1. Ndiéjunʼ niʼni ga̱jma̱á ni̱ndxu̱lú mámbáa dí ikháanʼ Jeobá rá.

GUNDXAʼWAMÍJNA̱ xóo ni̱jkuánú ninindxu̱lúʼ xa̱bi̱i̱ Jeobá. Ginii, nixtáa mbáa bi̱ niʼthúlu “ajngáa dí májánʼ”, mbáa anu̱lú o rudulú, mbáa bi̱ niñajunʼ gajmiúlú o bi̱ niʼnigajmaa gajmiúlú, o mbáa xa̱bi̱i̱ Jeobá bi̱ ni̱jkha̱ gáʼtaraʼa mámbá guʼwá (Mar. 13:10). Nda̱wa̱á, nixtáa bi̱ niriyaʼ mba̱yu̱u̱ʼ mbiʼi ga̱jma̱a̱ tsiakii maʼsngulúʼ ga̱jma̱a̱ numuu Biblia. Rúʼko̱ niʼni dí maʼndulú kuʼyáá Jeobá ma̱ngaa nijmañulúʼ dí ikhaa nandoo kaʼyulúʼ. Jeobá ni̱ʼkha̱ kaguáanʼ náa rí gajkhun. Ga̱jma̱a̱ numuu rí xúgi̱ ni̱ndxu̱lú bi̱ na̱jkua̱ kidxuu̱ʼ Jesucristo, kuaʼti̱i̱n rí makuwáánʼ kámuu mbiʼi nda̱wa̱á (Juan 6:44). Gajkhun má dí ra̱ʼkhá tháán exnáalu núma̱aʼ Jeobá numuu rí nijmiuu mbáa bi̱ maʼsngulúʼ rí gajkhun ga̱jma̱a̱ rí niniñulú muʼni ñajuunʼ.

2. Ndiéjunʼ guʼyáá náa artículo rígi̱ rá.

² Xúgi̱ rí nduʼyáá má dí gajkhun, kuaʼdáá mbá ñajuunʼ kiejunʼ dí mumbaʼñún eʼwíinʼ magún ga̱jma̱á ni̱ndxu̱lú náa kamba̱a̱ dí na̱jkha̱ kaguáanʼ makuwáánʼ. Kúwá tikhun bi̱ tséʼniún mingíjyúuʼ mutaraʼa mámbá guʼwá, mú naʼniún mingíjyúuʼ muxna mbá estudio. Lá nagiʼnulú xúʼko̱ mangáanʼ rá. Á mu rí xúʼko̱, mambáyulú tikhu dí naʼthúlú muʼni náa artículo rígi̱. Mbuʼyáá ndiéjunʼ exkajxáanʼ muʼsngúún xa̱bu̱. Ma̱ngaa mbuʼyáá xú káʼnii gándoo gúʼni gajmiúlú tikhu dí narikhulú muʼsngúún xa̱bu̱. Mú ginii mbuʼyáá náá numuu dí raʼkháa i̱ndó gíʼmaa muʼtáraʼa ajngáa rí májánʼ, ma̱ngaa gíʼmaa muʼsngáa.

3. Náá numuu eʼtáraʼalu rá.

³ Índo̱ Jesús nixtáa náa tsu̱du̱u̱ Ku̱ba̱ʼ, niʼtáñajúúnʼ xa̱bi̱i̱ a̱jma̱ dí gíʼmaa muni. Timbá, niʼthún dí mutaraʼa ajngáa rí májánʼ ga̱jma̱a̱ numuu Reino, niʼsngúún xóo gíʼmaa muni (Mat. 10:7; Luc. 8:1). Niʼthún ndiéjunʼ gúni á mu xa̱bu̱ gudxawíín ajngáa numuu Reino ga̱jma̱a̱ ndiéjunʼ gúni índo̱ xa̱bu̱ tsíñún gudxawíín (Luc. 9:2-5). Niʼtáriyaʼ asndu náá gártumuu rí majuiʼtáraʼa, niʼthí mbájmbu rí mudxawíín “xúgínʼ xa̱bu̱” (Mat. 24:14; Hech. 1:8). Tséʼniuu má xóo eriʼña xa̱bu̱, gíʼmaa miʼthúún ga̱jma̱a̱ numuu Reino ndrígóo Dios ga̱jma̱a̱ ndiéjunʼ gáʼni Reino rúʼko̱.

