Mbá tsiguʼ nda̱wa̱á, nijuiʼthún xúgínʼ bi̱ kúwá náa Betel dí naxtandi̱ʼi̱i̱n bi̱ muxnaxímíjná muñambáá náa Betel dí rígá Sudáfrica, náa marigá mbóʼ nuxi̱ʼ ajua̱nʼ dí mayambáá mu magumaa imprimir. Nixnaxíminaʼ mayambáá ga̱jma̱a̱ ra̱ʼkhá tháán nidxuʼ índo̱ nithu̱nʼ dí nixtrigún maʼgá. Ma̱ngaa nixtaʼwíin magún imbá gitsíin betelita bi̱ naguwáʼ náa Canadá: Dennis Leech, Bill McLellan ga̱jma̱a̱ Ken Nordin. Nithu̱xu dí i̱ndó miʼni numáá dí mu̱ʼguáxu.

Nitaróʼoo ru̱dúʼ ga̱jma̱a̱ nithu̱u̱n: “Mamá gúʼdóʼ mbáa dí ma̱tha̱a̱n, maʼgá náa Sudáfrica”. Ru̱dúʼ nindxu̱u̱ mbáa xa̱bu̱ bi̱ tséʼthi wéñuʼ mu gíʼdoo mba̱a̱ fe ga̱jma̱a̱ nandoo kaʼyoo Jeobá, ikha jngó na̱nguá ma niʼthúnʼ wéñuʼ, mu ndi̱yo̱o̱ dí ikhaa mambáyúʼ má dí niraʼwíí mani, ni má ru̱dúʼ ni má anu̱ʼ na̱nguá nirikhoʼ mani dí niraʼwíí, maski ajndu nikúwi̱i̱n ngíná numuu rí maʼgá mitsínguánʼ wéñuʼ.

Ginii ni̱jkuáxu náa Betel dí rígá náa Brooklyn, ikhí niniratáanʼxu ajtsú igu̱nʼ náa nijmañuxu xú kaʼnii gájmuxu ajua̱nʼ kiejunʼ dí magumaa ga̱jma̱a̱ imprimir. Nda̱wa̱á nitsímuxu náa mbóoʼ carro dí na̱jkhá jmbu náa Ciudad del Cabo (Sudáfrica). Ikhú ndiʼkhún ndi̱ya̱a̱ 20 tsiguʼ. Nda̱wa̱á dí nijkuánuxu náa Ciudad del Cabo, mbruʼun má rúʼko̱ nigíʼdi̱i̱xú ni̱jkuáxu ga̱jma̱a̱ mboʼ tren dí na̱jkha̱ asndu Johannesburgo. Timbá náa nigui̱ji̱ niʼni má wajtsiriga̱ náa mbó xuajen dí mbiʼyuu Karroo, ikhí nindxu̱u̱ xóo mbá mbaaʼ mijxooʼ. Rígá wéñuʼ yujndaʼ ga̱jma̱a̱ naʼni mijkha wéñuʼ. Índo̱ mbá najkuáan niyejxixu náa mbá ventana, nirajximíjnaxu xkáʼnii lá nindxu̱u̱ xuajen rúʼko̱. Náa lá nixuʼdámíjná rá. Tsiguʼ nda̱wa̱á índo̱ nitangáanʼxu náa mbaaʼ má rúʼko̱ nijkuánú ndiya̱a̱xu dí xa̱bu̱ bi̱ kúwi̱i̱n ikhí nindxu̱ún míjínʼ xa̱bu̱.

Ñajunʼ dí nikhánuʼ mani mbá nguáthá tsiguʼ nindxu̱u̱ rí majmuʼ linotipia, mboʼ ajua̱nʼ rí mingíjyúuʼ matrugua̱. Ñajunʼ dí nigúʼdoo nindxu̱u̱ rí mani mújúunʼ raya ndrígóo letra mu maguma imprimir i̱yu̱lúʼ Bi̱ Nayejngoo ga̱jma̱a̱ ¡Awaxunʼ! Betel rígi̱ naguwíi mbaʼa wéñuʼ i̱yu̱lúʼ náa mixtiʼkhu ajngáa dí nuthi bi̱ África, ra̱ʼkhá i̱ndó dí nuthi bi̱ Sudáfrica, ma̱ngaa nagájnuu dí majmaa náa i̱ʼwáʼ xuajen mba̱ʼu̱. Nidxuxu wéñuʼ dí ra̱ʼkhá tháán nijmaa imbo̱ʼ nuxi̱ʼ ajua̱nʼ rígi̱ dí asndu ni̱jkha̱ kaguáanʼxu náa i̱mba̱ nijniun numbaaʼ.

