1, 2. Ndiéjunʼ xkri̱da ma̱ndoo mambáyulú mu mikru̱ʼu̱lú rí naʼthí náa 1 Pedro 2:21 rá.

GUNDXAʼWAMÍJNA̱ dí rígá náa na̱jkua̱lú mu muʼni gagimijná ga̱jma̱a̱ ndayóoʼ manújngulú náa desierto náa dí tséʼyalú. Mú na̱jkha̱ mbáa ginii bi̱ naxná ikhulú ga̱jma̱a̱ na̱jkua̱ náa ikhaa nikujmaa ni̱jkha̱. Ga̱jma̱a̱ nda̱a̱ tsu̱ma̱ nijngudi̱i̱ huella ndrígóo, mú tsémiñulu numuu rí mbaʼáánʼ ga̱jma̱a̱ nuʼni tsiakimijna mu̱ʼgua̱ má xúʼko̱ náa ni̱jkha̱ bi̱ ndaʼya ikhí.

² Xóo muʼthá, bi̱ ni̱ndxu̱lú cristiano kuwáanʼ náa mbá numbaaʼ xkawiʼ rígi̱ náa migamíi wéñuʼ. Núma̱aʼ má Jeobá rí nixniúlú A̱ʼdióo bi̱ nindxu̱u̱ Jesucristo mu xúʼko̱ “mbuʼyaridáá tsumáá rí niʼni ikhaa” (1 Ped. 2:21). Náa tikhuu Biblia naʼthí dí Pedro naʼnimbríguíi̱ Jesús xóo mbáa bi̱ naxná ikhulú. Xóo má mbá nguáthi̱i̱n xa̱bu̱ bi̱ nagún náa rí tséya, mú ma̱ndoo magún náa ni̱jkha̱ bi̱ ndiʼya, xúʼko̱ má mangáanʼ ma̱ndoo mbuʼyaridáálú xkri̱doo Jesús dí ikhaa niniñuuʼ. Mú ndiéjunʼ nindxu̱u̱ rá. Xú káʼnii gándoo gúʼyaridáá xá. Ga̱jma̱a̱ xú káʼnii gándoo gúʼni rá.

3. Ndiéjunʼ eyoo gáʼthúu̱n dí mi̱dxu̱ʼ kidxuuʼ mbáa rá.

³ Ndiéjunʼ eyoo gáʼthúu̱n dí mi̱dxu̱ʼ kidxuuʼ mbáa rá. Ajngáa rí majngruiga̱, náa Biblia nandoo gáʼthúu̱n rí niʼni mbáa náa xúgíʼ mbiʼi rí nixtáa (Gén. 6:9; Prov. 4:26). Xkridoo mbáa xa̱bu̱ ma̱ndoo maʼnimbríguíi̱ ga̱jma̱a̱ mbá huella náa nikujmaa nijkha. Ikha jngóo dí mu̱ʼgua̱ kidxuuʼ mbáa nandoo gáʼthúu̱n dí mbuʼyaridáá xkridoo.

4. Ndiéjunʼ eyoo gáʼthúu̱n dí mu̱ʼgua̱ kidxuuʼ Jesús rá.

 ⁴ Ndiéjunʼ eyoo gáʼthúu̱n dí mu̱ʼgua̱ kidxuuʼ Jesús rá. Xóo muʼthá mbuʼyaridáá xkri̱da rí nigíʼ. Náa texto rí kayá edxu̱u̱ artículo rígi̱, apóstol Pedro niʼthí xkri̱da dí niniñuuʼ Jesús índo̱ nimínuuʼ. Mú rígá i̱ʼwáʼ náa rí ma̱ndoo mbuyaridáá Jesús (1 Ped. 2:18-25). Xúgíʼ dí niʼni Jesús ga̱jma̱a̱ dí niʼthí náa xúgíʼ vida ndrígóo ninindxu̱u̱ mbá májánʼ xkri̱da náa ikháanʼlu.

