1. Náá numuu rí ndayóoʼ mbuʼyamajkuíí Jeobá rá.

NDAYÓOʼ mbuʼyamajkuíí ga̱jma̱a̱ muʼnimbulúʼ * kuʼyáá Jeobá. Ikhaa Niʼniwáanʼlú, ikha jngó ikhaa kaʼyoo magruiga̱ ikha rí munimbánii bi̱ niʼniwíin (Rev. 4:11). Mú rígá i̱mba̱ numuu rí ndayóoʼ muʼnimbulúʼ kuʼyáá: Numuu rí phú májánʼ eʼtáñajunʼ. Mba̱yu̱u̱ʼ tsiguʼ mbaʼin xa̱bu̱ niguáʼdáá mbá ñajunʼ rí mutañajúún’ eʼwíínʼ. Mú Jeobá nindxu̱u̱ bi̱ najmañuu itháan, nandoo kaʼyulú, nañewu̱nlú mbá xúgiáánʼ (Éx. 34:6; Rom. 16:27; 1 Juan 4:8).

2. Ndiéjunʼ rí naʼthúlú náa Hebreos 12:9-11 rí ndayóoʼ mbuʼyamajkuíí Jeobá rá.

² Jeobá nandoo rí muʼnimbulúʼ kuʼyáá numuu rí nandulú kuʼyáá ma̱ngaa ga̱jma̱a̱ numuu rí nduʼyáá rí nindxu̱u̱ Anu̱lú bi̱ nandoo kaʼyulú. Náa carta rí Pablo nikuʼma náa inún cristianos hebreos, naʼthí rí ndayóoʼ mbuʼyamajkuíí Anu̱lú numuu rí ikhaa naʼsngúlú “mu mambáyulúʼ” má ikháanʼ (atraxnuu Hebreos 12:9-11). *

3. a) Xú káʼnii esngajmá rí nduʼyamajkuíí Jeobá rá. b) Xú káʼnii graxe̱ gúriʼña̱a̱ rá.

³ Nduʼyamajkuíí Jeobá índo̱ nu̱ʼni̱ xó má eʼngo̱o̱ mu muʼnimbulúʼ kuʼyáá, ma̱ngaa tséʼni̱ xó má kayáa edxu̱lúʼ ikháanʼ (Prov. 3:5). Á mu najkuanú nduʼyáá májánʼ xóo nindxu̱u̱ Jeobá, xáʼniulu mingíjyúuʼ muʼnimbulú kuʼyáá, náá numuu rá. Numuu rí nakujmaa xóo nindxu̱u̱ náa xúgíʼ rí naʼni (Sal. 145:9). Índo̱ nuniʼníiʼlú májánʼ Jeobá itháán nandulú kuʼyáá. Ma̱ngaa ga̱jma̱a̱  numuu rí nandulú kuʼyáá tséyóoʼ má maʼthúlú xúgíʼ kayuuʼ rí ndayóoʼ mu̱ʼni̱ ga̱jma̱a̱ dí xúʼni̱. Nuʼnimíjna̱ mundxaʼwáá edxu̱lúʼ xóo Jeobá ga̱jma̱a̱ makumulú xóo ikhaa ga̱jma̱a̱ nduʼyáá ndiéjunʼ nindxu̱u̱ rí májánʼ ga̱jma̱a̱ dí ra̱májánʼ (Sal. 97:10). Mú mbáa nguáná maʼniulú mingíjyúuʼ muʼnimbulúʼ kuʼyáá Jeobá. Náá numuu rá. Ga̱jma̱a̱ dí gándoo gajmañún bi̱ kuya̱ edxu̱u̱, xabuanii ga̱jma̱a̱ gu̱ʼú wanii bi̱ guáʼdiin e̱ji̱n rí niʼni Xa̱bu̱ Ñajunʼ Nehemías, rey David ga̱jma̱a̱ María ru̱dúu̱ Jesús rá. Náa artículo rígi̱ maxtiʼña̱a̱ graxe̱ rígi̱.

