1. Arathá xú káʼnii nixtáa apóstol Juan índo̱ na̱jkha̱ rámbáa siglo timbá.

ÍNDO̱ na̱jkha̱ rámbáa siglo timbá, apóstol Juan xtáa ranújngoo mbiʼi mingíjyúuʼ. Nikhi̱i̱ má, ga̱jma̱a̱ kraʼaa náa guʼwá e̱jua̱nʼ, náa mbaaʼ rí gíwanʼ náa tapo̱o̱ iyaʼ rí mbiʼyuu Patmos, mbáa imbawíí má xóó ikhaa xtáa rí nindxu̱u̱ apostol (Rev. 1:9). Ndiʼyoo rí xa̱bu̱ bi̱ tsíñún gúyáá rí gajkhun kúwá runi nduwiinʼ xa̱bi̱i̱ Dios ga̱jma̱a̱ nuni rí murkuajimíjná. Mbáa asndu nakujmaa rí na̱jkha̱ raguámbíin xa̱bi̱i̱ Dios (Jud. 4; Rev. 2:15, 20; 3:1, 17).

2. Xó má naʼthí náa Revelación 7:9-14, xú káʼnii visión rí mitsaanʼ weñu ndiʼyoo Juan rá. (Atayáá xtiʼkhuu rí na̱ʼkha̱ náa timbá ináa).

² Náa mbiʼi mingíjyúuʼ rígi̱, Juan ndiʼyoo mbá visión rí mitsaanʼ wéñuʼ. Ikhí ndiʼyoo rí nguéjmi̱i̱n ángeles nindrigú awan rí murikháá giñán mbiʼ ndrígóo majphú mba̱a̱ gaʼkhu asndu índo̱ gúda̱a̱ sello ndrígu̱ún bi̱ nguéjmi̱i̱n ñumbáá (Rev. 7:1-3). Ikhiin ni̱ndxu̱ún bi̱ 144,000 cristianos bi̱ mutañajunʼ gajmiún Jesús náa mekhuíí (Luc. 12:32; Rev. 7:4). Nda̱wa̱á, Juan niʼthí ga̱jma̱a̱ numún eʼwíínʼ xa̱bu̱ bi̱ phú mbaʼin wéñuʼ rí asndu niʼthí “¡gu̱ya̱a̱!”. Mbáa ga̱jma̱a̱ ajngáa rúʼko̱ nasngájmaa rí asndu niʼñuu tsiánguá rí ndiʼyoo mbá rí tágiʼthu̱u̱n mbaʼyoo. Tsíín ni̱ndxu̱ún rá. Ikhiin ni̱ndxu̱ún bi̱ “ra̱ʼkhá tháán mbaʼin xa̱bu̱, dí asndu nimbáa xa̱bu̱ tséʼngo̱o̱ gáguxnuu, bi̱ naguwáʼ náa xúgíʼ xuajen mba̱ʼu̱, xuajen majkhaʼ ga̱jma̱a̱ náa xúgíʼ ajngáa, guájun náa inuu trono ga̱jma̱a̱  náa inuu Aʼdá múgú” (atraxnuu Revelación 7:9-14). * Ra̱ʼkhá tháán nixtáa gagi índo̱ ndiʼyoo rí makuwá mbaʼin weñu xa̱bu̱ mu mbuyamajkuíí Jeobá.

3. a) Náá numuu rí ndayóoʼ maʼni gújkhuʼ fe ndrígúlú ga̱jma̱a̱ numuu visión rí ndiʼyoo Juan rá. b) Dí gajmañulú náa artículo rígi̱ rá.

