼni, ga̱jma̱a̱ xambríguminaʼ ga̱jma̱a̱ imba̱a̱ xa̱bu̱” (Gál. 6:4).

3. Xú kaʼnii ñajunʼ dí nitani̱ náa Jeobá rí naʼniaʼ maraxtaa gagi rá.

³ Jeobá nandoo dí makuwáanʼlu gagi ga̱jma̱a̱ ñajunʼ rí naʼngulú nuʼni náa ikhaa. Mbá xkri̱da̱, á mu nijngúlú má iyááʼ, gakuwáanʼlú  gagi ga̱jma̱a̱ numuu rí niʼngulú niʼnimbaníí dí niʼthálu muʼni. Numuu rí ikháanʼlu ma niraʼwíí muʼni ga̱jma̱a̱ numuu dí nandulú kuʼyáá Jeobá. Gundxaʼwamíjna̱lu xúgíʼ rí niʼngulú niʼni asndu nákha ikhú. Mbá xkri̱da̱, mbáa nanigulúʼ itháán índo̱ nuraxnuu ga̱jma̱a̱ nuʼnigajmaa Biblia, mbáa nuʼtajkháan itháán májánʼ ma̱ngaa nuʼni ga̱jma̱a̱ xúgíʼ a̱jkiu̱lú (Sal. 141:2). Mbáa najmañulúʼ itháán májánʼ xóo mugi̱ʼdi̱i̱ muʼtáraʼa ga̱jma̱a̱ rí majmulú májánʼ herramientas dí guaʼdáá náa muʼtáraʼa. Ga̱jma̱a̱ Jeobá nimbáyulúʼ mu muʼnimbánii itháán ma̱ja̱nʼ ñajunʼ rí kaʼñún muni xa̱bu̱ bi̱ nidamijná o xa̱bu̱ bi̱ guáʼdiin e̱ji̱n. Ma̱ndoo makuwáanʼlu gagi wéñuʼ ga̱jma̱a̱ numuu xúgíʼ ñajunʼ rí niʼngulú niʼni.

4. Ndiéjunʼ guʼyáá náa artículo rígi̱ rá.

⁴ Ma̱ndoo mumbáñuun eʼwíinʼ mu makuwá gagi ga̱jma̱a̱ ñajunʼ dí naʼngu̱u̱n nuni náa Jeobá ga̱jma̱a̱ dí xúni̱ mbrígumijna gajmiún eʼwíinʼ. Náa artículo rígi̱, mbuʼyáá xú kaʼnii xabuanii ma̱ndoo mumbañún e̱jñún, xóo gándoo gumbayumíjná xa̱bu̱ bi̱ nidamijná ga̱jma̱a̱ xóo gándoo bi̱ kuya̱ edxuu ma̱ngaa eʼwíinʼ bi̱ kúwi̱i̱n náa nagimbáanʼ mumbañún a̱ngiu̱lú. Nda̱wa̱á kayuuʼ mbuʼyáá tikhu ikha rí na̱ʼkha̱ náa Biblia rí ma̱ndoo mambáyulúʼ muʼgími̱jna̱ muʼni mbá rí maʼngulú muʼnimbánii.

5. Xó ma naʼthí náa Efesios 6:4, ndiéjunʼ dí xáʼyóoʼ muni xabuanii rá.

⁵ Xabuanii ragíʼmaa muni mbríguii aʼdiún gajmiún i̱mba̱ ga̱jma̱a̱ xáʼyóoʼ munda̱ʼa̱ maʼni itháán mbá dí ikhaa xáʼngo̱o̱ gaʼni. Rí matani mbríguii ga̱jma̱a̱ i̱mba̱ ga̱jma̱a̱ rí matanda̱ʼa̱a̱ maʼni wéñuʼ a̱ʼdiáaʼ maʼni rí maxmiéjunʼ (atraxnuu Efesios 6:4). * Mbáa ndxájulú bi̱ mbiʼyuu Sachiko * naʼthí: “Bi̱ nisngóoʼ niguaʼti̱i̱n dí maguwíi itháán tsídánʼ calificación ki xóo a̱ngui̱i̱nʼ. Ma̱ngaa ru̱dúʼ nindoo dí manigajmaa wéñuʼ mu xúʼko̱ magíʼ mbá májánʼ xkri̱da̱ náa bi̱ nusngo̱ʼ ga̱jma̱a̱ anu̱ʼ bi̱ na̱nguá nindxu̱u̱ xa̱bi̱i̱ Jeobá. Ga̱jma̱a̱ nindoo dí magúwíi xúgíʼ buena náa mbá xúgíʼ examen, mu rúʼko̱ dí rakáʼnii majmúún mani. Maski má ninújngoo tsiguʼ dí niguámboʼ escuela, mú nguáná naku̱mu̱ʼ, rí maski ajndu nani xúgíʼ xó má eʼngoʼ náa Jeobá mú naku̱mu̱ʼ dí ikhaa ndaʼyoo rí nda̱a̱ dí eni wéñuʼ”.