4. Xó má eʼthí Mateo 28:18-20, ndiéjunʼ nindxu̱u̱ i̱mba̱ dí gíʼmaa muʼni raʼkháa i̱ndó dí muʼtáraʼa numuu Reino rá.

⁴ Ndiéjunʼ imbo̱ʼ dí niʼtáñajúúnʼ muni xa̱bi̱i̱ Jesús rá. Niʼthún rí musngúún xa̱bu̱ munimbu̱ún xúgíʼ dí ikhaa niʼtáñajuunʼ. Mú, lá i̱ndó ndiyóoʼ mutaraʼa ga̱jma̱a̱ musngáa nákhá siglo timbá, xóo ekumu̱ún tikhun ráʼ. Na̱nguá, numuu rí Jesús niʼthí rí ñajunʼ rígi̱ dí gíʼdoo wéñuʼ numuu mbajyúuʼ asndu mbiʼi xúgi̱, asndu “índo̱ gátumuu mbiʼi” (atraxnuu Mateo 28:18-20). * Jesús niʼtáñajunʼ rígi̱ índo̱ nisngájmaminaʼ náa itháan rí 500 xa̱bi̱i̱ (1 Cor. 15:6). Ma̱ngaa náa rí nisngájmuu mbaʼyoo Juan nda̱wa̱á, niʼthí mbájmbu rí nandoo dí xúgínʼ xa̱bi̱i̱ mumbañún eʼwíinʼ xa̱bu̱ majmañún ga̱jma̱a̱ numuu Jeobá (Apoc. 22:17).

5. Xkáʼnii xkri̱da nijmuu Pablo náa 1 Corintios 3:6-9 mu masngájma xóo nindxu̱u̱ dí marataráʼa ga̱jma̱a̱ dí marasngáa rá.

⁵ Apóstol Pablo niʼnimbríguíi dí miʼsngúún xa̱bu̱ ga̱jma̱a̱ xóo miʼdu, xúʼko̱ nisngájma dí raʼkháa i̱ndó ndayóo miʼdu tsígáʼ. Niʼthún bi̱ kúwá náa Corinto: “Ikhúúnʼ ni̱du, Apolos nixíjyooʼ [...]. Ikháanʼ nindxa̱la mbaaʼ náa rí Dios naʼdu” (atraxnuu 1 Corintios 3:6-9). * Bi̱ nuñajunʼlú náa “mbayuuʼ Dios” raʼkháa i̱ndó ndayóoʼ muʼdu tsígáʼ ma̱ngaa gíʼmaa muxtíjyáaʼ ga̱jma̱a̱ mbuʼyáá má xúʼko̱ xóo ejkha̱ ragaja̱a̱ (Juan 4:35). Mú nduʼyáá dí Dios eʼni mbaja̱a̱ tsígáʼ.

