1. Ndiéjunʼ gárígá á mu nusngajmá rí itháan najmañulú ikháanʼ ki xóó eʼwíinʼ rá.

MBAʼIN xa̱bu̱ bi̱ kúwá náa numbaaʼ rígi̱ nuni asndu káʼnii má mu musngajma rí itháan kuaʼdáá numún ikhiin ki xóo eʼwíinʼ. Mbá xkri̱da, mbáa xa̱bu̱ bi̱ nagujua̱ naʼni asndu káʼnii ma, mu maguwáʼ mbaʼin xa̱bu̱ mu̱ʼtsi̱, mbáa bi̱ naʼtsíin ma̱ndoo maʼni gawúúnʼ kiejúnʼ i̱mba̱ equipo mu maʼngo̱o̱, o mbáa bi̱ nanigajmaa̱ náa escuela nandoo manújngoo náa exámen ma̱ndoo maʼni nduwaʼ mu maʼngo̱o̱. Xúgiáanʼ bi̱ ni̱ndxu̱lú cristianos nduʼyáá dí rúʼko̱ nindxu̱u̱ ra̱májánʼ ga̱jma̱a̱ rúʼko̱ ‹naʼni xuwiʼ› (Gál. 5:19-21). Lá ma̱ndoo rí xa̱bi̱i̱ Jeobá musngajma rí itháan najmañún ikhiin ki xóo eʼwíinʼ rí asndu xúyáá xóo guni xáʼ. Gíʼdoo numuu rí muriʼña̱a̱ graxe̱ rígi̱, numuu dí rígi̱ maʼni rí a̱ngiu̱lú ni xákuwa jnduʼ.

2. Ndiéjunʼ guʼyáá náa artículo rígi̱ rá.

² Náa artículo rígi̱, mbuʼyáaʼ ndiéjunʼ gaʼniulúʼ musngajma rí itháan najmañulú ikháanʼ ki xóo eʼwíinʼ a̱ngiu̱lú. Ma̱ngaa mbuʼyáaʼ xkri̱da ndrígu̱ún xa̱bi̱i̱ Jeobá bi̱ niguájun jmbu bi̱ na̱ʼkha̱ raʼthí náa Biblia bi̱ na̱nguá niʼniñami̱jna̱ muʼni xúʼko̱. Ginii ndayóoʼ muraximíjna̱lú. Guʼyáá xóo gúʼni.

3. Ndiéjunʼ gíʼmaa muraximíjnalu rá.

³ Májánʼ gáʼni rí muraximíjna̱lú rígi̱. Lá ndayóoʼ maʼni mbríguminaʼ gajmíʼ eʼwíinʼ mu xúʼko̱ maxtáá májánʼ ráʼ. Ndiéjunʼ  exkajxu̱u̱n ma̱ni̱ ñajunʼ náa guʼwá nagimbáanʼ rá. Lá nandoʼ masngájma rí najmañuʼ itháan ikhúún ki xóó eʼwíinʼ rá. O rí phú itháan nandoo rí maxnúu rí itháan májánʼ Jeobá rá. Ndíjkha rí gíʼdoo numuu muriʼña̱a̱ graxe̱ rígi̱ rá. Guʼyáá rí naʼthí náa Biblia.