³ Gajkhun rí visión rígi̱ niʼni rí maʼni gújkhuʼ fe ndrígóo Juan. Mú itháán ndayóoʼ maʼni gújkhuʼ fe ndrígúlú ikháanʼ, numuu dí xúgíʼ rí ndiʼyoo xtáa rambánuu rí mbiʼi xúgi̱. Nduʼyáálú gajkhun rí mbaʼin weñu xa̱bu̱ natu̱ʼu̱u̱n náa xuajñuu Dios bi̱ guáʼthi̱i̱n rí makáwíin náa majphú mba̱a̱ gaʼkhu ga̱jma̱a̱ makuwá kámuu mbiʼi náa tsu̱du̱u̱ ku̱ba̱ʼ. Náa artículo rígi̱, mbuʼyáá xú káʼnii Jeobá nisngájma náa xuajñuu rí naʼni má itháán rí a̱jkhu̱ skiñúʼ tsiguʼ rí niʼthún tsíín ni̱ndxu̱ún bi̱ ra̱ʼkhá tháán mbaʼin xa̱bu̱. Ma̱ngaa mbuʼyáá a̱jma̱ enii xóo ni̱ndxu̱ún xa̱bu̱ bugi̱: 1) Nguáthi̱i̱n ga̱jma̱a̱ 2) mixtiʼkuiin. Rígi̱ naʼni gújkhuʼ fe ndrígu̱ún bi̱ guáʼthi̱i̱n mani̱ndxu̱ún xa̱bu̱ bugi̱.

4. Ndiéjunʼ rí tsíkru̱ʼu̱u̱n religión bi̱ nuthíí rí ni̱ndxu̱ún cristianos ga̱jma̱a̱ ndiéjunʼ nijmañún bi̱ nunigajmaa Biblia rá.

⁴ Religión rí minduwaʼ tsésngáa rí naʼthí náa Biblia rí xa̱bu̱ bi̱ nunimbu̱ún makuwá kámuu náa tsu̱du̱u̱ ku̱ba̱ʼ (2 Cor. 4:3, 4). Rí mbiʼi xúgi̱, mbaʼa religión nuthi rí ni̱ndxu̱ún cristiano ga̱jma̱a̱ nusngáa rí xúgínʼ bi̱ nuni rí májánʼ nagúun mekhuíí índo̱ nakháñun. Mú, índo̱ niʼni siglo diecinueve, mbá nguéjmi̱i̱n cristianos bi̱ nunigajmaa Biblia nixnaraʼa revista rí xúgi̱ nagumbiʼyuu Bi̱ Nayejngoo ndiyáá rí mixtiʼkhu nindxu̱u̱. Ndiʼyáá rí Dios maʼni̱i̱ mbá ku̱ba̱ʼ mitsaanʼ ga̱jma̱a̱ rí phú mbaʼin wéñuʼ xa̱bu̱ bi̱ nunimbu̱ún makuwá náa tsu̱du̱u̱ ku̱ba̱ʼ gi̱i̱, raʼkháa náa mekhuíí. Maski ajndu xúʼko̱, ndijyúuʼ mu makru̱ʼu̱u̱n májánʼ tsíín gánindxu̱ún xa̱bu̱ buʼko̱ (Mat. 6:10).

5. Ndiéjunʼ rí nikumu̱ún bi̱ nunigajmaa Biblia ga̱jma̱a̱ numún bi̱ 144,000 rá.

⁵ Bi̱ nunigajmaa Biblia ma̱ngaa nikru̱ʼu̱u̱n rí ikhí nasngáa rí tikhun ‹majuiʼtsi̱i̱n náa ku̱ba̱ʼ› mu mutañajunʼ gajmiún Jesús náa mekhuíí (Rev. 14:3). ikhiin mani̱ndxu̱ún mbá 144,000 cristianos bi̱ nixnaximi̱jna̱ ga̱jma̱a̱ gagi mu muni ñajuunʼ Dios náa tsu̱du̱u̱ ku̱ba̱ʼ. Mú, tsíín gánindxu̱ún bi̱ ra̱ʼkhá tháán mbaʼin xa̱bu̱ rá.

