1. Ndiéjunʼ gíʼmaa muʼni xúgiáanʼ ikháanʼ bi̱ ni̱ndxu̱lú cristianos rá.

GAJKHUN má rí ikháanʼ xáʼndulú magaʼyulú á mu nduʼyáá rí mani̱ndxu̱u̱ mingíjyúuʼ, itháan á mu nandoo káñulú o néʼngúlú. Mú, apóstol Pablo niʼthí rí xúgiáanʼ ikháanʼ bi̱ ni̱ndxu̱lú cristianos gajkhun kuwáanʼ rugaʼyulú (Heb. 12:1). Ikha jngó tséʼniuu nguáthá tsigulú, xúgiáanʼ ndayóoʼ muʼni míjna magaʼyú asndu maʼngulú, mú xúʼko̱ ma̱ndoo makánulú rí Jeobá nikudaminaʼ maxnúlúʼ (Mat. 24:13).

2. Ndíjkha rí Pablo nindoo niʼthí ga̱jma̱a̱ xúgíʼ a̱jkiu̱u̱n ajngáa rí na̱ʼkha̱ náa 2 Timoteo 4:7, 8 rá.

² Pablo nindoo niʼthí ga̱jma̱a̱ xúgíʼ a̱jkiu̱u̱n rí: “Nigayúʼ asndu niʼngo̱ʼ” (atraxnuu 2 Timoteo 4:7, 8). * Mú ndiéjunʼ nindxu̱u̱ rí niʼthí Pablo rí ndayóoʼ magaʼyulú rá.

3. Ndiéjunʼ nindoo gáʼthi Pablo ga̱jma̱a̱ rí matagayáaʼ rá.

³ Nguáná Pablo nijmuu xkri̱da xóo gitsíin rí najmaʼnuuʼ náa Grecia nákha wajyúúʼ, mu xúʼko̱ maʼsngáa mbá rí gíʼdoo numuu (1 Cor. 9:25-27; 2 Tim. 2:5). Ikhaa niʼni mbríguíi rí xóo naxtáa mbáa cristiano ga̱jma̱a̱ rí matagayáaʼ (1 Cor. 9:24; Gál. 2:2; Filip. 2:16). Mbáa xa̱bu̱ nagíʼdu̱u̱ nagáyúu índo̱ naxnáximinaʼ náa Jeobá ga̱jma̱a̱ najngúun iyááʼ (1 Ped. 3:21). Ga̱jma̱a̱ índo̱ gátumuu ragáyúu mani̱ndxu̱u̱ índo̱ Jeobá maxnúu rí maxtáa kámuu mbiʼi (Mat. 25:31-34, 46; 2 Tim. 4:8).

4. Ndiéjunʼ guʼyáá náa artículo rígi̱ rá.

⁴ Rígá tikhu rí nambánii ga̱jma̱a̱ rí nagáñún xa̱bu̱ ga̱jma̱a̱  vida ndrígóo mbáa cristiano. Guʼyáá tikhuu. Timbá, ndayóoʼ mu̱ʼgua̱ náa kamba̱a̱ rí kaʼyoo. Rí maʼni a̱jma̱, gíʼmaa mundxaʼwamíjna̱ má xúʼko̱ náa rí makhánulúʼ. Rí maʼni ajtsú, ndayóoʼ maʼngulú náa xúgíʼ tsáʼkhá rí muraʼníí.

