1. Tsíín niyambáá mu magiʼi congregación náa Filipos rá.

ÍNDO̱ apóstol Pablo, Silas, Lucas ga̱jma̱a̱ Timoteo niguánu náa xuajen Filipos rí naʼtáñajuunʼ Roma, nixkamiin mbaʼin wéñuʼ xa̱bu̱ bi̱ niniguunʼ mudxawíín ajngóo Reino. A̱jkhui̱i̱n cristianos bugi̱ bi̱ nuni ñajuunʼ Dios ga̱jma̱a̱ gagi, niʼngu̱u̱n nigíʼ mbá congregación náa xuajen rúʼko̱. Xúgínʼ xa̱bu̱ mbáa nigimbíin náa goʼwóo mbáa cristiana bi̱ májánʼ a̱jkiu̱u̱n bi̱ mbiʼyuu Lidia (Hech. 16:40).

2. Xú kaʼnii xkujndu niraʼnuu congregación Filipos rá.

² Congregación rí ndiʼkhún nigi̱ʼi̱ niraʼnuu mbaʼa xkujndu. Gixa̱a̱ nixkaxi̱i̱n xa̱bu̱ bi̱ tsíñún gúyáá rí gajkhun mu mutsiji jti̱i̱n rí nutaraʼa a̱jkhui̱i̱n cristianos bugi̱. Xa̱bu̱ ñajuunʼ nirugua̱a̱ Pablo ga̱jma̱a̱ Silas, nixpajtíin ga̱jma̱a̱ xkuiya ga̱jma̱a̱ nixudiinʼ guʼwá e̱jua̱nʼ. I̱mba̱ néjtsuu nirawíín. Ndiéjunʼ nini índo̱ nigájnáan xá. Nigún gúñún discípulos bi̱ nuxu̱u̱nʼ ga̱jma̱a̱ nixnúún tsiakii. Ikhú nigájnun nigún gajmiún Timoteo, xó má Lucas niguanúu náa xuajen rúʼko̱. Xú káʼnii nini discípulos bi̱ nuxu̱u̱nʼ rá. Xi̱ʼ kaʼwu nimbáñun mu muni má xúʼko̱ ñajuunʼ Jeobá (Filip. 2:12). Ikha jngó, Pablo nidxuu kaʼñún.

3. Xó má eʼthí náa Filipenses 1:9-11, dí ninda̱ʼa̱ Pablo índo̱ niʼtájkáan rá.

³ Gu̱wa̱ʼ tsiguʼ nda̱wa̱á, Pablo niʼnirámáʼ mbá carta rí nikuʼma inún. Índo̱ nuraxnuu, núkhu e̱jkhua̱nú nduʼyáá rí Pablo raʼkháa tháán nindoo kaʼñún a̱ngiu̱lú. Numuu dí niʼthún rí  ndiñíinʼ wéñuʼ ga̱jma̱a̱ rí ‹nindoo kaʼñún wéñuʼ xóo Cristo Jesús› (Filip. 1:8). Ga̱jma̱a̱ niʼthún rí niʼtájkáan ga̱jma̱á numún. Nindo̱ʼo̱o̱ Jeobá rí mambáñún mu maʼndún kuyamijná itháan, ma̱ngaa rí mbuyáá ndiéjunʼ rí phú gíʼdoo itháan numuu ga̱jma̱a̱ mu muni rí jmbu ga̱jma̱a̱ xúni̱ majngrádiinʼ eʼwíínʼ ma̱ngaa mu magún ku̱ñu̱u̱n ajngáa rí májánʼ. Nduʼyáá gajkhun rí mbiʼi xúgi̱ ma̱ngaa ma̱ndoo mambáyulúʼ ajngáa rí niʼthí Pablo (atraxnuu Filipenses 1:9-11). * Náa artículo rígi̱ mbuʼyáá xú káʼnii gúʼgíʼ muʼnimbánii rí niʼthí ikhaa.

4. a) Xó má naʼthí náa 1 Juan 4:9, 10, xú káʼnii nisngájma Jeobá rí nandoo kaʼyulú rá. b) Nguáthá gíʼmaa rí maʼndulú kuʼyáá Dios rá.

