ARTÍCULO RÍ MUʼNIGAJMAA 17
Jeobá nandoo kaʼyulú
“Jeobá nadxuu a̱jkiu̱u̱n ga̱jma̱a̱ numuu xuajñuu” (SAL. 149:4).
AJMÚÚ 108 Ngajua ndrígóo Jeobá nindxu̱u̱ jmbu
RÍ MUʼNIGAJMAA *
Anu̱lú Jeobá nadxuu kaʼyoo mámbáa dí ikháanʼ. (Atayáá kutriga̱ 1).
1. Ndiéjunʼ rí phú ndaʼyoo Jeobá náa xuajñuu rá.
JEOBÁ “nadxuu a̱jkiu̱u̱n ga̱jma̱a̱ numuu xuajñuu” (Sal. 149:4). Ga̱jma̱a̱ rígi̱ naʼni dí makuwáánʼlu gagi índo̱ nduʼyáá rí Jeobá ndaʼyoo cualidad ndrígúlú ma̱ngaa rí naʼngulú nu̱ʼni̱ ga̱jma̱a̱ rúʼko̱ nambáyulú rí manindxu̱lú mígiu̱u̱. Á mu naguajúnlu jmbu náa ikhaa, maxtáa ga̱jma̱á ni̱ndxu̱lú kámuu mbiʼi (Juan 6:44).
2. Ndíjkha jngóo tikhuun naʼniún gakhi̱i̱ mbuyáá rí Jeobá nandoo kaʼñúún xá.
2 Mbáa tikhuun ma̱ndoo muthi: “Nda̱yo̱o̱ má rí Jeobá nandoo kaʼñúún xa̱bi̱i̱. Mú xú káʼnii gándoo gáyóo á mu gajkhun rí nandoo kaʼyoʼ ikhúún xá.” Dí gándoo gáʼniuu mbáa mu marajximínáʼ rígi̱ rá. Guʼyáá rí niʼthí mbáa ndxájulú a̱ʼgu̱ bi̱ mbiʼyuu Oksana, * nákha ninindxu̱u̱ ndxáʼgú nimínuuʼ wéñuʼ, ikhaa naʼthí: “Nixtáá gagi wéñuʼ índo̱ nijngúnʼ iyááʼ ga̱jma̱a̱ nigíʼdu̱u̱ ninindxu̱u̱ precursora, mú 15 tsiguʼ nda̱wa̱á nigíʼdu̱u̱ nirmáʼáan a̱jkiu̱nʼ xúgíʼ rí nimínuuʼ nákha chíʼgiúnʼ ga̱jma̱a̱ niku̱mu̱ʼ rí Jeobá tsigruigu̱ún ga̱jma̱a̱ dí tsíyoo gáʼyoʼ”. Xúʼko̱ má kayúuʼ eʼthí i̱mba̱ ndxájulú a̱ʼgu̱ bi̱ mbiʼyuu Yua, bi̱ ma̱ngaa nimínuuʼ nákha chíʼgíiʼ naʼthí: “Nixnajxí vida ndrígóʼ mu ma̱ni̱ ñajuunʼ Jeobá numuu rí nindoʼ maxtáa gagi, mú niku̱mu̱ʼ rí nditháan xándoo kaʼyoʼ”.
3. Dí guʼyáá náa artículo rígi̱ rá.
3 A̱jmi̱i̱n a̱ngiu̱lú gu̱ʼu̱ bi̱ niʼthá náa kutriga̱ 2 bi̱ niguájún jmbu, ikháán mangáánʼ nandaaʼ xtayáá Jeobá, mú nguáná maku̱ma̱a̱ʼ rí na̱nguá endoo kaʼyaaʼ, mú náá numuu rí ndayóoʼ ma̱ta̱ya̱a̱ gajkhun rí ikhaa naxmiéjuunʼ kaʼyaaʼ xá. Dí gándoo gámbáyaaʼ mu xatatsaʼwamínáʼ xúʼko̱ káʼnii rá.
