Phú ngíná ninindxu̱u̱ dí índo̱ ni̱jkha̱ raju̱u̱n xóo itháán, numuu dí mañu mañú nijkhá raniʼñúuʼ dí nambájxuʼ gajmuʼ Jeobá. Numuu dí naku̱mu̱ʼ dí a̱ngui̱nʼ bi̱ nanigajmaa̱ gajmíʼ náa escuela ikhiin nuni gagimijná, ga̱jma̱a̱ ikhúún nandátigo̱ʼ rúʼko̱. Ikha jngóo, niku̱mu̱ʼ dí índo̱ naxprígúʼ anu̱ʼ ma̱ngaa ru̱dúʼ ga̱jma̱a̱ ikha dí na̱ʼkha̱ náa Biblia ma̱ngaa rí mani ñajuunʼ Dios nindxu̱u̱ gakhi̱i̱ wéñuʼ. Gajkhun má nda̱yo̱o̱ dí Jeobá gajkhun xtáa, mú nditháan táku̱mu̱ʼ dí xtáá mijngii náa ikhaa.

Nánguá gajnú gátaraʼa kañiʼ mbiʼi. Ga̱jma̱a̱ índo̱ nataráʼa naʼniuʼ gakhii numuu dí na̱nguá eni̱ rataminaʼ. Ikha jngóo xa̱bu̱ bi̱ na̱thu̱u̱n na̱nguá eñún gudxawíín ga̱jma̱a̱ naʼni rí xaxtáá gagi numuu rí i̱ndó nandxa̱ʼwa̱mínáʼ rí tséjmún mbá kayuuʼ. Ikha jngóo ni̱jkhánú nirajximínáʼ: “Xú káʼnii gáʼngo̱o̱ gáʼni rígi̱ mbáa mambá xmáná ga̱jma̱a̱ mambá gu̱nʼ rá.”

Índo̱ ndiya̱a̱ 17 tsiguʼ, nindoʼ rí maxtáá mbáwún, ikha jngóo nigújxíi trastiuʼ ga̱jma̱a̱ ni̱jkhá gaxtáá náa Australia. Mú anu̱ʼ ga̱jma̱a̱ ru̱dúʼ índo̱ ndiyáá rígi̱, ra̱ʼkhá tháán nixmiéjúúnʼ kuyoʼ.  Ga̱jma̱a̱ nindxa̱ʼwa̱míjna̱ má xúʼko̱ dí ikhúún mani̱i̱ má xúʼko̱ ñajuunʼ Jeobá náa gáʼgá.

Náa Australia náa ni̱jkhánú, ikhí nánguá ni̱ni̱ kájxi̱ ñajuunʼ Jeobá numuu rí nguánáa ejkha̱ reunión. Nimbájxuʼ gajmíʼ wa̱ʼxa̱ʼ bi̱ a̱jma̱ inún, numuu rí nagún náa reunión, nda̱wa̱á índo̱ naguambá reunión nagún náa ndxa̱a̱ dí mbruʼun. Ga̱jma̱a̱ niku̱mu̱ʼ dí ikhúún na̱nguá xtáá kájxi̱ náa rí gajkhun numuu rí na̱ni̱ dí rígá náa numbaaʼ rígi̱, ikha jngóo ni̱jkhánú ndi̱yo̱o̱ dí na̱nguá kaʼyoʼ má nájma̱ rígi̱.

A̱jma̱ tsiguʼ nda̱wa̱á, niniʼníiʼ mbáa ndxájulú bi̱ niʼniuʼ mandxa̱ʼwa̱mínáʼ ndiéjunʼ rí phú nandoʼ ma̱ni̱ náa vida ndrígóʼ. Nixtáá gajmíʼ mbá witsiin wa̱ʼxa̱ʼ bi̱ xóó tsénu̱ju̱nʼ ga̱jma̱a̱ ni̱tha̱nxu̱ circuito ga̱jma̱a̱ a̱ʼgiu̱u̱ bi̱ mbiʼyuu Tamara mu maguanúu náa guʼuxu mbá xmáná. Numuu rí índo̱ circuito naxtáa reunión gajmíi̱n a̱ngiu̱lú náa congregación, a̱ʼgiu̱u̱ naguanúu ga̱jma̱á ni̱ndxu̱xu̱ʼ nunigagimijnáxu. Rúʼko̱ ninigu̱ʼ wéñuʼ numuu dí ikhaa nindxu̱u̱ mbáa a̱ʼgu̱ bi̱ nagíʼ xtíin rí na̱nguá minumuu ga̱jma̱a̱ nindxu̱u̱ mbáa xa̱bu̱ guabaaʼ ma̱ngaa tséʼniuxu gakhi̱i̱ dí mutamíjná gajmiúxu, rúʼko̱ niʼniuʼ wéñuʼ tsiánguá dí mbáa bi̱ naʼni kájxi̱ ñajuunʼ Jeobá ma̱ndoo maʼni gagiminaʼ.

