1, 2. Dí eyoo gáʼthúu̱n rí najuiʼtsiwáánʼ ga̱jma̱a̱ náá numuu rí ndayúlú rá.

ADÁN bi̱ ninindxu̱u̱ xa̱bu̱ jmbii ni̱jkha̱nú nikudaminaʼ aʼkhá ga̱jma̱a̱ nindáti̱go̱o̱ rí maxtáa kámuu mbiʼi, mú raʼkháa i̱ndó ikhaa mangiin e̱ji̱i̱n. Ikha jngóo, aʼkhá ndrígóo Adán niʼni rí nimbáa xáʼngo̱o̱ gáʼnikríyaminaʼ ikhí. Mú e̱ji̱i̱n xá. Ikhiin nda̱a̱ dí nini̱, na̱nguá kuáʼdáá aʼkhúún (Rom. 5:12, 14). Mú, lá ma̱ndoo maguma núma̱aʼ aʼkhá rí nikudaminaʼ Adán ráʼ. Xúʼko̱, numuu rí nguáthá mbiʼi nda̱wa̱á, índo̱ nikiéʼkhun Adán, Jeobá niʼthí rí maʼnikáwiin mbaʼin wéñuʼ xa̱bu̱ náa aʼkhá ga̱jma̱a̱ náa rí nakháñulú (Gén. 3:15). Ikha jngóo Jeobá nikuʼmaa A̱ʼdióo asndu mekhuíí, “mu maxná vida ndrígóo mu maʼtsiwíin mbaʼin xa̱bu̱” (Marcos 10:45; Juan 6:51).

² Ndiéjunʼ nindxu̱u̱ rí najuiʼtsiwáánʼ rá. Índo̱ naʼthí náa Escrituras griegas cristianas rí nijuiʼtsiwáanʼ, nandoo gáʼthúu̱n dí ra̱ʼkhá tháán minumuu niʼtsiwáánʼlú Jesús náa rí Adán nindáti̱go̱o̱ (1 Cor. 15:22). Náá numuu rí ndayúlú majuiʼtsiwáánʼ rá. Numuu rí Jeobá nindxu̱u̱ jmbii ga̱jma̱a̱ xtángoo ndrígóo naʼthí rí gíʼmaa majuixná ikhaa má vida, mu xúʼko̱ majuiʼni núma̱aʼ (Éx. 21:23, 24). Adán nitígo̱o̱ vida ndrígóo dí ragíʼdoo aʼkhá, mu mambanúu rí niʼthí náa xtángoo ndrígóo Dios. Ikha jngóo Jesús nixná vida ndrígóo rí nindxu̱u̱ jmbu (Rom. 5:17). Ga̱jma̱a̱ xúʼko̱ na̱jkha̱nú nambánúu rí naʼthí “Anu̱lú bi̱ xtáa Kámuu” náa xúgíi̱nʼ bi̱ guáʼdáá fe náa tsigijñaʼ (Isa. 9:6; Rom. 3:23, 24).

3. Xó má naʼthí náa Juan 14:31 ga̱jma̱a̱ 15:13, ndíjkha rí Jesús nixtáa xawii mu maxnájxi̱ vida ndrígóo rá.

³ Jesús nixtáa xawii mu makhañúu ga̱jma̱a̱ numulú, numuu dí ra̱ʼkhá tháán nindoo kaʼyoo anu̱u̱ bi̱ xtáa mekhuíí ga̱jma̱a̱ ikháanʼlu (atraxnuu Juan 14:31; * 15:13). * Ngajua rúʼko̱  nixkajxi̱i̱ mu mawiji̱ jmbu asndu índo̱ gákháñúu, mu xúʼko̱ maʼnimbánuu dí nandoo Jeobá ga̱jma̱a̱ numún xa̱bu̱ numbaaʼ, asndu nákha ginii. Ikha jngóo náa artículo rígi̱ muʼthá náá numuu rí Dios niniñuuʼ rí Jesús mamínuuʼ nákha xóó tsékháñuu, ma̱ngaa mbuʼyáá xkri̱da ndrígóo mbáa xa̱bu̱ bi̱ niʼnirámáʼ Biblia bi̱ ndiʼyoo rí gíʼdoo wéñuʼ numuu tsigijñaʼ, nda̱wa̱á kayuuʼ muʼthálú xú káʼnii gándoo gúsngajma rí nuxnáa núma̱aʼ rí nijuiʼtsiwáánʼlú ma̱ngaa rí musngajmá gamajkhu náa tsigijñaʼ rí Jeobá ga̱jma̱a̱ Jesús ni̱ni̱ ga̱jma̱á numulú.