5. Arathá náá numuu rí xúgiáanʼ ma̱ndoo mbuʼyaridáá xkri̱doo Jesús maski ajndu ni̱ndxu̱lú xa̱bu̱ aʼkhá.

⁵ Lá ma̱ndoo mbuʼyaridáá xkri̱doo Jesús ikháanʼ bi̱ ni̱ndxu̱lú xa̱bu̱ aʼkhá ráʼ. Ma̱ndoo, mú Pedro táʼthí dí muʼni ikháá má kayuuʼ xóo má niʼni Jesús, mu niʼthí rí ma̱ndoo mbuʼyaridáá. Á mu nuʼni tsiakimijna mu̱ʼni̱ xúgíʼ xóo má naʼngo̱o̱ mu mu̱ʼgua̱ kidxuuʼ, xúʼko̱ kuwáanʼ ruʼnimbáníí consejo ndrígóo apóstol Juan dí gíʼmáanʼ mbuʼyaridáá xóo má niʼni Jesús (1 Juan 2:6).

6, 7. Náá numuu rí, á mu najkua kidxuuʼ Jesús naʼni rí makuwáanʼ itháan mijngii náa Jeobá rá.

⁶ Á mu na̱jkua̱ kidxuuʼ Jesús, makuwáanʼ mijngii náa Jeobá. Náá numuu rá. Timbá numuu, Jesús niniñuuʼ mbá májánʼ xkri̱da rí xóo makuwáanʼ rí naniguuʼ Dios (Juan 8:29). Ikha jngóo, á mu na̱jkua̱ kidxuuʼ Jesús, Jeobá maʼdxuu ga̱jma̱á ni̱ndxu̱lú. Phú gajkhun rí Jeobá ma̱ʼkha̱ kanuu náa ikháanʼ á mu nuʼnimíjna̱ mambajxú gajmiúlú ikhaa (Sant. 4:8).

⁷ Dí maʼni ragajma, rí Jesús ndiʼyaridoo anu̱u̱ xóo má nindxu̱u̱ ikhaa. Ikha jngóo niʼthí: “Bi̱ ndiʼyoʼ ikhúúnʼ ndiʼyoo má Anu̱ʼ ma̱ngaa” (Juan 14:9). Nduʼyaridáá Jeobá índo̱ nuʼniu̱u̱n eʼwíinʼ xó má niʼniún xa̱bu̱ Jesús, mbá xkri̱da índo̱ nigáwi̱i̱nʼ a̱jkiu̱u̱n kaʼyoo mbáa xa̱bu̱ bi̱ naʼniuu nandii lepra ma̱ngaa nigáwi̱i̱nʼ a̱jkiu̱u̱n kaʼyoo mbáa a̱ʼgu̱ bi̱ naʼniuu  nandii mbiʼ ga̱jma̱a̱ nigáwi̱i̱nʼ a̱jkiu̱u̱n kaʼñún bi̱ nikháñúún a̱ngiu̱ún (Mar. 1:40, 41; 5:25-34; Juan 11:33-35). Índo̱ nuʼni tsiakimijna mbuʼyaridáá itháán Jeobá, itháán májánʼ embájxu gajmiúlú.

8. Arathá náá numuu, á mu najkua kidxuuʼ Jesús mambáyulú “muʼdaaʼ náa numbaaʼ”.

⁸ Á mu najkua kidxuuʼ Jesús, xúʼko̱ xúʼni̱ jngarígamijná ga̱jma̱a̱ dí rígá náa numbaaʼ xkawiʼ rígi̱. Iwáá mbruʼun dí Jesús nixtáa náa tsu̱du̱u̱ ku̱ba̱ʼ nindoo niʼthí: “Niʼngoʼ nidaaʼ náa numbaaʼ” (Juan 16:33). Gi̱i̱ nduʼyáá kaʼwu dí ikhaa na̱nguá niraʼwíí maʼni xóo dí rígá náa numbaaʼ ga̱jma̱a̱ rí mandxaʼwáminaʼ. Ikhaa niʼni tsiakimínáʼ maʼnimbánuu dí phú ni̱ʼkha̱ gáʼni náa tsu̱du̱u̱ ku̱ba̱ʼ: Rí maʼni kaʼwi̱i̱ mbiʼyuu Jeobá ga̱jma̱a̱ rí ikhaa kaʼyoo maʼtá ñajunʼ. Ikháanʼlu rá. Rígá mbaʼa rí ma̱ndoo maʼnijngarígáánʼ. Mú á mu nuʼnimíjna muʼni ginii ñajuunʼ Jeobá, xóo má niʼni Jesús, mangáanʼ maʼngulú “muʼdaaʼ náa numbaaʼ” (1 Juan 5:5).