Tamara ra̱ʼkhá tháán nadxuu, nandoo kaʼyoo dí gajkhun ga̱jma̱a̱ asndu gagi naʼtáraʼa, rúʼko̱ naʼni dí eʼwíinʼ muni xúʼko̱ ma̱ngaa. Ikhaa ra̱ʼkhá tháán nadxuu numuu rí naxnúu Jeobá rí itháán májánʼ dí gíʼdoo, mú ikhúún na̱nguá, numuu rí tséxnu̱u̱ Jeobá rí gúʼdoʼ. Ga̱jma̱a̱ rí xóo xa̱bu̱ nindxu̱u̱ ma̱ngaa dí naxtáa gagi rúʼko̱, niʼni rí maʼniuʼ wéñuʼ tsiánguá. Xkridoo niniguʼ wéñuʼ dí mba̱yo̱o̱ dí gajkhun dí naʼthí náa Biblia dí Jeobá nandoo ma̱ni̱ ñajuunʼ “ga̱jma̱a̱ gagi” (Sal. 100:2).

Nindoʼ maxtáá gagi mangúún xóo má xtáa Tamara. Mu ma̱ndoo maxtáá xúʼko̱, ndayóoʼ dí mariʼkuminaʼ. Gajkhun má rí ndijyúuʼ, mú mañu mañúú ni̱jkhá rariʼkumina̱a̱ʼ índo̱ nigíʼdu̱u̱ ninirataminaʼ mu magajnúʼ gátaraʼa, ga̱jma̱a̱ nguáná nani̱ndxu̱ʼ precursora auxiliar. Rúʼko̱ nimbáyúʼ wéñuʼ mu xámiñuʼ ga̱jma̱a̱ dí maku̱mu̱ʼ dí majmúún ma̱ni̱, índo̱ najmuʼ itháán Biblia náa nataráʼa, rúʼko̱ naʼni dí  maʼdxuʼ. Dí xúgi̱, nanindxu̱ʼ precursora auxiliar mambá gu̱nʼ.

Nigíʼdu̱u̱ nimbájxu̱ʼ gajmíʼ a̱ngiu̱lú bi̱ mixtiʼkhu tsigúún bi̱ kúwá má mba̱yu̱u̱ʼ runi̱ ñajuunʼ Jeobá ga̱jma̱a̱ gagi. Xkridún nimbáyúʼ mba̱yo̱o̱ ndiéjunʼ rí tháán gíʼdoo numuu ga̱jma̱a̱ rí maʼgíminaʼ ma̱ni̱ ñajuunʼ Dios. Índo̱ nagájnuʼ gátaraʼa, xúʼko̱ ni̱jkha̱ rani̱gu̱ʼ itháán ga̱jma̱a̱ nda̱wa̱á ninindxu̱ʼ precursora regular. Náa xúgíʼ tsiguʼ na̱nguá nixtáá gagi, ki xóo xúgi̱ dí na̱ni̱ ñajuunʼ Dios.

Mbá tsiguʼ nda̱wa̱á, niniʼníiʼ Alex, ikhaa nindxu̱u̱ mbáa májánʼ xa̱bu̱ ga̱jma̱a̱ nandoo kaʼyoo Jeobá ma̱ngaa dí maʼtáraʼa. Ikhaa nindxu̱u̱ siervo ministerial ga̱jma̱a̱ naʼni mbá 6 tsiguʼ rí nindxu̱u̱ precursor. Alex nixtáa rayambáá mbaʼa igu̱nʼ náa Malaui náa nda̱yo̱o̱ itháán miʼtáraʼa. Ikhí nimbájxu̱u̱ gajmíi̱n tikhun misionero bi̱ nitháán dí magíʼ ginii Reino náa vida ndrígóo.