6. Ikháanʼlu bi̱ nuʼsngáa, ndiéjunʼ eyóoʼ muʼni rá.

⁶ Nduʼñíinʼlu “xúgíinʼ bi̱ nusngajma rí nandún makuwá kámuu mbiʼi” (Hech. 13:48). Mu mani̱ndxu̱ún xa̱bi̱i̱ Jeobá bi̱ nuʼsngúún, rígá ajtsú dí gíʼmaa mumbaʼñún, timbá makru̱ʼu̱u̱n, raga̱jma̱ mudrigú, dí ma’ni ragajtsú mugíʼ munimbánii dí najmañuu náa Biblia (Juan 17:3; Col. 2:6, 7; 1 Tes. 2:13). Xúgiáánʼ bi̱ na̱jkua̱ náa nagimbáanʼ gíʼmaa mumbañún bi̱ ndiʼkhún enigajmaa̱, gusngajmá dí nandulú kuʼñúún ma̱ngaa gurajxíín ga̱jma̱a̱ guʼthúún dí májánʼ eni índo̱ nagún reunión (Juan 13:35). Bi̱ naʼsngáa ma̱ngaa ndayóoʼ maríyáʼ mbayuuʼ mbiʼi ga̱jma̱a̱ tsiakii mambáyúu bi̱ naʼsngóo maniñuuʼ kiʼsngáa dí mindu̱wa̱ʼ o dí raʼkhí “rí naʼni mingíjyúuʼ mambáa” (2 Cor. 10:4, 5). Mbáa ndayóoʼ mbayuʼ igu̱nʼ dí mumbáyii mbáa mariʼkuminaʼ asndu índo̱ ma̱ndoo majngúun iyááʼ, mú radíí má gánindxu̱u̱ tsiakii dí guʼni.

7. Náá numuu rí nuʼtáraʼa ga̱jma̱a̱ nuʼsngúún eʼwíinʼ rá.

⁷ Náá numuu rí nuʼtáraʼa ga̱jma̱a̱ nuʼsngúún eʼwíinʼ rá. Timbá, numuu rí nandulúʼ kuʼyáá Jeobá. Índo̱ nuʼni xó má eʼngo̱o̱ muʼnimbulúʼ  kiʼtáñajunʼ dí muʼtáraʼa ga̱jma̱a̱ muʼsngáa, nusngajmá dí nandulúʼ kuʼyáá Dios (1 Juan 5:3). Gundxaʼwámíjná rígi̱, numuu rí nandulúʼ kuʼyáá Jeobá nixkajxáánʼ muʼtáraʼa mámbá guʼwá. Lá mingíjyúuʼ ninindxu̱u̱ dí muʼnimbánii rúʼko̱ rá. Mbáa xúʼko̱. Mbáa nimíñulúʼ nákha niʼtáráʼa timbá aʼphu̱ náa mbá guʼwá. Mú niʼtáráʼa numuu rí nduʼyáá dí rúʼko̱ nandoo Jesús muʼni. Mbáa xúgi̱ nánguá má eʼniulú mingíjyúuʼ wéñuʼ muʼtáraʼa, mú xú káʼnii ekumu̱lú índo̱ nduʼyáá dí muxnáálu estudio mbáa rá. Mbáa índo̱ nundxaʼwamíjná namíñúluʼ. Mú, á mu nunda̱ʼa̱a̱ Jeobá dí xámiñulu muxná mbá estudio, ikhaa ma̱ndoo mambáyulúʼ maʼndulúʼ muʼsngúúnʼ eʼwíinʼ.