6. Ndiéjunʼ rí nikumu̱ún bi̱ nunigajmaa Biblia ga̱jma̱a̱ numún bi̱ ra̱ʼkhá tháán mbaʼin xa̱bu̱ rá.

⁶ Juan ndiʼñún bi̱ “guájun náa inuu trono ga̱jma̱a̱ náa inuu Aʼdá múgú” (Rev. 7:9). Ga̱jma̱a̱ numuu ajngáa rúʼko̱, bi̱ nunigajmaa Biblia nikru̱ʼu̱u̱n rí bi̱ ra̱ʼkhá tháán mbaʼin xa̱bu̱ makuwíin mekhuíí xó má bi̱ 144,000. Á mu a̱jma̱ enii xa̱bu̱ bugi̱ makuwíin mekhuíí, náá rí naʼni mixtiʼkuiin xá. Mú bi̱ nunigajmaa Biblia nikru̱ʼu̱u̱n rí bi̱ ra̱ʼkhá tháán mbaʼin xa̱bu̱ ni̱ndxu̱ún cristianos bi̱ na̱nguá ninimbu̱u̱n kuyáá kájxi̱ Dios índo̱ nikúwá náa tsu̱du̱u̱ ku̱ba̱ʼ. Maski ajndu tikhun túnimbu̱ún kájxi̱ kayuuʼ, mbáa tikhun nigún má xúʼko̱ náa nusngáa rí minduwaʼ. Rí ni̱jkha̱nú nikru̱ʼu̱u̱n bi̱ nunigajmaa Biblia nindxu̱u̱ rí xa̱bu̱ buʼko̱ na̱nguá kaʼñún mutañajuunʼ gajmiún Jesús. Ga̱jma̱a̱ numuu rí nánguá nindúún kuyáá wéñuʼ Dios, ikha jngó makuwíin náa mekhuíí náa inuu trono, mú xátrigi̱i̱n ikhí.

7. a) Xóo rí nikru̱ʼu̱u̱n bi̱ ninigajmaa Biblia, tsíín gákúwá náa tsu̱du̱u̱ ku̱ba̱ʼ índo̱ gáʼni mbá míí tsiguʼ rá. b) Ndiéjunʼ rí nikumu̱ún ga̱jma̱a̱ numún xa̱bu̱ bi̱ niguájun jmbu nákha wajyúúʼ xá.

⁷ Mú, tsíín gákuwiin náa tsu̱du̱u̱ ku̱ba̱ʼ rá.  Xóo rí nikumu̱ún bi̱ nunigajmaa Biblia, nda̱wa̱á rí bi̱ 144,000 gajmiún bi̱ ra̱ʼkhá tháán mbaʼin xa̱bu̱ gágun mekhuíí, makuwá má eʼwíínʼ xa̱bu̱ bi̱ mbaʼin mangiin mu makuwá náa tsu̱du̱u̱ ku̱ba̱ʼ ga̱jma̱a̱ maguma tsajkurámiinʼ índo̱ gáʼtañajunʼ Cristo mbá míí tsiguʼ. Na̱nguá nikumu̱ún rí xa̱bu̱ buʼko̱ muni ñajuunʼ Jeobá nákha xóó tsígi̱ʼdu̱u̱ rí maʼtáñajuunʼ, ikhiin nikumu̱ún rí musngúún ikha ndrígóo Jeobá índo̱ gáʼni rí mbá míí tsiguʼ. Nda̱wa̱á, bi̱ gúni rí nandoo Dios, ikhiin makhánun rí makuwíin kámuu mbiʼi náa tsu̱du̱u̱ ku̱ba̱ʼ, mú mambíin bi̱ tsénimbu̱ún. Mú bi̱ gánindxu̱ún “príncipes” mbiʼi rúʼko̱, ga̱jma̱a̱ bi̱ “kaʼñúnʼ má nakha wajyúúʼ” bi̱ nigabi̱ín xóo (xa̱bu̱ bi̱ niguájun jmbu bi̱ nikháñun nakha xóo tséʼkha̱ Cristo), bi̱ ninigajmaa Biblia nikru̱ʼu̱u̱n rí mbá tikhun rí ikhiin mundrígú mu makuwíin náa mekhuíí nda̱wa̱á rí gájngoo mbá míí tsiguʼ (Sal. 45:16).