4. Náá numuu dí ragíʼmaa muʼni mbrígumijnálu gajmiúlú eʼwíinʼ xóo ma eʼthí náa Gálatas 6:3, 4 rá.

⁴ Náa Biblia naʼthúlú rí xúʼni mbrígumijnálu gajmiúlú eʼwíinʼ (atraxnuu Gálatas 6:3, 4). * Náá numuu rá. Á mu nuʼni mbrígumijná gajmiúlú eʼwíinʼ makumulú rí itháan najmaaʼ ikháanʼ ki xóo eʼwíinʼ, rúʼko̱ gaʼni rí mu̱ʼni̱ mbaʼwumíjnalu. Á mu ikháanʼ nakumulú rí tséjmaa kayuʼ rúʼko̱ gáʼni rí makáwabáanʼlu, nájma̱ rígi̱ nditháan xambáyulú (Rom. 12:3). Mbáa ndxájulú bi̱ na̱ʼkha̱ náa Grecia bi̱ mbiʼyuu Katerina * naʼthí: “Ikhúún naguʼwuun rí na̱ni̱ mbríguminaʼ gajmíʼ a̱ngiu̱lú gu̱ʼu̱ bi̱ itháan mitsiʼñíin bi̱ najmañún nutaraʼa ma̱ngaa bi̱ kuaʼdiin mbaʼin bi̱ nambájxu̱u̱n gajmiún, rúʼko̱ naʼni maku̱mu̱u̱ rí na̱nguá gúʼdoo numuʼ”. Garmáʼáan a̱jkiu̱lú rí Jeobá táʼkha̱ kaguáán ga̱jma̱a̱ rí mitsiʼñán o rí najmaaʼ muʼthálú o rí najmaʼniáanʼ, ni̱ʼkha̱ kaguáanʼ numuu rí nandulú kuʼyáá ga̱jma̱a̱ nuʼdxawíín A̱ʼdióo (Juan 6:44; 1 Cor. 1:26-31).

5. Ndiéjunʼ esngáa ikháán rí nigíʼnuu ndxájulú Hyun rá.

⁵ Ma̱ngaa ma̱ndoo muraximíjna̱lú: “Lá ndu̱yo̱ʼ eʼwíinʼ rí ndaʼyáʼ marigá rí tsímáá ráʼ. Lá nakuʼdáminaʼ xkujndu gajmíʼ eʼwíinʼ dxe̱ʼ”. Guʼyáá rí nigíʼnuu ndxájulú Hyun, bi̱ xtáá Corea del Sur. Ni̱jkha̱nú mbá mbiʼi rí ikhaa ndiʼñún xóo bi̱ sia̱nʼ gajmíi̱n bi̱ guaʼdáá ñajunʼ náa congregación. Hyun naʼthí: “Natha numún, numuu rí na̱nguá eniguʼ rí nuthi̱”. Ndiéjunʼ nirígá ga̱jma̱a̱ rí niʼni xígi̱ xá. Ikháá naʼthí: “Rí xóo nindxu̱ʼ niʼni rí a̱ngiu̱lú xákuwa jnduʼ”. Mbaʼin bi̱ nambáxu̱u̱ gajmíi̱n nimbayíí mu mbaʼyoo rí ndayóoʼ mariʼkuminaʼ. Hyun niriʼkumina̱a̱ʼ, rí xúgi̱ nindxu̱u̱ mbáa bi̱ kayá edxu̱u̱ bi̱ májánʼ a̱jkiu̱u̱n. Ndiéjunʼ ejmañulú rá. Gíʼmaa muriʼkumijnálu á mu nusngajmá rí najmañulú itháan ikháanʼ ki xóo eʼwíinʼ o á mu tséʼyáʼ marigá tsímáá náa congregación.

6. Xóo ma eʼthí Gálatas 5:26, ndiéjunʼ gaʼniulúʼ rí mugi̱ʼdu̱lú gajmiúlú eʼwíinʼ rá.

⁶ (Atraxnuu Gálatas 5:26). * Ndiéjunʼ gaʼniulúʼ rí mugi̱ʼdu̱lú gajmiúlú eʼwíinʼ rá. Timbá nindxu̱u̱, rí nuʼni mbaʼwumíjnalúʼ. Mbáa xa̱bu̱ bi̱ naʼnimbamínáʼ i̱ndó naxmiéjunʼ kaʼyaminaʼ ikhaa. Dí maʼni ragajma nindxu̱u̱ rí maxíʼgúlú. Xa̱bu̱ bi̱ naxígúu, ra̱ʼkhá i̱ndó nandoo magiʼdoo rí imba̱a̱ gíʼdoo ma̱ngaa nandoo rí xa̱bu̱ buʼko̱ ni xágiʼdoo nimbá. Rí maxiʼgua̱a̱ʼ xtayáá mbáa, nandoo gáʼthúu̱n rí xáʼndaaʼ xtayáá, ikháanʼ tsíyulú manindxu̱lú xúʼko̱ káʼnii.