4. Arathá xóo nikháñuu Jesús.

⁴ Atatsaʼwáminaʼ xú káʼnii ninindxu̱u̱ vida ndrígóo Jesús, índo̱ nixtáa iwáá mbiʼi náa tsu̱du̱u̱ ku̱ba̱ʼ. Ikhaa ma̱ndoo ma̱ndo̱ʼo̱o̱ Anu̱u̱ mu makugui̱i̱nʼ mbaʼin wéñuʼ ángeles mu muñewa̱a̱n, mú ikhaa niniñaminaʼ rí marugua̱a̱ soldados romanos ga̱jma̱a̱ asndu tagáwi̱i̱nʼ a̱jkiu̱ún índo̱ nixnaá (Mat. 26:52-54; Juan 18:3; 19:1). Ga̱jma̱a̱ nijmún mbá jñuu mu muxnáá ga̱jma̱a̱ nda̱wa̱á nixnáá magu̱ mbá ixi̱ ga̱jma̱a̱ rúʼko̱ niʼnigawúunʼ tsu̱du̱u̱, ikhú Jesús nigíʼdu̱u̱ nixmájtaa asndu maʼga kayóo náa miʼdujmaa, ga̱jma̱a̱ ikhí ndiyáá imba̱a̱ xa̱bu̱ bi̱ nitháán mambáyúu mu maʼga kayóo ixi̱ (Mat. 27:32). Índo̱ Jesús ni̱jkha̱nú náa makhañúu, xa̱bu̱ sia̱nʼ nidujmáá clavo náa ñawúunʼ ga̱jma̱a̱ náa rajkhúu. Índo̱ krámaa náa ixi̱ nigawúunʼ wéñuʼ ñawúunʼ numuu rí mikiwi̱i̱n. Bi̱ nambájxu̱u̱ gajmíi̱n nimbi̱ya̱ʼ, ma̱ngaa ru̱dúu̱, mú Xa̱bu̱ Ñajunʼ judíos nutsijmaa (Lucas 23:32-38; Juan 19:25). Índo̱ nirajkhaa niʼñuu gakhi̱i̱ mu mbayá xi̱ʼ ga̱jma̱a̱ índo̱ ikhaa na̱jkha̱ rakáñuu niʼthí iwáá ajngáa, nda̱wa̱á nirájkha̱a̱ edxu̱u̱ ga̱jma̱a̱ nixnájxi̱ vida ndrígóo náa Anu̱u̱ (Mar. 15:37; Luc. 23:46; Juan 10:17, 18; 19:30). Ra̱ʼkhá tháán nimínuuʼ Jesús índo̱ nikháñuu.

5. Nákha nikháñuu Jesús, ndiéjunʼ rí niʼni maxmiéjuunʼ itháan xá.

⁵ Mú Jesús táxmiéjuunʼ ga̱jma̱a̱ numuu rí nikháñuu náa ixi̱, rí itháan nixmiéjuunʼ nindxu̱u̱ rí ikhaa nitanumáá ga̱jma̱a̱ rí túyamajkuíí mbiʼyuu Dios (Mat. 26:64-66). Ikhaa rígi̱ niʼni dí maxmiéjuunʼ Jesús ga̱jma̱a̱ nigi̱ʼthu̱u̱n rí Anu̱u̱ maʼnikríyaaʼ náa gamiéjunʼ rígi̱ (Mat. 26:38, 39, 42). Ndíjkha jngóo rí Jeobá niniñuuʼ rí A̱ʼdióo bi̱ nandoo kaʼyoo mamínuuʼ ga̱jma̱a̱ makhañúu xá. Guʼyáá mbá ajtsú numuu.

6. Náá numuu rí Jesús ndiyóoʼ miʼdujmaa náa ixi̱ rá.

⁶ Timbá, Jesús ndiyóoʼ makhañúu náa mbá ixi̱ mu xúʼko̱ maʼnikáwíin judíos náa nijuiʼthá tsríguíin (Gál. 3:10, 13). Numuu rí ikhiin nithi rí munimbaníí xtángoo ndrígóo Dios, mú na̱nguá nini̱. Ikha jngóo ikhiin kaʼñún makhañún numuu rí ni̱ndxu̱ún e̱ji̱i̱n Adán ga̱jma̱a̱ mangiin nini̱ aʼkhá (Rom. 5:12). Náa xtángoo ndrígóo Dios rí nijuixnún xa̱bu̱ Israel naʼthí rí á mu mbáa xa̱bu̱ nakudaminaʼ aʼkhá kaʼyoo rí makhañúu ga̱jma̱a̱ rí mafrajkhaa náa ixi̱ (Deut. 21:22, 23; 27:26). * Ikha jngóo índo̱ Jesús nikháñu náa ixi̱ nimbáñún mangiin judíos.