Índo̱ niʼni tsiguʼ 2003, ndi̱ya̱a̱ Alex, asndu nákha mbiʼi rúʼko̱ nigíʼdi̱i̱ ninixu̱ kájxi̱ ñajuunʼ Dios. Nijmañuxu mbaʼa wéñuʼ ga̱jma̱a̱ Jeobá niʼni tsajkurámáanxu wéñuʼ.

Nákha 2009, nituxu dí muñambáá xóo misionero náa Timor Oriental, náa mbá chíʼgíiʼ xuajen dí gíʼ mijngii náa Indonesia. Ra̱ʼkhá tháán gagi nikuwáanʼxu ga̱jma̱a̱ numuu xúgíʼ dí nindríguxu ga̱jma̱a̱ witsu igún nda̱wa̱á niguáʼnuxu náa capital ndrígóo Dili.

Dí xóo nikúwáanʼxu nákha ginii, mixtiʼkhu kayuuʼ nindxu̱u̱ xóo kuwáanʼxu xúgi̱, numuu rí ndiyóoʼ maguʼunxu̱ xóo kúwá xa̱bu̱, ajngáa rí nuthi, ganitsu rí naʼphu̱ ga̱jma̱a̱ dí xóo makuwáanʼxu. Ma̱ngaa náa nutaráʼaxu nuxkamiin xa̱bu̱ bi̱ gíníi, bi̱ tágún escuela ga̱jma̱a̱ bi̱ guáʼdáá xkujndu rí naʼni maxmiéjúúnʼ. Ga̱jma̱a̱ ndu̱ñu̱u̱n xa̱bu̱ guáʼdáá tsínáʼ náa xuñúnʼ ma̱ngaa numuu dí nigún náa guerra. *

 ¡Nagájnuu májánʼ náa nutaraʼa! Mbá xkri̱da, niniʼníiʼ María * bi̱ gíʼdoo 13 tsiguuʼ ga̱jma̱a̱ gíná wéñuʼ xóo xtáa ikhaa. Numuu dí ru̱dúu̱ nikháñuu nguáthá tsiguʼ ginii ga̱jma̱a̱ nguána̱á eʼyoo anu̱u̱, xó má eʼwíinʼ e̱ji̱n bi̱ tsigu̱ún xóo má ikhaa. Mú, María nda̱wa̱a̱ tsáa maxná ikhoo náa vida ndrígóo. Narmáʼáan a̱jkiu̱nʼ mbá miʼtsu rí asndu nimbi̱ya̱ʼ índo̱ niʼthúnʼ xóo eku̱mu̱u̱. Mú ikhúún tsíkroʼoʼ dí xtáa raʼthí numuu dí xóó tseta̱ májánʼ ajngóo. Ikhú nitakáñuu Jeobá mu xúʼko̱ mambáyúu dxáʼgú bugi̱ ga̱jma̱a̱ nigúxnuu tikhu texto rí maxnúu tsiakii. Ga̱jma̱a̱ mbá nguáthá tsiguʼ nda̱wa̱á ndi̱yo̱o̱ xú káʼnii ni̱jkha̱ rariʼkumina̱a̱ʼ María. Nijngúun iyááʼ ga̱jma̱a̱ rí xúgi̱ gíʼdiin mbaʼin bi̱ naʼsngúún ga̱jma̱a̱ Biblia. Rí xúgi̱ María gíʼdiin mbaʼin bi̱ nambájxu̱u̱ gajmíi̱n bi̱ nuni ñajuunʼ Dios ga̱jma̱a̱ ndaʼyoo dí gíʼdoo wéñuʼ numuu vida ndrígóo.