7. Ndiéjunʼ xkri̱da gámbáyulú mikruʼulú, dí maʼni gacháanʼlu á mu nuʼni mbaʼumíjna ga̱jma̱a̱ rí naxígulu rá.

⁷ Rí muʼni mbaʼumíjnalu ga̱jma̱a̱ rí maxiʼgúlú ma̱ndoo muʼni mbríguii ga̱jma̱a̱ mbá ruxi bi̱ na̱ʼkhu̱ ixi̱. Á mu ruxi naʼphu̱ ixi̱ rí gutamaa náa guʼwá, maski asndu mitsaanʼ nindxu̱u̱ mú majngudi̱i̱ á mu naʼphu̱ ruxi. Xúʼko̱ kayuuʼ ma̱ndoo muguanilú mangáanʼ maski asndu mba̱yu̱u̱ʼ ma kuwáánʼ ru̱ʼni̱ ñajuunʼ Jeobá á mu nuʼni mbaʼumijnalú ga̱jma̱a̱ naxígúlú gamíi majngutíguaanʼlú (Prov. 16:18). Ga̱jma̱a̱ muniʼñááʼ ru̱ʼni̱ ñajuunʼ Jeobá ma̱ngaa munigaumijnalú ikháanʼ ga̱jma̱a̱ a̱ngiu̱lú. Ndiéjunʼ gándoo gámbáyulú, rí xúʼnimbaʼumíjna ga̱jma̱a̱ rí xaxígulúʼ rá.

8. Xú kaʼnii gáʼngulu guʼni gajmiúlú dí nuʼni mbaʼumijnalú rá.

 ⁸ Maʼngulú muʼni gajmiúlú rí nuʼni mbaʼumijna á mu nuʼnimbulú consejo, rí nixnúún apóstol Pablo a̱ngiu̱lú bi̱ filipenses: “Xúni̱ nimbá rí maʼni mugiʼdala o rí nuni mbaʼumíjna̱la, gani̱ndxa̱la xa̱bu̱ guabaaʼ, gu̱ya̱a̱ rí eʼwíinʼ itháan guáʼdáá numún ki xóo ikháanʼla” (Filip. 2:3). Á mu nundxaʼwamíjná rí eʼwíinʼ kuaʼdáá itháan numún ki xóo ikháanʼlu, xúʼko̱ xúʼni mbrígumijná gajmiúlú bi̱ najmañún ga̱jma̱a̱ bi̱ kuaʼdáá ñajunʼ ki xóo ikháanʼlu, rí phú gíʼmaa muʼni rí maʼdxulu ga̱jma̱a̱ numún, itháan á mu najmún rí najmañún mu muni mba̱a̱ Jeobá. Xúʼko̱ ma kayuuʼ a̱ngiu̱lú bi̱ najmañún mangiin nunimbu̱ún consejo rí niʼthí Pablo, ikhiin mbuyáá rí májánʼ rí nuʼnilú. Numuu dí rúʼko̱ maʼni dí marigá rí tsímáá náa congregación ga̱jma̱a̱ makuwá mbá kambáxulú.

9. Ndiéjunʼ gándoo gámbáyulú mu maʼngulú muʼni ga̱jma̱a̱ rí naxígulú rá.

⁹ Ndiéjunʼ gándoo gámbáyulú mu maʼngulú muʼni ga̱jma̱a̱ rí naxígulú rá. Rí manindxu̱lú xa̱bu̱ guabaaʼ xóo muʼthá, rí mbuʼyáá rí tséʼngulú guʼni xúgíʼ. Á mu ni̱ndxu̱lú xa̱bu̱ guabaaʼ xuʼnimíjna musngajmá rí itháan najmañulú ikháanʼ ki xóo eʼwíinʼ. Rí phú gíʼmaa mu̱ʼni̱ gúʼyaridúún náa rí ikhiin najmañún nuni̱. Mbá xkri̱da á mu mbáa ndxájulú naxná májánʼ discurso ma̱ndoo munda̱ʼa̱a̱ rí mambáyulú mu mu̱ʼni̱ ratháá discurso ndrígúlú. Á mu mbáa ndxájulú a̱ʼgu̱ naʼni mújúnʼ miʼtsi wéñuʼ ganitsu ma̱ndoo murajxi̱i̱ xú káʼnii eni̱ mújúunʼ. O á mu mbáa dxámá o dxáʼgú bi̱ na̱nguá gíʼdiin bi̱ nambáxu̱u̱ gajmíi ma̱ndoo marajxu̱u̱ mbáa ndxájulú xú kaʼnii eni̱ mu magiʼdiin bi̱ mambáxu̱u̱ gajmíi̱n. Á mu nu̱ʼni̱ xúgi̱ rígi̱ mambáyulú mu xáxígulú ga̱jma̱a̱ majmañulú itháan.

