ARTÍCULO RÍ MUʼNIGAJMAA 17
“Natala rí ñajuanla bi̱ nambáxu̱ʼ gajmíi̱nʼ”
“Natala rí ñajuanla bi̱ nambáxu̱ʼ gajmíi̱nʼ, numuu rí xúgíʼ rí nidxawun náa Anu̱ʼ nixnala mbu̱ya̱a̱ mangáanʼ” (JUAN 15:15).
AJMÚÚ 13 Cristo nindxu̱u̱ xkri̱da ndrígúlú
RÍ MUʼNIGAJMAA *
1. Ndiéjunʼ gíʼmaa muni a̱jmi̱i̱n xa̱bu̱ mu ma̱ndoo mambajxúun májánʼ rá.
MU A̱JMI̱I̱N xa̱bu̱ ma̱ndoo mambajxúun májánʼ ndayóoʼ rí magajnún mbóó, muthi ndiéjunʼ e̱ndxa̱ʼwa̱míjna̱ ndiéjunʼ ekumún ga̱jma̱a̱ xú kaʼnii nikúwá. Mú, índo̱ nundxa̱ʼwa̱míjna̱ rí mambaxúlúʼ gajmiúlú Jesús mbáa nakumulú rí maʼni mingíjyúuʼ rí mambaxú gajmiúlú. Guʼyáá tikhu numuu rí maʼni mingíjyúuʼ.
2. Xú kaʼnii nindxu̱u̱ timbá numuu rí maʼni mingíjyúuʼ mambaxúlúʼ gajmiúlú Jesús rá.
2 Timbá numuu nindxu̱u̱, rí ikháanʼ nimbá míʼtsú túʼyáá Jesús. Mbaʼin má cristianos bi̱ nikúwá nákha siglo timbá túyáá Jesús. Maski ajndu má xúʼko̱ apóstol Pedro niʼthún: “Maski ajndu túya̱a̱ nimbá miʼtsú, nandala ku̱ya̱a̱. Maski ajndu xúgi̱ tséya̱a̱la, mú kuaʼdáá fe náa ikhaa” (1 Ped. 1:8). Rígi̱ naʼni mbuʼyáá rí tséyóoʼ má mbuʼyáá Jesús mu ma̱ndoo mambajxú gajmiúlú.
3. Xú kaʼnii nindxu̱u̱ rí maʼni a̱jma̱ numuu rá.
3 Rí maʼni a̱jma̱ numuu nindxu̱u̱ rí na̱nguá eʼtamíjná gajmiúlú Jesús. Índo̱ nuʼtájkáan, nuʼtháán Jeobá raʼkháa Jesús gajkhun má rí najmulú mbiʼyuu, mú tséʼtáán mbájmbu ikhaa. Jesús tsíyoo rí muʼtá káñíí ikhaa, numuu rí muʼtájkáan nindxu̱u̱ mbá rí xóo mbuʼyamajkuíí Jeobá, ikha jngó i̱ndó ikhaa ndayóoʼ muʼthán (Mat. 4:10). Maski má xúʼko̱ ma̱ndoo musngajmá rí nandulú kuʼyáá Jesús.
4. a) Xú kaʼnii nindxu̱u̱ rí maʼni ajtsú numuu rá. b) Ndiéjunʼ guʼyáá náa artículo rígi̱ rá.
4 Rí maʼni ajtsú numuu nindxu̱u̱ rí nda̱a̱ xóo makuwáanʼ gajmiúlú Jesús numuu rí ikhaa xtáa mekhuíí. Maski má nda̱a̱ xóo makuwáanʼ gajmiúlú ikhaa, mu ma̱ndoo majmañulúʼ mbaʼa wéñuʼ ga̱jma̱a̱ numuu ikhaa. Náa artículo rígi̱, mbuʼyáá a̱jkhu̱ enii rí ma̱ndoo muʼni mu mambaxú gajmiúlú ikhaa. Mú, ginii guʼyáá náá numuu rí ndayóoʼ mambaxú gajmiúlú Jesús.