8. Xú káʼnii ajtsú enii xa̱bu̱ kúwá nikumu̱ún bi̱ nunigajmaa Biblia rá.

⁸ Ikha jngó bi̱ nunigajmaa Biblia nikumu̱ún dí nikúwi̱i̱n mbá ajtsú enii xa̱bu̱: 1) Bi̱ 144,000, mutañajunʼ gajmiún Jesús náa mekhuíí; 2) ma̱ngaa bi̱ ra̱ʼkhá tháán mbaʼin xa̱bu̱ bi̱ na̱nguá nini kájxi̱ ñajuunʼ Dios muguajún náa inuu trono ga̱jma̱a̱ náa inuu Aʼdá múgú náa mekhuíí, ga̱jma̱a̱ 3) makuwá eʼwíínʼ xa̱bu̱ bi̱ mbaʼin mangiin mu majmañún ikha ndrígóo Jeobá náa tsu̱du̱u̱ Ku̱ba̱ʼ índo̱ Gáʼtañajunʼ mbá Míí Tsiguʼ Cristo. * Mú índo̱ Jeobá ndiʼyoo rígi̱, ikhú niʼni rí makujmaa itháan kaʼwu ga̱jma̱a̱ numuu rígi̱ náa xa̱bi̱i̱ (Prov. 4:18).

9. a) Xú káʼnii gándoo gákuwá náa “inuu trono ga̱jma̱a̱ náa inuu Aʼdá múgú” xa̱bu̱ bi̱ ra̱ʼkhá tháán mbaʼin wéñuʼ, á mu náa tsu̱du̱u̱ Ku̱ba̱ʼ kúwá xá. b) Ndiéjunʼ rí nisngájma kaʼwu rí naʼthí náa Revelación 7:9 rá.

⁹ Nákha tsiguʼ 1935, xa̱bi̱i̱ Jeobá nikru̱ʼu̱u̱n májánʼ tsíín ni̱ndxu̱ún bi̱ ra̱ʼkhá tháán mbaʼin xa̱bu̱ bi̱ ndiʼñún Juan náa mbá visión. Ndiyáá rí xa̱bu̱ bugi̱ na̱nguá má eyóoʼ makuwá mekhuíí mu maguajún náa “inuu trono ga̱jma̱a̱ náa inuu Aʼdá múgú” ga̱jma̱a̱ dí ajngáa rígi̱ nindxu̱u̱ mbá rí nandoo gáʼthúu̱n. Maski ajndu bi̱ ra̱ʼkhá tháán mbaʼin xa̱bu̱ makuwa náa tsu̱du̱u̱ Ku̱ba̱ʼ, makuwa náa “inuu trono”, nduyáá rí Jeobá naʼtáñajuunʼ ga̱jma̱a̱ nunimbu̱ún kuyáá (Is. 66:1). Ga̱jma̱a̱ kúwá náa “inuu Aʼdá múgú” á mu naguaʼdáá fe náa nikháñuu Jesús. Ma̱ngaa nuxkamaa mbá rí nambriguii ga̱jma̱a̱ náa Mateo 25:31, 32. Ikhí naʼthí rí “xúgíinʼ xa̱bu̱ xuajen”, asndu bi̱ nuni dí raʼkhí, “magimbíin náa inuu” Jesús ga̱jma̱a̱ náa trono ndrígóo. Nakujmaa kaʼwu rí xúgíʼ xuajen rígi̱ rígá náa tsu̱du̱u̱ ku̱ba̱ʼ raʼkháa náa mekhuíí. Rí nijuiʼthá nakha tsiguʼ 1935 nasngájma kaʼwu náá numuu rí náa Biblia tséʼthi rí bi̱ ra̱ʼkhá tháán mbaʼin xa̱bu̱ magúu̱n mekhuíí. Ma̱ngaa i̱ndó bi̱ magúu̱n mekhuíí ni̱ndxu̱ún bi̱ 144,000 bi̱ “mutañajunʼ náa tsu̱du̱u̱ ku̱ba̱ʼ” gajmiún Jesús (Rev. 5:10).