10. Ndiéjunʼ ndiyóoʼ maraʼnuu Gedeón rá.

¹⁰ Gundxa̱ʼwa̱míjna̱ rí nigíʼnuu Gedeón, bi̱ na̱ʼkha̱ náa tribu ndrígóo Manasés, ma̱ngaa gajmíi̱n xa̱bu̱ bi̱ naguwaʼ náa tribu ndrígóo Efraín. Jeobá nimbáyúu Gedeón gajmíi̱n 300 xa̱bi̱i̱ mu maʼngu̱u̱n náa nigún guxmijná ga̱jma̱a̱ rígi̱ ma̱ndoo muni mbaʼumíjna̱ ga̱jma̱a̱.  Xa̱bu̱ bi̱ naguwáʼ náa tribu ndrígóo Efraín nigún gutamijná gajmiún Gedeón, ra̱ʼkhá dí muthán rí májánʼ niʼni, rí phú nini̱ nigiʼdu̱u̱n gajmiún. Ikhiin nikiʼníin numuu rí tútún mu magún guxmijná gájmiún xa̱bu̱ sia̱nʼ ndrígóo Dios. Ikhiin nindúún musngajma rí tribu ndrígu̱ún gíʼdoo itháan numuu, mu rígá mbá rí nigumún dí: Gedeón niyambáá mu mbiʼyamajkuíí mbiʼyuu Jeobá ga̱jma̱a̱ maxtiewa̱a̱n xuajñuu (Juec. 8:1).

11. Xú káʼnii ajngáa nijmuu Gedeón mu maʼthúún xa̱bu̱ Efraín rá.

¹¹ Ga̱jma̱a̱ ajngáa guabaaʼ, Gedeón niʼthúunʼ xa̱bu̱ Efraín: “Ndiéjunʼ lá wéñuʼ nini̱ ikhúún ki xóo rí niʼni ikháanʼla rá.” Nda̱wa̱á niʼthúún ga̱jma̱a̱ mbáa xkri̱da xú káʼnii Jeobá niʼni tsajkurámiinʼ ga̱jma̱a̱ rúʼko̱ ‹niʼni rí xákiʼníin wéñuʼ› (Juec. 8:2, 3). Gedeón niʼni tsiakiminaʼ mu xáʼnimbamínaʼ mu xúʼko̱ marigá rí tsímáá náa xuajñuu Dios.

12. Ndiéjunʼ esngúlú xkridún xa̱bu̱ Efraín ga̱jma̱a̱ Gedeón rá.

¹² Ndiéjunʼ esngúlú xkridún xa̱bu̱ bugi̱ rá. Xkridún xa̱bu̱ bi̱ naguwáʼ náa Efraín, naʼsngúlú dí ragíʼmaa mbuʼyáá rí kuaʼdáá itháan numulú ikháanʼ ki xóo rí mu̱ʼni̱ mba̱a̱ Jeobá. Náa xkridoo Gedeón, naʼsngúún bi̱ kuya̱ edxu̱u̱ náa mbá guʼwá ga̱jma̱a̱ bi̱ kuya̱ edxu̱u̱ náa congregación, á mu mbáa nakiʼnáa kaʼñún ga̱jma̱a̱ numuu mbá rí ni̱ni̱, gíʼmaa mbuyáá náá numuu rí xa̱bu̱ buʼko̱ nakiʼnáa. Ma̱ngaa ma̱ndoo muthán rí májánʼ nigájnuu ñajunʼ rí niʼni. Mu maguma rúʼko̱ ndayóoʼ rí manindxu̱lú xa̱bu̱ guabaaʼ, itháan á mu xa̱bu̱ buʼko̱ tseʼyoo májánʼ dí nirígá. Itháan gíʼdoo numuu rí makuwáanʼ tsímáá ki xóo muʼnimíjna musngajmá rí nuʼthá ikháanʼ nindxu̱u̱ gajkhun.