Nda̱wa̱á, niñajunʼ náa Oficina ndrígóo Fabrica, ikhí niyambáá mu maguma mixtiʼkhu enii ñajunʼ  náa naguma imprimir, náa envíos ga̱jma̱a̱ náa najuiʼtájuíi. Nigúʼdoo mbaʼa dí mani ga̱jma̱a̱ nixtáa gagi wéñuʼ.

Nákha 1968, ndi̱ya̱a̱ Laura Bowen, ikhaa nixtáa mijngii Betel. Ikhaa ninindxu̱u̱ precursora ga̱jma̱a̱ niyambáá maʼtájuíi rí majmaa náa Departamento ndrígóo Traducción. Nákha ikhú, bi̱ ndiʼkhún nidamijná xándoo maguanún náa Betel, ikha jngó Betel nikuʼmá i̱yi̱i̱ʼ inuxuʼ dí nanindxu̱xuʼ precursor especial. Nixmiéjunʼ mbá chíʼgíʼ numuu dí gu̱wa̱ʼ tsiguʼ rí nixtáa náa Betel nigúʼdoo dí miʼkhu ga̱jma̱a̱ náa maxtáa, xú kaʼnii gáʼngo̱o̱ majmuxu mbújkha̱a̱ dí gakhánuxu xóo precursor especial rá. Mudríguxu 25 rands mámbá igu̱nʼ (rí nákhá ikhú nindxu̱u̱ 35 dólares) i̱ndó a mu naʼnguxu nuxnaxí i̱yu̱lúʼ, hora ga̱jma̱a̱ revisitas dí kaʼyuxu muxnaxí. Mbújkha̱a̱ rúʼko̱ mbaʼyoo muni numááxu náa maguánuxu, dí muphúxu, dí mu̱ʼguáxu ga̱jma̱a̱ carro, náa muni tanamijnáxu ga̱jma̱a̱ i̱ʼwáʼ dí gáʼyuxuʼ.

Nixuʼmáanʼ muʼguáxu náa mbá chímbaʼin a̱ngiu̱lú bi̱ kúwi̱i̱n mijngii náa xuajen Durban, náa rawuunʼ océano Índico. Ikhí kúwi̱i̱n mbaʼin wéñuʼ xa̱bu̱ bi̱ naguwáʼ náa India. Mbaʼin dí ikhiin naguwáʼ náa xa̱bu̱ bi̱ nini muñajunʼ ga̱jma̱a̱ tsiakii nákha inu mámbá siglo diecinueve náa nagájnuu azúcar. Mu rí xúgi̱ guáʼdáá i̱ʼwáʼ ñajunʼ, mú túni mbáti̱ga̱a̱ muni xóo má ma eguʼwún eni ga̱jma̱a̱ xóo muni májánʼ ganitsu, ma̱ngaa mbóʼ ganitsu miʼtsí rí ikhiin nuni májáánʼ ga̱jma̱a̱ curry. Numuu rí nuthi inglés ikha jngó táʼniuxu mingíjyúuʼ mutaruʼúúnxu.

Bi̱ nindxúu̱n precursor especial ndiyóoʼ muxnaxi̱i̱ 150 hora mámbá igu̱nʼ. Ikha jngóo ikhúún ga̱jmu̱ʼ Laura niríyaʼ awan dí munixu majun hora timbá mbiʼi. Numuu rí xóó raguáʼdááxu revisita ni má estudio ikha jngóo ndiyóoʼ mutaráʼaxu mámbá guʼwá dí mbá majun hora ga̱jma̱a̱ ikhí ra̱ʼkhá tháán mijkha ma̱ngaa niʼni maruñáanʼxu wéñuʼ. Mbégu̱ʼ má rí nigiʼdixu, niyejxu̱u̱ relioʼ... ¡Káaʼ ninújngoo 40 minuto! Niraximínaʼ a mu maʼngu̱xu muxnaxíxu hora xóo má exnáxi̱i̱ mbáa precursor especial.