10. Náá numuu rí gíʼmaa muniʼnuuʼ májánʼ ikha ndrígóo Jeobá bi̱ ra̱ʼkhá tháán mbaʼin xa̱bu̱ nákha xóó tséʼni mbá Míí tsiguʼ rá.

¹⁰ Asndu nákha tsiguʼ 1935, Bi̱ nutaraʼa numuu Jeobá nakru̱ʼu̱lú rí bi̱ ra̱ʼkhá tháán mbaʼin xa̱bu̱ bi̱ ndiʼñún Juan náa visión ikhiin ni̱ndxu̱ún cristianos bi̱ naguáju̱n jmbu ga̱jma̱a̱ naguaʼti̱i̱n makuwíin kámuu mbiʼi náa tsu̱du̱u̱ Ku̱ba̱ʼ. Mu makáwíin náa majphú mba̱a̱ gaʼkhu ga̱jma̱a̱ ‹náa xúgíʼ rígi̱ rí wíji̱ marigá›, cristianos bugi̱ ndayóoʼ muniʼnuuʼ ikha ndrígóo Jeobá ga̱jma̱a̱ musngajma rí kuáʼdáá mbá fe gújkhuʼ nákha xóó Tséʼtañajunʼ mbá Míí Tsiguʼ Cristo (Luc. 21:34-36).

11. Náá numuu rí tikhuun bi̱ Ninigajmaa Biblia nikumu̱ún rí makuwá tikhuun bi̱ magúu̱n mekhuíí nda̱wa̱á rí gájngoo mbá Míí tsiguʼ rá.

¹¹ Xó má ndiʼyáá náa kutriga̱ 7, tikhuun bi̱ Nunigajmaa Biblia nikumu̱ún rí makuwá tikhuun bi̱ magúu̱n mekhuíí nda̱wa̱á rí gájngoo mbá Míí tsiguʼ. Náá numuu rí nikumu̱ún xúʼko̱ xá. Numuu dí rúʼko̱ niʼthí náa mbá revista rí nigájnuu 15 ñajunʼ gu̱nʼ febrero tsiguʼ 1913 rí mbiʼi  xúgi̱ najmaʼnuuʼ xóo Bi̱ Nayejngoo. Tikhuun nindxa̱ʼwa̱míjna̱ rígi̱: Á mu dí cristianos bi̱ na̱nguá nini kájxi̱ ñajuunʼ Dios magúu̱n mekhuíí, náá numuu rí xa̱bu̱ bi̱ niguájun jmbu nákha wajyúúʼ i̱ndó mundrígúu rí makuwá náa tsu̱du̱u̱ ku̱ba̱ʼ rá. Xúʼko̱ nindxa̱ʼwa̱míjna̱ numuu rí nikumu̱ún a̱jma̱ enii dí raʼkhí rígi̱: 1) Bi̱ ra̱ʼkhá tháán mbaʼin xa̱bu̱ makuwá mekhuíí ga̱jma̱a̱ 2) náa ikhiin makuwá bi̱ na̱nguá nini kájxi̱ ñajuunʼ Dios.

12, 13. Ndiéjunʼ rí naguánu nduyáá bi̱ kaxtaʼwíin gajmiún bi̱ ra̱ʼkhá tháán mbaʼin xa̱bu̱ ga̱jma̱a̱ numuu rí mundrígúu rá.