5. Xú kaʼnii kamba̱a̱ rí ndayóoʼ mu̱ʼgua̱, ga̱jma̱a̱ náá numuu rá.

⁵ Mú xa̱bu̱ bi̱ nagáñun maʼngu̱u̱n muda̱ʼ ndayóoʼ magañún náa xúgíʼ kamba̱a̱ rí nuthi bi̱ kuya̱ edxu̱u̱ náa gitsíin. Xúʼko̱ má mangáanʼ, á mu nandulú makhánulúʼ rí makuwáanʼ kámuu mbiʼi, ndayóoʼ mu̱ʼgua̱ náa kamba̱a̱ rí kaʼyoo o xóo kaʼyoo maxtáa mbáa cristiano (Hech. 20:24; 1 Ped. 2:21). Mú Gixa̱a̱ ga̱jma̱a̱ xa̱bi̱i̱ nandún rí ikháanʼ magajnúlu náa kamba̱a̱ rúʼko̱ ga̱jma̱a̱ mu̱ʼgua̱ náa nagún “ikhiin” (1 Ped. 4:4). Nutsíjmáánʼ rí xóo kuwáanʼ ga̱jma̱a̱ nuthi rí xóo kúwá ikhiin nindxu̱u̱ itháán májánʼ. Mu rúʼko̱ nindxu̱u̱ minduwaʼ (2 Ped. 2:19).

6. Ndiéjunʼ ejmañuluʼ náa xkri̱da ndrígóo Brian rá.

⁶ Á mu mbáa nandoo maʼga̱ náa kamba̱a̱ dí rígá náa numbaaʼ ndrígóo Gixa̱a̱ rígi̱, xájyúuʼ má mba̱yu̱u̱ʼ rí mbaʼyoo dí kamba̱a̱ rígi̱ na̱jkha̱ kayáa rí mamínuʼ raʼkháa rí máxtáa májánʼ (Rom. 6:16). Guʼyáá xkri̱da ndrígóo ndxájulú Brian. Índo̱ ikhaa ninindxu̱u̱ mbáa ada̱, anu̱u̱ ga̱jma̱a̱ ru̱dúu̱ nisngáá rí maxtáa xó má naʼthí náa Biblia. Mú índo̱ ninindxu̱u̱ mbáa dxámá niʼni a̱jma̱ a̱jkiu̱u̱n ga̱jma̱a̱ nikumu̱u̱ dí rígi̱ xáʼni maxtáa tsímáá. Ikhú niraʼwíí ma̱ngaa maʼni xó má nuni xa̱bu̱ bi̱ nuni rí nandoo Gixa̱a̱. Brian naʼthí: “Na̱nguá niku̱mu̱ʼ á mu rí niraʼwíí mani xó má eyoʼ ikhúúnʼ maʼga̱ kañun mani tikhu rí maʼniuʼ mingíjyúuʼ maniʼñuʼ”. Ikhaa nigíʼdu̱u̱ nijmuu drogas, niʼga̱a̱n iyaʼ najnga̱a̱ ga̱jma̱a̱ niʼni aʼkhá gajmíi̱n gu̱ʼu̱. Ikha naʼthí xóó: “Índo̱ ninújngoo tsiguʼ, xuyuʼ nagua̱ʼa̱ ikháá majmuʼ drogas. Asndu ni̱jkhánú nigujua̱ drogas mu xúʼko̱ magúʼdoo mbújkha̱a̱ mu mani rí nagua̱ʼa̱ xuyuʼ”. Mú tsiguʼ nda̱wa̱á nixtrigaminaʼ maʼnimbánuu ikha ndrígóo Jeobá. Niriʼkhu̱u̱ xóo nixtáa ga̱jma̱a̱ nijngúnʼ iyááʼ nákha tsiguʼ 2001. Rí xúgi̱ xtáa tsímáá numuu rí naxtáa xóo mbáa cristiano. *