4, 5. Xó má naʼthí náa Romanos 7:21-23, náá numuu rí nguáná naʼniulú mingíjyúuʼ muʼnimbulúʼ kuʼyáá Jeobá rá.

⁴ Nguáná naʼniulú mingíjyúuʼ muʼnimbulúʼ numuu rí nindxulú xa̱bu̱ aʼkhá. Índo̱ Adán ga̱jma̱a̱ Eva túnimbu̱ún náa Dios ga̱jma̱a̱ ni̱ʼphu̱ xndúu ixi̱ rí niʼthúnʼ rí xúphu̱, nini rí nindúún ikhiin (Gén. 3:22). Xúʼko̱ má ma̱ngaa rí mbiʼi xúgi̱, mbaʼin xa̱bu̱ tsixmiéjúúnʼ xóo eku̱mu̱u̱ Dios ga̱jma̱a̱ ikhiin má nuraʼwíi muni rí nakumu̱ún rí nindxu̱u̱ májánʼ ga̱jma̱a̱ dí ra̱májánʼ.

⁵ Asndu mangáánʼ bi̱ nuniʼniiʼ ga̱jma̱a̱ bi̱ nandulú kuʼyáá Jeobá nu̱ʼni̱ mbá tsiakii mba̱a̱ mu muʼni xúgíʼ rí ikhaa naniguuʼ. Xúʼko̱ má nigíʼnuu apóstol Pablo ma̱ngaa (atraxnuu Romanos 7:21-23). * Xó má ikhaa, nandulú muʼni rí naniguuʼ Dios. Mú ndayóoʼ muʼni mbá tsiakii mú muguajún jti̱i̱n rí maʼni maʼga kaguáanʼ muʼni dí raʼkhí.

6, 7. Xú káʼnii i̱mba̱ numuu rí maʼniulú mingíjyúuʼ mbuʼyamajkuíí Jeobá rá. Arathá mbá xkri̱da.

⁶ Ma̱ngaa nguáná maʼniulú mingíjyúuʼ mbuʼyamajkuíí Jeobá numuu rí mixtiʼkhu xuajen náa naguwaʼ ga̱jma̱a̱ xóo nigajáanʼ. Mbaʼa rí xóo nakumu̱ún xa̱bu̱ tsímbriguii ga̱jma̱a̱ xóo eʼthí Dios, mbáa ndayóoʼ mu̱ʼni̱ mbá tsiakii mu muniʼñáaʼ rí xóo nakumu̱ún mbaʼin xa̱bu̱ rí mbiʼi xúgi̱. Guʼyáá mbá xkri̱da.

⁷ Náa mbaʼa xuajen, naguʼwún rí mutsudi̱i̱n jiáma ga̱jma̱a̱ wa̱ʼxa̱ʼ rí mbuyááʼ mbújkha̱a̱. Rúʼko̱ nigíʼnuu mbáa ndxájulú bi̱ mbiʼyuu Mary. * Nákha xóó tséniniiʼ Jeobá, niʼnigajmaa̱ náa mbá universidad rí gíʼdoo wéñuʼ numuu dí rígá náa xuajñuu. Bi̱ kúwi̱i̱n náa goʼwóo nitsudaa mu mbayááʼ mbá ñajunʼ náa mada̱ʼ mba̱a̱ mbújkha̱a̱ ga̱jma̱a̱ rí majmaʼniiʼ wéñuʼ. Rúʼko̱ rí phú nindoo ma̱ngaa. Mú niriʼkhuu xóo nindxa̱ʼwáminaʼ índo̱ nininiiʼ Jeobá ga̱jma̱a̱ nindoo kaʼyoo wéñuʼ. Maski má xúʼko̱, ikhaa naʼthí: “Nguáná naxkamaa náa ma̱ndoo mada̱ʼ mba̱a̱ mbújkha̱a̱, mú xániñuʼ mani itháan ñajuunʼ Jeobá. Mú ga̱jma̱a̱ numuu xóo nini mbáju̱u̱n naʼniuʼ gakhi̱i̱. Ndayóoʼ matakháñuu wéñuʼ Jeobá mu mambáyuʼ rí xagruígú ñajunʼ rí xániñuʼ mani ñajuunʼ ikhaa” (Mat. 6:24).