7. Dí maʼni raga̱jma̱ numuu, ndíjkha rí Dios niniñuuʼ rí A̱ʼdióo mamínuuʼ rá.

⁷ Dí maʼni raga̱jma̱, nindxu̱u̱ rí Dios niniñuuʼ rí A̱ʼdióo mamínuuʼ. Ikhaa niʼnirathaa Jesús mu magruigú mbá ñajunʼ kiejunʼ nda̱wa̱á, rí mani̱ndxu̱u̱ ndxajkun bi̱ mbayá edxu̱u̱, Jesús ndiʼyoo májánʼ dí gakhi̱i̱ nindxu̱u̱ dí maʼnimbo̱o̱ kaʼyoo Anu̱u̱ índo̱ nixtáa náa awúu̱n xkujndu. Ikha jngóo niʼtákáñuu mu mambáyúu ‹ga̱jma̱a̱ niʼthí gakhi̱i̱ asndu nigajtaa iyooʼ iduu›, ikhaa niʼngo̱o̱ náa mbaʼa xkujndu, Jesús nakro̱ʼo̱o̱ ndiéjunʼ rí ndayúlú ga̱jma̱a̱ “nandoo  mambáyulú [índo̱] kuwáanʼ náa mbá xkujndu”. Ra̱ʼkhá tháán exnáa núma̱aʼlú Jeobá, numuu rí nigíiʼ Jesús xóo Ndxajkuun bi̱ phú kayá Edxu̱u̱ bi̱ ra̱ʼkhá tháán májánʼ a̱jkiu̱u̱n “bi̱ nakro̱ʼo̱o̱ xóo kuwáanʼ” (Heb. 2:17, 18; 4:14-16; 5:7-10).

8. Xú káʼnii rí maʼni ragajtsú numuu rí Dios niniñuuʼ dí Jesús mamínuuʼ wéñuʼ rá.

⁸ Ragajtsú numuu dí Jeobá niniñuuʼ dí Jesús mamínuuʼ wéñuʼ, mu xúʼko̱ ma̱ndoo maxtiʼña̱a̱ graxe̱ rígi̱ rí gíʼdoo wéñuʼ numuu: Lá ma̱ndoo mbáa xa̱bu̱ aʼkhá maʼni ñajuunʼ Dios maski ajndu mamínuuʼ wéñuʼ ráʼ. ¡Gixa̱a̱ naʼthí rí na̱nguá! Ikhaa naʼthí rí xa̱bu̱ nuni̱ ñajuunʼ Dios numuu dí rígá rí naxnún. Ga̱jma̱a̱ naku̱mu̱u̱ rí ikhiin xáʼndúún muni̱ ñajuunʼ Jeobá xó má niʼni Adán (Job 1:9-11; 2:4, 5). Mú, índo̱ nduʼyáá rí Jesús niʼngo̱o̱ niwi̱ji̱ jmbu ga̱jma̱a̱ rí Jeobá niniñuuʼ mamínuuʼ wéñuuʼ xó má mbáa xa̱bu̱. Jesús niwi̱ji̱ jmbu ga̱jma̱a̱ xúʼko̱ nisngájma rí Gixa̱a̱ nindxu̱u̱ mbáa bi̱ minduwaaʼ.