8. Xó má eʼthí Marcos 6:34, ndiéjunʼ imbo̱o̱ʼ numuu dí nuʼsngúún xa̱bu̱ dí gajkhun rá.

⁸ Raga̱jma̱, nuʼsngáa dí gajkhun numuu rí nandulú kuʼñúún xa̱bu̱. Mbá miʼtsú, Jesús gajmíi̱n xa̱bi̱i̱ niʼni neʼngu̱u̱n wéñuʼ nda̱wa̱á rí nisngúún kañiʼ mbiʼi xa̱bu̱, ikha jngó ndiyáʼ náa ma̱ndoo mbuya̱a̱ xu̱únʼ. Mú mbaʼin wéñuʼ xa̱bu̱ kúwá má raguaʼthi̱i̱n náa nigún. Jesús ra̱ʼkhá tháán nigáwi̱i̱nʼ a̱jkiu̱u̱n ikha jngó “mbaʼa dí nigíʼdu̱u̱ niʼsngúún” (atraxnuu Marcos 6:34). * Náá numuu rí Jesús niʼni mbá tsiakii rá. Numuu rí nindxa̱ʼwáminaʼ xóo ekumu̱ún xa̱bu̱ buʼko̱ ga̱jma̱a̱ nindoo mambáñún. Ndiʼyoo dí nimíniiʼ wéñuʼ ga̱jma̱a̱ rí ndiyóoʼ miʼthúún dí rígá mbá rí májánʼ marigá nda̱wa̱á. Mbiʼi xúgi̱ ma̱ngaa, xa̱bu̱ ndayóoʼ miʼthúún dí marigá mbá dí májánʼ nda̱wa̱á, maski asndu rí mbájníi nakujmaa dí kúwá gagi. Ni̱ndxu̱ún xóo mugu̱ bi̱ nindáti̱gi̱i̱n, bi̱ nda̱wa̱a̱ tsáa mambáñun ga̱jma̱a̱ xóo bi̱ nda̱wa̱a̱ tsáa bi̱ maxnún ikha. Apóstol Pablo niʼthí rí kúwá xóo náa nda̱wa̱a̱ Dios ni má na̱nguá kuaʼti̱i̱n rí májánʼ nda̱wa̱á (Efes. 2:12). Nagún náa “kamba̱a̱ rí na̱jkha̱ kagui̱i̱n maʼnimbáti̱gi̱i̱n” (Mat. 7:13). Índo̱ nundxaʼwamíjná ga̱jma̱a̱ numún xa̱bu̱ bi̱ kúwá náa nuʼtáraʼa ga̱jma̱a̱ xóo kúwá náa inuu Dios, rí nandulú kuʼñúún ga̱jma̱a̱ rí nagáwi̱i̱nʼ a̱jkiu̱lú kuʼñúún naxkaxáanʼ mumbaʼñúnlú. Ikha jngóo dí itháan májánʼ muʼni nindxu̱u̱ dí muʼsngúún ga̱jma̱a̱ numuu Biblia.

9. Xó má eʼthí náa Filipenses 2:13, xú káʼnii gándoo mambáyulú Jeobá rá.

⁹ Mbáa tsíyulú guʼtháán xa̱bu̱ dí muʼsngáá ga̱jma̱a̱ numuu Biblia numuu rí nakumulú rí ndayóoʼ mba̱yu̱u̱ʼ mbiʼi. Á mu xúʼko̱, guʼtháán Jeobá xóo ekumulúʼ ga̱jma̱a̱ gunda̱ʼa̱a̱ rí mambáyulú maxkajxáánʼ mbuʼyáaʼ mbáa bi̱ nandoo maʼnigajmaa Biblia (atraxnuu Filipenses 2:13). * Apóstol Juan niʼthí dí Dios mariʼña̱a̱ índo̱ nunda̱ʼa̱a̱ muʼni rí ikhaa má nandoo (1 Juan 5:14, 15). Ikha jngó nandoo nduʼyáá gajkhun dí Jeobá má gaʼni rí maʼndulú muʼsngúún xa̱bu̱.

10, 11. Náá numuu rí mbáa tsíyulú muxná mbá estudio rá.

¹⁰ Nduʼyáá rí gíʼdoo wéñuʼ numuu muʼsngúún xa̱bu̱, mú mbáa rígá tikhu dí narikhulú muʼni xó má eʼngo̱o̱. Guʼyáá tikhu dí ikhaa ga̱jma̱a̱ xóo gándoo gúraʼníí.