¹² Xó má ndiʼyáá, asndu nákha tsiguʼ 1935 Bi̱ nutaraʼa numuu Jeobá nakru̱ʼu̱lú májánʼ rí bi̱ gákhawíin náa Armagedón ni̱ndxu̱ún bi̱ ra̱ʼkhá tháán mbaʼin xa̱bu̱ bi̱ ndiʼñún Juan náa mbá visión. Bi̱ Magajníin náa “majphú mba̱a̱ ga̱ʼkhu̱” náa tsu̱du̱u̱ Ku̱ba̱ʼ gi̱i̱ ga̱jma̱a̱ muxnáá mbá aʼwá gákhii: “Náa Dios gíʼmáanʼ rí niguma káwáanʼ, bi̱ gíiʼ náa trono ga̱jma̱a̱ Aʼdá múgú” (Rev. 7:10, 14). Ma̱ngaa náa Biblia naʼsngáa rí xa̱bu̱ bi̱ magabiín náa mekhuíí mundrígú ‹mbá rí itháán májánʼ› ki xóo bi̱ niguájun jmbu nákha wajyúuʼ (Heb. 11:40). Rí nijuiʼtájuíi nuxi̱ʼ rígi̱ nixkajxi̱i̱n a̱ngiu̱lú mugi̱ʼdi̱i̱ muthún xa̱bu̱ rí muni ñajuunʼ Jeobá mu ma̱ndoo makuwíin kámuu mbiʼi nda̱wa̱á náa tsu̱du̱u̱ Ku̱ba̱ʼ.

¹³ Rí kuáʼti̱i̱n bi̱ ra̱ʼkhá tháán mbaʼin xa̱bu̱ naʼni rí makuwíin gagi. Nakru̱ʼu̱u̱n rí Jeobá nindxu̱u̱ bi̱ gáraʼwíin xa̱bi̱i̱ bi̱ guájun jmbu, á mu kaʼñún makuwíin mekhuíí o náa tsu̱du̱u̱ Ku̱ba̱ʼ. Xó má bi̱ kaxtaʼwíin gajmiún bi̱ ra̱ʼkhá tháán mbaʼin xa̱bu̱ naguánu nduyáá rí mundrígúu nindxu̱u̱ ga̱jma̱a̱ numuu rí májánʼ a̱jkiu̱nʼ Jeobá rí naxnún mbá dí rakáʼñún ga̱jma̱a̱ numuu rí nikunguanʼ Jesucristo mú maʼtsiwáanʼlú (Rom. 3:24).

14. Nda̱wa̱á rí tsiguʼ 1935 náá numuu rí mbaʼin niraximíjná xóo gambánuu rí nijuiʼtáriyaʼ ga̱jma̱a̱ numún bi̱ ra̱ʼkhá tháán mbaʼin xa̱bu̱ rá.

¹⁴ Nda̱wa̱á rí niguánu ndiyáá rí gajkhun ga̱jma̱a̱ numún bi̱ ra̱ʼkhá tháán mbaʼin xa̱bu̱ nákha tsiguʼ 1935, mbaʼin niraximíjna̱ xú káʼnii gáʼganú maʼni mbaʼin wéñuʼ cristianos bi̱ makuwíin náa tsu̱du̱u̱ Ku̱ba̱ʼ. Mbá xkri̱da, nákha 1935 Ronald Parkin nigiʼdoo 12 tsiguuʼ ikhaa nirmáʼáan a̱jkiu̱u̱n: “Dí nákha ikhú nikúwá mbá 56,000 publicadores náa xúgíʼ numbaaʼ ga̱jma̱a̱ mbaʼin rí ikhiin ninindxu̱ún bi̱ kaxtaʼwíin. Ikha jngó bi̱ ra̱ʼkhá tháán mbaʼin xa̱bu̱ nákha ikhú nikujmaa dí nguéjmi̱i̱n”.