6. Ndiéjunʼ gándoo gajmañún xabuanii dí na̱ʼkha̱ raʼthí Salmo 131:1, 2 rá.

⁶ Rígá mbóʼ dí gíʼdoo numuu dí ma̱ndoo  majmañún xabuanii dí naʼthí náa Salmo 131:1, 2 (atraxnuu). * Rey David niʼthí: “Ni tsíyóóʼ magúʼdoo rí nindxu̱u̱ mba̱ʼu̱, ni má xúgíʼ rí mitsaan rí naniguʼ ikhúúnʼ”. Ga̱jma̱a̱ numuu dí ni̱jkha̱ mbáa xa̱bu̱ gua̱ba̱ʼ ma̱ngaa táyáaʼ magiʼdoo itháán rí xáʼngo̱o̱ gagíʼdoo, niʼni dí “xaxmiéjunʼ wéñuʼ”. Rígi̱ naʼsngúún xabuanii ma̱ngaa rí ma̱ndoo mani̱ndxu̱ún xa̱bu̱ guabiinʼ ga̱jma̱a̱ rí mbuyáá náa mbríga̱a̱ gáʼngu̱u̱n guni ga̱jma̱a̱ rí guáʼti̱i̱n muni e̱jñún. Ndayóoʼ mbuyáá ndiéjunʼ dí najmiin nuni e̱jñún ga̱jma̱a̱ ndiéjunʼ rí tséjmiin gúni, mu xúʼko̱ índo̱ gundu̱ʼu̱u̱n mbá rí muni, majmi̱i̱n munimbaníí ga̱jma̱a̱ maʼdxúún. Mbáa ndxájulú bi̱ mbiʼyuu Marina narmáʼáan a̱jkiu̱u̱n: “Ru̱dúʼ nimbá miʼtsú táʼni mbrígu̱ún gajmíi̱nʼ ajtsíin a̱ngui̱nʼ ní ma eʼwíinʼ e̱ji̱n. Niʼsngóo dí xúgínʼ guáʼdáá mbá dí najmañún nuni ga̱jma̱a̱ dí xúgínʼ guáʼdáá numún eʼyoo Jeobá. Núma̱aʼ ma ikhaa, nimbá miʼtsú tseni mbrígumináʼ gajmíi̱nʼ eʼwíinʼ”.

7, 8. Xú káʼnii gándoo gaʼyamajkhuu agiuuʼ mbáa xa̱biya̱ rá.