NDÍJKHA RÍ NDAYÓOʼ MAMBAXÚ GAJMIÚLÚ JESÚS RÁ.
5. Ndíjkha rí gíʼdoo numuu mambaxú gajmiúlú Jesús rá. Ma̱ngaa atayáá kúgumaʼá “ Rí mambaxú gajmiúlú Jesús maʼga̱ kaguáanʼ mambaxú gajmiúlú Jeobá” ga̱jma̱a̱ “ Awáán gíʼmaa maʼndulú kuʼyáá Jesús”.
5 Mú ma̱ndoo mambaxúlúʼ májánʼ gajmiúlú Jeobá, ndayóoʼ mambaxú gajmiúlú Jesús. Guʼyáá a̱jma̱ numuu, ndíjkha rí xúʼko̱ eʼthá. Timbá, Jesús niʼthúún xa̱bi̱i̱: ‹Anu̱ʼ nandoo kaʼyalaʼ numuu rí nindala ku̱yo̱ʼ ikhúúnʼ› (Juan 16:27). Ma̱ngaa niʼthí: “Nimbáa xándoo maʼga̱nú náa Anu̱ʼ á mu raʼkháa ga̱jma̱a̱ numuʼ ikhúúnʼ” (Juan 14:6). Á mu nandulú mambaxúlúʼ gajmiúlú Jeobá mu Jesús na̱nguá, mani̱ndxu̱u̱ asndu xóo maʼndulú manújngulúʼ náa mbá guʼwá rí asndu xatu̱ʼu̱lú náa xkrugua. Jesús nijmuu mbá xkri̱da xúgi̱ kaʼnii índo̱ niʼthí rí ikhaa nindxu̱u̱ ‹xkrugua náa mataʼán mugu̱› (Juan 10:7). Rí maʼni a̱jma̱ numuu, Jesús nisngájma ga̱jma̱a̱ xkri̱da ndrígóo xú phú kaʼnii Anu̱u̱. Niʼthúún xa̱bi̱i̱: “Bi̱ ndiʼyoʼ ikhúúnʼ ndiʼyoo má Anu̱ʼ ma̱ngaa” (Juan 14:9). Ikha jngó mu ma̱ndoo muniʼniiʼ májánʼ Jeobá ndayóoʼ muniʼniiʼ májánʼ Jesús. Índo̱ itháán gajmañulú ga̱jma̱a̱ numuu ikhaa itháan gaʼndulúʼ kuʼyáá, índo̱ itháan gaʼndulúʼ kuʼyáá Jesús itháan gaʼndulúʼ kuʼyáá Jeobá.