RÍ MAKUMULÚ RÍ TSÍYOO KAʼYULÚ JEOBÁ MIGAMÍI NINDXU̱U̱
4. Náá numuu rí gamíi makumulú rí Jeobá tsíyoo kaʼyulú rá.
4 Ngajua gíʼdoo tsiakii. Índo̱ nduʼyáá gajkhun rí Jeobá nandoo kaʼyulú, nandulú muʼni itháan ñajuunʼ ga̱jma̱a̱ xúgíʼ a̱jkiu̱lú, maski ajndu gakhi̱i̱ nindxu̱u̱ xóo kuwáánʼ. Mú, á mu nakumulú rí Dios tsíyoo kaʼyulú, rígi̱ maʼni rí ‹xaguaʼdáá tsiakii› (Prov. 24:10). Ga̱jma̱a̱ á mu nundxa̱ʼwáá edxu̱lú rí Dios na̱nguá eyoo kaʼyulú, rúʼko̱ gáʼni rí xáʼngulú gúraʼníí xúgíʼ tsáʼkhá dí gágrui̱ga̱ Gixa̱a̱ (Efes. 6:16).
5. Ndiéjunʼ niguáʼníí tikhuun bi̱ nikumu̱ún rí na̱nguá eyoo kaʼñúún Dios rá.
5 Tikhuun a̱ngiu̱lú naguáʼdi̱i̱ nundxa̱ʼwa̱míjna̱ rí Jeobá na̱nguá eyoo kaʼñúún ga̱jma̱a̱ naʼni rí makáguabaaʼ fe ndrígu̱ún. Mbáa ndxájulú bi̱ kayá edxu̱u̱, bi̱ mbiʼyuu James naʼthí: “Maski ajndu xtáá rayambáá náa bethel ga̱jma̱a̱ náa imbo̱ʼ congregación rí nuthi imbo̱o̱ ajngáa, mú ni̱jkhánú nirajximínáʼ, á mu rí Jeobá ndaʼyoo ñajunʼ rí xtáá rani̱ ga̱jma̱a̱ á mu naʼdxawuun rí natajkháan”. Xúʼko̱ má eʼthí i̱mba̱ ndxájulú bi̱ mbiʼyuu Eva bi̱ ma̱ngaa naʼni kájxi̱ ñajuunʼ Jeobá: “Ni̱jkhánú ndi̱yo̱o̱ rí gamíi nindxu̱u̱ rí maku̱ma̱a̱ʼ rí Jeobá tsíyoo gaʼyáaʼ, numuu dí rúʼko̱ gaʼniáanʼ rí majmáa̱n a̱jkia̱nʼ ga̱jma̱a̱ nánguá maʼndaaʼ matanigajmaa̱ Biblia ga̱jma̱a̱ mandatíga̱a̱ gagi”. Michael bi̱ nindxu̱u̱ precursor regular ga̱jma̱a̱ bi̱ kayá edxu̱u̱ naʼthí: “Á mu naku̱ma̱a̱ʼ rí Dios tséxmiéjuunʼ kaʼyaaʼ gamíi matani tsínguminaʼ náa ikhaa”.
6. Dí gíʼmaa muʼni á mu nakumulú rí Dios tsíyoo kaʼyulú rá.
6 Rí niguáʼníí a̱jmi̱i̱n a̱ngiu̱lú bugi̱, nasngájma dí raʼkhí mundxa̱ʼwa̱míjna̱ rí Jeobá na̱nguá eyoo kaʼyulú. Mú, ndiéjunʼ gíʼmaa mu̱ʼni̱ á mu nakumulú rí Dios na̱nguá eyoo kaʼyulú rá. Gíʼmaa mu̱ʼni̱ gaʼduunʼ ku̱ma̱ rúʼko̱ mbá nacha̱. Gunda̱ʼa̱a̱ Jeobá rí mambáyulú mu xúʼko̱ xundxa̱ʼwa̱míjna̱ rí tsíyoo kaʼyulú, ga̱jma̱a̱ guʼni rí marigá tsímáá rí na̱ʼkha̱ náa Dios náa a̱jkiu̱lú (Sal. 139:23; nota; Filip. 4:6, 7). Ga̱jma̱a̱ garmáʼáan a̱jkia̱la dí na̱nguá kúwáanʼ ndajkuáanʼ. Kúwá mbaʼin a̱ngiu̱lú bi̱ nunimíjna̱ muniña̱a̱ʼ ku̱ma̱ xóo rígi̱. Nikúwá xa̱bi̱i̱ Jeobá nákha wajyúuʼ rí mangiin niguáʼdáá xkujndu xóo rígi̱. Ikha jngóo rí xúgi̱ mbuʼyáá xkridoo apóstol Pablo.