8. Dí gúʼyáá rá.

⁸ Xó má ndiʼyáá, rí mbuʼyamajkuíí Jeobá nambáyulú má ikháanʼ. Mú rígá i̱mba̱ numuu rí munimbu̱ún kuyáá Jeobá bi̱ guáʼdáá mbá ñajunʼ rí kajkuáa ñawúúnʼ, xóo bi̱ kuya̱ edxu̱u̱, xabuanii ga̱jma̱a̱ gu̱ʼú wanii bi̱ guáʼdiin e̱ji̱n: Ma̱ndoo mumbañún eʼwíínʼ. Rí xúgi̱ mbuʼyáá tikhu xkri̱da rí na̱ʼkha̱ náa Biblia rí maʼsngúlú muʼnimbánii ñajunʼ rí kajkuáa ñawúnlú xó má naniguuʼ Jeobá.

9. Ndiéjunʼ rí mingíjyúuʼ niraʼnuu Nehemías rá.

⁹ Jeobá nixnúún mbá ñajunʼ kiejunʼ bi̱ kuya̱ edxu̱u̱ rí muñewu̱u̱n xa̱bi̱i̱ (1 Ped. 5:2). Bi̱ kuya̱ edxu̱u̱ mbaʼa rí ma̱ndoo majmañún náa xkridoo  Xa̱bu̱ Ñajunʼ Nehemías xóo niñewu̱u̱n xa̱bi̱i̱ Jeobá. Ikhaa nigiʼdoo mbá ñajunʼ kiejunʼ náa Judá (Neh. 1:11; 2:7, 8; 5:14). Gundxaʼwamíjna̱ xú káʼnii rí mingíjyúuʼ niraʼnuu índo̱ ni̱jkha̱ rí maʼni a̱jma̱ nuthu náa Jerusalén. Índo̱ ni̱jkha̱nú ndiʼyoo rí judíos nini tsagáá templo ma̱ngaa nánguá embañún ga̱jma̱a̱ mbújkha̱a̱ levitas xó má eʼthí náa Xtángoo. Ma̱ngaa nánguá eyamajkuíí mbiʼi sábado ga̱jma̱a̱ asndu tikhuun xa̱bekha ninigu̱nʼ gajmiún gu̱ʼu̱ bi̱ naguwááʼ. Xa̱bu̱ Ñajunʼ Nehemías ndiyóoʼ rí maʼnimbánuu xkujndu rí gakhi̱i̱ rígi̱ (Neh. 13:4-30).

10. Xú káʼnii nijmuu ñajunʼ rí nijkhuáa ñawúunʼ Nehemías rá.

¹⁰ Nehemías na̱nguá nijmuu ñajunʼ rí nigiʼdoo mu matsudi̱i̱n judíos munimbánii rí ikhaa nandoo. Rí phú niʼni, niʼtákáñuu wéñuʼ Jeobá mu maxnúu ikha ga̱jma̱a̱ niʼsngúún xa̱bu̱ xuajen xtángoo ndrígóo Dios (Neh. 1:4-10; 13:1-3). Ma̱ngaa ninindxu̱u̱ xa̱bu̱ guabaaʼ ga̱jma̱a̱ asndu niñejunʼ gajmii a̱ngui̱i̱n náa niguma̱a̱ xtátsí ndrígóo Jerusalén (Neh. 4:15).

11. Xó má naʼthí náa 1 Tesalonicenses 2:7, 8, xú káʼnii gíʼmaa bi̱ kuya̱ edxu̱u̱ muñewu̱u̱n bi̱ kúwá náa congregación rá.

