Nákha inuu makhañúu Jesús, ndíjkha jngóo niʼthí ajngá rí niʼthí David náa Salmo 22:1 rá.

Xóo ma eʼthí náa Mateo 27:46, nákhi inu makhañúu Jesús niʼthí ajngáa rígi̱: “Dios ndrígóʼ, Dios ndrígóʼ. Náa numuu rí nitatsíñúnʼ rá”. Xúʼko̱ ikhaa niʼnimbánuu dí niʼtáriyaʼ David náa Salmo 22:1 (Mar. 15:34). Jesús na̱nguá niʼthí ajngáa rígi̱ ga̱jma̱a̱ numuu dí tágájnúu májánʼ rí niʼni o ga̱jma̱a̱ numuu rí niʼnitígo̱o̱ fe ndrígóo (Mat. 16:21; 20:28). Ikhaa nikro̱ʼo̱o̱ májánʼ náá numuu dí gíʼmaa makhañúu ga̱jma̱a̱ maxtáa xawii mu maʼni, ga̱jma̱a̱ ndiʼyoo dí Jeobá ni xáñawu̱u̱n nditháan índo̱ gákáñúu. Mu xúʼko̱ Jesús masngájma rí mawiji̱ jmbu asndu índo̱ gákáñúu (Job 1:10; Mar. 14:35, 36).

Ikha jngóo náá numuu rí niʼthí ajngáa rígi̱ Jesús rá. Mu ikháanʼ xándoo mutajuíi, mu guyáá rí ma̱ndoo muʼni. *

Ga̱jma̱a̱ ajngáa rígi̱ Jesús na̱nguá niʼthí dí Jeobá ma̱ʼkha̱ gámbáyúu índo̱ gákáñúu. Ikhaa má kaʼyoo mani núma̱aʼ ga̱jma̱a̱ rígi̱. Numuu rí nindxu̱u̱ mbáa xa̱bu̱ numbaaʼ ga̱jma̱a̱ mbaʼyóoʼ makhañúu “ga̱jma̱a̱ numuu xúgínʼ xa̱bu̱ ga̱jma̱a̱ xúʼko̱ nimbáñun” (Heb. 2:9).

Índo̱ Jesús niʼthí ajngáa rí ni̱ʼkha̱ raʼthí náa Salmo 22 niʼni marmáʼáan a̱jkiu̱ún mbaʼin xa̱bu̱ dí na̱ʼkha̱ raʼthí náa xúgíʼ Salmo. Nákha mbiʼi rúʼko̱ mbaʼin judío naguʼwún  rí matra̱ʼa̱ edxu̱u̱ kájxi̱ Salmo. Ikha jngóo a mu mbáa naʼni marmáʼáan a̱jkiu̱ún versículo rígi̱, nacha̱ e̱ʼkha̱ náa edxu̱ún kájxi̱ rí na̱ʼkha̱ raʼthí náa Salmo mu ra̱ʼkháa índo̱ rúʼko̱ nindoo Jesús maʼni (Sal. 22:7, 8, 15, 16, 18, 24). Ma̱ngaa nindoo rí mambáñúún, á mú i̱ndó rúʼko̱ nindoo Jesús, xtáa rambáñúún discípulos bi̱ ni̱ndxu̱ún judío, mu maʼni marmáʼáan a̱jkiu̱ún mbá kiʼtáriyaʼ dí na̱ʼkha̱ raʼthí náa Salmo ga̱jma̱a̱ numuu rí nikháñun, náa iwáá na̱ʼkha̱ raʼthí ga̱jma̱a̱ numuu “xú kaʼnii gáʼtañajunʼ” Jeobá asndu “náa xúgíʼ numbaaʼ” (Sal. 22:27-31).

Índo̱ niʼthí Jesús ajngáa dí niniraʼmáʼ David mbáa xtáa rambayumináʼ índo̱ niʼthí dí ndaa aʼkhúun. Nákha inu muxiyáa Jesús, ndiyóo maʼngo̱o̱ mu mutha numáá (Mat. 26:65, 66). Ikha jngóo xa̱bu̱ edi̱i̱ nigimbúmijná mbá nacha̱ ga̱jma̱a̱ túnimbu̱ún xtángoo (Mat. 26:59; Mar. 14:56-59). Ikha jngóo índo̱ Jesús niʼthí rígi̱: “Dios ndrígóʼ, Dios ndrígóʼ”. Náá numuu rí nitatsíñúnʼ rá. Gi̱i̱ Jesús xtáa raʼthí rí na̱nguá kaʼyoo magruigú castigo numuu rí táʼni mbá dí raʼkhí.