6. Xú kaʼnii nindxu̱u̱ imbo̱ʼ numuu rí ndayóoʼ mambaxúlúʼ gajmiúlú Jesús rá.
6 Ndayóoʼ mambaxú gajmiúlú Jesús mu ma̱ndoo maxtiʼña̱a̱ rí nuʼtájkáan. Gíʼdoo wéñuʼ numuu mbuʼyáá náá numuu rí najmulú “mbiʼyuu Jesús” índo̱ námbúlú nuʼtájkáan, raʼkháa mbaaʼ muʼtháá. Ndayóoʼ makru̱ʼu̱lú xú kaʼnii Jeobá najmiuu Jesús mu mariʼña̱a̱ rí nuʼtájkáan. Jesús niʼthún xa̱bi̱i̱: ‹Asndu ndiéjunʼ má rí gundaʼa ga̱jma̱a̱ mbiʼyuʼ, ikhúú mani› (Juan 14:13). Jeobá nindxu̱u̱ bi̱ naʼdxaun ga̱jma̱a̱ nariʼña̱a̱ rí nuʼtájkáan, mú najmiuu A̱ʼdióo mu maʼnimbánuu rí ikhaa nandoo maguma (Mat. 28:18). Guʼyáá ndiéjunʼ erígá índo̱ nu̱nda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyulú índo̱ nuʼni mbá dí raʼkhí. Nákha xóó tsériʼña̱a̱ rí niʼtájkáan, ginii ndaʼyoo á mu nunimbánii rí niʼtáñajulú Jesús: “Á mu nuni mba̱a̱ a̱jkia̱la ku̱ñu̱u̱n xa̱bu̱ bi̱ nuni gawánla, xúʼko̱ má Ana̱la bi̱ xtáa mekhuíí maʼni mba̱a̱ a̱jkiu̱u̱n kaʼyala mangáanʼ; mú á mu na̱nguá eni mba̱a̱ a̱jkia̱la ku̱ñu̱u̱n xa̱bu̱ bi̱ nakiéʼkhun náa ikháanʼ, ma̱ngaa Ana̱la xáʼni mba̱a̱ a̱jkiu̱u̱n kaʼyala ga̱jma̱a̱ numuu rí nakieʼkhala” (Mat. 6:14, 15). Ikha jngó gíʼdoo wéñuʼ numuu muʼniu̱u̱n eʼwíinʼ xó má Jeobá ga̱jma̱a̱ Jesús nuni ga̱jma̱á ni̱ndxu̱lú.
7. Ndiéjunʼ gíʼmaa muʼni mu mudrigú rí májánʼ ga̱jma̱a̱ numuu rí nixnáximinaʼ Jesús rá.
7 I̱ndó xa̱bu̱ bi̱ nambáxu̱u̱n májánʼ gajmiún Jesús ma̱ndoo mudrigú rí májánʼ ga̱jma̱a̱ numuu rí ikhaa nixnáximinaʼ. Xú kaʼnii eʼyáá rá. Jesús mínaaʼ má niʼthí rí “maxnáximinaʼ ga̱jma̱a̱ numún bi̱ nambáxu̱u̱ gajmíi̱n” (Juan 15:13). Xa̱bi̱i̱ Jeobá bi̱ nikúwá nákha Jesús xóó tséʼkha̱ náa tsu̱du̱u̱ ku̱ba̱ʼ xóo Abrahán, Sara, Moisés, Rahab ga̱jma̱a̱ eʼwíinʼ, índo̱ ikhiin gágabíín mbaʼyóoʼ mambaxúun gajmiún Jesús, majmañún ga̱jma̱a̱ numuu ikhaa ga̱jma̱a̱ maʼdúún kuyáá, mu xúʼko̱ ma̱ndoo makuwá kámuu mbiʼi (Juan 17:3; Hech. 24:15; Heb. 11:8-12, 24-26, 31).
8, 9. Xó má eʼthí náa Juan 15:4, 5, ga̱jma̱a̱ numuu rí nambaxú gajmiúlú Jesús ndiéjunʼ rí ma̱ndoo muʼni ga̱jma̱a̱ ndíjkha rí gíʼdoo numuu makuwáanʼ mbóó gajmiúlú ikhaa xá.
8 Ikháanʼ guaʼdáá mbá ñajunʼ mitsaanʼ rí muñajunʼ mbóó jnduʼ gajmiúlú Jesús náa muʼtáraʼa ajngáa májánʼ ndrígóo Reino. Índo̱ ikhaa nixtáa náa tsu̱du̱u̱ ku̱ba̱ʼ nisngáa rí gajkhun ga̱jma̱a̱ numuu Dios, ga̱jma̱a̱ índo̱ nitanga̱a̱ mekhuíí xóo bi̱ kayá edxu̱u̱ náa congregación, naxná má xúʼko̱ ikha náa ñajunʼ rí miʼtáraʼa. Ndaʼyoo xúgíʼ tsiakii rí nuʼni índo̱ numbáʼñún eʼwíinʼ xa̱bu̱ muniʼniiʼ ikhaa ga̱jma̱a̱ Anu̱u̱. Xó má eʼyáá rí i̱ndó ma̱ndoo muʼni ñajunʼ rígi̱ ga̱jma̱a̱ tsiakii ndrígóo Jeobá ga̱jma̱a̱ Jesús (atraxnuu Juan 15:4, 5). *
9 Náa Biblia naʼthí kaʼwu rí ndayóoʼ maʼndulú kuʼyáá Jesús á mu nandulú muʼni rí nanigu̱u̱ʼ Jeobá. Rí xúgi, mbuʼyáá a̱jkhu̱ enii rí ndayóoʼ muʼni mu mambaxú gajmiúlú Jesús.