7. Xó má naʼthí náa Mateo 7:13, 14, xú kaʼnii nindxu̱u̱ a̱jma̱ kamba̱a̱ dí rígá rá.

⁷ Gíʼdoo wéñuʼ numuu mu̱ʼgua̱ náa kamba̱a̱ rí kaʼyoo. Gixa̱a̱ nandoo rí muniʼñáaʼ ragaʼyúlúʼ náa kamba̱a̱ smídú “rí na̱jkha̱ kaguáanʼ mu makuwáanʼ” ga̱jma̱a̱ nandoo rí mu̱ʼgua̱ náa kamba̱a̱ rí ma̱ja̱nʼ náa nagún mbaʼin xa̱bu̱ bi̱ kúwá náa numbaaʼ rígi̱. Kamba̱a̱ rígi̱ na̱nguá  mingíjyúuʼ mi̱dxu̱ʼ, mú na̱jkha̱ kaguáanʼ náa “maʼnimbáti̱gáanʼ” (atraxnuu Mateo 7:13, 14). * Á mu tsíyulú magajnúlu náa kamba̱a̱ rí kaʼyoo mu̱ʼgua̱, ndayóoʼ rí makumulúʼ kuʼyáá Jeobá ga̱jma̱a̱ mudxawíín rí ikhaa naʼthí.

8. Ndiéjunʼ eni bi̱ nagáñun índo̱ najngutigi̱i̱n rá.

⁸ Xa̱bu̱ bi̱ nagáñun nuyexi má xúʼko̱ náa nagún mú xúʼko̱ xájngrádiinʼ. Maski ajndu xúʼko̱ ma̱ndoo majnguiʼíin náa mbá iñáʼ o manújngún rudiin a̱ngiu̱ún. Maski má najngutigi̱i̱n naguáxún nagáñun mbu̱júu̱ʼ. Na̱nguá tangi̱ín mu magi̱ʼdu̱u̱n gajmiún bi̱ niʼni majngrádiinʼ, i̱ndó nundxa̱ʼwa̱míjna̱ náa rí maʼngu̱u̱n mudaaʼ.

9. Ndiéjunʼ gáʼyoo muʼni á mu najngutigáanʼ rá.

⁹ Xúʼko̱ má mangáanʼ, mbáa mbaʼa nuthu najngutígaánʼ, ma̱ndoo maʼni ga̱jma̱a̱ numuu mbá rí nuʼthá o mbá rí nuʼni nindxu̱u̱ raʼkhí, o ga̱jma̱a̱ numuu mbáa ndxájulú niʼni mbá dí raʼkhí ga̱jma̱a̱ naʼni gawúnlú. Rígi̱ xáʼyóoʼ maʼniulú tsiánguá numuu rí ni̱ndxu̱lú xa̱bu̱ aʼkhá ga̱jma̱a̱ kuwáanʼ rugaʼyulú náa mbá kamba̱a̱ smídú rí na̱jkha̱ kagua̱a̱ʼ mu makuwáanʼ. Ikha rígi̱ numuu rí nguáná najngrándáanʼlú gajmiúlú eʼwíinʼ. Pablo ma̱ngaa niʼthí rí nguáná muxiéʼkhá “ga̱jma̱a̱ numuu imba̱a̱” (Col. 3:13). Mú xáʼyóoʼ mundxaʼwamíjna̱ wéñuʼ náa bi̱ niʼni majngrádánʼ, rí ndaʼyóoʼ mugídáʼ náa edxu̱lúʼ nindxu̱u̱ dí rígá makhánulúʼ. Ikha jngó, á mu najngutigáanʼ, gatuxulú ga̱jma̱a̱ gagaʼyúlúʼ mbu̱júu̱ʼ. Numuu rí á mu mbaʼ nutrigánʼ ga̱jma̱a̱ nakuwáanʼ gíná ma̱ngaa nuxieʼkhá, á mu xúʼko̱ eʼni nda̱a̱ rí gáʼngo̱o̱ gúʼdaa, asndu gamíi maʼni rí eʼwíinʼ bi̱ nunimíjna̱ magañún náa kamba̱a̱ smídú mbuyáá rí ni̱ndxu̱lú bi̱ maʼni majngrádíinʼ.

