Jeobá nandoo rí a̱jmi̱i̱n xa̱bu̱ bi̱ nidamijná makuwá gagi ga̱jma̱a̱ rí nditháan xúniñami̱jna̱ (Mat. 19:4-6). Á mu ikháán nandaaʼ mataniʼgún’ o matanujúnʼ, xú káʼnii gándoo gátaxkamaa mbáa májáanʼ xa̱biya̱ o mbáa májáanʼ a̱ʼgu̱ rá. Numuu rí Jeobá nindxu̱u̱ bi̱ niʼniáánʼ, ikhaa ndaʼyoo ndiéjunʼ gíʼmaa muʼni mu magajnúu májánʼ índo̱ kuwáánʼ runiʼníiʼ bi̱ mbuʼyáa ga̱jma̱a̱ índo̱ niʼdamijná má. Rí muʼgíiʼ muʼnimbánii ikha dí na̱ʼkha̱ náa Biblia nambáyulúʼ má xúʼko̱. Guʼyáá tikhu ikha dí na̱ʼkha̱ náa Biblia.

Ginii, xúgiáánʼ gíʼmaa mbuʼyáá dí: “Nda̱a̱ imbo̱o̱ rí maʼni nduwánʼ itháan ki xóo a̱jkiu̱lúʼ ga̱jma̱a̱ ra̱ʼkhá tháán echo̱o̱” (Jer. 17:9). Índo̱ a̱jmi̱i̱n xa̱bu̱ nandún mudamijná nugi̱ʼdi̱i̱ nagájnún mbóó, nguáná mbá nacha̱ má endún kuyamijná wéñuʼ ga̱jma̱a̱ nánguá eyáá rí xóo phú gíʼmaa marigá. Á mu nuraʼwíí mudamijná i̱ndó ga̱jma̱a̱ rí xóo ekumu̱ún, mbáa rúʼko̱ gaʼni dí nda̱wa̱á makuwá ngíná ga̱jma̱a̱ numuu rí niraʼwi̱i̱ muni (Prov. 28:26). Ikha jngó, raʼkhí gáʼni dí bi̱ ni̱ndxu̱ún novio mutamijná wéñuʼ rí xóo ekumu̱ún kuyamijná índo̱ ndiʼkhún egiʼdi̱i̱ muniʼnumijná ni má rí muxná ajngún dí muni nájmiin nda̱wa̱á nákha xóó tséni’numijná májánʼ.

Proverbios 22:3 naʼthí: “Bi̱ nandxa̱ʼwáminaʼ májánʼ ndaʼyoo gamíi ga̱jma̱a̱ narkaʼwuminaʼ, mú bi̱ tsindxaʼwamíjna̱ májánʼ nagún má xúʼko̱ ga̱jma̱a̱ numíniiʼ”. Ndiéjunʼ gamíi magíʼnaa á mu najmaaʼ sitio ndrígóo Internet dí najmún mu muxkamaa mbáa bi̱ mbuya̱a̱ xá. Tikhun nimíniiʼ wéñuʼ numuu rí bi̱ niniʼniún náa internet i̱ndó nininduwiinʼ. Ma̱ngaa xa̱bu̱ bi̱ ra̱ʼkhá tháán minduwiinʼ nuniwíi cuenta dí ragájkhun mu muninduwiinʼ eʼwíinʼ xa̱bu̱ mu xúʼko̱ muni kúʼwúnʼ mbújku̱ún. Nguáná bi̱ nuni xúgíʼ dí raʼkhí rígi̱ nithíí dí ni̱ndxu̱ún xa̱bi̱i̱ Jeobá.

Guʼyáá i̱mba̱ dí gamíi marigá. Tikhu sitio rígi̱ najmún número dí najmaa náa matemática mu muthíí rí xúʼko̱ ma̱ndoo muxkamaa mbáa bi̱ ma̱ndoo mbu̱ya̱a̱. Mú nda̱a̱ nimbá náa nasngájma dí rúʼko̱ nindxu̱u̱ gajkhun. Lá májánʼ gáʼni rí computadora o celular maraʼwíí mbá rí gíʼdoo wéñuʼ numuu muʼni xóo tsáa gándoo mbuʼyáa ráʼ. Na̱nguá. Dí na̱ʼkha̱ náa internet nditháan na̱nguá mbríguii ga̱jma̱a̱ ikha dí na̱ʼkha̱ náa Biblia (Prov. 1:7; 3:5-7).

Náa Proverbios 14:15 nuxkamaa i̱mba̱ rí gajkhun. Ikhí naʼthí: “Mbáa bi̱ tséʼyoo naʼnimbo̱o̱ xúgíʼ rí nutháán, mú bi̱ najmañuu nandxa̱ʼwáminaʼ, ndaʼyoo náa ejkha̱”. Nákhá xóó tséʼthá tsáa bi̱ ma̱ndoo mbuʼyáa, gíʼdoo numuu muniʼniiʼ májánʼ ginii. Mú, maʼni mingíjyúuʼ mbuʼyáá xóo phú nindxu̱u̱, mbáa  bi̱ nu’tamijná gajmiúlú náa internet. Índo̱ a̱jmi̱i̱n nutamijná xóo kaʼniúún ga̱jma̱a̱ nutamijná mbayuuʼ náa internet, lá ma̱ndoo muʼthá dí nuniʼnumijná máján’ xáʼ. Tikhun nindxaʼwami̱jna̱ rí nixkamaa bi̱ phú májáanʼ mbuya̱a̱, mú ra̱ʼkhá tháán niguanún tsiánguá índo̱ ndiyamijná timbá aʼphu̱ mijngii xígi̱.