9. Ndiéjunʼ xkri̱da nigíʼ apóstol Juan rá.

⁹ Fe rí niguáʼdáá mbaʼin cristianos nimbáñún wéñuʼ ga̱jma̱a̱ numuu rí nijmañún rí nijuiʼtsiwíin, ga̱jma̱a̱ túniña̱a̱ʼ rutaraʼa maski ajndu nijuixkúún ga̱jma̱a̱ niʼngu̱u̱n niraʼníí mbaʼa tsáʼkhá asndu índo̱ niganii. Guʼyáá mbá xkri̱da, ga̱jma̱a̱ numuu apóstol Juan, ikhaa niʼtáraʼaʼ dí gajkhun ga̱jma̱a̱ numuu Cristo ma̱ngaa niʼsngáa ga̱jma̱a̱ numuu tsigijñaʼ ndrígóo itháan rí 60 tsiguʼ. Índo̱ ikhaa nigiʼdoo 90 tsiguuʼ, xa̱bu̱ nikumu̱ún rí Juan nindxu̱u̱ mbáa xa̱bu̱ ra̱májáanʼ, ikha jngóo Xa̱bu̱ Ñajunʼ romanos nixuda̱a̱ʼ guʼwá e̱jua̱nʼ náa isla ndrígóo Patmos. Ndiéjunʼ dí raʼkhí niʼni xá. Numuu rí i̱ndó niʼthí “ga̱jma̱a̱ numuu Dios ma̱ngaa rí niʼni Jesús” (Apoc. 1:9). ¡Ra̱ʼkhá tháán májánʼ xkri̱da rí nigíʼ ga̱jma̱a̱ numuu fe ndrígóo ga̱jma̱a̱ rí niʼngo̱o̱!

10. Xú káʼnii nisngájma rí ndiʼyamajkuu Juan dí nijuiʼtsiriya̱a̱ʼ dí niniraʼmáʼ náa libro ndrígóo xá.

¹⁰ Náa i̱yi̱i̱ʼ dí niniraʼmáʼ Juan, naʼthí dí ra̱ʼkhá tháán nindoo kaʼyoo Jesús ga̱jma̱a̱ ndiʼyamajkuu tsigijñaʼ rí nixnájxi̱ ikhaa. Ikhí niʼthí mbá 100 nuthu rí nijuiʼtsiwáanʼ, ikha jngóo Juan niʼthí: “Á mu mbáa nikudaminaʼ aʼkhá, Anu̱lú nixnáa mbáa bi̱ ma̱ndoo mambáyulúʼ, ikhaa nindxu̱u̱ Jesucristo, mbáa bi̱ nindxu̱u̱ jmbii” (1 Juan 2:1, 2). Náa niʼnirámáʼ Juan, ikhí naʼthí rí gíʼdoo wéñuʼ numuu, “muʼthá ga̱jma̱a̱ numuu Jesús” (Apoc. 19:10). Gi̱i̱ nakujmaa kaʼwu rí Juan ndiʼyamajkuu tsigijñaʼ ndrígóo Jesús. Xú káʼnii gándoo gusngajmá mangáánʼ rígi̱ rá.

11. Ndiéjunʼ gándoo gámbáyulú mu xájngutíguánʼ náa tsáʼkhá rá.

¹¹ Gaʼngo̱o̱ a̱jkiu̱lú mu xúxuʼdámijná aʼkhá. Á mu dí gajkhun nangajulú rí nijuiʼtsiwáanʼ xúʼni̱ dí raʼkhí ga̱jma̱a̱ xúndxaʼwamíjna xígi̱: “Ndíjkha rí maʼngo̱o̱ a̱jkiu̱nʼ marikhoo índo̱ nagua̱ʼa̱ xuyuʼ ma̱ni̱ aʼkhá rá. Numuu rí ma̱ndoo ma̱ni̱ má xúʼko̱ ñajuunʼ Dios maski asndu nakuʼdáminaʼ aʼkhá, nda̱wa̱á ma̱ndoo manda̱ʼa̱ rí muni̱ mba̱a̱ a̱jkiu̱ún kuyoʼ”. Rí phú gíʼmaa mu̱ʼni̱, índo̱ nagua̱ʼa̱ mu̱ʼni̱ dí raʼkhí, gúʼthá: ¡Xáni rígi̱! Xú káʼnii gándoo manigawúunʼ Jeobá ga̱jma̱a̱ Jesús xúgíʼ rí ikhiin nini̱ ga̱jma̱á numuʼ rá. Ga̱jma̱a̱ munda̱ʼa̱a̱lú Jeobá rí maxnúlú tsiakii, gútháán: “Xátani rí maxpátrígúún náa tsáʼkhá” (Mat. 6:13).