¹¹ Mbáa bi̱ kuya̱ edxu̱u̱ xúraʼníí xkujndu xóo niraʼnuu Nehemías. Mú ma̱ndoo mbuyaridáá. Xóo muñajunʼ gakhi̱i̱ mu mumbañún a̱ngiu̱ún. Ga̱jma̱a̱ tsékumu̱ún rí guáʼdáá itháan numún ga̱jma̱a̱ ñajunʼ rí kuáʼdáá, rí phú nuni nuñewu̱u̱n ga̱jma̱a̱ ngajua bi̱ kúwá náa congregación (atraxnuu 1 Tesalonicenses 2:7, 8). * Ga̱jma̱a̱ rí xóo nuthúún eʼwíínʼ nusngajma rí nandún kuñún ga̱jma̱a̱ rí ni̱ndxu̱ún xa̱bu̱ guabiinʼ. Mbáa bi̱ ka̱ya̱ edxu̱u̱ má mba̱yu̱u̱ʼ tsiguʼ bi̱ mbiʼyuu Andrew naʼthí: “Na̱jkhánú ndayóo rí a̱ngiu̱lú nundrigú májánʼ ikha índo̱ bi̱ kuya̱ edxu̱u̱ ni̱ndxu̱ún míjínʼ xa̱bu̱ ga̱jma̱a̱ índo̱ nusngajmún rí nandún kuñún, rúʼko̱ nambáñun  rí munimbu̱u̱n rí nuthi bi̱ kuya̱ edxu̱u̱”. Ga̱jma̱a̱ Tony, bi̱ mba̱yu̱u̱ʼ má tsiguʼ nindxu̱u̱ bi̱ kayá edxu̱u̱, naʼthí: “Naniminaʼ manimbánuu xtágabu rí naʼthí náa Filipenses 2:3 ga̱jma̱a̱ naniminaʼ mba̱yo̱o̱ rí eʼwíínʼ guáʼdáá itháán numún ki xóo ikhúúnʼ. Rúʼko̱ nambáyuʼ mu xáni̱ndxu̱ʼ mbáa xa̱bu̱ bi̱ naniguuʼ maxiéjúúnʼ eʼwíínʼ”.

12. Náá numuu rí ndayóoʼ mani̱ndxu̱ún xa̱bu̱ guabiinʼ bi̱ nuyegún edxu̱u̱ rá.

¹² Bi̱ nuyegún edxu̱u̱ gíʼmaa mani̱ndxu̱ún xa̱bu̱ guabiinʼ xóo Jeobá. Maski má nindxu̱u̱ mbáa bi̱ itháan mba̱a̱ náa xúgíʼ tsu̱du̱u̱ ku̱ba̱ʼ, naginduti̱ga̱ mu makuxi̱i̱ ‹náa mbayiʼ bi̱ ngínáa› (Sal. 18:35; 113:6, 7). Ga̱jma̱a̱ tsíyoo gáʼñun bi̱ nunimbaʼumíjna̱ (Prov. 16:5).

