LÁ NANIGULÚ maguaʼdáá mbá asignación rí xúgi̱ xáʼngulú guʼnimbaníí ráʼ. Mbáa ma̱ndoo mani̱ndxu̱u̱ mbá ñajuunʼ rí gíʼdoo mbáa ndxájulú o mbá rí ni̱ʼni̱ má nákha ginii. Mbáa numuu rí guaniáanʼ má, naʼniulú nandii, nda̱a̱ mbújkha̱a̱ o rígá i̱ʼwáʼ rí narikhulú mu muʼni rí nandulú. O ga̱jma̱a̱ numuu rí naxtiʼkhu̱u̱ dí narígá náa xuajñuu Dios, ikha jngó ndiyooʼ muniʼñáaʼ mbá ñajuunʼ rí nikuwáanʼ ru̱ʼni̱ mba̱yu̱u̱ʼ tsiguʼ, tséʼniuu asndu xkáʼníí má, mbáa nakumulú rí tséxnáá Jeobá xúgíʼ rí nandulú muxnáá. Á mu xúʼko̱ kuwáanʼ ruguáʼníín, guʼyáá ndiéjunʼ gándoo gúʼni mu xákaguabáanʼlú, mu xájmaa a̱jkiu̱lú ga̱jma̱a̱ mu xákiʼnáanʼlú. Ga̱jma̱a̱ guʼyáá dí gándoo gambáyulú mu makuwáanʼlu má xúʼko̱ gagi.

Xkri̱da ndrígóo Juan bi̱ Nakumíínʼ iyááʼ xa̱bu̱ naʼsngúlú mbá rí gíʼdoo wéñuʼ numuu. Ikhaa ninindxu̱u̱ mbáa xa̱bi̱i̱ Dios bi̱ nikhánáa mbá ñajuunʼ rí nigiʼdoo wéñuʼ numuu. Mú mbáa ikhaa nditháan táku̱mu̱u̱ xú káʼnii gáxtáa, á mu rí itháan mba̱yu̱u̱ʼ gáxtáa náa guʼwá e̱jua̱nʼ ki xóo náa maʼtáraʼa. Maski má xúʼko̱, ikhaa nixtáa gagi má xúʼko̱ raʼni ñajuunʼ Dios náa xúgíʼ mbiʼi rí nixtáa. Dí nimbáyúu xá. Ga̱jma̱a̱ dí gándoo gambáyulú mu makuwáanʼ má xúʼko̱ gagi maski ajndu rígá rí naʼni magawúnlú rá.

Nákha abril tsiguʼ 29 tsiguʼ nda̱wa̱á, Juan nigíʼdu̱u̱ niʼthún xa̱bu̱ ga̱jma̱a̱ numuu rí ma̱ʼkha̱ Mesías xó má niʼthúu̱n Jeobá rí maʼni. Niʼthí: “Atangaánʼla náa Dios numuu dí reino dí rígá mekhuíí na̱ʼkha̱ mijngii” (Mat. 3:2; Luc. 1:12-17). Mbaʼin ninimbu̱u̱n rí niʼthí ga̱jma̱a̱ mbaʼin niguwáʼ asndu mitsínguánʼ mu mudxawíín rí naʼthí ma̱ngaa mbaʼin xa̱bu̱ nitanga̱a̱ a̱jkiu̱ún ga̱jma̱a̱ nijngún iyááʼ. Juan ma̱ngaa támiñuu mu maʼthúún rí maguáʼníí bi̱ kuya̱ edxu̱ún náa guʼwá ndxájkun bi̱ a̱jma̱ inún á mu tseriʼkumijnáa (Mat. 3:5-12). Gu̱nʼ octubre tsiguʼ 29 nigiʼdoo wéñuʼ numuu náa ikhaa, tsiguʼ rúʼko̱ nikúma̱a̱ʼ iyááʼ Jesús. Ikhú nigíʼdu̱u̱ nixnúún tsiakii xa̱bu̱ mu magún ki̱dxu̱u̱ʼ Jesús bi̱ nindxu̱u̱ Mesías bi̱ nijuiʼthá ma̱ʼkha̱ (Juan 1:32-37).

Ga̱jma̱a̱ numuu ñajuunʼ kiejuunʼ rí niʼni Juan, Jesús niʼthí ga̱jma̱a̱ numuu: “Bi̱ nagumiin náa a̱ʼgu̱, tátuxuu imba̱a̱ bi̱ mani̱ndxu̱u̱ itháan ginii xóo Juan bi̱ Nakumíínʼ iyááʼ xa̱bu̱”  (Mat. 11:11). Gajkhun rí Juan ra̱ʼkhá tháán ningajo̱o̱ rí niʼngo̱o̱ niʼni ga̱jma̱a̱ numuu Jeobá ma̱ngaa nidxuu rí niguma tsajkurámááʼ. Xó má ikhaa, rí mbiʼi xúgi̱ a̱ngiu̱lú bi̱ nuni ga̱jma̱a̱ xúgíʼ a̱jkiu̱únʼ ñajuunʼ Dios naniguunʼ xú káʼnii naguma tsájkurámíin. Guʼyáá xú káʼnii nixtáa ndxájulú bi̱ mbiʼyuu Terry ga̱jma̱a̱ a̱ʼgiu̱u̱ bi̱ mbiʼyuu Sandra, bi̱ naʼni má cincuenta tsiguʼ rí kúwá runi káxi̱ ñajuunʼ Dios, Terry naʼthí: “Nigúʼdoo mbaʼa ñajuunʼ rí mitsaanʼ. Ninindxu̱ʼ precursor regular, betelita, precursor especial ga̱jma̱a̱ circuito ma̱ngaa distrito, ga̱jma̱a̱ rí xúgi̱ ni̱ndxu̱ʼ precursor especial, mbu̱júu̱ʼ”. Rí mundrígúlú ñajunʼ xóo rígi̱ naʼni rí maʼdxulú. Mú xkri̱da ndrígóo Juan naʼsngúlú rí gagi tséʼkha̱ ga̱jma̱a̱ numuu ñajunʼ rí kuaʼdáá, mu xándáti̱ga̱a̱ gagi rí kuaʼdáá ndayóoʼ muxtrígamijna wéñuʼ.