12. Xú káʼnii gándoo guʼnimbáníí consejo rígi̱ rí na̱ʼkha̱ náa 1 Juan 3:16 asndu 18 rá.

¹² Gaʼndaaʼ xtayáá ndxájuáaʼ. Índo̱ nandulú kuʼñúún a̱ngiu̱lú, xúʼko̱ nusngajmá rí nuxnáa núma̱aʼ rí nijuiʼtsiwáanʼ. Náá numuu rá. Numuu rí Jesús nikháñuu ga̱jma̱á numulú xúgiáanʼ. Numuu rí guaʼdáá numún eʼyoo ikhaa  (atraxnuu 1 Juan 3:16-18). * Índo̱ nuʼthúún a̱ngiu̱lú rí mumbáñúún, xúʼko̱ nusngajmá rí nandulú kuʼñúún (Efes. 4:29, 31–5:2). Mbá xkri̱da, numbáñún índo̱ naʼniún nandii, índo̱ kúwá ranújngún náa mbaʼa tsáʼkhá, kúwá rumíníiʼ ga̱jma̱a̱ mbá gamiéjunʼ gakhi̱i̱. Mú ndiéjunʼ gúʼni á mu bi̱ ndiʼkhún gi̱ʼdu̱u̱ ejkha̱ reunión naʼni o naʼthí mbá rí maʼnigawúnʼlú rá.

13. Náá numuu rí gíʼmaa mu̱ʼni̱ mba̱a̱ a̱jkiu̱lú kuʼyamijná rá.

¹³ Lá nakiʼnán xtayáá mbáa bi̱ ndiʼkhún nagíʼdu̱u̱ na̱jkha̱ reunión ráʼ. (Lev. 19:18.) Á mu dí xúʼko̱, atanimbáníí consejo rígi̱: “Gaʼngo̱o̱ a̱jkia̱la kuyamijná ga̱jma̱a̱ gu̱ni̱ mba̱a̱ a̱jkia̱la kuyamijná má xúʼko̱, á mu mbáa naxiéʼkhá ga̱jma̱a̱ numuu i̱mba̱a̱, xó má Jeobá niʼni mba̱a̱ a̱jkiu̱u̱n kaʼyala, xúʼko̱ má gúnila mangáanʼ” (Col. 3:13). Mámbá índo̱ nu̱ʼni̱ mba̱a̱ a̱jkiu̱lú kuʼñúún a̱ngiu̱lú, xúʼko̱ nusngajmá rí nduʼyamajkuíí rí nijuiʼtsiwáanʼ dí nimináanʼlú Anu̱lú bi̱ xtáa mekhuíí. Xú káʼnii gándoo gusngajmá rí nduʼyamajkuíí rí nimínáanʼlu Dios rá.

14. Xú káʼnii gándoo gusngajmá rí nduʼyamajkuíí rí nijuiʼtsiwáanʼ rá.

¹⁴ Guxnáa núma̱aʼ Jeobá rí niʼtsiwáánʼ. Mbáa ndxájulú bi̱ gíʼdoo 83 tsiguuʼ bi̱ mbiʼyuu Joanna bi̱ xtáa náa India, naʼthí: “Dí matajkáan tsejtsí mbiʼi gíʼdoo wéñuʼ numuu dí maxnáa núma̱aʼ Jeobá ga̱jma̱a̱ numuu rí nijuiʼtsiwáanʼ”. Índo̱ gáratajkáan mbáwiin, atatsaʼwáminaʼ náa raʼkhí dí nitani̱ mbiʼi rúʼko̱ ga̱jma̱a̱ atanda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyaaʼ. Á mu nitaxúdaminaʼ mbá aʼkhá mbiiʼ mbaʼyóoʼ marathu̱u̱n mumbayáaʼ a̱ngiu̱lú bi̱ kuya̱ edxu̱u̱ ga̱jma̱a̱ ikhiin mudxawaanʼ, muxnáa mbá májánʼ consejo rí na̱ʼkha̱ náa Biblia, mutajkáan ga̱jma̱á nindxa̱a̱ʼ ga̱jma̱a̱ munda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyaaʼ ga̱jma̱a̱ numuu tsigijñaʼ rí nixnájxi̱ Jesús ‹mu xúʼko̱ maguma thanaaʼ› (Sant. 5:14-16).

15. a) Náá numuu rí ndayóoʼ muríyaʼ mbiʼi mu muraxnuu náa naʼthí rí nijuiʼtsiwáanʼ rá. b) Ndíjkha rí ndayóoʼ mundxaʼwamíjná ga̱jma̱a̱ numuu rígi̱ rá.