⁷ Xa̱bekha bi̱ ni̱ndxu̱ún cristianos gíʼmaa mbuyamajkún guʼñún (1 Ped. 3:7). Rúʼko̱ eyoo gáʼthúu̱n dí gíʼmaa mbuyáá ndiéjunʼ rí phú eñu̱ún ga̱jma̱a̱ maguaʼdáá gamajkhún kuñún. Xú káʼnii gándoo gúni xá. Musngajmúún rí guáʼdáá numún, xúndu̱ʼu̱u̱n muxná itháán rí xáʼngu̱u̱n gúxna ga̱jma̱a̱ rí xúni̱ mbríguíin gajmiún eʼwíinʼ gu̱ʼu̱. Ndíjkha rí mbiiʼ wéñuʼ rí muni mbríguiin gajmiún eʼwíinʼ xá. Guʼyáá ndiéjunʼ nigíʼnuu mbáa ndxájulú bi̱ mbiʼyuu Rosa. Ajmbio̱o̱ bi̱ na̱nguá nindxu̱u̱ xa̱bi̱i̱ Jeobá naguʼwun naʼni mbríguii ma xúʼko̱ gajmíi̱n eʼwíinʼ gu̱ʼu̱. Ga̱jma̱a̱ ajngáa gújkhúʼ rí naʼthúu̱n, ra̱ʼkha̱ i̱ndó niʼni dí Rosa maku̱mu̱u̱ dí nda̱a̱ rí ejma̱a̱ ma̱ngaa niʼni mandxaʼwáminaʼ, rí mbáa nda̱wa̱a̱ tsáa bi̱ ma̱ndoo kaʼyoo gajkhun. Ikhaa naʼthí: “Nandoʼ muni marmáʼáan a̱jkiu̱nʼ tsejtsi mbiʼi rí Jeobá ndaʼyoo rí gúʼdoʼ numuʼ”. Mú xa̱bekha bi̱ ni̱ndxu̱ún cristianos nduyamajkhún guʼñún numuu dí xúʼko̱ nuñewa̱a̱n xóo embáxu̱u̱n gajmiún ikhiin ga̱jma̱a̱ xóo embáxu̱u̱n gajmiún Jeobá. *

⁸ Xa̱bekha bi̱ nduyamajkhún guʼñún nuthi dí ma̱ja̱nʼ ga̱jma̱a̱ numún ikhiin, nutún dí nandún kuñún ga̱jma̱a̱ nutún dí májánʼ eni (Prov. 31:28). Rúʼko̱ nindxu̱u̱ rí niʼni ajmbio̱o̱ Katerina, bi̱ niʼthá ga̱jma̱a̱ numuu náa artículo dí ninújngoo, mu mambáyúu mbaʼyoo dí gíʼdoo numuu. Índo̱ kaʼnííʼ chíʼgíʼ Katerina, ru̱dúu̱ naʼthúu̱n dí nda̱a̱ numuu ga̱jma̱a̱ naʼni mbríguii gajmíi̱n eʼwíinʼ e̱jín wáxá ma̱ngaa asndu bi̱ nambáxu̱u̱ gajmíi̱n. Xúʼko̱ niʼni dí Katerina nigíʼdu̱u̱ niʼni mbrígumina̱ʼ gajmíi̱n eʼwíinʼ, maski ajndu nininuuʼ dí gajkhun nda̱wa̱á ikhaa niʼni má xúʼko̱. Mú ajmbio̱o̱ nimbáyúu mu ní xáʼni mbríguminaʼ gajmíi̱n eʼwíinʼ ga̱jma̱a̱ mbaʼyoo rí gíʼdoo̱ numuu dí naʼngo̱o̱ naʼni ikhaa. Ikhaa naʼthí: “Ajmbioʼ nandoo kaʼyoʼ, índo̱ nani rí májánʼ naʼthúnʼ dí májánʼ nindxu̱u̱ rí nini ma̱ngaa naʼtájkháan ga̱jma̱a̱ numuʼ. Ga̱jma̱a̱ naʼni marmáʼáan a̱jkiu̱nʼ xóo xa̱bu̱ nindxu̱u̱ Jeobá ma̱ngaa nambáyuʼ mu mariʼkhuu dí ní xandxaʼwamínaʼ rí nda̱a̱ dí ejmúún”.

9, 10. Xú káʼnii nini bi̱ kuya̱ edxu̱u̱ mumbayíí mbáa ndxájulú a̱ʼgu̱ bi̱ naʼnimbrígúminaʼ gajmíi̱n eʼwíinʼ rá.

⁹ Xú káʼnii gándoo gúni bi̱ kuya̱ edxu̱u̱ mumbañúún bi̱ nuni mbrígúmijná gajmiún eʼwíinʼ rá. Guʼyáá xóo nigíʼnuu mbáa ndxájulú bi̱ mbiʼyuu Hanuni, nákha xóó chíʼgíiʼ nutháán má xúʼko̱ rí nda̱a̱ dí ejma̱a̱ gáʼni. Ikhaa naʼthí: “Nimíñuʼ mata̱ ma̱ngaa niku̱mu̱ʼ dí eʼwíinʼ e̱ji̱n itháan najmiin ki  xóo ikhúún. Narmáʼáan a̱jkiu̱nʼ rí ninimbrígúminaʼ má xúʼko̱ gajmíi̱nʼ eʼwíinʼ”. Ma̱ngaa asndu nda̱wa̱á rí ninindxu̱u̱ má xa̱bi̱i̱ Jeobá, Hanuni niʼnimbrígúminá gajmíi̱n eʼwíinʼ, índo̱ naʼni xúʼko̱ naku̱mu̱u̱ rí nda̱a̱ dí ejmaa maʼni wéñuʼ náa congregación. Mú, rí xúgi̱ ikhaa nindxu̱u̱ mbáa precursora bi̱ naʼni ñajuunʼ gagi. Ndiéjunʼ nimbáyúu mariʼkuminaʼ xá.