⁴ Jeobá nisngájma dí ra̱ʼkhá tháán eyoo kaʼyulú índo̱ nikuʼmaa A̱ʼdióo mu makhañúu náa tsu̱du̱u̱ Ku̱ba̱ʼ ga̱jma̱a̱ numuu aʼkhúlúʼ (atraxnuu 1 Juan 4:9, 10). * Rí niʼni Jeobá ga̱jma̱á ni̱ndxu̱lú naxkajxáanʼ rí maʼndulú kuʼyáá mangáanʼ (Rom. 5:8). Nguáthá gíʼmaa maʼndulú kuʼyáá Dios rá. Jesús niʼthí rígi̱ índo̱ nirajxu̱u̱ mbáa fariseo: “Gíʼmaa maʼnda̱ʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ, ga̱jma̱a̱ xúgíʼ nímia̱nʼ ga̱jma̱a̱ xúgíʼ ku̱ma̱ ndrígáʼ” (Mat. 22:36, 37). Ikháanʼ tsíyulú rí káaʼ wáá gáʼndulúʼ kuʼyáá. Nandulú rí mámbá mbiʼi maʼga ragaja̱a̱ itháan rí maʼndulú kuʼyáá. Pablo niʼthún bi̱ filipenses rí ngajua ndrígu̱ún ndayóoʼ maʼni itháán mba̱a̱. Dí gándoo gúʼni mu maga̱ja̱a̱ itháán rí nandulú kuʼyáá Dios rá.

5. Dí gáʼyóoʼ muʼni mu xúʼko̱ maʼndulú kuʼyáá itháan Dios rá.

⁵ Mu maʼndulú kuʼyáá Dios, ndayúlú rí muniʼniiʼ. Náa Biblia naʼthí: “Bi̱ na̱nguá eyoo kaʼyoo ndxájuu na̱nguá eʼninuwinʼ Dios numuu rí Dios nandoo kaʼñúún xúgínʼ” (1 Juan 4:8). Apóstol Pablo niʼthí rí nandulú kuʼyáá Dios nda̱ja̱a̱ itháan índo̱ naguáʼdáálú “ku̱ma̱ rí káxi̱” ndrígóo Jeobá ga̱jma̱a̱ ‹rí makru̱ʼu̱lú májánʼ› xú kaʼnii eʼyoo mámbá dí rígá (Filip. 1:9). Índo̱ nigíʼdi̱i̱ niʼnigajmaa̱ Biblia, tikhúú rí nijmañulú ga̱jma̱a̱ numuu Dios, ga̱jma̱a̱ ku̱ma̱ rúʼko̱ nixkajxáanʼlu maʼndulú kuʼyáá. Mú rí nandulú kuʼyáá ni̱jkha̱ ra̱ja̱a̱ índo̱ nijmañulú itháan ga̱jma̱a̱ numuu, ma̱ngaa rí xóo mitsaanʼ xóo xa̱bu̱ nindxu̱u̱. Ikha jngó rí muʼnigajmaa tsejtsí mbiʼi Ajngá rawunʼ Dios gíʼdoo wéñuʼ numuu (Filip. 2:16).

6. Xó má naʼthí náa 1 Juan 4:11, 20, 21, tsíín gíʼmáánʼ maʼndulú kuʼñúún ma̱ngaa mu mbaja̱a̱ ngajua rí kuaʼdáá rá.

⁶ Ga̱jma̱a̱ numuu rí Dios nandoo kaʼyulú wéñuʼ rúʼko̱ naxkajxáanʼ mu maʼndulú kuʼñúún a̱ngiu̱lú (atraxnuu 1 Juan 4:11, 20, 21). * Mbáa makumulú rí ngajua rúʼko̱ mbaja̱a̱ ikháá. Numuu rí nuʼni ñajuunʼ Jeobá ga̱jma̱a̱ rí nduʼyaridáá xóo nindxu̱u̱. Ma̱ngaa rí nduʼyaridáá Jesús, bi̱ nindoo kaʼyulú wéñuʼ rí asndu nixnáximinaʼ mu makhañúu ga̱jma̱á numulú. Mú nguáná naʼniulú gákhii rí  maʼndulú kuʼyamijná. Guʼyáá xú káʼnii nirígá náa congregación dí nirígá náa Filipos.