9. Ndiéjunʼ gíʼmaa mu̱ʼni̱ mu xandatígulu rí makuwáanʼ kámuu mbiʼi rá.

⁹ Á mu najkua kidxuuʼ Jesús makuwáanʼ kámuu mbiʼi. Índo̱ dxámá bi̱ gíʼdoo wéñuʼ nirajxu̱u̱ Jesús ndiéjunʼ rí gíʼmaa maʼni mu maxtáa kámuu mbiʼi, ikhaa niriʼñuu: “Ayi̱ mu ma̱nindxa̱a̱ʼ xa̱bi̱ʼ” (Mat. 19:16-21). Jesús niʼthún tikhun Judíos bi̱ tsénimbu̱ún rí ikhaa nindxu̱u̱ Cristo: “Mugiu̱ʼ [...] nagún ki̱dxu̱ʼ. Ga̱jma̱a̱ ikhúún nani rí makuwá kámuu mbiʼi” (Juan 10:24-29). Ga̱jma̱a̱ Nicodemo mbáa bi̱ kayá edxu̱u̱ náa Sanedrín bi̱ nindoo mbaʼyoo rí Jesús naʼsngáa, niʼthúu̱n rí xa̱bu̱ bi̱ nusngajma fe náa ikhaa, makuwá kámuu mbiʼi (Juan 3:16). Nusngajmá rí guaʼdáá fe náa Jesús índo̱ nu̱ʼni̱ dí ikhaa niʼsngáa ga̱jma̱a̱ xkri̱da dí nigíʼ. Á mu nuʼni̱ rígi̱, xúʼko̱ makuwáanʼ kámuu mbiʼi (Mat. 7:14).

10. Ndiéjunʼ gíʼmaa mu̱ʼni̱ mu muniʼniiʼ májánʼ Jesús rá. (Juan 17:3.)

¹⁰ Mu mu̱ʼgua̱ má xúʼko̱ kidxuuʼ Jesús, ginii ndayóoʼ muniʼniiʼ májánʼ (atraxnuu Juan 17:3). * Mu muniʼníiʼ májánʼ Jesús, ndayóoʼ muʼgímíjná muniʼníiʼ tsejtsí mbiʼi, xóo muʼthá majmañulú cualidad ndrígóo, xóo nandxa̱ʼwáminaʼ ga̱jma̱a̱ xtángoo ndrígóo. Tséʼniuu á mu mba̱yuuʼ má kuwáanʼ ruʼnigajmaa Biblia o na̱nguá, xúgiáanʼ gíʼmaa muʼni tsiakimijna muniʼníiʼ Jeobá ga̱jma̱a̱ A̱ʼdióo.

11. Dí eʼthí náa a̱jkhu̱ Evangelio rá.

¹¹ Jeobá nandoo kaʼyulú wéñuʼ, ikha jngóo niniñuuʼ dí magumaraʼmáʼ náa mbá nájkhu̱ Evangelio Ajngóo, mu xúʼko̱ ma̱ndoo muniʼníiʼ májánʼ A̱ʼdióo. Numuu dí ikhí naʼtulúʼ rí niʼthí Jesús, rí nikumu̱u̱ ga̱jma̱a̱ dí niʼni. Nájkhu̱ libro  rígi̱ nambáyulú mundxaʼwamíjna̱ má xúʼko̱ xkri̱doo Jesús (Heb. 12:3). Á mu nuraxnuu Evangelio rígi̱, ikhí ma̱ndoo muniʼníiʼ itháán májánʼ Jesús ga̱jma̱a̱ rí xóo nixtáa ma̱ngaa dí mbuʼyaridáá.

12. Ndiéjunʼ gáʼyóoʼ mu̱ʼni̱ mu mikruʼulú rí naʼthí náa Evangelios rá.

¹² Mu makruʼulú májánʼ Evangelio, raʼkháa i̱ndó ndayóoʼ muraxnuu. Ndayóoʼ muríyaʼ mbiʼi dí muʼnigajmaa má xúʼko̱ ma̱ngaa rí mundxaʼwamíjna̱ (atayáá ma̱ngaa Josué 1:8). Guʼyáá a̱jma̱ rí ma̱ndoo mambáyulú mu mundxaʼwamíjna̱ índo̱ nuraxnuu Evangelio ma̱ngaa rí muʼgíʼ mu̱ʼni̱.