DÍ NAJMAÑÚLU GA̱JMA̱A̱ NUMUU RÍ NIGÍʼNUU PABLO
7. Ndiéjunʼ xkujndu niraʼnuu Pablo rá.
7 Lá nguáná naku̱ma̱a̱ʼ rí xáʼngaaʼ gátani mbá ñajunʼ o néʼnga̱a̱ʼ wéñuʼ ráʼ. Á mu dí xúʼko̱, mbuʼyáá xkridoo Pablo. Ikhaa nixmiéjuunʼ wéñuʼ ga̱jma̱a̱ numuu ‹mbaʼa congregación› raʼkháa mbóó (2 Cor. 11:23-28). Lá naʼniaaʼ mbá nandii mbiiʼ wéñuʼ rí nda̱a̱ thanuu rí naʼni dí xáraxtáá gagi ráʼ. Á mu dí xúʼko̱, mbuʼyáá xú káʼnii nikumu̱u̱ Pablo, ikhaa nikumu̱u̱ rí asndu xóo ‹tsuwanʼ fraʼa náa xuyuuʼ› rí naʼni gínáanʼ, ikha jngóo nindoo maʼni kriyamínáʼ náa ikhaa (2 Cor. 12:7-10). Lá najmáanʼ ga̱jma̱a̱ numuu rí naʼniaaʼ mbá nandii mbiiʼ ráʼ. Pablo ma̱ngaa niku̱mu̱u̱ xúʼko̱ káʼnii. Rí ikhaa ndiʼyoo dí nguáná nánguá xtáa gagi ga̱jma̱a̱ numuu rúʼko̱. Numuu rí tsétsí mbiʼi naʼniminaʼ ga̱jma̱a̱ aʼkhá ndrígóo (Rom. 7:21-24).
8. Ndiéjunʼ nimbáyúu Pablo mu mbaʼyoo xú káʼnii gaʼnimbánuu xkujndu ndrígóo xá.
8 Maski ajndu Pablo niraʼnuu mbaʼa xkujndu gakhi̱i̱ nákha mbiʼi rí nixtáa, mu ikhaa niʼni má xúʼko̱ ñajuunʼ Jeobá. Mú, dí nixnúu tsiakii xá. Maski ajndu ndiʼyoo rí nindxu̱u̱ xa̱bu̱ aʼkhá, mú nigiʼdoo fe náa rí nijuiʼtsiriya̱a̱ʼ. Ga̱jma̱a̱ nindxa̱ʼwa̱mínáʼ má xúʼko̱ náa ajngáa rí niʼthí Jesús rí xúgíinʼ ‹bi̱ gaguáʼdáá fe náa ikhaa ma̱ndoo makuwá kámuu mbiʼi› (Juan3:16; Rom. 6:23). Ga̱jma̱a̱ ikhaa ninindxu̱u̱ mbáa dí ikhiin bi̱ nigiʼdoo fe náa rí nijuiʼtsiriya̱a̱ʼ. Ga̱jma̱a̱ ndiʼyoo gajkhun rí Jeobá maʼni mba̱a̱ a̱jkiu̱u̱n kaʼñúún xúgíinʼ bi̱ nixudamíjna̱ aʼkhá á mu natanga̱a̱ a̱jkiu̱ún náa ikhaa (Sal. 86:5).