¹⁰ Hanuni naʼthí rí a̱ngiu̱lú̱ bi̱ kuya̱ edxu̱u̱ nimbayíí. Ikhiin nitháán rí nakumu̱ún kuyáá ikhaa ga̱jma̱a̱ nitháán dí májánʼ xkri̱da eniñuʼ. Hanuni naʼthí: “Nguáná a̱ngiu̱lú bi̱ kuya̱ edxu̱u̱ nuthu̱nʼ rí maxnuu tsiakii tikhun a̱ngiu̱lú gu̱ʼu̱ bi̱ ndiyóoʼ mixtambáñuun. Rúʼko̱ niʼni mba̱yo̱o̱ rí bi̱ kúwá náa nagimbáanʼ ndayóoʼ mambáñún. Narmáʼáan a̱jkiu̱nʼ rí bi̱ kuya̱ edxu̱u̱ nixna̱a̱ʼ núma̱aʼ numuu rí nimbáñun tikhun a̱ngiu̱lú wa̱ʼxa̱ʼ ga̱jma̱a̱ nda̱wa̱á niraxnuu inuʼ náa 1 Tesalonicenses 1:2, 3. Rúʼko̱ ni̱jkhánú asndu náa a̱jkiu̱nʼ. Núma̱aʼ má ga̱jma̱a̱ numuu a̱ngiu̱lú bi̱ kuya̱ edxu̱u̱, rí xúgi̱ ni̱jkhánú ndi̱yo̱o̱ dí gíʼdoo numuʼ náa xuajñuu Jeobá”.

11. Xú káʼnii gándoo gumbaʼñún “bi̱ guabiinʼ ga̱jma̱a̱ bi̱ nagawúnʼ a̱jkiún” bi̱ na̱ʼkha̱ raʼthí náa Isaías 57:15 rá.

¹¹ (Atraxnuu Isaías 57:15). * Jeobá naxmiéjuunʼ kaʼñún “bi̱ guabiinʼ ga̱jma̱a̱ bi̱ nagawúnʼ a̱jkiún”. Xúgiáanʼ ikháanʼ ma̱ndoo muxnúún tsiakii a̱ngiu̱lú bi̱ nakumu̱ún xúʼko̱, raʼkháa i̱ndó bi̱ kuya̱ edxu̱u̱. Mbá rí xóo ma̱ndoo muʼni nindxu̱u̱ dí maxmiéjunlú gajkhun kuʼñúún. Jeobá nandoo musngajmá rí nandoo kaʼñúún wéñuʼ mugiu̱u̱ (Prov. 19:17). I̱mba̱ rí xóo ma̱ndoo mumbaʼñúún nindxu̱u̱ rí manindxu̱lúʼ xa̱bu̱ guabaaʼ ga̱jma̱a̱ rí tséʼngo̱o̱ gúʼni xúgíʼ ikháanʼ. Xúʼko̱ eʼni rí xaxígún kuyulúʼ eʼwíinʼ. Itháan má nandulú majmulú dí najmánʼ nuʼni ga̱jma̱a̱ dí najmañulúʼ mu muxnamijná tsiakii (1 Ped. 4:10, 11).