10. Ndiéjunʼ gíʼmaa muʼni mu xúʼni xkájkiún eʼwíinʼ rá.

¹⁰ Á mu tsíyulú muʼni xkájkiún a̱ngiu̱lú bi̱ nagaʼyú gajmiúlú, ndayóoʼ rí manindxu̱lúʼ xa̱bu̱ guabaaʼ ga̱jma̱a̱ xáʼyóoʼ muguaʼthi̱i̱n maguma i̱ndó rí nandulú ikháanʼ (Rom. 14:13, 19-21; 1 Cor. 8:9, 13). Rí xóo nagaʼyúlúʼ ikháanʼ nindxu̱u̱ i̱mba̱ nuthu xóo náa rí nagáñún xa̱bu̱. Numuu rí ikhiin nunimíjna̱  maʼngu̱u̱n i̱ndó ikhiin tsixmiéjunʼ kuñún a̱ngiu̱ún. Ikha jngó nuni asndu xó má eʼngu̱u̱n mu magún ginun. Mú ikháanʼ tségaʼyulú mu manújngulúʼ ruʼdiin a̱ngiu̱lú (Gál. 5:26; 6:4). Rí phú nandulú nindxu̱u̱, rí mumbañún xúgíinʼ mu maʼngu̱u̱n magañún asndu martumún ga̱jma̱a̱ makanún rí makuwá kámuu mbiʼi. Ikha jngó nuʼgímijna̱ muʼnimbánii xtágabu rí niʼthí Pablo rí xáxmiéjulú kuʼyamijná i̱ndó ikháanʼ, ‹ma̱ngaa gíʼmaa maxmiéjunlú kuʼñúún eʼwíinʼ› (Filip. 2:4).

11. Ndiéjunʼ rí nundxa̱ʼwa̱míjna̱ bi̱ nagáñun ga̱jma̱a̱ náá numuu rá.

¹¹ Ma̱ngaa mbá rí nuni bi̱ nagáñun, nindxu̱u̱ rí nundxa̱ʼwa̱míjna̱ má xúʼko̱ náa rí makhánun. Maski ajndu xóó tséyáá, mú nundxa̱ʼwa̱míjna̱ náa rí gartumún magañún ga̱jma̱a̱ mudrigú rí muda̱ʼ. Ikhaa rígi̱ rí naxnún tsiakii.

12. Ndiéjunʼ rí naʼthúlúʼ Jeobá rá.

¹² Numuu rí Jeobá nandoo kaʼyulú wéñuʼ, ikha jngó naʼthúlúʼ rí xúgíinʼ bi̱ gáʼngu̱u̱n gagañún asndu martumún, ikhiin buʼko̱ bi̱ makhánun rí makuwá kámuu mbiʼi, tséʼniuu má asndu náa, á mu mekhuíí o náa ku̱ba̱ʼ mitsaanʼ. Náa Biblia naʼthúlúʼ mbaʼa rí naʼni mudxa̱ʼwa̱míjna̱ xú kaʼnii mitsaanʼ nindxu̱u̱ rí kuáʼti̱i̱n makhánulúʼ. Á mu nundxa̱ʼwa̱míjna̱ má xúʼko̱ náa rí kuáʼti̱i̱n, rúʼko̱ gáʼni rí xúniʼñáʼ ragaʼyulúʼ asndu martumulúʼ tséʼniuu á mu tri̱ga̱ rí maʼni majngrádánʼ.

13. Ndiéjunʼ rí májánʼ kuaʼdáá ikháanʼ dí na̱nguá guaʼdáá xa̱bu̱ bi̱ nagáñún rá.

¹³ Nákha wajyúúʼ náa Grecia, xa̱bu̱ bi̱ nágáñún mbaʼa gaʼkhu rí nuraʼníí xóo rí naʼni néʼngu̱u̱n ga̱jma̱a̱ naʼkhui̱i̱n. I̱ndó maʼngu̱u̱n magañún á mu nuni ratamijná májánʼ ga̱jma̱a̱ á mu guáʼdáá tsiakii. Xúʼko̱ má mangáanʼ, nagumaratáánʼ mu magaʼyúlúʼ náa kamba̱a̱ rí maʼni makuwáanʼ. Mú ikháanʼ guáʼdáá mbá rí májánʼ: Tsiakii ndrígúlú nditháan tsétumuu, numuu rí na̱ʼkha̱ náa Jeobá. Á mu numbáʼyumíjná náa ikhaa, ikhaa nakudaminaʼ dí maʼniratháánʼ mu maʼni gújkiaanʼ (1 Ped. 5:10).