13. Náá numuu rí gíʼmaa muñewa̱a̱n rí nuthi bi̱ kuya̱ edxu̱u̱ rá.

¹³ A̱ngiu̱lú bi̱ nuyegún edxu̱u̱ bi̱ nunimbu̱ún kuyáá Jeobá ndayóoʼ muñewa̱a̱n rí nuthi. Á mu tséni, asndu gamíi muriʼñáá raʼkhí mbáa bi̱ tsesngájma gamajkhu náa ikhiin (Gál. 5:14, 15; Sant. 1:26). Andrew, bi̱ niʼthá ga̱jma̱a̱ numuu nákha ginii naʼthí: “Nguáná, nandoʼ xáriʼñun májánʼ mbáa ndxájulú bi̱ naku̱mu̱ʼ rí táʼyamajkhuʼ. Mú rí mandxaʼwáminaʼ xkri̱da ndrígu̱ún xa̱bu̱ bi̱ naʼthí náa Biblia bi̱ niguájun jmbu nimbáyuʼ mba̱yo̱o̱ rí gíʼdoo weñu numuu mani̱ndxu̱ʼ mbáa xa̱bu̱ guabaaʼ ga̱jma̱a̱ bi̱ xákiʼnáa”. Bi̱ kuya̱ edxu̱u̱ nusngajma rí nunimbu̱ún náa Jeobá índo̱ nandún kuñún eʼwíínʼ ma̱ngaa nuthúún ga̱jma̱a̱ ajngáa gua̱ba̱ʼ a̱ngiu̱lú ga̱jma̱a̱ eʼwíínʼ bi̱ kuya̱ edxu̱u̱ (Col. 4:6).

14. Dí ñajunʼ nixnúún xabuanii Jeobá ga̱jma̱a̱ ndiéjunʼ gíʼthúu̱n rí muni xá.

¹⁴ Jeobá nixnúún mbá ñajunʼ kiejunʼ xabuanii bi̱ guáʼdiin e̱ji̱n, rí mbu̱ya̱ edxu̱u̱ náa guʼwún ga̱jma̱a̱ rí musngúún ma̱ngaa rí muxprigún e̱jñún (1 Cor. 11:3; Efes. 6:4). Rígá náa nartumuu ñajunʼ rí guáʼdáá. Gíʼmaa muxnaxi̱i̱ cuenta náa Jeobá, numuu rí xúgínʼ kúwá ga̱jma̱a̱ numuu ikhaa (Efes. 3:14, 15). Xabuanii nusngajma rí nunimbu̱ún náa Dios índo̱ nunimbaníí ñajunʼ rí kajkuáa ñawúúnʼ xó má eyoo Jeobá. Mbaʼa weñu rí ma̱ndoo majmañún rí munigajmaa xkri̱da ndrígóo rey David.

15. Náá numuu dí rey David nindxu̱u̱ mbá májánʼ xkri̱da náa xabuanii rá.

¹⁵ Jeobá nigíiʼ David raʼkháa i̱ndó rí mbayá edxu̱u̱ náa goʼwóo, ma̱ngaa rí maʼtáñajuunʼ náa xuajin Israel. Numuu rí ikhaa ninindxu̱u̱ rey, rígá mbaʼa rí ma̱ndoo maʼni. Mú nguáná niʼni mbá dí raʼkhí kayuuʼ (2 Sam. 11:14, 15). Maski ajndu xúʼko̱, ikhaa nisngájma rí ndiʼyamajkuu Jeobá índo̱ ikhaa niʼdxaun ga̱jma̱a̱ májánʼ rí nixprígúu. Niʼthúu̱n xúgíʼ rí nikumuu  índo̱ niʼtákáñuu ga̱jma̱a̱ ndiyáʼ ikha ndrígóo. (Sal. 51:1-4). Ma̱ngaa, nisngájma rí ninindxu̱u̱ xa̱bu̱ guabaaʼ índo̱ niʼdxaun májánʼ xtágabu rí nixnáá xa̱bekha ga̱jma̱a̱ gu̱ʼu̱ (1 Sam. 19:11, 12; 25:32, 33). Mbaʼa rí nijmañuu náa nijngawa̱a̱n, nda̱wa̱á nigíminaʼ maʼni ñajuunʼ Jeobá.