9. Ndiéjunʼ ajngáa gándoo gajmañulú dí niʼthí Pablo náa Gálatas 2:20 rá.
9 Pablo nigiʼdoo fe náa Dios numuu rí nindoo kaʼyoo wéñuʼ, ma̱ngaa ndiʼyoo rí ikhaa nikuʼmaa a̱ʼdióo rí makhañúu ga̱jma̱a̱ numuu (atraxnuu Gálatas 2:20). * Gúʼyáá xú káʼnii niʼnirámáʼ náa iwáá versículo náa ajngáa rí niʼthí: “A̱ʼdióo Dios nandoo kaʼyoʼ [...] nixnáximinaʼ ga̱jma̱a̱ ni̱ndxu̱ʼ”. Pablo na̱nguá nikumu̱u̱ rí nindxu̱u̱ mbáa xa̱bu̱ xkawiiʼ rí ‹Dios má xándoo gáʼyoo ga̱jma̱a̱ na̱nguá nindxa̱ʼwáminaʼ rí i̱ndó a̱ngui̱i̱n maʼndoo kaʼñúún Jeobá, ndiʼyoo rí ma̱ngaa maʼndoo kaʼyoo›, ikha jngóo Pablo niʼnirámáʼ rígi̱ náa inún bi̱ kúwá náa Roma, “índo̱ ikháanʼ káʼnii ni̱ndxu̱lú xa̱bu̱ aʼkhá, Cristo nikháñu ga̱jma̱a̱ numulú” (Rom. 5:8). Nda̱a̱ nimbá rí gárikhoo rí Dios má xándoo kaʼyulú.
10. Ndiéjunʼ ejmañulú dí na̱ʼkha̱ raʼthí náa Romanos 8:38 ga̱jma̱a̱ 39 rá.
10 (Atraxnuu Romanos 8:38, 39). * Pablo ndiʼyoo gajkhun rí nandoo kaʼyoo Dios ikha jngóo niʼnirámáʼ: “Nda̱a̱ nimbá rí maʼni tsíngulúʼ dí nandoo kaʼyulú Dios”. Ga̱jma̱a̱ ikhaa ndiʼyoo gajkhun dí niʼngo̱o̱ a̱jkiu̱u̱n kaʼñúún israelitas, Jeobá ga̱jma̱a̱ ikhaa mína̱a̱ʼ má ma̱ngaa ndiʼyoo xú káʼnii Jeobá niʼni mba̱a̱ a̱jkiu̱u̱n kaʼyoo. Ikha jngóo muʼthá dí Pablo niʼthí ‹xó má Jeobá nikuʼmaa a̱ʼdióo mu makhañúu ga̱jma̱á ni̱ndxu̱ʼ, ikha jngóo ragíʼmaa ma̱ni̱ a̱jma̱ a̱jkiu̱nʼ dí ikhaa nandoo kaʼyoʼ› (Rom. 8:32).
Rí ndayamajkhuu Jeobá ikhaa nindxu̱u̱ rí nuʼni xúgi̱ ga̱jma̱a̱ dí muʼni nda̱wa̱á, raʼkháa náa rí nikiéʼkulu nákha ginii. (Atayáá náa kutriga̱ 11). *
11. Maski ajndu Pablo ndiʼyoo aʼkhá rí niʼni xó má na̱ʼkha̱ raʼthí náa 1 Timoteo 1:12-15, náá numuu rí ndiʼyoo gajkhun dí Dios nandoo kaʼyoo xá.