15. Arathá xú káʼnii ni̱jkha̱ raʼni mbaʼin bi̱ ra̱ʼkhá tháán mbaʼin xa̱bu̱.

¹⁵ Mú nda̱wa̱á rí ninújngoo mbá gu̱wa̱ʼ tsiguʼ nixuʼmiin misioneros náa mbaʼa xuajen, ga̱jma̱a̱ na̱jkha̱ raʼni mbaʼin má xúʼko̱ Bi̱ nutaraʼa numuu Jeobá. Nákha tsiguʼ 1968, nigi̱ʼi̱ mbá awáanʼ rí musngáa ga̱jma̱a̱ numuu Biblia ga̱jma̱a̱ libro rí nigu mbiʼyuu La verdad que lleva a vida eterna. Ga̱jma̱a̱ numuu rí libro rígi̱ ramiʼsko̱o̱ eʼtajuíi rí naʼsngáa náa Biblia niʼni rí mbaʼin wéñuʼ xa̱bu̱ maniguunʼ munigajmaa. Káaʼ a̱jkhu̱ tsiguʼ niʼni rí  nijngúun iyááʼ itháan rí mbá tapha millón xa̱bu̱. Ga̱jma̱a̱ mbaʼa millón xa̱bu̱ nijngún iyááʼ índo̱ guʼwá ndxájkun ni̱jkha̱ randáti̱go̱o̱ tsiakii rí gíʼdoo náa América Latina ga̱jma̱a̱ náa eʼwáʼ xuajen mba̱ʼu̱, ga̱jma̱a̱ índo̱ nánguá niniñuʼ a̱ngiu̱lú mutaraʼa náa Europa oriental ga̱jma̱a̱ náa África (Is. 60:22). Xíjkhóó, xuajñuu Jeobá niguwíi mbaʼa wéñuʼ rí ma̱ndoo mambáñún xa̱bu̱ mú makru̱ʼu̱u̱n itháán májánʼ rí naʼthí náa Biblia. Gajkhun dí ra̱ʼkhá tháán mbaʼin xa̱bu̱, rí mbiʼi xúgi̱ kúwá itháan rí mbá ocho millón.

16. Náá eguwáʼ bi̱ ra̱ʼkhá tháán mbaʼin xa̱bu̱ rá.

¹⁶ Náa visión rí Juan ndiʼñún bi̱ ra̱ʼkhá tháán mbaʼin xa̱bu̱ maguwáʼ náa “xúgíʼ xuajen mba̱ʼu̱, xuajen majkhaʼ ga̱jma̱a̱ náa xúgíʼ ajngáa”. Nandoo gáyáa ga̱jma̱a̱ rí niʼtáriyaʼ gaʼyee Zacarías. Ikhaa niʼnirámáʼ: ‹Mbiʼi rúʼko̱ makuwíin mbá gu̱wi̱nʼ xa̱bekha bi̱ nuthi xúgíʼ ajngáa náa xuajin mba̱ʼu̱, ikhú murajtuun, xúʼko̱ murajtuun xa̱ʼ jnáwu̱u̱n mbáa xa̱biya̱ bi̱ nindxu̱u̱ judío ga̱jma̱a̱ muthi: “Nanduxu muʼguá ga̱jma̱á nindxa̱laʼ, numuu rí nidxáwinxu rí Dios xtáa gajmiála›” (Zac. 8:23).

17. Ndiéjunʼ rí narígá mu mixtambáñuun xa̱bu̱ náa xúgíʼ xuajen ga̱jma̱a̱ náa mixtiʼkhu ajngáa rá.

¹⁷ Bi̱ nuʼtáraʼa numuu Jeobá nduʼyáálú, mu ma̱ndoo mbuwi̱i̱n xa̱bu̱ bi̱ nuthi xúgíʼ ajngáa, ndayóoʼ muʼtáruʼun xúgínʼ xa̱bu̱ buʼko̱ ga̱jma̱a̱ ajngáa rí májánʼ. Ikha jngó naʼni má mbá ciento treinta tsiguʼ rí nuʼtájuii i̱yi̱i̱ʼ rí nagájnuu náa Biblia.  Rí xúgíʼ najuiʼtájuíi itháan iyulú ki xóo eʼwáʼ i̱yi̱i̱ʼ, nuʼtájuii náa mbaʼa wéñuʼ ajngáa. Nakujmaa kaʼwu rí Jeobá rí mbiʼi xúgi̱ xtáa raʼni mbá milagro: Nagímbíin bi̱ ra̱ʼkhá tháán mbaʼin xa̱bu̱ náa xúgíʼ xuajen. Numuu dí rígá i̱yi̱i̱ʼ náa mbaʼa wéñuʼ ajngáa, xa̱bu̱ bi̱ mixtiʼkuiin bugi̱ nuni ñajuunʼ Jeobá mbá kambájxu̱u̱n. Ga̱jma̱a̱ najmaʼnunʼ numuu rí nutaraʼa ga̱jma̱a̱ gagi ma̱ngaa rí nandún kuyamijná. Lá ragájkhun dí rígi̱ naʼni itháán gújkhuʼ fe ndrígúlú ráʼ. (Mat. 24:14; Juan 13:35).