7. Ndiéjunʼ eʼsngúlúʼ xtágabu rí Pablo nixnúu Evodia ga̱jma̱a̱ Síntique rá.

⁷ Evodia ga̱jma̱a̱ Síntique ninindxu̱ún a̱jmi̱i̱n a̱ngiu̱lú gu̱ʼu̱ bi̱ nikúwá ruñajuunʼ gagi ‹gajmiún› apóstol Pablo. Mú mbáa niniñaaʼ rambáxu̱u̱n numuu rí tsémbanii rí nundxa̱ʼwa̱a̱ edxu̱ún. Pablo niʼthí mbiʼñún náa carta rí nikuʼma ga̱jma̱a̱ nixnúún mbájmbu xtágabu. Niʼthún rí mbóó gíʼmaa ‹mundxa̱ʼwa̱a̱ edxu̱ún› (Filip. 4:2, 3). Ma̱ngaa apóstol ndiʼyoo rí ndiyóoʼ maʼthúún xúgínʼ a̱ngiu̱lú: “Guni má xúʼko̱ xúgíʼ ga̱jma̱a̱ xúxiéʼká ni má xúgíʼdala” (Filip. 2:14). Gajkhun rí xtágabu rí nikhánún mbájmbu, raʼkháa káaʼ a̱jmi̱i̱n a̱ngiu̱lú bugi̱ nimbáñun ma̱ngaa nimbáñun mbá xúgínʼ bi̱ kúwá náa congregación.

8. Ndiéjunʼ gáʼni rí xáʼndulú kuʼñúún a̱ngiu̱lú ga̱jma̱a̱ xú káʼnii gúʼnimbáníí xkujndu rúʼko̱ rá.

⁸ Xó má nigíʼnuu Evodia ga̱jma̱a̱ Síntique, á mu i̱ndó nduʼyáá rí nakiéʼkúún a̱ngiu̱lú, maʼniulú mingíjyúuʼ rí maʼndulú kuʼñúún. Xúgiáanʼ nakiéʼkulu. Rí mbuʼyáá rí nakiéʼkúún a̱ngiu̱lú maʼni gámbáa rí nandulú kuʼñúún. Guʼgíʼ mbá xkri̱da. Mbáa ndxájulú nambumuu gámbáyulú maʼni kaʼwii náa Guʼwá Nagimbáanʼ, ikha jngó nakiʼnáanʼ kuʼyáá. Mú, á mu narmáʼáan a̱jkiu̱lú náa xúgíʼ rí nikiéʼkúun, maʼni rí makasngañulú ga̱jma̱a̱ rí ni xáʼndulú kuʼyáá. Lá xígi̱ kuwáanʼ ru̱ʼni̱ ráʼ. Á mu xúʼko̱, garmáʼáan a̱jkiu̱lú rí Jeobá ndaʼyoo rí nakiéʼkulu ga̱jma̱a̱ ma̱ngaa rí nakiéʼkúún a̱ngiu̱lú, maski ajndu xúʼko̱, ikhaa nandoo kaʼyulú mbá xúgiáanʼ. Ikha jngó gíʼmaa rí mbuʼyaridáá ngajua ndrígóo ga̱jma̱a̱ guʼyáá xúgíʼ rí májánʼ dí nuni a̱ngiu̱lú. Índo̱ nuxtrigamijna̱ maʼndulú kuʼñúún a̱ngiu̱lú, nambajxulú májánʼ gajmiúlú (Filip. 2:1, 2).

9. Náá guaʼyaa nindxu̱u̱ tikhu “rí gíʼdoo itháan numuu” rí niʼthí Pablo náa carta rí nikuʼma náa inún filipenses rá.

⁹ Ga̱jma̱a̱ xi̱ʼ kaʼwu apóstol Pablo niʼthún bi̱ filipenses ga̱jma̱a̱ xúgínʼ cristianos rí mbuyáá “rí gíʼdoo itháan numuu” (Filip. 1:10). Tikhu rí ikhaa nindxu̱u̱, rí maguma kaʼwii mbiʼyuu Dios, rí mambanúu rí nandoo ga̱jma̱a̱ rí marigá rí tsímáá ga̱jma̱a̱ kambájxu̱u̱n náa congregación (Mat. 6:9, 10; Juan 13:35). Índo̱ nuʼni rígi̱ nusngajmá rí nandulú kuʼyáá Jeobá.