14. Xú kaʼnii embáyuluʼ 2 Corintios 12:9, 10 mu maʼngulú muraʼníí gaʼkhu rá.

¹⁴ Apóstol Pablo ma̱ngaa niraʼnuu mbaʼa gaʼkhu. Niʼngo̱o̱ índo̱ nitha wéñííʼ ga̱jma̱a̱ índo̱ nini gínáa, nguáná nikumu̱u̱ rí nánguá gíʼdoo tsiakii, ma̱ngaa ndiyóoʼ maʼngo̱o̱ índo̱ ikhaa niʼthí rí ni̱ʼkha̱nú náa “xuyuuʼ mbá tsuwanʼ” (2 Cor. 12:7). Mú ikhaa takanájnkóoʼ ga̱jma̱a̱ numuu rígi̱, rí phú niʼni ndiʼyoo rígi̱ xóo mbá náa ma̱ndoo masngájma rí naku̱mu̱u̱ kaʼyoo Jeobá (atraxnuu 2 Corintios 12:9, 10). * Ikha jngó Jeobá nimbáyúu má xúʼko̱.

15. Ndiéjunʼ guʼyáá á mu nduʼyaridáá xkri̱da ndrígóo Pablo rá.

¹⁵ Xó má apóstol Pablo, mbáa mangáanʼ nutawéñulú o nuxkulú ga̱jma̱a̱ numuu fe ndrígúlú. Mbáa ndayóoʼ mangulúʼ ga̱jma̱a̱ numuu mbá nandii o rí nánguá guaʼdáá tsiakii. Mú, á mu nduyaridáá Pablo, mangáanʼ mbuʼyáá ngajua ndrígóo Jeobá ga̱jma̱a̱ xú kaʼnii nambáyulúʼ náa mámbá xkujndu rí nuraʼníí.

16. Ndiéjunʼ gándoo muni a̱ngiu̱lú bi̱ guáʼdáá mbá nandii rá.

¹⁶ Mú, lá maʼngu̱u̱n magañún gajmiún bi̱ itháan jiámá, a̱ngiu̱lú bi̱ nandoo káñún, bi̱ nánguá eʼngu̱u̱n gágun ga̱jma̱a̱ bi̱ nánguá kruigu̱u̱n ráʼ. Xúʼko̱. Mbaʼin a̱ngiu̱lú guanii ga̱jma̱a̱ bi̱ nandoo káñún kúwá ragáñún náa kamba̱a̱ rí maʼga̱ ka̱gui̱i̱n makuwá  kámuu mbiʼi, gajkhun má rí naʼngu̱u̱n nuni rígi̱ ga̱jma̱a̱ tsiakii ndrígóo Jeobá raʼkháa ndrígu̱ún ikhiin. Nudxawíín náa teléfono rí nanújngoo náa reunión o nduyáá náa Internet. Nutaruʼún bi̱ kuñún, ga̱jma̱a̱ bi̱ kúwá náa guʼwá thana, tikhun nutaraʼa ga̱jma̱a̱ carta o ga̱jma̱a̱ teléfono.