¹¹ Mbáa nakumulú dí nánguá xóo muʼni wéñuʼ ga̱jma̱a̱ numuu xóo kuwáánʼ. Mbá xkri̱da, tikhun publicadores guanii má o nandoo kháñuun. Á mu xúʼko̱, guʼyáá ndiéjunʼ ikha nijmañulúʼ ga̱jma̱a̱ numuu nandii COVID-19: Rí ma̱ndoo muʼsngúún xa̱bu̱ ga̱jma̱a̱ teléfono o majmulú internet. Ikha jngó ma̱ndoo muʼthán, muʼsngáá mbáa asndu náa guʼwúlú. Ma̱ngaa tikhun xa̱bu̱ nandún munigajmaa Biblia, mú na̱nguá waphiin munigajmaa índo̱ a̱ngiu̱lú kúwá  rutaraʼa. Lá ma̱ndoo muʼthúún muʼsngúún índo̱ ikhiin nawaphiin xáʼ. Tséʼniuu á mu miʼcha̱ wéñuʼ o wakhííʼ wéñuʼ, Jesús niʼsngóo Nicodemo wakhííʼ wéñuʼ numuu rí xúʼko̱ nindoo Nicodemo (Juan 3:1, 2).

12. Á mu nakumulú rí na̱nguá ejmañuluʼ guʼsngáa, ndiéjunʼ nindxu̱u̱ ajtsú dí gambáyulú rá.

¹² Nakumulú rí na̱nguá ejmañuluʼ guʼsngáa numuu Biblia. Mbáa nundxaʼwámijnálu rí ndayóoʼ majmañulúʼ o rí ndayóo muʼsngáa itháan májánʼ. Á mu xúʼko̱, gundxaʼwámíjná ajtsú dí mambáyulú. Timbá, Jeobá nandxa̱ʼwáminaʼ dí majmáanʼ muʼsngúún eʼwíinʼ (2 Cor. 3:5). Raga̱jma̱, Jesús, bi̱ “natañájunʼ mekhuíí ga̱jma̱a̱ náa tsu̱du̱u̱ ku̱ba̱ʼ” niʼtáñajunlú dí muʼsngáa (Mat. 28:18). Ragajtsú, na̱nguá kuwáánʼ ndajkuáánʼ. Xó má Jesús, ma̱ndoo makumulúʼ dí Jeobá má gambáyuluʼ mbuʼyáá ndiéjunʼ gúʼthá (Juan 8:28; 12:49). Ma̱ngaa, ma̱ndoo muʼthán bi̱ kayá edxu̱u̱ náa nuʼtáraʼa, mbáa precursor bi̱ najmaa, o mbáa publicador bi̱ najmañuu mu mambáyulú mugíʼdi̱i̱ muʼsngáá mbáa ga̱jma̱a̱ numuu Biblia. Á mu na̱jkuá gajmiúlú náa mbáa bi̱ nusngáá, ma̱ndoo manindxu̱lúʼ mbáa bi̱ naʼsngáa májánʼ.

13. Ndíjkha rí gíʼdoo numuu maguʼwunlu rá.

¹³ Naʼniulú mingíjyúuʼ maguʼwunlu ga̱jma̱a̱ i̱mba̱ nuxi̱ʼ xóo muʼsngáa ga̱jma̱a̱ i̱ʼwáʼ i̱yi̱i̱ʼ dí nuxi̱ʼ ráʼ. Rí xóo muʼsngáa ga̱jma̱a̱ numuu Biblia nixtiʼkhuu. I̱yi̱i̱ʼ rí itháan najmulú nindxu̱u̱, Araxtaa gagi kámuu, ndayóoʼ rí muniratamijná májánʼ muʼsngáa ga̱jma̱a̱ rí muʼsngáa mixtiʼkhu xóo eʼni nákha ginii. Nuʼtámíjná itháan gajmiúlú bi̱ nuʼsngáa ki xóo rí magixnuu mbaʼa kutriga̱. Najmulú itháan video ga̱jma̱a̱ i̱ʼwáʼ dí ndayóoʼ mbuʼyáá náa celular o tablet, xóo JW Library^®. Á mu nakumulú dí naʼniulú mingíjyúuʼ majmulú rígi̱, guʼtháán mbáa bi̱ maʼsngulúʼ majmulú. Mingíjyúuʼ nindxu̱u̱ rí maguʼwunlu náa nixtiʼkhuu. Itháan nanigulúʼ muʼni xó má kuwáánʼ ru̱ʼni̱. Mú, ga̱jma̱a̱ numuu dí Jeobá má gambáyulú ga̱jma̱a̱ a̱ngiu̱lú, xáʼni mingíjyúuʼ maguʼwunlu ma̱ngaa rí asndu manigulúʼ itháan náa nuʼsngáa numuu Biblia. Xó má niʼthí mbáa precursor, rí imbo̱o̱ʼ nuxi̱ʼ xóo muʼsngáa “nindxu̱u̱ xóo mbá giñánʼ wéʼtsí náa bi̱ najmañuu, xúʼko̱ má náa bi̱ naʼsngáa ma̱ngaa”.