Tájyúuʼ má mbayuuʼ rí niríyaʼxu mbá májánʼ awan. Xúgíʼ mbiʼi ginii nuni májánʼ sándwich dí muphúxu ga̱jma̱a̱ nuxíñaʼxu sopa o café náa mbá termo. Índo̱ nanduxu mbu̱ya̱a̱xu mbégu̱ʼ nusraʼa carriuxu Volkswagen náa mbá xkamijxoo ixi̱. Nguáná ikhí ra̱ʼkhá tháán mbaʼin i̱ji̱n naxuʼmamijná náa giáa̱nʼxu ga̱jma̱a̱ tsiánguá eni inu kuyuxu. Índo̱ ninújngoo nguáthá mbiʼi, káaʼ ndu̱ya̱a̱xu xóo enújngoo a̱jma̱ o ajtsú hora nda̱wa̱á ní tséya̱a̱xu xú kaʼnii guámbáa mbiʼi.

Nikúwáanʼxu gagi dí ni̱jkuáxu gúthu̱u̱n dí gajkhun rí na̱ʼkha̱ raʼthí náa Biblia xa̱bu̱ bi̱ kúwá náa xuajen rúʼko̱. Ni̱jkuánú ndiya̱a̱xu dí xa̱bu̱ India guáʼdáá gamajkhún, nindxúu̱n míjínʼ xa̱bu̱, nundriguíin májánʼ xa̱bu̱ bi̱ nagún náa guʼwún ga̱jma̱a̱ nandún kuyáá Dios. Mbaʼin xa̱bu̱ bi̱ kúwá náa India nidxawíín ajngáa dí nithu̱u̱nxu. Ninigu̱u̱nʼ wéñuʼ majmañún ga̱jma̱a̱ numuu Jeobá, numuu Jesús, dí naʼthí Biblia ma̱ngaa dí marígá tsímáá ga̱jma̱a̱ dí xa̱bu̱ bi̱ nikháñúún magabiín náa numbaaʼ nuxi̱ʼ. Nda̱wa̱á dí ninújngoo mbá tsiguʼ niguáʼdiinxu 20 xa̱bu̱ bi̱ nusngúúnxu ga̱jma̱a̱ numuu Biblia. Nini májáánʼ dí muphúxu náa goʼwóo mbáa bi̱ nusngááxu. ¡Ra̱ʼkhá tháán nikúwáanʼxu gagi!

Mu tájyúuʼ má mbayuuʼ índo̱ nikhánúxu muni imbo̱ʼ ñajunʼ. Nixuʼmáanʼxu muyambááxu xóo circuito náa mijngii rawunʼ iyaʼ mitsaanʼ ndrígóo Océano Índico. Mámbá xmáná naguanúxu náa goʼwóo mámbá ndxájulú bi̱ xtáa náa congregación na̱jkuáxu̱ ma̱ngaa na̱jkuáxu̱ gutaraʼa gajmiúxu mámbáa ndxájulú mu xúʼko̱ muxnu̱u̱xu tsiakii. Ikhiin nuniuxu xóo bi̱ kuñún ga̱jma̱a̱ naniguxu makuwaanʼ gajmiúxu ikhiin, ga̱jma̱a̱ ejñúnʼ xúʼko̱ má xujkhú bi̱ guáʼdiin.

Ñajunʼ dí nikhánuʼ mani náa Betel nindxu̱u̱ dí maxtáa náa Departamento ndrígóo Servicio, ikhí nindoo niñajunʼ gajmíi̱nʼ mbaʼin a̱ngiu̱lú bi̱ najmañún. Nákha ikhú nda̱wa̱á rí mbáa ndxájulú viajante niguámbóo ñajunʼ ndrígóo náa mbá congregación nakuʼmá informe ndrígóo náa Betel. Ikha jngóo Departamento ndrígóo Servicio naxuʼma mbá carta maʼgá náa congregación. Nuxuʼma Carta rúʼko̱ mu maxnún tsiakii a̱ngiu̱lú ga̱jma̱a̱ maxnún ikha dí nda̱ñúunʼ. A̱ngiu̱lú bi̱ nindxúu̱n secretario nuñajunʼ gakhi̱i̱ wéñuʼ mu mutajuíi inglés informe ndrígu̱ún Viajante náa ajngáa xóo xhosa ga̱jma̱a̱ zulú.  Nda̱wa̱á nutajuíi náa ajngáa dí nuthi bi̱ África carta rí naʼnirámáʼ sucursal náa ajngáa inglés. Nixníín núma̱aʼ wéñuʼ a̱ngiu̱lú buʼko̱ bi̱ niñajunʼ gakhi̱i̱ náa nitajuíi numuu rí xúʼko̱ nindoo ndi̱yo̱o̱ xú kaʼnii gaʼkhu raʼnii a̱ngiu̱lú bi̱ skuʼniún.