17. Xú kaʼnii eʼni a̱jkiu̱u̱n Jeobá ga̱jma̱a̱ numún bi̱ tséʼngu̱u̱n gúni wéñuʼ rá.

¹⁷ Xúniʼñámíjná rí makawabáanʼ gaʼni rí tséʼngulú gúʼni, rí maʼni mundxa̱ʼwa̱míjna̱ dí xángu̱lúʼ gágaʼyúlú náa kamba̱a̱ rí maʼga̱ kaguáanʼ makuwáanʼ kámuu mbiʼi. Jeobá nandoo kaʼyulú numuu rí kuaʼdáá fe náa ikhaa ga̱jma̱a̱ numuu rí nuʼni má xúʼko̱ ñajuunʼ. Ikhaa nditháan xániñulú índo̱ ndayulúʼ (Sal. 9:10). Maxtáa itháan mijngii ga̱jma̱á ni̱ndxu̱lú. Guʼyáá rí naʼthí mbáa ndxájulú bi̱ naʼniuu wéñuʼ nandii: “Numuu rí nandii rí gúʼdoo mámbá mbiʼi naʼniuʼ itháan gakhii, rúʼko̱ naʼni dí nánguá eʼngo̱o̱ mataraʼa. Mú narmáʼáan a̱jkiu̱nʼ rí tséʼniuu má asndu chíʼgíʼ tsiakii rí naʼni, Jeobá naxtáa gagi. Rúʼko̱ naʼni rí maxtáá gagi mangúún”. Índo̱ nakuwáanʼ gíná, garmáʼáan a̱jkiu̱lú rí ikhaa xtáa ga̱jma̱á ni̱ndxu̱lú. Gundxaʼwamíjna̱ náa ajngáa rí niʼthí Pablo, ikhaa niʼthí: “Nadxuʼ rí guabúnʼ [...]. Numuu rí índo̱ guabúnʼ, ikhú nagúʼdoo tsiakii” (2 Cor. 12:10).

18. Xú kaʼnii gaʼkhu eraʼníí tikhun rá.

¹⁸ Tikhun bi̱ nagáñun náa kamba̱a̱ rí na̱jkha̱ kagui̱i̱n makuwá, nuraʼníí i̱mba̱ ga̱ʼkhu̱ rí naʼniún mingíjyúuʼ. A̱ngiu̱lú bugi̱ nuraʼníí mbá xkujndu rí eʼwíinʼ tséyáá o tséʼngu̱u̱n gákru̱ʼu̱u̱n, xóo rí naxmiéjunʼ wéñuʼ. Náá numuu rí mingíjyúuʼ nindxu̱u̱ rígi̱ rá. Numuu rí á mu mbáa nijmigaʼ ñawúunʼ o bi̱ tséʼgo̱o̱ gáʼga, xúgíinʼ nandoo nduyáá rí xú kaʼnii xtáa ga̱jma̱a̱ numbayíí. Mú mbáa bi̱ naxmiéjunʼ wéñuʼ tsékujmaa ma̱ta̱ya̱a̱ xú kaʼnii gaʼkhu dí eraʼnuu. Mú rí xóo nagawúunʼ eʼyoo ikha nindxu̱u̱ ikhaa xóo eʼkhu̱ eʼyoo bi̱ nijmigaaʼ, mú eʼwíinʼ mbáa na̱nguá embayíí mu maʼnii a̱jkiu̱u̱n.