Jeobá xtáa raʼni tsajkurámuuʼ ñajunʼ dí naguma náa Timor Oriental. Náa mbá gu̱wa̱ʼ tsiguʼ rí ninújngoo mbaʼin wéñuʼ publicadores nijngún iyááʼ ga̱jma̱a̱ mbaʼin dí ikhiin nuñambáá xóo precursores, siervos ministeriales o bi̱ kuya̱ edxu̱u̱. Eʼwíinʼ nuyambáá náa oficina náa najuiʼtájui̱i̱ ajngáa ga̱jma̱a̱ xúʼko̱ nandoo nagájnuu i̱yi̱i̱ʼ náa ajngún xa̱bu̱ bi̱ kúwá náa xuajen rúʼko̱. Índo̱ nuni ajmúú náa reunión, ra̱ʼkhá tháán nakúwá gagi, rúʼko̱ naʼni dí maʼdxuʼ wéñuʼ índo̱ nda̱yo̱o̱ dí nuni itháán ñajuunʼ Dios.

Índo̱ nikúwáanʼxu náa Timor Oriental ninindxu̱u̱ mixtiʼkhu kayuuʼ ki xóo náa Australia, mú nikúwáanʼxu gagi. Gajkhun má nguáná índo̱ najkuáxu náa autobús gajchu̱ún mbaʼin xa̱bu̱ ga̱jma̱a̱ ikhí má gajchu̱ún e̱gi̱ʼ ga̱jma̱a̱ ya̱ʼu̱ dí naxtango̱jo̱o̱ náa xuáá dí rígá náa xuajen rúʼko̱. Nguáná nusngúnxu̱ xa̱bu̱ ga̱jma̱a̱ numuu Biblia, náa mbá guʼwá rí mijkha ga̱jma̱a̱ nda̱a̱ piso i̱ndó ku̱ba̱ʼ rígá ma̱ngaa ngrui̱gu̱u̱n xtílá. Maski ajndu xúʼko̱ káʼnii nikuwáanʼxu, mú tániʼñuu randxaʼwaminaʼ: “Rígi̱ nindxu̱u̱ mitsaanʼ”.

Índo̱ nandxa̱ʼwa̱mínáʼ dí xóo nixtáá nákha ginii, ra̱ʼkhá tháán naxnáa núma̱aʼ anu̱ʼ ga̱jma̱a̱ ru̱dúʼ, dí ikhiin ni̱ni̱ xóo má niʼngo̱o̱ mu musngoʼ ga̱jma̱a̱ numuu Jeobá dí ikhiin ni̱mba̱yúʼ má xúʼko̱ nákha ninindxu̱ʼ dxáʼgú numuu dí ni̱ni̱ dí raʼkhí. Náa Proverbios 22:6, nambríguii ga̱jma̱a̱ dí xóo ni̱ndxu̱ʼ dí naʼthí ikhí. Xó má ru̱dúʼ ga̱jma̱a̱ anu̱ʼ ra̱ʼkhá tháán nadxún kúyuxu índo̱ nduyáá dí nunixu kájxi̱ ñajuunʼ Jeobá. Asndu nákha tsiguʼ 2016, nikúwáanʼxu ruyambáá xóo circuito náa Australia ma̱ngaa náa Nueva Zelanda.

Maski ajndu naʼniuʼ gakhii manimbo̱ʼ dí niku̱mu̱ʼ dí marataráʼa nindxu̱u̱ mbá ñajunʼ gakhi̱i̱. ¡Mú rí xúgi̱ nanigu̱ʼ wéñuʼ dí mataraʼa! Ni̱jkhánú ndi̱yo̱o̱ dí maski ajndu niraʼnuu mbaʼa xkujndu náa vida ndrígóʼ, mú dí ma̱ni̱ ñajuunʼ Jeobá naʼni dí maxtáá gagi. Numuu dí naʼni mbá 18 tsiguʼ dí xtáá gajmu Alex runi̱ ñajuunʼ Jeobá ga̱jma̱a̱ kuwáanʼ gagi wéñuʼ. Rí xúgi̱, nda̱yo̱o̱ gajkhun dí niʼthí David índo̱ niʼnirámáʼ Salmo índo̱ niʼthúu̱n Jeobá: “Xúgíinʼ bi̱ numbayumijná náa ikháán makuwá gagi; mundxaʼwá má xúʼko̱ rí kúwá gagi. Ikháán matiewu̱u̱n ga̱jma̱a̱ nandún kúyáá mbiʼyaaʼ maʼdxúún núma̱aʼ má ikháánʼ” (Sal. 5:11).