18. a) Xó má naʼthí náa Isaías 46:10, 11, náá numuu rí tséʼniulú tsiánguá rí Jeobá niʼnimbánuu rí kiʼtáriyaʼ ga̱jma̱a̱ numún bi̱ ra̱ʼkhá tháán mbaʼin xa̱bu̱ rá. b) Náá numuu rí tsékumu̱ún dí raguáʼdáá numún bi̱ guáthi̱i̱n makuwíin náa tsu̱du̱u̱ ku̱ba̱ʼ rá.

¹⁸ Kuáʼdáá mbaʼa numuu rí naʼni muʼnimbulúʼ dí naʼthí náa kiʼtáriyaʼ rígi̱. Ikha jngó tséʼniulú tsiánguá rí Jeobá ninimbánuu xúʼko̱ káʼnii (atraxnuu Isaías 46:10, 11). * Bi̱ kaʼñún náa bi̱ ra̱ʼkhá tháán mbaʼin xa̱bu̱ nuxnáa núma̱aʼ Dios ga̱jma̱a̱ numuu rí guáʼthi̱i̱n nda̱wa̱á. Na̱nguá eku̱mu̱ún dí raguáʼdáá numún, ga̱jma̱a̱ numuu rí táxtaʼwíin mú magúun mekhuíí mutañajuunʼ gajmiún Jesús. Náa Biblia naʼthí ga̱jma̱a̱ numún xa̱bu̱ ma̱ngaa gu̱ʼu̱ bi̱ niguájun jmbu bi̱ nixnúún ikha xi̱ʼ kaʼwu, mú na̱nguá nindxúu̱n bi̱ 144,000, xóo Juan bi̱ nakumíínʼ iyááʼ xa̱bu̱ ga̱jma̱a̱ David (Mat. 11:11; Hech. 2:34). Ikhiin gajmiún eʼwíínʼ matujxi̱ín náa ku̱ba̱ʼ mitsaanʼ. Xúgínʼ ikhiin ga̱jma̱a̱ bi̱ ra̱ʼkhá tháán mbaʼin ma̱ndoo makuwíin jmbu náa Jeobá ga̱jma̱a̱ náa maʼtáñajuunʼ.

19. Á mu dí nakru̱ʼu̱lú visión náa nikujmiin phú mbaʼin xa̱bu̱, ndiéjunʼ gúʼni rá.

¹⁹ Jeobá nakha ginii nimbá miʼtsú táruwiin mbaʼin wéñuʼ xa̱bu̱ náa mbaʼa xuajen mu mbuyamajkuíí. Tséʼniuu á mu muʼguaaʼ mekhuíí o makuwáanʼ náa tsu̱du̱u̱ ku̱ba̱ʼ, ndayóoʼ mumbáñún mbaʼin xa̱bu̱ asndu xó má engo̱o̱ mu mani̱ndxu̱ún bi̱ ra̱ʼkhá tháán mbaʼin xa̱bu̱ o bi̱ ‹eʼwíínʼ mugu̱› (Juan 10:16). Mú nánguá má mba̱yu̱u̱ʼ eyóoʼ rí Jeobá maniñuuʼ ma̱ʼkha̱ rí majphú mba̱a̱ gaʼkhu rí maʼni gámbíin Xa̱bu̱ Ñajunʼ ga̱jma̱a̱ xúgíʼ religión bi̱ nini rí xa̱bu̱ numbaaʼ mumíniiʼ. Ikhú Xúgínʼ bi̱ kaʼñún náa phú mbaʼin xa̱bu̱ makuwíin gagi wéñuʼ rí muni ñajuunʼ Jeobá kámuu mbiʼi náa tsu̱du̱u̱ ku̱ba̱ʼ (Rev. 7:14).