Lá narmáʼáan a̱jkiu̱u̱n Jesús maski ajndu David bi̱ niniraʼmáʼ Salmo rígi̱ niniñuuʼ rí mamínuuʼ ga̱jma̱a̱ rí Jeobá tagruiguíi xá. Mú David tandati̱go̱o̱ fe, nda̱wa̱á dí niʼni graxe̱ rígi̱, niʼthí dí Jeobá nikumu̱u̱ kaʼyoo rí ikhaa má gáʼni káwíin xa̱bi̱i̱, ga̱jma̱a̱ rí Jeobá gaʼni tsajkurámiinʼ (Sal. 22:23, 24, 27). Ikhaa má kayúúʼ xóo ma niʼni Jesús “A̱ʼdióʼ David”, nimínuuʼ náa mbá ixi̱, ra̱ʼkhá rúʼko̱ eyoo gáʼthúun rí Jeobá tagruiguíi (Mat. 21:9).

Mbáa Jesús niʼthí ma̱ngaa rí nigáwi̱i̱nʼ a̱jkiu̱u̱n numuu rí Jeobá xáñewu̱u̱n índo̱ gawi̱ji̱ jmbu. Nda̱wa̱á rí Adán ga̱jma̱a̱ Eva nixudami̱jna̱ aʼkhá, Jesús ndiyóoʼ mamínuuʼ ga̱jma̱a̱ makhañúu. Ga̱jma̱a̱ rúʼko̱ Jeobá tándoo marigá náa tsu̱du̱ʼ ku̱ba̱ʼ, numuu rí Jesús tani mbá dí ra̱májánʼ mu ikhaa ndiyóoʼ mamínuuʼ ga̱jma̱a̱ makhañúu, mu xúʼko̱ maʼthúu̱n dí Gixa̱a̱ nindxu̱u̱ mbáa bi̱ nduwaaʼ ga̱jma̱a̱ maʼni káwíin xa̱bu̱ numbaaʼ (Mar. 8:31; 1 Ped. 2:21-24). I̱ndó maʼngo̱o̱ marigá rígi̱, á mu Jeobá xámbáyuu Jesús índo̱ gákáñúu.

Jesús nigíminaʼ mambáñuun xa̱bi̱i̱ mu mbuyáá náa numuu rí Jeobá niniñuuʼ makhañúu xúʼko̱ kaʼnii.  * Jesús ndiʼyóoʼ rí makhañúu náa mbá ixi̱ ga̱jma̱a̱ mbuyáá dí nindxu̱u̱ mbáa xa̱bu̱ bi̱ nagudíin a̱ngui̱i̱n ga̱jma̱a̱ rúʼko̱ gáʼni rí majngrádiinʼ (1 Cor. 1:23). Á mu xa̱bi̱i̱ gúyáá náa numuu dí nikháñuu, maguánú makru̱ʼu̱u̱n, ndíjkha jngó numuu nirígá xúʼko̱ (Gál. 3:13, 14). Xúʼko̱ maguánú mbuyáá rí na̱nguá nindxu̱u̱ mbáa xa̱bu̱ bi̱ nagudíin a̱ngui̱i̱n, mbuyáá rí nindxu̱u̱ mbáa bi̱ maʼni káwíin.

Tséʼniuu asndu xkáʼnii ma numuu rí niʼthí Jesús náa ajngáa rúʼko̱, ikhaa ndiʼyoo rí makhañúu náa mbá ixi̱ ga̱jma̱a̱ mambanúu rí nandoo Jeobá. Nda̱wa̱á rí niʼthí ajngáa rígi̱: “Nimbánuu rá” (Juan 19:30; Luc. 22:37). Xúʼko̱ Jeobá táñawu̱u̱n ga̱jma̱a̱ nindoo manimbánuu náa tsu̱du̱ʼ ku̱ba̱ʼ rígi̱, ga̱jma̱a̱ xúʼko̱ nigíminaʼ mu manimbánuu “xúgíʼ rí kiʼniraʼmáʼ” ga̱jma̱a̱ numuu ikhaa “náa xtángoo ndrígóo Moisés náa rí ninirámáʼ gaʼyee ga̱jma̱a̱ rí naʼthí náa Salmos” (Luc. 24:44).