¹⁵ Atatsaʼwáminaʼ ga̱jma̱a̱ numuu rí nijuiʼtsiwáanʼ. Mbáa ndxájulú a̱ʼgu̱ bi̱ gíʼdoo 73 tsiguuʼ bi̱ mbiʼyuu Rajamani, naʼthí: “Índo̱ nagúxnuu rí nimínuuʼ Jesús, asndu ikhúún nandoʼ gámbiya̱ʼ eʼni”. Mbáa xúʼko̱ nuguáʼníí mangáánʼ rí  asndu nandulú gúmbiya̱ʼ índo̱ nundxa̱ʼwa̱míjna̱ rí xóo nimínuuʼ Jesús. Índo̱ gátatsaʼwamínáʼ itháan xú káʼnii Jesús nixnáximinaʼ ga̱jma̱á numulu, xúʼko̱ gáʼndaaʼ xtayáá itháan ikhaa ga̱jma̱a̱ Anu̱u̱. Mu mambáyaaʼ itháan ga̱jma̱a̱ numuu rí nijuiʼtsiwáanʼ. Náá numuu rí tsítriyaʼ májánʼ awan mu matanigájmaa ga̱jma̱a̱ numuu rígi̱ rá.

16. Xú káʼnii gámbáyulú rí muʼsngúún eʼwíinʼ ga̱jma̱a̱ numuu rí nijuiʼtsiwáánʼ rá. (Atayáá xtiʼkhuu rí na̱ʼkha̱ náa timbá ináa.)

¹⁶ Arasngúún eʼwíinʼ ga̱jma̱a̱ numuu rí nijuiʼtsiwáánʼ. Índo̱ guʼthúún eʼwíinʼ ga̱jma̱a̱ numuu rí nijuiʼtsiwáánʼ, xúʼko̱ gusngajmá dí nduʼyamajkuíí regalo rígi̱, kuaʼdáá tikhu i̱yi̱i̱ʼ mu ma̱ndoo muʼsngúún eʼwíinʼ. Náá numuu nikháñuu Jesús ga̱jma̱á numulú rá. Mbuʼyáá mbá xkri̱da náa folleto Ajngáa rí májánʼ na̱ʼkha̱ náa Dios náa kíxnuu 4 náa kayá edxu̱u̱ “Tsáa lá ñajunʼ Jesús rá.” Ma̱ngaa ma̱ndoo majmulú libro Ndiéjunʼ eʼsngúlúʼ Biblia rá. Náa capítulo 5 rí kayá edxu̱u̱ “Rí nijuiʼtsiwáanʼ nindxu̱u̱ regalo ndrígóo Dios”. Ga̱jma̱a̱ mámbá tsiguʼ ma̱ndoo muxnáa núma̱aʼ rí nijuiʼtsiwáánʼlu, rígi̱ nusngajmá índo̱ nakuwáanʼlú náa Conmemoración ma̱ngaa índo̱ nuʼthúún eʼwíinʼ rí makuwá ga̱jma̱á ni̱ndxu̱lú. ¡Ra̱ʼkhá tháán mitsaanʼ nindxu̱u̱ ñajunʼ rígi̱ dí Jeobá nixnúlú mu ma̱ndoo muʼsngúún eʼwíinʼ ga̱jma̱a̱ numuu Jesucristo!

17. Náá numuu rí nijuiʼtsiwáánʼ nindxu̱u̱ mbá rí nimináanʼlú Dios rá.

¹⁷ Kuaʼdáá mbaʼa numuu rí ma̱ndoo mbuʼyamajkuíí rí nijuiʼtsiwáánʼ. Numuu rí xúʼko̱ nandoo nambájxulu gajmiúlú Jeobá maski ajndu ni̱ndxu̱lú xa̱bu̱ aʼkhá. Ga̱jma̱a̱ numuu rí nijuiʼtsiwáánʼ, xúgíʼ rí naʼni Gixa̱a̱ mambáa (1 Juan 3:8). Ga̱jma̱a̱ numuu rígi̱, Jeobá maʼnimbánuu rí nikudaminaʼ nákha wajyúuʼ náa tsu̱du̱u̱ ku̱ba̱ʼ rí maʼni̱i̱ mbá ku̱ba̱ʼ mitsaanʼ. Xúgíinʼ bi̱ gákáwíin maʼndún kuyáá Jeobá ga̱jma̱a̱ muni̱ ñajuunʼ. Ikhú muni̱ tsiakimíjna̱ mu muxnáa núma̱aʼ rí nijuiʼtsiwáánʼ. Rígi̱ nindxu̱u̱ rí nimínáanʼlu Dios.