13. Ndiéjunʼ xkujndu ndiyóoʼ maraʼnuu Ana ga̱jma̱a̱ ndiéjunʼ niʼni xá.

¹³ Rí xúgi̱ mbuʼyáá xkri̱da ndrígóo Ana. Ikháá ndiyáa mbáa levita, bi̱ mbiʼyuu Elcaná. Mu Elcaná gíʼdaa i̱mbá a̱ʼgiu̱u̱ bi̱ mbiʼyuu Peniná, mú ikhaa nandoo kaʼyoo itháan Ana ki xóo Peniná. “Peniná gíʼdiin e̱ji̱n mu Ana na̱nguá”. Peniná “natsíjmaa ma xúʼko̱ Ana mu majmáan a̱jkiu̱u̱n”, ga̱jma̱a̱ “rúʼko̱ naʼni mambi̱ya̱ʼ ma̱ngaa nánguá ekuiʼtsu” (1 Sam. 1:2, 6, 7). Maski asndu xúʼko̱, náa Biblia tséʼthi rí Ana mata̱nga̱a̱ maʼniuu xúʼko̱ ma̱ngaa, rí phú niʼni nithúún xúgíʼ Jeobá ga̱jma̱a̱ nikumu̱u̱ rí ikhaa ma gámbáyúu. Náa Biblia tséʼthi rí Peniná niriʼkhu̱u̱ xóo nindxu̱u̱. Mu nduʼyáá rí Ana niʼni̱i̱ a̱jkiu̱u̱n ga̱jma̱a̱ nixtáa gagi mbu̱júu̱ numuu rí náa Biblia naʼthí rí “na̱nguá nisngajma rí naxmiéjunʼ” (1 Sam. 1:10, 18).

14. Ndiéjunʼ ejmañulú ga̱jma̱a̱ numuu Ana rá.

¹⁴ Ndiéjunʼ ejmañulú ga̱jma̱a̱ numuu Ana rá. Á mu mbáa nandoo muʼni mbrígumijná gajmiúlú, garmáʼáan a̱jkiu̱lú rí ikháanʼ kaʼyulú muraʼwíi rí muʼni. Xúʼni dí marigá itháan xkujndu, guʼnimíjnalu rí makuwáanʼ májánʼ xúʼni xóo ma niʼniulúʼ (Rom. 12:17-21). Maski asndu  ikhiin na̱nguá eriʼkumijnáá, mú ikháanʼ ma̱ndoo makuwáanʼ tsímáá.

15. Ndiéjunʼ eʼni mbríguii Apolos ga̱jma̱a̱ Pablo rá.

¹⁵ Iwáá kayuʼ, guʼyáá xóo esngúlú xkri̱da ndrígóo Apolos ga̱jma̱a̱ apóstol Pablo. Nájmi̱i̱n xa̱bu̱ bugi̱ najmañún májánʼ rí naʼthí náa Escritura, ga̱jma̱a̱ nuʼsngáa májánʼ ma̱ngaa numbañún xa̱bu̱. Ma̱ngaa ikhiin nimbañúún xa̱bu̱ mu manidxu̱ún discípulos. Mú tuyamijná xóo xa̱bu̱ sia̱nʼ.

16. Xú káʼnii xa̱bu̱ ninindxu̱u̱ Apolos rá.

¹⁶ Apolos nixtáa náa Alejandría, náa nagún xa̱bu̱ nákhá siglo timbá mu majuiʼsngúún itháan. Ikhaa ninindxu̱u̱ mbáa xa̱bu̱ bi̱ najmañuu naʼthí májánʼ ga̱jma̱a̱ ‹naʼninuuʼ májánʼ Escrituras› (Hech. 18:24). Índo̱ Apolos nixtáa náa Corinto, a̱ngiu̱lú nisngajmá rí nindúún kuyáá itháan ikháá ki xóo eʼwíinʼ bi̱ nigún xóo má Pablo (1 Cor. 1:12, 13) Lá, Apolos nindoo ma̱ngaa rí a̱ngiu̱lú xákuwáanʼ jnduʼ ráʼ. Na̱nguá. Índo̱ Apolos ni̱jkha̱, Pablo niʼthúu̱n rí mata̱nga̱a̱ (1 Cor. 16:12). Pablo xáthúu̱n rí mata̱nga̱a̱ á mu ndaʼyoo rí Apolos nandoo rí xákuwa jnduʼ a̱ngiu̱lú. Gi̱i̱ na̱jkua̱nulúʼ nduʼyáá itháan májánʼ, rí Apolos nijmuu rí najmañuu mu mataraʼa ajngáa rí májánʼ ga̱jma̱a̱ nisngájma rí nindxu̱u̱ xa̱bu̱ guabaaʼ. Mbá xkri̱da, nda̱a̱ náa naʼthí rí ikhaa nisngájma rí nigawúunʼ índo̱ Áquila ga̱jma̱a̱ Priscila nitháán “xú káʼnii manjgruigo̱o̱ náa kambo̱o̱ Dios” (Hech. 18:24-28).