10. Dí gíʼmáanʼ muʼni mu Jeobá mbaʼyulú dí raguáʼdáá aʼkhúlúʼ rá.

¹⁰ Pablo ma̱ngaa niʼthí rí ‹gíʼmáanʼ muʼni rí jmbu›. Rígi̱ tsíyoo gáʼthi rí naxtanda̱ʼa̱ rí manindxu̱lúʼ xa̱bu̱ jmbii. Xándoo ganindxu̱lú xóo Jeobá bi̱ ragíʼdoo aʼkhá. Mú ikhaa mbaʼyulú dí raguáʼdáá aʼkhúlúʼ á mu nuxtrigamijna̱ muguaʼdáá ngajua ga̱jma̱a̱ á mu nduʼyáá rí itháán gíʼdoo numuu. Mbá rí xóo ma̱ndoo musngajmá rí kuaʼdáálu ngajua nindxu̱u̱ rí muʼni tsiakimijna rí xúʼni̱ majngrádiinʼ eʼwíínʼ.

11. Ndíjkha dí ragíʼmáanʼ muʼni majngrádiinʼ eʼwíínʼ rá.

¹¹ Jesús niʼthí rí xúʼni̱ majngrádiinʼ eʼwíínʼ: Xú kaʼnii e̱ʼni̱ gagimijná, xtíin rí naguʼwúnlú o ñajunʼ rí nuʼni ma̱ndoo maʼni rí majngrádiinʼ eʼwíínʼ. Mbáa tséʼni má mbá dí ra̱májánʼ, mú mbiiʼ gáʼni rí gúraʼwíí muʼni maʼni gawu̱u̱nʼ ku̱ma̱ ndrígu̱ún ga̱jma̱a̱ maʼni majngrádiinʼ a̱ngiu̱lú. Jesús niʼthí rí itháan májánʼ gáʼni rí maxtu̱ʼwájma mbá itsí mba̱a̱ náa aphulú ga̱jma̱a̱ miʼdamáʼáanʼlu náa lamáa rí mi̱jnu̱ʼ mu xúʼni̱ majngrádiinʼ mugiu̱u̱ (Mat. 18:6).

12. Ndiéjunʼ eʼsngúlúʼ rí nini a̱ngiu̱lú precursores bugi̱ rá.

¹² Guʼyáá xú káʼnii niʼni mbáa matrimonio bi̱ precursores rí xúni̱ majngrádiinʼ eʼwíínʼ. Náa congregación rí kúwá, nixtáa mbáa matrimonio bi̱ ndiʼkhún nijngún iyááʼ bi̱ niganii náa mbá guʼwá rí tséniñuuʼ muni nimbá dí nandún  ikhiin. A̱ngiu̱lú bugi̱ ndiyáá dí ragíʼmaa mbuyáá nimbá película, maski ajndu nindxu̱u̱ mbá película rí ma̱ndoo má mbuʼyáá. Ikha jngó niʼniún tsiánguá índo̱ nidxawíín rí Precursores bugi̱ ndiyáá mbá película. Ikha jngó precursores bugi̱ niraʼwi̱i̱ rí nixágúún gúyáá película asndu índo̱ gajmañún májánʼ a̱ngiu̱lú (Heb. 5:14). Xúʼko̱ nisngajma rí nandún kuñún a̱ngiu̱lú raʼkháa i̱ndó nuthíí (Rom. 14:19-21; 1 Juan 3:18).