11 (Atraxnuu 1 Timoteo 1:12-15). * Pablo nigáwi̱i̱nʼ a̱jkiu̱u̱n ga̱jma̱a̱ numuu dí niʼni nákha ginii, ikha jngóo tséʼniulú tsiánguá dí índo̱ niʼthí dí ‹ikhaa nindxu̱u̱ bi̱ itháan ra̱májánʼ kayuuʼ›. Nákha ikhaa xóó tséniʼnuuʼ dí gajkhun, Pablo niʼni gíníin wéñuʼ Cristianos ga̱jma̱a̱ nikudiinʼ guʼwá e̱jua̱nʼ ma̱ngaa ni̱jkha̱ raguwíinʼ mámbá xuajen rí asndu niyambáá mu magudíin tikhuun (Hech. 26:10, 11). Ikha jngóo ikhaa nigáwi̱i̱nʼ wéñuʼ a̱jkiu̱u̱n, á mu mbá miʼtsu ninuwíin mbá ndxáma bi̱ ikhaa nixiyáa anu̱u̱, ikha nigáwi̱i̱nʼ wéñuʼ a̱jkiu̱u̱n ga̱jma̱a̱ numuu dí niʼni, mú nánguá xóo maʼni, ikhaa ndiʼyoo gajkhun rí Cristo nikháñuu ga̱jma̱a̱ nindxu̱u̱, ikha jngóo niʼnirámáʼ: “Numuu rí májánʼ wéñuʼ a̱jkiu̱u̱n Dios, ikhúún má ni̱ndxu̱ʼ” (1 Cor. 15:3, 10). Ndiéjunʼ ejmañulú ikháanʼ ga̱jma̱a̱ numuu rígi̱ rá. Dí guʼnimbulúʼ rí Cristo nikháñuu ga̱jma̱á ni̱ndxu̱lú ga̱jma̱a̱ rúʼko̱ naʼni dí ma̱ndoo mambajxúlúʼ májánʼ gajmiúlú Jeobá (Hech. 3: 19). Rí itháan ndaʼyoo Dios nindxu̱u̱ rí nuʼni xúgi̱ ga̱jma̱a̱ rí muʼni nda̱wa̱á, raʼkháa rí niʼni nákha wájyúuʼ, tséʼniuu á mu nákha ginii nini̱ndxu̱lú xa̱bi̱i̱ Jeobá o na̱nguá (Isa. 1:18).
12. Á mu nakumulú rí nda̱a̱ rí ejmáánʼ o na̱nguá eñún kuyulú, xú káʼnii gándoo gámbáyulú 1 Juan 3:19 ga̱jma̱a̱ 20 rá.
12 Índo̱ nundxa̱ʼwa̱míjna̱ dí Cristo nikháñuu ga̱jma̱a̱ aʼkhá ndrígúlú, mbáa muʼthálu rakáʼyoo magruigú ikhúún regalo kiejunʼ rígi̱. Náá numuu rí ma̱ndoo maku̱ma̱a̱ʼ xúʼko̱ káʼnii rá. Numuu rí a̱jkiu̱lú gamíi maʼni nduwáánʼlú, ga̱jma̱a̱ makumulú rí nda̱a̱ rí e̱jmáánʼ ga̱jma̱a̱ rakáʼyulú rí maʼndún kuyulú (atraxnuu 1 Juan 3:19, 20). * Á mu nakumulú xúʼko̱, gíʼmaa marmáʼáan a̱jkiu̱lú ‹rí Dios itháan mba̱a̱ ki xóo a̱jkiu̱lú› ga̱jma̱a̱ rí nandoo kaʼyulú ma̱ngaa rí niʼni mba̱a̱ a̱jkiu̱u̱n kaʼyulú, itháan gíʼdoo numuu ki xóo makumulú dí raʼkhí dí gíwánʼ náa a̱jkiu̱lú, mína̱a̱ʼ má ikháanʼ má guʼyáá dí Jeobá nandoo kaʼyulú, mu muʼnilú rígi̱ ndayóoʼ muʼnigajmalú má xúʼko̱ Biblia, guʼtájkáan tsejtsí mbiʼi ga̱jma̱a̱ gambajxú gajmiú a̱ngiu̱lú bi̱ kúwá náa xuajñuu Jeobá. Ndíjkha rí gíʼdoo wéñuʼ numuu mu̱ʼni̱ rígi̱ rá.
XÚ KÁʼNII GAMBAYULÚ RÍ MUʼNIGAJMA, RÍ MUʼTÁJKÁAN GA̱JMA̱A̱ ANGIULÚ RÁ.