13. Xú káʼnii gúʼni mu makumulú rí asndu xóo ikháanʼ kuwáanʼ ikhí, índo̱ nuraxnuu Evangelios rá.

¹³ Timbá, gakumulú rí xóo ikháanʼ kuwáanʼ ikhí dí naʼthí náa Evangelio. Gundxaʼwamíjna̱ mu mbuʼyáá, guʼdxawíín ga̱jma̱a̱ gakumulú xúgíʼ dí xtáa rarígá mbájndi náa kuwáanʼ. Ma̱ngaa rí mambáyulú wéñuʼ nindxu̱u̱ dí mbuʼyáʼ náa i̱yi̱i̱ʼ dí naguwíi xuajñuu Jeobá. Guʼyáʼ itháán ga̱jma̱a̱ numuu dí kuwáanʼlu ruraxnuu. Guʼyáʼ ga̱jma̱a̱ numún xa̱bu̱ bi̱ na̱ʼkha̱ raʼthí ikhí, náa nikúwi̱i̱n ga̱jma̱a̱ ndiéjunʼ nirígá ginii ga̱jma̱a̱ nda̱wa̱á dí naʼthí náa kuwáanʼ ruraxnuu. Á mu kuwáanʼ ruraxnuu mbá Evangelio, guʼni mbríguii ga̱jma̱a̱ imbo̱ʼ mbáa ikhí naʼthí itháán náa rí eʼwíinʼ na̱nguá niniraʼmáʼ.

14, 15. Ndiéjunʼ gíʼmaa mu̱ʼni̱ mu muʼgíʼ muʼnimbánii dí naʼthí náa Evangelios rá.

¹⁴ Ragajma, guʼgíʼ muʼnimbánii dí naʼthí náa Evangelios. (Juan 13:17). Nda̱wa̱á dí niʼnigajmaa Evangelio guraximíjna̱: “Ndiéjunʼ eʼsngóʼ ikhúún rígi̱ rá. Xú káʼnii gájmuʼ rígi̱ mu mambáyúu imba̱a̱ rá.” Gundxaʼwamíjna̱ ga̱jma̱a̱ numuu mbáa bi̱ ma̱ndoo mambáyúu, índo̱ gándoo, guʼtháán tsumáá ga̱jma̱a̱ gamajkhu ikha dí nijmañulúʼ náa niraxnuu.

¹⁵ Guʼyáá mbá xkri̱da xú káʼnii gándoo muʼgíʼ muʼnimbáníí a̱jma̱ xkri̱da rígi̱. Gi̱i̱ majmañulú ga̱jma̱a̱ numuu a̱ʼgú xuáʼa̱ bi̱ gínáa bi̱ Jesús ndiʼyoo náa templo.

16. Arathá dí na̱ʼkha̱ raʼthí náa Marcos 12:41.

¹⁶ Gakumulúʼ xóo ikháanʼ kuwáanʼ dí naʼthí náa Marcos 12:41 (atraxnuu). * Atatsaʼwáminaʼ dí nirígá. Nákha 11 ñajunʼ gu̱nʼ nisán tsiguʼ 33. Ní tséʼni má imbá xmáná rí makhañúu Jesús, ikhaa nixtáa raʼsngáa xúgíʼ mbiʼi náa templo. Bi̱ kuya̱ edxu̱u̱ náa guʼwá dxájkuun nindri̱ga̱ tsáʼkhá náa inuu. Ga̱jma̱a̱ tikhun nithi dí ikhaa rakáʼyoo maʼtáñajunʼ ma̱ngaa eʼwíinʼ nini̱i̱ graxe̱ mu mbuyáá á mu najmañuu, mu xúʼko̱ ma̱ndoo murugua̱a̱ (Mar. 11:27-33; 12:13-34). Índo̱ Jesús ndiʼyoo rígi̱, ikhú ni̱jkha̱ mbríʼkhá, mbáa náa nawi̱i̱n gu̱ʼu̱. Numuu rí ikhí ma̱ndoo mbaʼyoo caja náa najti mbújkha̱a̱. Nagi̱ʼi̱ ga̱jma̱a̱ ndaʼñún xa̱bu̱ bi̱ nundri̱ya̱ʼ mbújkha̱a̱. Ndaʼñún rí mbaʼin xa̱bu̱ bi̱ guaʼdáá nundri̱ya̱ʼ mba̱a̱ mbújkha̱a̱. Mbáa ikhaa gíʼ mijngii ikhí ga̱jma̱a̱ naʼngo̱o̱ naʼdxaun índo̱ nundri̱ya̱ʼ mbújkha̱a̱ náa caja.