XÓO MAMBAXÚ GAJMIÚLÚ JESÚS
Mu ma̱ndoo mambaxú gajmiúlú Jesús 1) ndayóoʼ muniʼnii, 2) mundxaʼwamíjna ga̱jma̱a̱ muʼni xóo ikhaa, 3) mumbaʼñún a̱ngiu̱lú bi̱ kaxtaʼwíin ga̱jma̱a̱ 4) muʼnimbulúʼ awan rí nurawíi a̱ngiu̱lú bi̱ kuya̱ edxu̱u̱. (Atayáá kutriga̱ 10 asndu 14). *
10. Xú kaʼnii nindxu̱u̱ timbá enii rí ndayóoʼ muʼni mu mambaxú itháan gajmiúlú Jesús rá.
10 Timbá, ndayóoʼ muniʼnii Jesús. Mu ma̱ndoo muʼni rígi̱ ndayóoʼ muraxnuu libro rí na̱ʼkha̱ náa Biblia xóo Mateo, Marcos, Lucas ga̱jma̱a̱ Juan. Índo̱ gundxaʼwamíjna̱ rí naʼthí náa relato rígi̱ ga̱jma̱a̱ mbuʼyáá xú kaʼnii Jesús niʼniún rí májánʼ xa̱bu̱, maʼni rí maʼndulú kuʼyáá itháan. Mbá xkri̱da, ikhaa na̱nguá ndiʼñún xóo ñumbáá xa̱bi̱i̱ maski ajndu ikhaa gíʼdoo itháan numuu ki xóo ikhiin, ikhaa ndiʼñún xóo bi̱ nambáxu̱u̱ gajmíi̱n ga̱jma̱a̱ niʼthún xúgíʼ rí naku̱mu̱u̱ ga̱jma̱a̱ xúgíʼ rí ndaʼyoo (Juan 15:15). Nixtáa gíná índo̱ xa̱bi̱i̱ nikúwá gíná asndu nimbiya̱ʼ gajmíi̱n (Juan 11:32-36). Asndu xa̱bu̱ bi̱ tsíñún gúyáá, ndiyáá rí ikhaa nimbáxu̱u̱ gajmíi̱n bi̱ nindrigú ajngóo (Mat. 11:19). Á mu ikháanʼ mangáanʼ nuʼniu̱u̱n eʼwíinʼ xóo Jesús niʼni gajmíi̱n xa̱bi̱i̱, rúʼko̱ gáʼni rí mambaxú gajmiúlú ga̱jma̱a̱ makuwáanʼ gagi ma̱ngaa maʼndulú kuʼyáá itháan Jesús.
11. Xú kaʼnii nindxu̱u̱ rí maʼni a̱jma̱ enii rí ndayóoʼ muʼni mu mambaxú gajmiúlú Jesús ga̱jma̱a̱ ndíjkha rí gíʼdoo numuu rá.