14. a) Ndiéjunʼ gíʼmaa marmáʼáan a̱jkiu̱lú á mu naʼni mingíjyúuʼ mudxawíín xa̱bu̱ náa nuʼtáraʼa rá. b) Xú káʼnii exnúlú tsiakii 1 Corintios 3:6, 7 rá.

¹⁴ Nakumulú rí náa na̱jkua̱ guʼtáraʼa naʼni mingíjyúuʼ mugíʼdi̱i̱ muʼsngáá mbáa ga̱jma̱a̱ numuu Biblia. Mbáa tikhun xa̱bu̱ tsénigu̱u̱n mudxawíín dí nuʼthá o tsíñún gúyá ñajunʼ dí nuʼni. Ndiéjunʼ gambáyulú maʼdxuu má xúʼko̱ a̱jkiu̱lú rá. Garmáʼáan a̱jkiu̱lú dí numbaaʼ náa kuwáánʼ naxtiʼkhuu má xúʼko̱, rí xóo kúwá xa̱bu̱ naxtiʼkhuu mámbá mbiʼi ga̱jma̱a̱ bi̱ tsíñún gudxawíín nákha ginii mbáa nda̱wa̱á maʼndún mbuyáá ga̱jma̱a̱ numuu Dios (Mat. 5:3). Tikhun xa̱bu̱ bi̱ ninigaʼdu̱u̱n mudrigú i̱yu̱lú nda̱wa̱á nindúún majuiʼsngúún ga̱jma̱a̱ numuu Biblia. Ma̱ngaa, nduʼyáá dí Jeobá nindxu̱u̱ bi̱ kaʼyoo magu̱u̱ dí nijuiʼduu (Mat. 9:38). Nandoo dí muʼdu má xúʼko̱ ga̱jma̱a̱ rí muxtijyááʼ, mú ikhaa eʼni dí mbaja̱a̱ tsígáʼ (1 Cor. 3:6, 7). Ga̱jma̱a̱ ra̱ʼkhá tháán naxnúlú tsiakii, dí maski ajndu xúgi̱ na̱nguá exná mbá estudio, Jeobá naʼni tsajkurámuuʼ tsiakii dí nuʼni ra̱ʼkhá ñajunʼ dí nigájnuu niʼni. *