Mbáa bi̱ niʼnirámáʼ mbá salmo niʼthí: “Na̱nguá eʼgúnʼ gajmííʼ xa̱bu̱ bi̱ nuni nduwaʼ; ni má tsímbáxu̱ʼ gajmííʼ bi̱ nurkaʼwu xóo ni̱ndxu̱ún” (Sal. 26:4). Mbaʼin xa̱bu̱ nduyáá dí nda̱a̱ má dí raʼkhí munindu̱wa̱ʼ xóo kaʼniúún náa internet mu xúʼko̱ mbaʼin xa̱bu̱ maʼndún kuñún. Mbáa tikhun nurkaʼwu xóo phú ni̱ndxu̱ún o tsesngájma xóo phú kaʼniúún náa mensaje dí nuniraʼmá. Mbáa kúwá tikhun bi̱ nuthi rí ni̱ndxu̱ún xa̱bi̱i̱ Jeobá, mú lá gajkhun nijngún má iyááʼ xáʼ. Ni̱ndxu̱ún cristiano bi̱ nundxaʼwamíjná májánʼ ráʼ. Nambáxu̱u̱n májánʼ gajmiún Jeobá xáʼ. Lá a̱ngiu̱lú bi̱ kúwá náa congregación nduyamajkhún xá’. O na̱nguá ni̱ndxu̱ún bi̱ nuxná májánʼ xkri̱da ga̱jma̱a̱ ni̱ndxu̱ún bi̱ ‹ragíʼmaa mambáxulu gajmiúlú› dxe̱ʼ. (1 Cor. 15:33; 2 Tim. 2:20, 21.) Lá ni̱ndxu̱ún bi̱ naʼthí náa Biblia bi̱ ma̱ndoo munuju̱nʼ o munigu̱nʼ gajmiún xáʼ. Rúʼko̱ gíʼmaa mbaʼyoo mbáa, mú maʼni mingíjyúuʼ mbuʼyáá rúʼko̱ á mu na̱nguá eʼtamíjná gajmiúlú a̱ngiu̱lú bi̱ nuniʼniiʼ májánʼ xa̱bu̱ buʼko̱ (Prov. 15:22). Ma̱ngaa, nduʼyáá kaʼwu rí mbáa xa̱bi̱i̱ Dios bi̱ nawi̱ji̱ jmbu nditháan xáyáa mbáa “xa̱bu̱ bi̱ tseniʼniiʼ Dios” bi̱ xóó tséjngúun iyááʼ (2 Cor. 6:14; 1 Cor. 7:39).

Xó má eʼyáá, sitio ndrígóo Internet dí najmún mu muxkamaa mbáa bi̱ mbuya̱a̱, mbaʼa dí gamíi rígá mugíʼniin, mú lá rígá mbá rí xóo ma̱ndoo mbuʼyáaʼ o muniʼniiʼ mbáa xa̱bu̱ májáanʼ bi̱ ma̱ndoo mbuʼyáa ráʼ. Índo̱ nda̱wa̱a̱ tsáa rikhoo mbuwáánʼ náa nagimbáanʼ mbaʼánʼ, nandoo nuniʼnúnʼ mijngii eʼwíinʼ xa̱bi̱i̱ Jeobá náa reunión, náa asamblea o i̱ʼwáʼ náa ndawáanʼ mbaʼánʼ.

Índo̱ na̱nguá xóo mbuwáánʼ mbaʼánʼ, xóo ga̱jma̱a̱ índo̱ rígá nandii COVID-19, najmulú mixtiʼkhu enii xóo makuwáánʼ reunión, ikhí ma̱ndoo muniʼniiʼ eʼwíinʼ xa̱bi̱i̱ Jeobá bi̱ xóó tsédiin xa̱bu̱. Ikhí nandoo mbuʼyáá xóo ethi ga̱jma̱a̱ nandoo nuʼdxawíín xóo enii comentar (1 Tim. 6:11, 12). Ma̱ngaa nandoo nuʼtámíjná gajmiúlú nda̱wa̱á dí naguámbá reunión náa nandoo muwi̱i̱n nguéjmi̱i̱n xa̱bu̱. I̱mba̱ náa ma̱ndoo muxkamiin eʼwíinʼ nindxu̱u̱ índo̱ tikhun a̱ngiu̱lú nuríyaʼ awan magimbíin mbá xngaa mutamijná náa internet. Mbiʼi xóo rúʼko̱, nandoo nakujmaa xóo eʼniún eʼwíinʼ xa̱bu̱ buʼko̱ ga̱jma̱a̱ xkáʼnii phú nindxu̱u̱ (1 Ped. 3:4). Índo̱ na̱jkua̱ runiʼnumijná, nájmáanʼ ma̱ndoo mbuya̱a̱ á mu ikháá endxa̱ʼwa̱a̱ edxa̱la rí muni nda̱wa̱á, ndiéjunʼ rí gíʼdoo numuu ga̱jma̱a̱ á mu nambríguii xóo endxaʼwamíjnala.

Índo̱ mbáa naʼnimbánuu ikha dí na̱ʼkha̱ náa Biblia, índo̱ nda̱yáaʼ mbáa bi̱ mbayáa, ikhaa má gáxtáa gagi ga̱jma̱a̱ índo̱ gáyáa. Xó má eʼthí náa proverbio: “Bi̱ nixkamaa mbáa a̱ʼgu̱ májáánʼ, nixkamaa mbá rí májánʼ, ga̱jma̱a̱ Jeobá naxnúu mbaʼa rí májánʼ wéñuʼ” (Prov. 18:22).