17. Ndiéjunʼ niʼni a̱ʼgú xuáʼa̱ bi̱ na̱ʼkha̱ raʼthí náa Marcos 12:42 rá.

¹⁷ (Atraxnuu Marcos 12:42). * Ikhú ndaʼyoo Jesús mbáa “a̱ʼgú xuáʼa̱ bi̱ gínáa” (Luc. 21:2). A̱ʼgú xuáʼa̱ bugi̱, ra̱ʼkhá tháán ngíná xtáa numuu rí na̱nguá gíʼdoo mba̱a̱ mbújkha̱a̱ mu maxtáa ga̱jma̱a̱. Maski ajndu xúʼko̱, ikhaa na̱jkha̱ náa caja ga̱jma̱a̱ tséʼnimbamínaʼ índo̱ narajkhuaa mbújkha̱a̱ rí na̱nguá gíʼdoo wéñuʼ numuu, dí lucha̱á má ewán índo̱ narajkuáa mbújkha̱a̱. Mú Jesús ndaʼyoo mbújkha̱a̱ dí nirajkhuáa a̱ʼgu̱ bugi̱ ga̱jma̱a̱ na̱nguá gíʼdoo wéñuʼ numuu nákha ikhú, nindxu̱u̱ a̱jma̱ leptón. Dí asndu na̱nguá eʼngo̱o̱ mu maratsi̱i̱ mbáa ñu̱ʼu̱ chíʼgíiʼ bi̱ naxtángujui̱i̱n mu miʼtsún.

18. Xó má naʼthí Marcos 12:43, 44, ndiéjunʼ niʼthí Jesús ga̱jma̱a̱ numuu mbújkha̱a̱ dí nirajkuáa a̱ʼgú xuáʼa̱ rá.

¹⁸ (Atraxnuu Marcos 12:43, 44). * Índo̱ Jesús ndiʼyoo a̱ʼgú xuáʼa̱ niʼniuu wéñuʼ tsiánguá. Ikha jngóo nindxaʼwún xa̱bi̱i̱ niʼthún: “Nathala gajkhun rí a̱ʼgú xuáʼa̱ gínáa bugi̱, nigruiʼyáʼ itháan mbújkha̱a̱ ki xóo eʼwíinʼ”. Niʼthúún xóó: “Xúgíinʼ ikhiin [bi̱ guáʼdáá] nixna rí napídu̱ún eni̱, mú a̱ʼgu̱ maski ajndu migínáa, nigruiʼyáʼ xúgíʼ, xúgíʼ rí gíʼdoo mu maxtáa ga̱jma̱a̱”. Mbiʼi rúʼko̱, índo̱ a̱ʼgú xuáʼa̱ nirajkuáa iwáá mbújkha̱a̱ dí gíʼdoo mu maxtáa ga̱jma̱a̱, ikhaa nisngájma dí nikumu̱u̱ kaʼyoo Jeobá dí ikhaa má gáñewu̱u̱n (Sal. 26:3).