16. Ndiéjunʼ gándoo gajmañún xabuanii náa xkri̱da ndrígóo rey David rá.

¹⁶ Guʼyáá tikhu ikha rí ma̱ndoo majmañala xabuanii, náa xkri̱da ndrígóo rey David. Xánújngurámala ga̱jma̱a̱ ñajunʼ dí Jeobá nirajkuáa ñawánla. Gu̱ya̱a̱ rí mangáanʼ najngawáanʼla ga̱jma̱a̱ gundrígú ga̱jma̱a̱ májánʼ xtágabu rí na̱ʼkha̱ náa Biblia rí nuxnala. A mu nuni, guʼyalaʼ ga̱jma̱a̱ e̱jña̱la mbuyamajkuala numuu rí nindxa̱la xa̱bu̱ guabaaʼ. Ma̱ngaa, índo̱ nutajkáan gajmiála, gutha̱a̱n xúgíʼ Jeobá rí nakumalaʼ. Mu xúʼko̱ mbuyáá rí gíʼdoo wéñuʼ numuu makumu̱ún kuyáá Jeobá. Ga̱jma̱a̱, guʼgíjmína̱ rí muni̱ káxi̱ ñajuunʼ Dios (Deut. 6:6-9). Rí májánʼ xkri̱da ndrígála nindxu̱u̱ mbá rí mitsaanʼ wéñuʼ rí muxnunla bi̱ kúwi̱i̱n náa guʼwálaʼ.

17. Dí ñajunʼ nirajkuáa ñawúúnʼ gu̱ʼú wanii Jeobá rí muni rá.

¹⁷ Jeobá nirajkuáa mbá ñajunʼ rí gíʼdoo weñu numuu náa ñawúúnʼ gu̱ʼú wanii mu muni náa mbá guʼwi̱i̱n, rí ma̱ndoo mutañajúúnʼ mangiin e̱jñún (Prov. 6:20). Xóo gúni mba̱ji̱i̱n ejñúnʼ, rúʼko̱ gáʼni rí e̱ji̱n xámbu̱múún xóo nigajiin (Prov. 22:6). Guʼyáá ndiéjunʼ gándoo gajmañún gu̱ʼú wanii náa xkri̱da ndrígóo María, ru̱dúu̱ Jesús.

18, 19. Ndiéjunʼ gándoo gajmañún gu̱ʼú wanii xkri̱da ndrígóo María rá.

¹⁸ María nininuuʼ májánʼ Escrituras. Ra̱ʼkhá tháán ndiʼyamajkuu Jeobá ma̱ngaa nimbáxu̱u̱ májánʼ ga̱jma̱a̱. Ikhaa nixnáximinaʼ maʼnimbo̱o̱ kaʼyoo maski ajndu rúʼko̱ gáʼni rí mariʼkhu̱u̱ mbá kayuuʼ xóo maxtáa (Luc. 1:35-38, 46-55).

¹⁹ Guʼyáá tikhuu ikha rí ikháanʼla gu̱ʼú wanii ma̱ndoo majmañala náa xkri̱da ndrígóo María. Timbá, gunigajmaa Biblia ga̱jma̱a̱ gutajkáan ndajkuáanʼ mu mambáxala má xúʼko̱ gajmiála Jeobá. Rí maʼni a̱jma̱, a mu ndayóoʼ guriʼkhuíí xóo kuwáanʼ mu xúʼko̱ muni̱ rí maʼdxuu Dios. Mbá xkri̱da, nguáná xabuanii nakiʼníin mbá nacha̱ ga̱jma̱a̱ nuthúún mijkoo e̱jñún. Mbáa ikháanʼ ndijáanʼla xúʼko̱ kaʼnii ga̱jma̱a̱ nakumala dí xúʼko̱ ma̱ndoo muni mba̱ji̱i̱n e̱jña̱la mangáanʼ. Mbáa asndu nda̱wa̱á rí nijmañala xóo naniguuʼ Jeobá rí muni mba̱ji̱i̱n e̱jña̱la, mbáa naʼniala mingíjyúuʼ rí xákiʼnáanʼ ga̱jma̱a̱ rí maʼngo̱o̱ a̱jkia̱la, itháan índo̱ néʼnga̱la ga̱jma̱a̱ índo̱ ikhiin tsénimbu̱u̱n (Efes. 4:31). Índo̱ narígá rígi̱, itháan gáʼyóoʼ rí munda̱ʼa̱ Jeobá. Mbáa a̱ʼgu̱ bi̱ mbiʼyuu Lydia naʼthí: “Nguáná, ndayóoʼ rí matajkáan wéñuʼ mu  xáthúu̱n mijkoo a̱ʼdióʼ índo̱ tséʼnimbo̱o̱. Asndu ndiyóoʼ maniʼñuuʼ dí xtáá ra̱ta̱ mu ma̱ndo̱ʼo̱o̱ mañúú Jeobá rí mambáyuʼ. Númaa ma rí nitajkháan, nimbáyuʼ mu xákiʼnún nacha̱” (Sal. 37:5).