13. Xú káʼnii embáyulú dí nuʼnigajmaa Biblia rá. (Atayáá náa kúgumaʼá “ Xú káʼnii nimbáñúún Biblia”).
13 Atanigajmaa̱ tsétsí mbiʼi Biblia, mu xúʼko̱ ma̱ta̱ya̱a̱ xú káʼnii xa̱bu̱ nindxu̱u̱ Jeobá ma̱ngaa ma̱ta̱ya̱a̱ dí ra̱ʼkhá tháán nandoo kaʼyaaʼ, índo̱ natatsaʼwáminaʼ dí natraxnuu mámbá mbiʼi, rúʼko̱ ‹mambáyáaʼ mu matriʼkumina̱a̱ʼ› ga̱jma̱a̱ rí xóo natatsaʼwáminaʼ ma̱ngaa dí gíwánʼ náa a̱jkia̱a̱nʼ (2 Tim. 3:16). Mbáa bi̱ kayá edxu̱u̱ bi̱ mbiʼyuu Kevin bi̱ nixtáa ngíná ikhaa naʼthí: “Índo̱ nagúxnuu ga̱jma̱a̱ nandxa̱ʼwa̱mínáʼ dí naʼthí náa Salmo 103, rúʼko̱ nimbáyúʼ mba̱yo̱o̱ májánʼ xú káʼnii endxa̱ʼwáminaʼ Jeobá ga̱jma̱a̱ ni̱ndxu̱ʼ”. Ma̱ngaa Eva bi̱ niʼthá náa kutriga̱ 5, naʼthí: “Índo̱ naguámbá mbiʼi, nandxa̱ʼwa̱mínáʼ xóo edxaʼwóo edxu̱u̱ Jeobá ga̱jma̱a̱ xúʼko̱ a̱jkiu̱nʼ naxtáa tsímáá ma̱ngaa fe ndrígóʼ naʼni gujkhuʼ”.
14. Xú káʼnii gándoo gámbáyulú rí nuʼtájkháan rá.
14 Aratájkáan tsétsí mbiʼi (1 Tes. 5:17). Índo̱ mbáa nandaaʼ mambajxáaʼ ga̱jma̱a̱ʼ naratháán nángii eʼníí ga̱jma̱a̱ xú káʼnii ku̱ma̱a̱ʼ, xúʼko̱ má kayuuʼ gíʼmaa mani̱ndxu̱u̱ rí nambájxulu gajmiúlú Jeobá ma̱ngaa índo̱ nuʼtháán xú káʼnii eku̱mu̱lúʼ rí nundxa̱ʼwáá edxu̱lú ga̱jma̱a̱ rí naʼni maxmiéjunlú, xúʼko̱ nusngajmáá rí nakumulú kuʼyáá ikhaa ga̱jma̱a̱ dí nandoo kaʼyulú (Sal. 94:17-19; 1 Juan 5:14, 15). Ndxájulú a̱ʼgu̱ bi̱ mbiʼyuu Yua, bi̱ niʼthá náa kutriga̱ 2 naʼthí: “Índo̱ natajkháan raʼkháa i̱ndó na̱thu̱u̱n Jeobá ga̱jma̱a̱ numuu ñajunʼ rí ni̱ni̱ mbiʼi rúʼko̱, na̱thu̱u̱n xúgíʼ xú káʼnii e̱ku̱mu̱ʼ ga̱jma̱a̱ xúʼko̱ ni̱jkhánú ndi̱yo̱o̱ Jeobá raʼkháa xóo mbáa bi̱ kayá edxu̱u̱ náa nañejunʼ, ni̱jkhánú ndi̱yo̱o̱ xóo mbáa xa̱bu̱ nikhi̱i̱ bi̱ gajkhun nandoo kaʼñúún e̱ji̱i̱n” (atayáá kúgumaʼá “ Lá nitraxnuu ráʼ”).
15. Xú káʼnii esngájma Jeobá rí nandoo kaʼyulú rá.
15 Araxtaa gajmiáanʼ a̱ngiu̱lú. Numuu rí ikhiin ni̱ndxu̱ún mbá regalo kiejunʼ rí Jeobá nixniáaʼ (Sant. 1:17). Anu̱lú bi̱ xtáa mekhuíí gajkhun dí naxmiéjuunʼ kaʼyulú mámbáa dí ikháanʼlu ga̱jma̱a̱ nixniúlú bi̱ ma̱ndoo makuwáánʼ gajmiulúʼ, ikhiin ni̱ndxu̱ún a̱ngiu̱lú bi̱ ma̱ndoo musngajma rí nandún kuyulú (Prov. 17:17). Náa carta rí niʼnirámáʼ Pablo dí nikuʼma náa Colosas niʼthí ga̱jma̱a̱ numún cristianos bi̱ nimbayíí numuu rí ndiʼyoo rí ikhiin ‹nini̱ rí maʼni̱i̱ a̱jkiu̱u̱n› (Col. 4:10, 11). Rí asndu Jesús ndiyóoʼ rí mixtámbáyíí ga̱jma̱a̱ nixníin núma̱aʼ bi̱ nambájxu̱u̱ gajmíi̱n xó má ángeles ga̱jma̱a̱ xa̱bu̱ numbaaʼ (Lucas 22:28, 43).