17. Ndiéjunʼ niʼni Pablo mu maʼni dí marigá rí tsímáá rá.

¹⁷ Apóstol Pablo ndiʼyoo xú kaʼnii ñajunʼ rí xtáa raʼni Apolos. Pablo na̱nguá nixmiéjuunʼ rí xa̱bu̱ nuthi ga̱jma̱a̱ numuu Apolos rí najmañuu itháan ikhaa ki xóo Pablo. Consejo rí niʼnirámáʼ dí nijkha náa inún a̱ngiu̱lú bi̱ kúwá náa Corinto, Pablo nisngájma rí nindxu̱u̱  xa̱bu̱ guabaaʼ ga̱jma̱a̱ rí nindxaʼwamínaʼ májánʼ. Ikhaa nikiʼnáa índo̱ xa̱bu̱ nithi ‹ikhúún gajmuʼ Pablo› ikhaa niʼthí rí xúgiáanʼ kaʼyulú náa Jeobá ga̱jma̱a̱ náa Cristo (1 Cor. 3:3-6).

18. Xóo ma eʼthí náa 1 Corintios 4:6, 7, ndiéjunʼ ejmañulú náa xkridoo Apolos ga̱jma̱a̱ Pablo rá.

¹⁸ Ndiéjunʼ ejmañulú náa xkri̱da ndrígóo Apolos ga̱jma̱a̱ Pablo rá. Najmañulú rí xúgíʼ ñajunʼ dí nu̱ʼni̱ náa Jeobá nagájnuu májánʼ numuu rí kuaʼdáá tsiakii ndrígóo ikhaa, itháan índo̱ numbañún xa̱bu̱ mu majngún iyááʼ tséʼni ga̱jma̱a̱ tsiakii ndrígulú, numuu rí kuaʼdáá tsiakii ndrígóo Jeobá nandoo narígá xúgíʼ rígi̱. Imbo̱o̱ rí najmañulú, maski asndu kuaʼdáá mbaʼa ñajunʼ náa congregación ma̱ndoo mu̱ʼni̱ marigá dí tsímáá ga̱jma̱a̱ rí mambáxulu. A̱ngiu̱lú bi̱ kuya̱ edxu̱u̱ ga̱jma̱a̱ siervos ministeriales nuni rígi̱ índo̱ nunimbún ikha ndrígóo Jeobá ga̱jma̱a̱ tseni i̱ndó rí naniguun ikhiin, dí phú nuni̱ nduyaridáá xkridoo Jesús. Ra̱ʼkhá tháan nadxulú rí kuaʼdiin a̱ngiu̱lú bugi̱ (atraxnuu 1 Corintios 4:6, 7). *

19. Ndiéjunʼ gíʼmaa maʼni mambáa rí ikháanʼlu rá. (Atayáá náa kúgumaʼá “ Xúʼni mbríguiin a̱ngiu̱lú”.)

¹⁹ Jeobá nixnúlú rí najmañulú ga̱jma̱a̱ rí najmáánʼ nu̱ʼni̱ (1 Ped. 4:10). Mbáa makumulú rí nuxnálúʼ na̱nguá nindxu̱u̱ mba̱a̱. Maski asndu chíʼgíiʼ rí nu̱ʼni̱, naʼni makuwáanʼ mba kambáxulú ni̱ndxu̱u̱ xóo inu gúmá rí naʼni maxtoʼóo ma xúʼko̱ mbóo xtíin. Ikha jngó guʼni tsiakimíjna muʼni gámbáa ku̱ma̱ rí nandulú muʼni mbrigumijná gajmiúlú mbáa ga̱jma̱a̱ guʼni tsiakimijna muʼni marigá rí tsímáá náa congregación ga̱jma̱a̱ rí mambáxulu májánʼ gajmiúlú a̱ngiu̱lú (Efes. 4:3).