20. Ndiéjunʼ nindxu̱u̱ xkujndu rí nuraʼníí tikhun gu̱ʼú wanii rá.

²⁰ Mú tikhun gu̱ʼú wanii nuraʼníí i̱ʼwáʼ xkujndu, ga̱jma̱a̱ naʼniún mingíjyúuʼ musngajmúún e̱jñún rí nandún kuñún (Tito 2:3, 4). Rígi̱ narígá numuu rí nákha majkhiinʼ aniúún túsngajmúún rí nandún kuñún. Mú ikhiin ragíʼmaa muni ikháá má gajmiún e̱jñún. Gu̱ʼú wanii bi̱ nunimbu̱ún kuyáá Jeobá, ndayóoʼ musngajmúún e̱jñún rí nandún kuñún. Gajkhun má rí naʼniún mingíjyúuʼ muriʼkui̱i̱ xóo endxa̱ʼwa̱a̱ edxu̱ún, xóo nakumu̱ún ga̱jma̱a̱ xóo nuni, mú ma̱ndoo muriʼkhumijná. Á nuni makuwá gagi gajmiún bi̱ kúwá náa guʼwún.

21, 22. Xó má naʼthí náa Isaías 65:13, 14, ndiéjunʼ embáyulú rí muʼnimbulúʼ kuʼyáá Jeobá rá.

²¹ Rey David ndiʼyoo dí ra̱ʼkhá tháán nimbáyúu rí maʼnimbo̱o̱ kaʼyoo Jeobá. Ikhaa niʼnirámáʼ: “Rí naʼtáñajunʼ Jeobá nindxu̱u̱ jmbu wéñuʼ, naʼni rí maʼdxuu a̱jkiu̱lú; rí naʼtáñajunʼ Jeobá nindxu̱u̱ mikaʼwu wéñuʼ, naʼni maxpíbi̱ʼ idulú”. Ga̱jma̱a̱ niʼthí xóó: “Ma̱ngaa, naʼthúu̱n xa̱bia̱ʼ ndiéjunʼ ñajunʼ rí gíʼmaa maʼni; á mu naʼnimbánuu magruigú rí májánʼ wéñuʼ” (Sal. 19:8, 11). Rí mbiʼi xúgi̱, nakujmiin mixtiʼkuiin bi̱ nunimbu̱u̱n kuyáá Jeobá ga̱jma̱a̱ bi̱ nunigaʼduunʼ ikha ndrígóo. Bi̱ nunimbu̱u̱n kuyáá Dios nakúwá itháan gagi “ga̱jma̱a̱ rí májánʼ a̱jkiu̱ún” (atraxnuu Isaías 65:13, 14). *

²² Índo̱ bi̱ kuya̱ edxu̱u̱, xa̱bu̱ wanii ga̱jma̱a̱ gu̱ʼú wanii nunimbu̱u̱n kuyáá Jeobá, nakúwá itháan májánʼ, bi̱ kúwi̱i̱n náa guʼwún nakúwi̱i̱n itháan gagi ma̱ngaa bi̱ kúwá náa congregación nakúwá mbá kambájxu̱u̱n. Mú rí nuni rí maxtáa gagi Jeobá rúʼko̱ rí itháan gíʼdoo numuu (Prov. 27:11).