16. Xú káʼnii eyambáá a̱ngiu̱lú mu mambajxú májánʼ gajmiúlú Jeobá rá.
16 Lá nduʼyáʼ rí mumbayúlú a̱ngiu̱lú bi̱ kúwá náa congregación ráʼ. Dí marathu̱u̱n ndiéjunʼ eʼni maxmiéjuanʼ bi̱ nambájxáaʼ gajmiáanʼ. Raʼkháa rúʼko̱ nandoo gáʼthúu̱n dí na̱nguá ejmáánʼ, nindxu̱u̱ rí ma̱ndoo mambáyáaʼ. Guʼyáá rí niʼthí James, bi̱ niʼthá ga̱jma̱a̱ numuu náa kutriga̱ 5: “Rí mambajxáaʼ májánʼ gajmiáanʼ bi̱ nuni̱ ñajuunʼ Dios, nindxu̱u̱ rí mambáyaaʼ má ikháán numuu rí índo̱ naku̱mu̱ʼ rí nda̱a̱ rí ejmúún, ikhiin nudxawunʼ májánʼ ga̱jma̱a̱ nuni̱ marmáʼáan a̱jkiu̱nʼ rí nandún kuyoʼ, ga̱jma̱a̱ numuu rúʼko̱ na̱jkhánú nda̱yo̱o̱ rí Jeobá nandooʼ kaʼyoʼ ga̱jma̱a̱ naxmiéjuunʼ kaʼyoʼ”. ¡Ikha jngóo ra̱ʼkhá tháan gíʼdoo numuu rí mambájxúʼ gajmíʼ a̱ngiu̱lú bi̱ nuni̱ ñajuunʼ Dios!
GAʼNDAAʼ XTAYÁÁ MÁ XÚʼKO̱ JEOBÁ
17, 18. Tsáa bi̱ gíʼmaa muʼdxawíín ga̱jma̱a̱ náá numuu rá.
17 Gixa̱a̱ nandoo rí makánajkulú ga̱jma̱a̱ rí maxúʼni rí jmbu, ikhaa nandoo makumulú rí Jeobá na̱nguá eyoo kaʼyulú ga̱jma̱a̱ dí rakáʼyulú makáwáánʼ. Mú xó má ndiʼyáá, rí nda̱a̱ nimbá rí maʼni matsíngulú rí nandoo kaʼyulú Jeobá.
18 Jeobá nandoo kaʼyaaʼ, ikháán xtaʼdáá wéñuʼ núma̱aʼ eʼyoo, á mu natatsímbaa ma̱ndoo kaʼyaaʼ má xúʼko̱ xó má nindoo kaʼyoʼ Jesús (Juan 15:10). Xátadxawíín rí gáʼthí Gixa̱a̱ ni má dí gákumu̱u̱ náa a̱jkia̱nʼ. Rí phú gíʼmaa matani, atadxawíín rí gáʼtháanʼ Jeobá bi̱ ndaʼyoo dí májánʼ dí rígá náa mámbáa dí ikháanʼlu. ¡Atayáá gajkhun rí Jeobá ‹nandoo kaʼñúún xa̱bi̱i̱› ga̱jma̱a̱ ikháán!
AJMÚÚ 141 Mitsaanʼ xóo nikhánulú makuwáanʼ
^ párr. 5 Nguáná tikhuun a̱ngiu̱lú naʼniún gakhi̱i̱ mbuyáá rí Jeobá gajkhun nandoo kaʼñúún. Ikha jngóo náa artículo rígi̱, muʼthá xú káʼnii gándoo guʼyáá gajkhun rí Jeobá nandoo kaʼyoo mámbáa dí ikháanʼlu. Ma̱ngaa mbuʼyáá xú káʼnii gúʼni mu xáʼniulu gakhi̱i̱ mbuʼyáá rí ikhaa nandoo kaʼyulú.