Nákha ikhú, bi̱ kúwá náa Sudáfrica kúwá náa mbá xtángoo dí xáʼyóoʼ mambaxúún gajmiún i̱ʼwáʼ raza rí najmaʼnuuʼ xóo apartheid. Mámbá raza kúwá mbóo jnduʼ náa mbá xuajen, ikha jngó ndaa xóo mambaxúún gajmiún eʼwíínʼ bi̱ nindxúu̱n i̱ʼwáʼ raza. A̱ngiu̱lú bi̱ skuniúnʼ nutamijná ga̱jma̱a̱ ajngún, nutaraʼa náa ajngún ga̱jma̱a̱ nagimbíi̱n náa congregación dí nuthi ajngún.

Numuu dí nixungu̱u̱n mayambáá má xúʼko̱ náa kúwi̱i̱n xa̱bu̱ bi̱ nuthi ajngáa inglés, ikha jngó na̱nguá ni niʼniún mbaʼin xa̱bu̱ bi̱ naguwáʼ náa África. Mu rí xúgi̱ ma̱ndoo majmañuʼ xóo ndiji̱i̱n ga̱jma̱a̱ ndiéjunʼ eni. Ni̱jkhánú ndi̱yo̱o̱ xú kaʼnii míniiʼ a̱ngiu̱lú buʼko̱ ga̱jma̱a̱ numuu rí xóo eni xa̱bu̱ xuajñún. Nisngajma rí támiñún numuu rí nini gaʼduunʼ xúgíʼ kiʼsngáa rí tséʼkha̱ náa Biblia ga̱jma̱a̱ nini gaʼduunʼ muni má xúʼko̱ rí nákha̱ náa xa̱bu̱ xawan, maski ajndu nikiʼníin bi̱ kuñún ga̱jma̱a̱ xa̱bu̱ xuajñún. Náa mbaaʼ dí ndaa mbaʼa wéñuʼ guʼwá xa̱bu̱ migíníi wéñuʼ, mbaʼin dí ikhiin nánguá nigún mbayuuʼ escuela o nditháan tágun, mú nduyamajkuíí Biblia.

Nidxuʼ dí nindoo niñajunʼ náa ma̱ndoo manimbánuu xkujndu ga̱jma̱a̱ numuu dí ndayóoʼ mbuyamajkuíí xóo nuraʼwi̱i̱ muni numuu rí nduyamajkuíí Dios ga̱jma̱a̱ rí naguájun jmbu. Nixnúʼ tsiakii mba̱yo̱o̱ rí naguájun jmbu ga̱jma̱a̱ rí tsémiñún e̱jñún a̱ngiu̱lú bi̱ nixkawíin náa escuela numuu rí ninigaʼduunʼ mutajkáan ga̱jma̱a̱ muni ajmúú dí na̱ʼkha̱ náa i̱ʼwáʼ religión.

A̱ngiu̱lú bi̱ kúwi̱i̱n náa mbá xuajen chíʼgíʼ ndrígóo África rí nigumbiʼyuu Suazilandia (rí xúgi̱ nindxu̱u̱ Esuatini) niraʼníí imbo̱ʼ tsáʼkhá̱. Índo̱ nikháñuu rey Sobhuza II, nixtandu̱ʼu̱u̱n xúgínʼ xa̱bu̱ xuajen muni mbóʼ costumbre rí musngajma rí kúwi̱i̱n ngíná. Nijuiʼthún xa̱bekha dí muda tátsiún ga̱jma̱a̱ gu̱ʼu̱ murujtu chijndii tátsiún. Mbaʼin wéñuʼ a̱ngiu̱lú xa̱bekha ga̱jma̱a̱ gu̱ʼu̱ nini gíníi ga̱jma̱a̱ numuu rí nini gaʼduunʼ muni xóo eyamajkhún wajin xiʼñúnʼ. Ga̱jma̱a̱ numuu xóo niguájun jmbu náa Jeobá ni̱jkha̱nú asndu náa a̱jkiu̱xuʼ. Mbaʼa wéñuʼ rí nisnguxu a̱ngiu̱lú bi̱ kúwá náa África xóo rí niguájun jmbu ga̱jma̱a̱ dí xóo niʼngo̱o̱ a̱jkiu̱ún, rúʼko̱ niʼni dí maʼni itháán gujkhuʼ fe ndrígúxu̱.