12. Náá numuu rí xa̱bu̱ guabiinʼ ninigu̱u̱nʼ makuwá gajmiún Jesús rá. (Atayáá xtiʼkhu rí na̱ʼkha̱ náa timbá ináa).

¹² Ma̱ndoo majmañulúʼ wéñuʼ rí xóo muʼniuu eʼwíinʼ á mu nduʼyáá xóo niʼniún xa̱bi̱i̱ Jesús. Maski ajndu nindxu̱u̱ mbáa xa̱bu̱ bi̱ gíʼdoo wéñuʼ numuu, mú, ninindxu̱u̱ mbáa xa̱bu̱ bi̱ “tsejmanguuʼ ga̱jma̱a̱ mbáa xa̱bu̱ guabaaʼ” (Mat. 11:28-30). Na̱nguá ejkha̱ raʼnimbamínáʼ dí nikro̱ʼo̱o̱ wéñuʼ ni má dí nijmañuu wéñuʼ. Índo̱ niʼsngáa, nijmuu ajngáa waba̱ʼ ga̱jma̱a̱ nijmuu xkri̱da dí ra̱mingíjyúuʼ makru̱ʼu̱u̱n ga̱jma̱a̱ maʼga̱nú náa a̱jkiu̱u̱n xa̱bu̱ guabiinʼ (Luc. 10:21). Jesús na̱nguá niʼni xóo xa̱bu̱ ede̱ bi̱ nini mbaʼumíjna̱, ikhaa niʼni rí xa̱bu̱ makumu̱ún rí guaʼdáá numún eʼyoo Dios (Juan 6:37). Niʼthún ga̱jma̱a̱ gamajkhu xúgínʼ xa̱bu̱ bi̱ raguáʼdáá numún eyáá xa̱bu̱.

13. Ndíjkha nuʼthá rí Jesús niʼniún dí májánʼ ga̱jma̱a̱ ndiʼyángajui̱i̱n xa̱bi̱i̱ rá.

¹³ Jesús niʼniún dí májánʼ ga̱jma̱a̱ ndiʼyángajui̱i̱n xa̱bi̱i̱. Ndiʼyoo dí mámbáa mixtiʼkhu dí najmaa naʼni ga̱jma̱a̱ rí mixtiʼkhu xóo nikúwá, ikha jngó raʼkháa xúgínʼ ma̱ndoo muni ikháá ñajunʼ ni má rí muni ikháá kayuʼ náa mutaraʼa. Mú Jesús ndiʼyoo dí gíʼdoo numuu tsiakii dí niʼni mámbáa dí ikhiin ga̱jma̱a̱ xúgíʼ a̱jkiu̱ún. Nandoo nduʼyáá dí xúʼko̱ índo̱ niʼthí xkri̱da ga̱jma̱a̱ numuu talentos. Ikhí niʼthí ga̱jma̱a̱ numuu mbáa xa̱bu̱ bi̱ nixnúún ñajunʼ xa̱bi̱i̱ dí “xó má najmiin muni”. Gajkhun má rí a̱jmi̱i̱n xa̱bi̱i̱ bi̱ ninimbánii ñajuunʼ ndrígu̱ún mbáwíi bi̱ nidaaʼ itháan ki xóo imba̱a̱. Mú xa̱bu̱ bi̱ nixnúún ñajunʼ niʼthún ikháá ajngáa rígi̱: “¡Nindxa̱a̱ʼ mbáa ñumbáá májáanʼ ga̱jma̱a̱ jmbii, phú májánʼ rí nitani̱!” (Mat. 25:14-23).

14. Xú káʼnii gándoo guʼyaridáá Jesús rá.

¹⁴ Jesús ma̱ngaa naʼniulú dí májánʼ ga̱jma̱a̱ ndaʼyángajuáanʼlu. Ndaʼyoo dí mixtiʼkhu dí ejmañuluʼ ga̱jma̱a̱ dí mixtiʼkhu xóo kuwáánʼ, ga̱jma̱a̱ ra̱ʼkhá tháán edxu̱u̱ índo̱ mámbáa naʼni xó má eʼngo̱o̱. Xú káʼnii gándoo gúʼyaridáá xá. Tsíyulú muʼni rí mbáa ndxájulú maku̱mu̱u̱ rí nda̱a̱ dí ejmaa o rí mati̱yu̱u̱ʼ numuu rí tséjmaa  gáʼni wéñuʼ xóo eʼwíinʼ. Dí itháan májánʼ muʼni nindxu̱u̱ rí guʼyáaʼ xóo muʼthún náa rí májánʼ nuni a̱ngiu̱lú mu muxnáá Jeobá rí itháan májánʼ.

15, 16. Xú káʼnii nimbáyúu mbáa ndxájulú a̱ʼgu̱ rí magíiʼ maʼni mbá rí maʼngo̱o̱ maʼnimbánuu xá.