11 Rí maʼni a̱jma̱, gundxa̱ʼwa̱míjna̱ ga̱jma̱a̱ guʼni xó má Jesús. Índo̱ itháan gúʼgími̱jna̱ muʼni xóo endxaʼwóo edxu̱u̱ ikhaa, itháan gambaxú gajmiúlú (1 Cor. 2:16). Xú kaʼnii gándoo guʼyaridáá xá. Guʼyáá tikhu rí ikhaa niʼni. Ikhaa ndiʼyoo rí itháan gíʼdoo numuu mambáñún eʼwíinʼ ki xóo mbaʼyoo i̱ndó rí ndayóoʼ ikhaa (Mat. 20:28; Rom. 15:1-3). Numuu rí xúgi̱ kaʼnii endxa̱ʼwáminaʼ, rúʼko̱ niʼni rí maʼni gínáminaʼ ga̱jma̱a̱ numún eʼwíinʼ ma̱ngaa rí maʼni mba̱a̱ a̱jkiu̱u̱n kaʼñún, ga̱jma̱a̱ tségawúunʼ nacha̱ kayuʼ índo̱ nuta numáá (Juan 1:46, 47). Ga̱jma̱a̱ tsétanga̱a̱ maʼthúún kikháá xa̱bu̱ náa raʼkhí rí nini (1 Tim. 1:12-14). Ikha jngó gíʼdoo wéñuʼ numuu mbuʼyaridáá xkri̱da ndrígóo, ikhaa niʼthí: “Mú xúʼko̱ xúgínʼ gúyáá dí ikháanʼla nindxalá xa̱bi̱ʼ, á mu nandala kuyamíjna̱” (Juan 13:35). Ikha jngó gíʼmaa rí murajximíjna̱: “Lá na̱ni̱ xó má eʼngo̱o̱ mu maxtáá tsímáá gajmíʼ a̱ngui̱nʼ ráʼ.”
12. Xú kaʼnii nindxu̱u̱ rí ajtsú enii rí ndayóoʼ muʼni mu mambaxú gajmiúlú Jesús ga̱jma̱a̱ xú kaʼnii gúʼni rá.
12 Rí maʼni ajtsú, gumbañúún a̱ngui̱i̱n Cristo. Jesús ndaʼyoo rí índo̱ numbañún a̱ngui̱i̱n ikhaa, nindxu̱u̱ asndu xóo ikhaa embaʼyíí (Mat. 25:34-40). Rí xóo numbaʼñún a̱ngui̱i̱n ikhaa nindxu̱u̱ índo̱ nuʼnimbáníí ñajunʼ rí ikhaa nixnún xa̱bi̱i̱ rí muʼtáraʼa ajngáa ndrígóo Reino (Mat. 28:19, 20; Hech. 10:42). Tsiakii rí nuni “eʼwíínʼ mugu̱” nayambáá wéñuʼ mu a̱ngui̱i̱n Cristo maʼngu̱u̱n munimbánii ñajunʼ dí narígá mbiʼi xúgi̱ rí miʼtáraʼa náa xúgíʼ numbaaʼ (Juan 10:16). Ikháanʼ bi̱ ni̱ndxu̱lú eʼwíinʼ mugu̱, mámbá rí nagájnúlúʼ gutaraʼa nusngajmá rí nandulú kuʼyáá Jesús ma̱ngaa a̱ngui̱i̱n.
13. Xú kaʼnii guʼnimbánii ajngáa rí niʼthí Jesús dí na̱ʼkha̱ náa Lucas 16:9 rá.
13 Ma̱ngaa ma̱ndoo mambaxú gajmiúlú Jeobá ma̱ngaa Jesús índo̱ nuxná mbújkha̱a̱ mu majmaa náa ñajunʼ rí ikhiin nuxna ikha (atraxnuu Lucas 16:9). * Ma̱ndoo muxnálú rí guaʼdáá náa obra mundial mu majmaa náa najuiʼtáraʼa, náa naguma guʼwá, náa naguma májáanʼ guʼwá rí nduyamajkuíí Jeobá ga̱jma̱a̱ náa narígá mbá gamiéjunʼ. Ma̱ngaa ma̱ndoo muxná mbújkha̱a̱ náa congregación ndrígúlú mu mumbañún a̱ngiu̱lú bi̱ nuraʼníí mbá gamiéjunʼ (Prov. 19:17). Á mu nuʼni rígi̱, kuwáanʼ rumbañún a̱ngui̱i̱n Cristo.