19. Ndiéjunʼ ikha dí gíʼdoo wéñuʼ numuu gándoo majmañulú dí niʼthí Jesús numuu a̱ʼgú xuáʼa̱ rá.

¹⁹ Guʼgíʼ muʼnimbáníí dí niraxnuu. Guraximíjna̱: “Ndiéjunʼ gándoo gajmañuʼ dí niʼthí Jesús ga̱jma̱a̱ numuu a̱ʼgú xuáʼa̱ bugi̱ rá.” Gajkhun má, ikhaa nindoo maxnúu itháán Jeobá. Maski ajndu xúʼko̱, ikhaa niʼni xúgíʼ xó má niʼngo̱o̱ dí maxnúu Jeobá rí itháán májánʼ dí gíʼdoo. Jesús niʼthí rí a̱ʼgú xuáʼa̱ bugi̱ nixnúu Jeobá rí itháán gíʼdoo numuu. Rígi̱ naʼsngúlú mbá ikha rí gíʼdoo wéñuʼ numuu: “Dí Jeobá naniguuʼ muxnáá rí itháán májánʼ, dí mu̱ʼni̱ ñajuunʼ ga̱jma̱a̱ xúgíʼ a̱jkiu̱lú (Mat. 22:37; Col. 3:23). Jeobá naxtáa gagi índo̱ nuʼni xúgíʼ xó má eʼngulú mu mu̱ʼni̱ ñajuunʼ. Rígi̱ nandoo gáʼthúu̱n dí muríyaʼ mbiʼi, tsiakii mu mu̱ʼni̱ ñajuunʼ ikhaa, mbá xkri̱da xóo índo̱ na̱jkua̱lú guʼtáraʼa o índo̱ na̱jkua̱ reunión.

20. Xú káʼnii gándoo guʼgíʼ muʼnimbáníí dí najmañulú ga̱jma̱a̱ numuu a̱ʼgú xuáʼa̱ rá. Arathá mbá xkri̱da.

²⁰ Xú káʼnii gándoo guʼgíʼ muʼnimbáníí dí najmañulú ga̱jma̱a̱ numuu a̱ʼgú xuáʼa̱ rá. Gundxaʼwamíjna̱  ga̱jma̱a̱ numún tikhun a̱ngiu̱lú, dí májánʼ gáʼni dí mu̱ʼni̱ marmáʼáan a̱jkiu̱ún dí Jeobá naxtáa gagi dí ikhiin nu̱ni̱. Mbá xkri̱da, lá nuniʼníiʼ mbáa ndxájulú a̱ʼgu̱ bi̱ nikhi̱i̱ bi̱ naku̱mu̱u̱ rí nánguá ejmaa maʼni o nánguá eʼngo̱o̱ gáʼtaraʼa xóo nákha ginii ráʼ. O lá nunuʼwíin mbáa ndxájulú bi̱ gíʼdoo nandii mbiiʼ ga̱jma̱a̱ nánguá eʼngo̱o̱ gáʼga̱ xúgíʼ reunión ga̱jma̱a̱ rúʼko̱ dí naʼni makáguabaaʼ xáʼ. Guxnáá tsiakii (Efes. 4:29). Guʼtháán ga̱jma̱a̱ numuu rí nijmañulúʼ náa xkri̱da ndrígóo a̱ʼgú xuáʼa̱ bi̱ gínáa. Rúʼko̱ gáʼni dí marmáʼáan a̱jkiu̱u̱n dí Jeobá naxtáa gagi, á mu nu̱ʼni̱ xúgíʼ xó má eʼngo̱o̱ (Prov. 15:23; 1 Tes. 5:11). Índo̱ nuʼthúún eʼwíinʼ dí májánʼ eni̱ ga̱jma̱a̱ rí ikhiin nuni tsiakimijna muni̱ ñajuunʼ Jeobá xóo má kaʼyoo. Maski ajndu makujmaa dí ragíʼdoo numuu dí nuʼthá, mú xígi̱ nusngajma dí nduʼyaridáá Jesús.

21. Ndiéjunʼ xtaa xawii mu matani ikháán rá.

²¹ Nadxulú wéñuʼ dí náa Evangelios na̱ʼkha̱ kuduun rí xóo nixtáa Jesús ga̱jma̱a̱ xúʼko̱ ma̱ndoo mbuʼyaridáá. Ra̱ʼkhá tháán májánʼ gánindxu̱u̱ á mu nuriyaʼ awan muʼnigajmaa mbá guʼwáanʼ o ndajkhuáan Evangelio rígi̱. Mu mikru̱ʼu̱lú májánʼ, ndayóoʼ dí makumulú rí xóo ikháanʼ kuwáanʼ dí naʼthí ikhí ga̱jma̱a̱ rí muʼgíʼ mu̱ʼni̱. Raʼkháa i̱ndó ndayóoʼ mbuyaridáá Jesús dí niʼni, rí itháán gíʼdoo numuu rí muʼdxawíín dí niʼthí. Náa imbo̱ʼ artículo mbuʼyáá rí gándoo gajmañulú dí niʼthí Jesús índo̱ ikhaa krájkaa náa ixi̱.