¹⁵ Rí mundxaʼwamíjná kiejunʼ mbá rí muʼni náa nuʼni ñajuunʼ Jeobá nambáyulúʼ mbuʼyáá ndiéjunʼ phú guʼni ga̱jma̱a̱ mbuʼyáá rí gíʼdoo numuu dí kuwáanʼlu. Mú rí guʼgíʼ muʼni gíʼmaa mambáníi ga̱jma̱a̱ rí majmáán muʼni ma̱ngaa rí xóo kuwáánʼ, raʼkháa rí najmiin nuni eʼwíinʼ. Á mu nuʼni xóo eʼwíinʼ maʼni rí maxmiéjunlú ga̱jma̱a̱ makáguabáanʼ (Luc. 14:28). Guʼyáá xkri̱da ndrígóo mbáa precursora bi̱ mbiʼyuu Midori.

¹⁶ Índo̱ Midori nindxu̱u̱ xóó mbáa ada̱, anu̱u̱ bi̱ na̱nguá ninindxu̱u̱ xa̱bi̱i̱ Jeobá, naʼnimbríguíi má xúʼko̱ gajmíi̱n eʼwíinʼ angui̱i̱n ga̱jma̱a̱ bi̱ naʼnigajmaa gajmíi̱n. Ikhaa naʼthí: “Niku̱mu̱ʼ rí nda̱a̱ dí ejmúún mbá kayuʼ”. Mú xó má ejkha̱ rajngoo tsiguʼ nixtiʼkhuu mañu mañúú xóo nindxa̱ʼwa̱mínáʼ. Midori naʼthí: “Nagúxnuu Biblia xúgíʼ mbiʼi numuu dí rúʼko̱ nambáyuʼ maxtáá tsímáá ga̱jma̱a̱ naʼni maku̱mu̱ʼ rí Jeobá nandoo kaʼyoʼ”. Ma̱ngaa nigíiʼ maʼni rí majmaa maʼnimbánúu ga̱jma̱a̱ nindo̱ʼo̱o̱ Jeobá rí mambáyúu maʼnimbánuu. Xúʼko̱ niʼni maxtáa gagi dí najmaa maʼni náa ñajuunʼ Jeobá.

17. Xú káʼnii gándoo bi̱ cristianos “muriʼkhu̱u̱ má xúʼko̱ xóo edxa̱ʼwamíjna” rá. Ga̱jma̱a̱ ndiéjunʼ dí gárígá rá.

¹⁷ Rí makumulúʼ ga̱jma̱a̱ rí nundxaʼwamíjná dí nda̱a̱ dí ejmáán tséndatígaa mbá nacha̱. Ikha jngó Jeobá naʼthúlú: “Muriʼkhu̱u̱ má xúʼko̱ xóo edxa̱ʼwamíjna” (Efes. 4:23, 24). Gajkhun má mu maʼngo̱o̱ muniʼñááʼ, gíʼmaa muʼtájkáan, muʼnigajmaa Ajngá rawuunʼ Dios ga̱jma̱a̱ mundxaʼwamíjná dí naʼthí ikhí. Xúniʼñáʼ ru̱ʼni̱ rúʼko̱ ga̱jma̱a̱ gunda̱ʼa̱a̱ Jeobá dí mambáyulú maxnúlúʼ tsiakii. Tsiakii ndrígóo Jeobá gambáyuluʼ rí xúʼni mbrígúmijná gajmiúlú eʼwíinʼ. Jeobá ma̱ngaa  mambáyulú mbuʼyáá á mu nuʼni mbaʼumíjna̱ o naxígulúʼ ga̱jma̱a̱ á mu xúʼko̱, guriʼkuminá mbá nacha̱ mu xánindxu̱lú xúʼko̱.

18. Xú káʼnii eʼni maʼni̱i̱ a̱jkia̱a̱nʼ ikháán ajngáa rí naʼthí náa 2 Crónicas 6:29, 30 rá.

¹⁸ (Atraxnuu 2 Crónicas 6:29, 30). * Jeobá naninuʼ a̱jkiu̱lú. Ma̱ngaa ndaʼyoo rí ndayóoʼ muʼnimi̱jna̱ muniʼñááʼ rí nuni xa̱bu̱ numbaaʼ ga̱jma̱a̱ i̱ʼwáʼ dí raʼkhí nuʼni. Índo̱ ndaʼyoo xúgíʼ tsiakii dí nuʼni mu muniʼñááʼ dí raʼkhí, mámbá mbiʼi nandoo kaʼyulú itháan.