13. Xú káʼnii gándoo gúʼni rí makudaminaʼ aʼkhá mbáa rá.

¹³ Ma̱ngaa ma̱ndoo muʼni rí majngrádiinʼ a̱ngiu̱lú á mu nuʼniúu̱n rí muxudamíjna̱ aʼkhá. Guʼyáá xú káʼnii gándoo gárígá rígi̱. Gundxaʼwamíjna̱ rí mbáa bi̱ ndiʼkhún eʼnigajmaa Biblia naxtrigaminaʼ gákhii mu maniñuuʼ mbá kayuuʼ iya najnga̱a̱. Ikhaa ndaʼyoo dí ragíʼmaa maga̱a̱n ni mbá chíʼgíiʼ. Mbá nacha̱ nariʼkuminaʼ ga̱jma̱a̱ najngúun iyááʼ. Mbá miʼtsú, mbáa ndxájulú niʼthúu̱n maʼga̱ náa goʼwóo gajmíi̱n eʼwíínʼ a̱ngiu̱lú. Ndxájulú bi̱ goʼwóo májánʼ má eʼni eʼyoo ikhaa, naxnúu mbá iya miʼkhu̱u̱n maga̱a̱n ga̱jma̱a̱ naʼthúu̱n: “Nijnguánʼ má iyááʼ ga̱jma̱a̱ xtaʼdáá má xi̱ʼ kaʼwu ndrígóo Dios. Xámbumaaʼ rí mbá dí na̱ʼkha̱ náa xi̱ʼ kaʼwu nindxu̱u̱ rí matiewa̱a̱n rí matani. Á mu natiewa̱a̱n rí natani, awáán má gígíi̱n”. Tséyóoʼ má muʼthá ndiéjunʼ gárígá á mu ndxájulú bugi̱ naʼnimbo̱o̱ xtágabu dí ra̱májánʼ rígi̱.

14. Xú káʼnii embáyulú rí mu̱ʼgua̱ reunión mu muʼnimbaníí xtágabu rí na̱ʼkha̱ náa Filipenses 1:10 rá.

¹⁴ Rí mu̱ʼgua̱ reunión nambáyulú wéñuʼ mu muʼnimbaníí xtágabu rí na̱ʼkha̱ náa Filipenses 1:10. Timbá, naʼni marmáʼáan  a̱jkiu̱lú ndiéjunʼ rí Jeobá ndaʼyoo rí gíʼdoo wéñuʼ numuu. Raga̱jma̱, naʼsngúlú mu muʼgíʼ muʼnimbaníí rí najmañulúʼ mu xúʼko̱ xáguaʼdáá aʼkhúlúʼ. Ga̱jma̱a̱ rí maʼni ajtsú, naxkajxáanʼlú musngajmá ngajua ga̱jma̱a̱ rí muʼni dí májánʼ (Heb. 10:24, 25). Índo̱ a̱ngiu̱lú nuxnulú tsiakii naʼni rí maʼndulú kuʼñúún itháan ga̱jma̱a̱ nandulú kuʼyáá itháan Dios. Á mu gajkhun rí xúgíʼ a̱jkiu̱lú eyulú kuʼyáá Jeobá ga̱jma̱a̱ a̱ngiu̱lú, muxúʼni nimbá rí maʼni majngrádiinʼ.

15. Dí eyoo gáʼthúu̱n rí muʼni ‹rí majma̱a̱ rí májánʼ› rá.

¹⁵ Apostol Pablo niʼnikháñúu Jeobá rí mambáñún bi̱ filipenses mu muni ‹rí majma̱a̱ rí májánʼ› (Filip. 1:11). Gajkhun dí rígi̱ nindxu̱u̱ rí nandún kuyáá Jeobá ga̱jma̱a̱ xuajñuu. Ma̱ngaa rí muthúún eʼwíínʼ ga̱jma̱a̱ numuu fe rí kuáʼdáá náa Jesús ga̱jma̱a̱ rí mitsaanʼ rí kuaʼti̱i̱n marigá. Ma̱ngaa, Pablo niʼthí rí maxpíbíinʼ “xóo aguʼ náa numbaaʼ” (Filip. 2:15). Phú májánʼ embríguii rígi̱, numuu rí Jesús niʼthí rí xa̱bi̱i̱ ni̱ndxu̱ún ‹agiuuʼ numbaaʼ› (Mat. 5:14-16). Ma̱ngaa niʼthún rí musngúún xa̱bu̱ “asndu náa wámbari̱go̱o̱ ku̱ba̱ʼ” (Hech. 1:8; Mat. 28:18-20). ‹Nuxná rí májánʼ› índo̱ nuʼnilú ñajunʼ rígi̱ rí itháán gíʼdoo numuu.