14. Xó má naʼthí náa Efesios 4:15, 16, xú kaʼnii nindxu̱u̱ rí naʼni a̱jkhu̱ enii rí ndayóoʼ muni mu mambaxú gajmiúlú Jesús rá.
14 Rí maʼni a̱jkhu̱, gumbaʼyíí awan rí nagájnuu náa congregación. Ma̱ndoo mambaxúlúʼ itháan májánʼ gamiúlú Jesús bi̱ kayá edxu̱u̱ náa congregación á mu nuʼnimbulúʼ kuʼñúún a̱ngiu̱lú bi̱ nuñewu̱lúʼ (atraxnuu Efesios 4:15, 16). * Mbá xkri̱da, xuajñuu Jeobá niriyaʼ awan mu majmuluʼ májánʼ Guʼwá náa nagimbáanʼ. Ikhaa rúʼko̱ numuu rí mbaʼa congregación ndi̱wa̱a̱ ga̱jma̱a̱ xúʼko̱ má náa mutaraʼa ma̱ngaa. Rígi̱ niñambá mu majmaa májánʼ mbújkha̱a̱. Ma̱ngaa ga̱jma̱a̱ numuu rígi̱, tikhun a̱ngiu̱lú ndiyóoʼ maguʼwún náa rí xóo kaʼnii nixtiʼkhu̱u̱ rígi̱ numuu rí tikhun a̱ngiu̱lú nikúwá ikháá má congregación ga̱jma̱a̱ nigúwún kuñún a̱ngiu̱lú, mu rí xúgi̱ nijuiʼthún magún imbo̱ʼ congregación. Jesús nadxuu wéñuʼ índo̱ ndaʼñún xa̱bi̱i̱ nunimbu̱u̱n awan rígi̱.
RÍ MAMBAXÚ GAJMIÚLÚ JESÚS MBAJYÚUʼ KÁMUU
15. Xú káʼnii gánindxu̱u̱ rí nambaxú gajmiúlú Jesús nda̱wa̱á rá.
15 A̱ngiu̱lú bi̱ kaxtaʼwíin ga̱jma̱a̱ xi̱ʼ kaʼwu, guáʼthi̱i̱n makuwá gajmiún Jesús náa mekhuíí mu mutañajunʼ gajmiún kámuu mbiʼi náa Reino ndrígóo Dios. Ikhiin mbuyáá Jesús, mutamijná gajmiún ga̱jma̱a̱ makuwá gajmiún (Juan 14:2, 3). Mú, bi̱ guáʼthi̱i̱n makuwá náa tsu̱du̱u̱ ku̱ba̱ʼ mangiin makuwá májánʼ numuu rí Jesús ma̱ndoo kaʼñún má xúʼko̱. Maski ajndu xándoo mbuyáá, mú mámbá mbiʼi mambaxúun itháan gajmiún náa mbá numbaaʼ rí Jeobá ga̱jma̱a̱ Jesús niʼthí maxnún (Is. 9:6, 7).
16. Xú kaʼnii eguma tsajkurámáánʼ rí mambaxú gajmiúlú Jesús rá.
16 Índo̱ nundrígú rí mambaxúlúʼ gajmiúlú Jesús naguma tsajkurámáánʼ wéñuʼ. Mbá xkri̱da, ikhaa nandoo kaʼyulú ga̱jma̱a̱ xtáa má xúʼko̱ mu mambáyulúʼ ma̱ngaa rúʼko̱ naʼni rí ma̱ndoo makuwáanʼ kámuu mbiʼi. Mú rí itháán gíʼdoo numuu, i̱ndó á mu nambaxú gajmiúlú Jesús i̱ndó xúʼko̱ ma̱ndoo mambaxú gajmiúlú Jeobá. Phú mitsaanʼ nindxu̱u̱ rí mambaxú gajmiúlú Jesús.