Nákha 1981, nitangaán niñajunʼ náa imprenta mu mambáñún majmúún computadora náa ñajunʼ dí maguma imprimir. Ra̱ʼkhá tháán mitsaanʼ ninindxu̱u̱ tsiguʼ rúʼko̱. Nixtiʼkhu̱u̱ náa naguma imprimir. Mbáa xa̱bu̱ bi̱ kayá edxu̱u̱ náa nagujua̱ ajua̱nʼ fotocomponedora nixnúu sucursal mu mbaʼyoo xú kaʼnii ñajunʼ. Xóo niñajunʼ ajua̱nʼ rígi̱ niʼni rí muriʼkuriya̱a̱xuʼ mbá mijna gu̱wa̱ʼ linotipias mu muxuda̱ʼ witsu fotocomponedoras nuxi̱ʼ. Ma̱ngaa nigídaxuʼ imbo̱ʼ nuxi̱ʼ ajua̱nʼ dí nayambáá maguma imprimir. Ikhú nigíʼdi̱i̱ nini̱i̱xu imprimir itháán nacha̱ ki xóo nákha ginii.

Dí nijmuxuʼ computadoras niʼni rí muniwíixu i̱mba̱ nuxi̱ʼ rí ndiyóoʼ majmuxu ga̱jma̱a̱ MEPS rí nindxu̱u̱ dí ma̱ndoo maguma májánʼ computadoras maguraʼmá i̱ʼwáʼ letra dí gíʼdoo mixtiʼkhu ajngáa ¡Ra̱ʼkhá tháán mbaʼa dí nixtiʼkhuu asndu má nákhá nijkuáxu ajkuáanʼxu bi̱ nindxuxu betelitas bi̱ naguwáʼ náa Canadá náa Sudáfrica! (Is. 60:17). Nákha ikhú, xugiáanʼxu niniʼgúnxu gajmiúxu mbáa májánʼ precursora bi̱ nandún kuyáá wéñuʼ Jeobá. Bill ga̱jma̱a̱ ikhúún kuwáánʼxu xóó náa Betel. Ken ga̱jma̱a̱ Dennis nikúwá mijngii gajmiún bi̱ kúwá náa guʼwún.

Ñajunʼ rí maguma traducir ga̱jma̱a̱ maguma̱a̱ imprimir mámbá mbiʼi nda̱joo itháan, ga̱jma̱a̱ nuxuʼmáxu náa i̱ʼwáʼ Betel. Ikha jngó ndiyóoʼ rí marigá imbo̱ʼ nuxi̱ʼ Betel. A̱ngiu̱lú nini náa mbá mitsaanʼ mbaaʼ dí gíʼ náa narámaaʼ a̱jkha̱ʼ náa Johannesburgo, nákhá 1987 niguma ndxo̱o̱ numuu rí niguáxi. Ra̱ʼkhá tháán xtáá gagi numuu rí ndi̱yo̱o̱ xóo ni̱jkha̱ rajoo itháán ñajunʼ ga̱jma̱a̱ rí nixtáa mbayuuʼ tsiguʼ mayambáá náa Comité ndrígóo Sucursal dí rígá náa Sudáfrica.

Nákhá 2001, nidrígúxu̱ mboʼ dí taguáʼthi̱i̱n, nithu̱nʼ dí mayambáá xóo Comité ndrígóo Sucursal dí rígá náa Estados Unidos rí ndiʼkhún nigi̱ʼi̱. Maski ajndu nikúwáanʼxu ngíná numuu rí muniʼñáʼ ñajunʼ ndrígúxu̱ ga̱jma̱a̱ bi̱ nambájxu gajmiúxu̱ bi̱ kúwá náa Sudáfrica, kuwáanʼxu gagi rí makuwáanʼ gajmiúxu̱ eʼwíinʼ a̱ngiu̱lú bi̱ kúwá náa Betel dí rígá náa Estados Unidos.