19. Ndiéjunʼ ejmuu Jeobá mu maʼthúlú xóo eku̱mu̱u̱ kaʼyulú rá.

¹⁹ Mú maʼthúlú xóo eku̱mu̱u̱ kaʼyulú Jeobá, najmuu xkri̱da ndrígóo mbáa a̱ʼgu̱ bi̱ nandoo kaʼyoo wéñuʼ a̱ʼdióo (Is. 49:15). Mbáa a̱ʼgu̱ bi̱ mbiʼyuu Rachel naʼthí: “A̱ʼdióo bi̱ mbiʼyuu Stephanie nixtáa nákha xóó tséjkha̱nú gu̱nʼ maxtáa. Timbá aʼphu̱ rí ndi̱yo̱o̱ ra̱ʼkhá tháán chíʼgíiʼ ga̱jma̱a̱ ndiyóoʼ mixtambáyíi... Mbá igu̱nʼ nigida̱ʼ náa incubadora, mú doctor niniñuʼ rí mba̱ya̱a̱ xúgíʼ mbiʼi. Xúgíʼ mbiʼi rúʼko̱ ninindxu̱u̱ kiejunʼ wéñuʼ niʼni rí maʼndo̱ʼ ka̱yo̱o̱ itháan. Rí xúgi̱ gíʼdoo majun tsiguuʼ ga̱jma̱a̱ ikhaa itháan chíʼgíʼ ki xóo eʼwíinʼ i̱ji̱n bi̱ tsigúnʼ xó má ikhaa, mú nandoʼ ka̱yo̱o̱ ga̱jma̱a̱ xúgíʼ a̱jkiu̱nʼ numuu rí niʼni mbá tsiakii rí maxtáa ga̱jma̱a̱ niʼni rí maʼdxuʼ wéñuʼ”. Índo̱ Jeobá ndaʼyoo rí nuʼni mbá tsiakii mba̱a̱ muxnáá rí itháan májánʼ, ikhú nandoo kaʼyulú wéñuʼ xó má a̱ʼgu̱ bi̱ nandoo kaʼyoo wéñuʼ a̱ʼdióo. Lá ragájkhun dí naʼni̱i̱ a̱jkiu̱lú índo̱ nduʼyáá xúʼko̱ ráʼ.

20. Ndíjkha rí ma̱ndoo maʼdxuu a̱jkiu̱lú rá.

²⁰ Mámbáa xa̱bi̱i̱ Jeobá gíʼdoo mbá ñajunʼ kiejunʼ ga̱jma̱a̱ gíʼdoo wéñuʼ numuu náa xuajñuu náa kúwá mixtiʼkhu enii xa̱bi̱i̱. Jeobá na̱nguá ni̱ʼkha̱ kaguáanʼ numuu rí itháán májánʼ eʼni ikháanʼ ki xóo eʼwíinʼ xa̱bu̱, ikhaa ndiʼyoo a̱jkiu̱lú ga̱jma̱a̱ ndiʼyoo rí ni̱ndxu̱lú xa̱bu̱ guabaaʼ ga̱jma̱a̱ rí muniʼñámíjná rí ikhaa maʼsngulúʼ ga̱jma̱a̱ rí mariʼkuáanʼlú (Sal. 25:9). Ma̱ndoo mbuʼyáá gajkhun rí nadxuu índo̱ nuʼni xó má eʼngo̱o̱ muʼni ñajuunʼ. Rí naʼngulú ga̱jma̱a̱ naguajún jmbu nasngájma rí kuaʼdáá “mbá a̱jkiu̱lú májánʼ” (Luc. 8:15). Ikha jngó guxnáá Jeobá dí itháan májánʼ dí kuaʼdáálu. Á mu nuʼni xúʼko̱, marigá dí maʼni maʼdxuu a̱jkiu̱lú dí niʼnilu ikháanʼ, raʼkháa dí muʼni mbrígúmijná gajmiúlú eʼwíinʼ.