^ párr. 2 Nixtiʼkhuu tikhun mbiʼñún
^ párr. 9 Gálatas 2:20: “Kiʼdujmúún náa ixi̱ ga̱jmu̱ʼ Cristo. Nánguá ni̱ndxu̱ʼ ikhúúnʼ bi̱ ndaʼya; nindxu̱u̱ Cristo bi̱ xtáa ga̱jma̱á ni̱ndxu̱ʼ. Mú xóo xtáá xúgi̱, xtáá ga̱jma̱a̱ numuu fe náa A̱ʼdióo Dios bi̱ nindoo kaʼyoʼ ma̱ngaa nixnáximinaʼ ga̱jma̱a̱ numuʼ”.
^ párr. 10 Romanos 8:38, 39: “Numuu rí nda̱yo̱o̱ gajkhun rí ní makhañúlúʼ, ni rí mbuʼya, ni ángeles, ni xa̱bu̱ ñajunʼ, ni má dí rígá xúgi̱, ni má dí marigá nda̱wa̱á, ni tsiakii, ni rí mitsídanʼ, ni rí mi̱jnu̱ʼ, ni i̱mba̱ rí niguma ma̱ndoo matsíngúlú náa ngajua rí gíʼdáánʼ Dios dí rígá náa Cristo, Tátá ndrígúlú”.
^ párr. 11 1 Timoteo 1:12-15: “Naxna̱a̱ núma̱aʼ Cristo Jesús Señor ndrígúlú, rí nixnúʼ tsiakii, numuu rí ndiʼyoo rí ni̱ndxu̱ʼ jmbii ga̱jma̱a̱ nixnúʼ mbá ñajunʼ mani. Maski ajndu nákha ginii nitha wéñúúnʼ eʼwíinʼ, nixkúún ga̱jma̱a̱ ninindxu̱ʼ mbáa xa̱bu̱ bi̱ na̱nguá nigiʼdoo gamajkhuu. Mú, nini mba̱a̱ a̱jkiu̱ún kuyoʼ numuu rí táyo̱o̱ rí ni̱ni̱ ga̱jma̱a̱ numuu dí ragúʼdoo fe. Mú, rí májáanʼ a̱jkiu̱u̱n Señor ndrígúlú nirígá wéñu’ ga̱jma̱a̱ fe ma̱ngaa ngajua dí rígá náa Cristo Jesús. Rí nata rígi̱ nindxu̱u̱ gajkhun ga̱jma̱a̱ gíʼmaa mundrígula, Cristo Jesús ni̱ʼkha̱ náa numbaaʼ gaʼni káwíin xa̱bu̱ aʼkhá. Rí mbá xúgínʼ ikhiin ikhúúnʼ gúʼdoo itháan aʼkhá”.
^ párr. 12 1 Juan 3: 19, 20: “Xúgi̱ kaʼnii gusngajmá rí kuwáanʼ náa rí gajkhun, ga̱jma̱a̱ mbóó a̱jkiu̱lú gáʼni náa ikhaa, numuu rí a̱jkiu̱lú ma̱ndoo maʼni gínáanʼ, mú Dios itháan mba̱a̱ ki xóo a̱jkiu̱lú ga̱jma̱a̱ ikhaa naninuuʼ májánʼ xúgíʼ”.
^ párr. 71 NAʼTHÍ NUMUU XTIʼKHU: Nákha wájyúuʼ, Pablo nikudiinʼ guʼwá e̱jua̱nʼ mbaʼin cristianos. Índo̱ nijmañuu ga̱jma̱a̱ numuu Jesús, ikhaa rúʼko̱ nimbáyúu mu mariʼkumina̱a̱ʼ ga̱jma̱a̱ nigíʼdu̱u̱ nixnún tsiakii cristianos. Mbáa tikhuun ninindxu̱ún bi̱ kuñún bi̱ ikhaa má nixkúún nákha ginii.