15. Xóo eku̱mu̱u̱ Jeobá índo̱ mbáa nagruigú dí majuiʼsngáá ga̱jma̱a̱ nagíʼ naʼni dí najmañuu náa Biblia rá.

¹⁵ Jeobá nadxuu wéñuʼ índo̱ mbáa xa̱bu̱ nandoo miʼsngáá dí naʼthí náa Biblia ga̱jma̱a̱ naʼthúún eʼwíinʼ dí ejmañuu (Prov. 23:15, 16). Nadxuu wéñuʼ índo̱ ndaʼyoo dí xóo xtáa rarígá mbiʼi xúgi̱. Mbá xkri̱da, maski ajndu nirígá nandii  tsiguʼ 2020, nijuiʼsngúún mbá 7,705,765 xa̱bu̱ ga̱jma̱a̱ numuu Biblia, ga̱jma̱a̱ nimbañúún mbá 241,994 xa̱bu̱ muxnaxímíjná náa Jeobá ga̱jma̱a̱ majngún iyááʼ. Nda̱wa̱á, bi̱ ndiʼkhún nijngún iyááʼ musngúún eʼwíinʼ ga̱jma̱a̱ numuu Biblia mu xúʼko̱ makuwá itháan bi̱ majngún iyááʼ (Luc. 6:40). Nduʼyáá gajkhun dí ñajunʼ dí nuʼni, rí nuʼsngúún xa̱bu̱ naʼni rí Jeobá maʼdxuu a̱jkiu̱u̱n.

16. Ndiéjunʼ gándoo guʼgíʼ muʼni rá.

¹⁶ Ndayóoʼ tsiakii mu mbáa muʼsngáá maʼndoo kaʼyoo Anu̱lú bi̱ xtáa mekhuíí, mú Jeobá má gambáyulú náa ñajunʼ rí muʼsngúún itháan xa̱bu̱. Lá ma̱ndoo muʼgíʼ mugi̱ʼdi̱i̱ muʼsngáá mbáa xa̱bu̱ ga̱jma̱a̱ numuu Biblia rá. Mámbá índo̱ gándoo, guʼthúún rí muʼsngúún ga̱jma̱a̱ numuu Biblia xúgíinʼ xa̱bu̱ bi̱ nuʼtámíjná gajmiúlú. Á mu nuʼni xúʼko̱, mbáa maʼniulú tsiánguá xóo gúriʼña̱a̱ ikhiin. Gakumulú gajkhun dí Jeobá má gáʼni tsajkurámuuʼ tsiakii dí guʼni.

17. Xú káʼnii gákumulú á mu naʼngulú nuʼsngáá mbáa ga̱jma̱a̱ numuu Biblia rá.

¹⁷ Mbá gamajkhu mba̱a̱ nindxu̱u̱ rí muʼtáraʼa ga̱jma̱a̱ muʼsngáa rí gajkhun. Nindxu̱u̱ mbá ñajunʼ rí naʼni makuwáanʼ gagi. Apóstol Pablo nimbáñun mbaʼin xa̱bu̱ bi̱ nikúwá náa Tesalónica mani̱ndxu̱ún xa̱bi̱i̱ Jesús, ikhaa niʼthí xóo nikumu̱u̱: “Ndiéjunʼ rí kuáʼthi̱i̱nxu̱, dí nindxu̱u̱ gagi ndríguxu̱, ga̱jma̱a̱ rí muda̱a̱ʼxu̱ rí maʼni mu̱ni̱ xtiákamijnáxu̱ náa inuu Tátá Jesús índo̱ gáʼkha̱a̱ rá. Lá raʼkháa ga̱jma̱a̱ numala ikháanʼ ráʼ. Xúʼko̱, ikháanʼla nuni̱ rí maʼdxuu a̱jkiu̱xu̱ ga̱jma̱a̱ rí makúwáanʼxu̱ gagi” (1 Tes. 2:19, 20; Hech. 17:1-4). Rí mbiʼi xúgi̱, mbaʼin xa̱bi̱i̱ Jeobá nadxún xúʼko̱ kayuuʼ ma̱ngaa. Mbáa ndxájulú mbiʼyuu Stéphanie, bi̱ ga̱jma̱a̱ ajmbio̱o̱ nimbañúún mbaʼin bi̱ nisngúún majngún iyááʼ, niʼthí: “Nda̱a̱ i̱mba̱ rí naʼni maraxtaa gagi ki xóo rí matambáñun xa̱bu̱ muxnaxímíjná náa Jeobá”.