AJMÚÚ 17 “Nandoʼ”
^ párr. 5 Náa nguáthá tsiguʼ rí nixtáa Jesús, apóstoles ndrígóo nindoo nitamijná gajmiún, niñajunʼ mbóó gajmiún ga̱jma̱a̱ xúʼko̱ nindoo nimbáxu̱u̱n májánʼ. Jesús ma̱ngaa nandoo rí ikháanʼ mangáanʼ mambaxúlúʼ gajmiúlú, mú ikháanʼ ma̱ndoo maʼniulú itháan mingíjyúuʼ ki xóo apóstoles. Lá natayáá náa numuu rá. Náa artículo rígi̱ mbuʼyáá náa numuu ga̱jma̱a̱ mbuʼyáá rí ma̱ndoo mambáyulúʼ mu mambaxúlúʼ májánʼ gajmiúlú Jesús.
^ párr. 8 Juan 15:4, 5: “Gakuwa̱ánʼlá mbá nduʼ ga̱jma̱a̱ ni̱ndxu̱ʼ ga̱jma̱a̱ ikhúúnʼ maxtáa ga̱jma̱á nindxala. Xóo má mbá ñawun ixi̱ xándoo gáxná xndúu i̱ndó ikhaa, ndayóoʼ rí magiʼma náa ixu̱u̱, ikháanʼ mangáanʼ nda̱a̱ rí gándoo muni á mu nánguá ku̱wa̱a̱nʼ ga̱jma̱á ni̱ndxu̱ʼ. Ikhúúnʼ ni̱ndxu̱ʼ ixu̱u̱ uva ga̱jma̱a̱ ikháanʼla nindxala ñawúunʼ. Bi̱ xtáa ga̱jma̱á ni̱ndxu̱ʼ, ikhúúnʼ xtáá ga̱jma̱a̱ nindxu̱u̱, buʼko̱ mbaʼa rí naʼngo̱o̱ naʼni. Numuu rí á mú na̱nguá kuwáanʼ mbóó ga̱jma̱a̱ ni̱ndxu̱ʼ ikháanʼ nda̱a̱ rí gájmáanʼ munila nimbá.”
^ párr. 13 Lucas 16:9: “Ma̱ngaa natala: Ga̱jmala mbújkha̱a̱ dí rígá mu mbuʼñíinʼ bi̱ mambaxá gajmiála, numuu rí índo̱ gámbá rígi̱, ma̱ndoo mataʼalá náa rí makuwáanʼ kámuu mbiʼi.”
^ párr. 14 Efesios 4:15, 16: “Mú guʼthá rí gajkhun, ga̱jma̱a̱ numuu ngajua guʼni xúgíʼ náa bi̱ kayá edxu̱u̱, Cristo. Ikháanʼ nindxulú xóo xuwiʼ dí ikhaa naʼtáñajunʼ, numuu dí mbóó kagujtuminaʼ ga̱jma̱a̱ numbáyumíjná ma̱ngaa gájtsúu nañambáá náa ndayóoʼ, ma̱ngaa mámbá dí kuaʼdáá náa xuwiʼ ndayóoʼ, nañambáá dí mbaja̱a̱ ga̱jma̱a̱ ngajua.”
^ párr. 58 NAʼTHÍ NUMUU XTIʼKHU: 1) Náa mbá guʼwíin, kúwá runigajmaa xóo nixtáa ga̱jma̱a̱ nitaraʼa Jesús. 2) Náa congregación, nuʼnimíjna̱ makuwáanʼ tsímáá gajmiúlú a̱ngiu̱lú. 3) Á mu nuʼtáraʼa ga̱jma̱a̱ xúgíʼ a̱jkiu̱lú, kuwáanʼ rumbaʼñúún a̱ngui̱i̱n Cristo. 4) Índo̱ tikhu congregación nda̱wa̱a̱ naʼni̱i̱ mbóó, nuʼnimbulúʼ ikha rí nurawíi bi̱ kuya̱ edxu̱u̱.