16. Xú káʼnii esngájma Filipenses 1:12-14 rí ma̱ndoo maxpíbiáanʼlú xóo aguʼ rí nambiʼi maski ajndu kúwáanʼ awúu̱n xkujndu rí mingíjyúuʼ rá. (Atayáá xtiʼkhuu rí na̱ʼkha̱ náa timbá ináa.)

¹⁶ Tséʼniuu asndu xkáʼníí má kuwáanʼlu, ma̱ndoo maxpíbiáanʼlú xóo aguʼ rí nambiʼi. Nguáná rí nakujmaa rí tséniñulú muʼtáraʼa na̱jkha̱nú nanindxu̱u̱ mbá náa ma̱ndoo muʼtáraʼa. Rígi̱ rí nigíʼnuu apóstol Pablo. Índo̱ niʼnirámáʼ carta rí maʼga náa inún bi̱ filipenses, mbáa índo̱ nixtáa náa guʼwá e̱jua̱nʼ náa goʼwóo náa Roma. Mú rúʼko̱ tárikhoo rí maʼtáraʼa ga̱jma̱a̱ gagi náa soldado bi̱ nuñewa̱a̱n ga̱jma̱a̱ bi̱ nagún gúyáá. Xkridoo nixnúún  tsiakii a̱ngiu̱lú mu “xámiñuun mutariyaaʼ Ajngá rawunʼ Dios” (atraxnuu Filipenses 1:12-14; 4:22). *

17. Arathá mbá xkri̱da dí rígá mbiʼi xúgi̱, náa a̱ngiu̱lú tséniñaaʼ rutaraʼa maski ajndu kúwi̱i̱n awúu̱n xkujndu rí mingíjyúuʼ.

¹⁷ Mbaʼin a̱ngiu̱lú nandoo nusngajma rí tsímiñun xó má Pablo. Kúwi̱i̱n náa xuajen mba̱ʼu̱ rí tséniñuuʼ nditháan mutaraʼa, ikha jngó najmún rí najmiin nuni mu mutaraʼa asndu xkáʼníí má (Mat. 10:16-20). Náa mbá xuajen rúʼko̱, mbáa circuito niʼthúún publicadores rí mámbáa gáʼtaraʼa náa “xtáa”: Xóo bi̱ kuñún, bi̱ kúwi̱i̱n náa mijngii kúwá, bi̱ nuñajuunʼ gajmiún, bi̱ nunigajmaa gajmiún ga̱jma̱a̱ eʼwíínʼ bi̱ nuniʼnúnʼ. Índo̱ niʼni a̱jma̱ tsiguʼ, niʼni mbaʼa congregación dí rígá ikhí. Mbáa ikháanʼ nimbáa tsérikhulú mu xúʼtáraʼa. Maski má xúʼko̱, mba̱a̱ rí eʼsngúlúʼ rí nuni a̱ngiu̱lú bugi̱. Guʼyááʼ muyambáá xó má eʼngo̱o̱ náa najuiʼtáraʼa, numuu rí Jeobá maxnúlú tsiakii rí gáʼyulú mu maʼngulú muraʼníí asndu xkáʼníí má xkujndu (Filip. 2:13).

18. Ndiéjunʼ rí gáʼyóoʼ muxtrigamijna̱ muʼni rá.

¹⁸ Náa mbiʼi kiejunʼ rígi̱, guxtrigamijna̱ muʼnimbaníí xtágabu rí nixnúún Pablo bi̱ filipenses. Guʼyáá ndiéjunʼ rí itháan gíʼdoo numuu, guʼnimi̱jna̱ rí xáguaʼdáá nditháan aʼkhúlúʼ, xúʼni̱ majngrádiinʼ eʼwíínʼ ga̱jma̱a̱ guʼni rí majma̱a̱ rí májánʼ náa ikháanʼlu. Xúʼko̱, mbaja̱a̱ ngajua rí kuaʼdáá ga̱jma̱a̱ muʼni mba̱a̱ Anu̱lú Jeobá bi̱ nandoo kaʼyulú.