19. Ndiéjunʼ eʼsngúlúʼ xkri̱da ndrígóo Mefibóset rá.

¹⁹ Á mu xóo kuwáanʼ tséniñuluʼ muʼni rí nandulúʼ ga̱jma̱a̱ nduʼyáá rí eʼwíinʼ tsíkru̱ʼu̱u̱n kuyulúʼ, relato ndrígóo Mefibóset ma̱ndoo maxnúlúʼ tsiakii (2 Sam. 4:4). Maski má ikhaa nigiʼdoo mbá nandii, mú ndiyóoʼ maʼngo̱o̱ xúgíʼ dí raʼkhí niʼniuu rey David. Mefibóset na̱nguá nigiʼdoo aʼkhúun náa xkujndu rígi̱, mú tániñuuʼ dí rígi̱ maʼni maxtáa gíná. Rí phú niʼni ningajo̱o̱ kaʼyoo xúgíʼ rí májánʼ rí nigiʼdoo ga̱jma̱a̱ nixnáa numaaʼ David numuu rí ikhaa niʼniuu rí májánʼ nákha ginii (2 Sam. 9:6-10). Ikha jngó índo̱ Mefibóset nigumaa dí raʼkhí, ikhaa ndiʼyoo náa rí májánʼ raʼkháa dí ra̱májánʼ. Taniñuuʼ rí niʼniuu David maxtáa  gíná ni má táʼni tsu̱du̱u̱ Jeobá ga̱jma̱a̱ rí nigíʼnuu. Rí phú niʼni, nimbáyúu rey bi̱ Dios nigíiʼ (2 Sam. 16:1-4; 19:24-30). Jeobá niʼni rí magumaraʼmáʼ náa Biblia xkri̱da ndrígóo Mefibóset mu mambáyulúʼ ikháanʼ mbiʼi xúgi̱ (Rom. 15:4).

20. Ndiéjunʼ eguáʼníí tikhun rí naxmiéjunʼ wéñuʼ ga̱jma̱a̱ ndiéjunʼ dí gíʼmaa mbuyáá xá.

²⁰ Numuu rí naxmiéjúnʼ wéñuʼ tikhun a̱ngiu̱lú, rúʼko̱ naʼni rí mamiñún o maxkajkiún rí mutamijná gajmiún eʼwíinʼ a̱ngiu̱lú mambá mbiʼi. Maski má naʼniún mingíjyúuʼ makuwá gajmiún xa̱bu̱, mú nunimi̱jna̱ magún má xúʼko̱ reunión ga̱jma̱a̱ asamblea. Naʼniún mingíjyúuʼ mutamijná gajmiún bi̱ tseniʼniúnʼ mu nagájnún gutaraʼa. Á mu xúʼko̱ eguaʼníílú mangáanʼ raʼkháa i̱ndó ikháanʼ eguáʼníí xúʼko̱. Garmáʼáan a̱jkiu̱lú rí Jeobá rí nadxuu índo̱ nuʼni mbá ñajunʼ ga̱jma̱a̱ xúgíʼ a̱jkiu̱lú. Á mu tsékanájkulú rúʼko̱ nasngájma rí ikhaa naʼni tsajkurámáánʼ ma̱ngaa naxnúlú tsiakii rí ndayúlú * (Filip. 4:6, 7; 1 Ped. 5:7). Jeobá nadxuu kaʼyulú á mu tséniʼñááʼ ru̱ʼni̱ ñajuunʼ maski ajndu rígá dí narikulúʼ.

21. Ndiéjunʼ gáʼngo̱o̱ gúʼni ga̱jma̱a̱ tsiakii ndrígóo Jeobá rá.

²¹ Xó má ndiʼyáá, rígá tikhu rí naʼni mixtiʼkhu náa nagáñun xa̱bu̱ ga̱jma̱a̱ rí niʼthí Pablo. Náa nagáñun xa̱bu̱ nákha wajyúúʼ, káaʼ mbáwíi bi̱ naʼngo̱o̱ nadaaʼ. Mú, mixtiʼkhu nindxu̱u̱ náa nagaʼyúlú ikháanʼ bi̱ ni̱ndxu̱lú cristianos, numuu rí xúgíinʼ bi̱ gáguájunʼ jmbu buʼko̱ bi̱ mudrigú rí makuwá kámuu mbiʼi (Juan 3:16). Xa̱bu̱ bi̱ nagáñun ndayóoʼ rí maguaʼdáá tsiakii mu maʼngu̱u̱n. Mú mbaʼánʼ dí ikháanʼ nánguá guáʼdáá tsiakii mú nugaʼyúlú má xúʼko̱ (2 Cor. 4:16). Ga̱jma̱a̱ tsiakii ndrígóo Jeobá xúgiáanʼ maʼngo̱o̱ magaʼyúlúʼ asndu náa martumulú.