Mbóo dí niʼni maxmiéjunxu nindxu̱u̱ rí xákuwáanʼ mijngii gajmiúxu̱ ru̱dúu̱ Laura numuu dí ikhaa nikhi̱i̱ má. Asndu náa Nueva York ndaa xóo mumbáyiixu wéñuʼ, mu ajtsíin a̱ngui̱i̱n Laura nithi rí muxnáá dí gáʼyoo rudún, dí xaxmiéjunʼ wéñuʼ ga̱jma̱a̱ rí mumbayíí ga̱jma̱a̱ mbújkha̱a̱. Nituxu numuu rí ndaa xóo muñajunʼ kajxi náa Jeobá ikha jngó nituxu rí ikhiin ma gúñewa̱a̱n rudún mu xúʼko̱ mumbáyúxu munixu má xúʼko̱ ñajunʼ ndrígúxu̱, ra̱ʼkhá tháán nixni̱i̱nxu numaaʼ.

Ndxájuʼ ga̱jma̱a̱ a̱ʼgiu̱u̱ bi̱ nikúwá náa Toronto ma̱ngaa nimbáyuxu muñewa̱a̱n ru̱dúʼ numuu rí niguanúu mbawíí. Asndu má nákha ikhú, kúwá ma gajmiún ikhaa itháán rí 20 tsiguʼ. Nuxni̱i̱nxu numaaʼ wéñuʼ ga̱jma̱a̱ numuu rí niñewa̱a̱n májánʼ asndu índo̱ nikháñuu nguáthá mbiʼi nda̱wa̱á rí niguáʼnuxu náa Nueva York. Ra̱ʼkhá tháán májánʼ nindxu̱u̱ dí kúwá bi̱ kuʼñúún bi̱ kúwá xawii muri̱ʼkhu̱u̱ xóo kúwi̱i̱n muni mbá ñajuunʼ dí nguáná nindxu̱u̱ mingíjyúuʼ.

Ñajunʼ rí nikhánuʼ mani tsiguʼ rí nixtáá náa Estados Unidos nindxu̱u̱ náa Nagájnuu i̱yi̱i̱ʼ ndrígúlú, rí xúgi̱ niʼni itháán nuxi̱ʼ ga̱jma̱a̱ niʼni itháán ra̱mingíjyúuʼ. Ga̱jma̱a̱ xíkhoo nigíʼdu̱u̱ niñajunʼ náa Departamento náa ndaʼyoo ndiéjunʼ eyóoʼ majuiʼtsi. Ra̱ʼkha̱ tháán gagi xtáá rí nindoo niyambáá imbá 20 tsiguʼ náa Betel rí mba̱a̱ wéñuʼ rígi̱, náa rí xúgi̱ kúwi̱i̱n 5,000 betelitas ga̱jma̱a̱ imbá 2,000 a̱ngiu̱lú bi̱ naguwáʼ ruñambáá.

Nákhá 60 tsiguʼ kidííʼ tándxa̱ʼwáminaʼ wáa rí maxtáá gi̱i̱. Xúgíʼ tsiguʼ rí ninújngoo rígi̱ Laura nimbáyuʼ wéñuʼ. ¡Ra̱ʼkhá tháán mitsaanʼ nikuwáanʼxu! Ndu̱ya̱a̱xu dí gíʼdoo wéñuʼ numuu mixtiʼkhu enii ñajunʼ rí nikhánu munixu ga̱jma̱a̱ xúgínʼ a̱ngiu̱lú bi̱ nindoo niñajunʼ gajmiúxu̱. Tikhun dí ikhiin nuñajunʼ náa Sucursal dí rígá náa mbaʼa xuajen náa ni̱jkuáxu. Mú rí xúgi̱ nánguá exnuʼ mbaʼa wéñuʼ ñajunʼ mani numuu rí gúʼdoo itháán ma dí 80 tsiguʼ ga̱jma̱a̱ kúwi̱i̱n mbaʼin a̱ngiu̱lú jiáma bi̱ ma̱ndoo muñajunʼ.

Mbáa bi̱ niʼnirámáʼ Salmo niʼthí: “Gagi kúwi̱i̱n xa̱bu̱ bi̱ guáʼdaa Jeobá xóo Dios ndrígu̱ún” (Sal. 33:12). ¡Phú gajkhun nindxu̱u̱ ajngáa rúʼko̱! Ra̱ʼkha̱ tháán naxnáa núma̱aʼ, numuu dí nini ñajunʼ Jeobá gajmuʼ xuajñuu náa kajchún xa̱bu̱ bi̱ kúwá gagi.