Juan bi̱ Nakumíínʼ iyááʼ xa̱bu̱ tandati̱go̱o̱ gagi rí nigiʼdoo numuu rí nixnáa wéñuʼ núma̱aʼ ga̱jma̱a̱ numuu ñajuunʼ rí nigiʼdoo. Mbá xkri̱da, índo̱ niguámbóo nikumáaʼ iyááʼ Jesús, Juan nánguá nigiʼdiin mbaʼin discípulos, xó má Jesús itháan ni̱jkha̱ raʼni itháan mbaʼin discípulos ndrígóo. Ikhaa rúʼko̱ rí niʼni maxmiéjúúnʼ discípulos ndrígóo Juan, ikhiin nitháán: “Atayáá, xa̱bu̱ etsúwíín xá, ga̱jma̱a̱ mbá xúgíinʼ nagún náa ikhaa” (Juan 3:26). Juan niriʼña̱a̱: “Bi̱ gíʼdaa novia nindxu̱u̱ novio. Mú, bi̱ nambáxu̱u̱ ga̱jma̱a̱ novio, índo̱ wíji̱ ga̱jma̱a̱ naʼdxuun rí naʼthí, xtáa gagi índo̱ naʼdxuun aʼwóo novio. Ikha jngó gagi ndrígóʼ niʼni káxi̱” (Juan 3:29). Juan táʼyoo Jesús xóo bi̱ sia̱nʼ ga̱jma̱a̱, ni má tándxa̱ʼwáminaʼ rí ñajuunʼ rí xtáa raʼni ragíʼdoo wéñuʼ numuu ki xóo rí naʼni Jesús. Ikhaa nixtáa má xúʼko̱ gagi numuu rí ndiʼyoo rí gíʼdoo wéñuʼ numuu rí mani̱ndxu̱u̱ “bi̱ nambáxu̱u̱ ga̱jma̱a̱ novio”.

Xú kaʼnii niʼni Juan nimbáyúu maxtáa gagi maski má ñajuunʼ rí xtáa raʼni nindxu̱u̱ gákhii. Mbá xkri̱da, numuu rí ninindxu̱u̱ nazareo, asndu nákha chíʼgíiʼ tágáan nditháan vino (Luc. 1:15). Jesús niʼthí xú káʼnii nixtáa: ‹Juan ni̱ʼkha̱ mú takuiʼtsu ni má tágaan›. Mú Jesús gajmíi̱n discípulos ndrígóo tákuwi̱i̱n xóo nikúwá nazareos, ikhiin nikúwá xó má kúwá eʼwíínʼ xa̱bu̱ (Mat. 11:18, 19). Ma̱ngaa, maski ajndu Juan nditháan táʼni milagros, ikhaa ndiʼyoo rí discípulos ndrígóo Jesús ga̱jma̱a̱ bi̱ nigún ki̱dxu̱u̱ʼ ikhaa nákha ginii muni milagros (Mat. 10:1; Juan 10:41). Mú Juan táxmiéjuunʼ rúʼko̱, ikhaa nigíminaʼ maʼnimbánuu ñajuunʼ rí Jeobá nirajkuáa ñawúunʼ maʼni.

Á mu rí mangáánʼ nduʼyáá rí gíʼdoo numuu ñajuunʼ rí Jeobá nixnulú muʼni, xándáti̱gu̱lú gagi rí kuaʼdáá. Terry, bi̱ niʼthá ga̱jma̱a̱ numuu, naʼthí: “Niniguʼ wéñuʼ xúgíʼ ñajuunʼ rí nikhánuʼ mani”. Índo̱ nandxa̱ʼwáminaʼ xú kaʼnii xtáa rí naʼni káxi̱ ñajuunʼ Dios, naʼthí: “Nditháan tsítanga̱a̱ a̱jkiu̱nʼ. I̱ndó rígá mbaʼa rí mitsaanʼ rí nditháan xámbumuʼ”.

Makuwáanʼlu itháan gagi á mu nundxaʼwamíjna̱ dí eʼni rí mbá asignación o ñajuunʼ magiʼdoo numuu: Rí manindxu̱lúʼ bi̱ “numbáyii Dios” (1 Cor. 3:9). Guʼgíʼ mbá xkri̱da. Á mu nuñewa̱a̱n mbá daan ku̱ba̱ʼ rí nirígá nákha wajyúuʼ rí niniñaaʼ xiʼñúlú, maski má wajyúuʼ rígá, mú mitsaanʼ má xúʼko̱. Ikháá má kayuuʼ, á mu nundxa̱ʼwa̱míjna̱ rí mitsaanʼ nindxu̱u̱ rí muʼni ñajuunʼ Dios, nimbá xáʼni rí mandáti̱ga̱ gagi rí kuaʼdáá. Xúʼnimbríguíi rí nu̱ʼni̱ ga̱jma̱a̱ rí nuni eʼwíínʼ ni má xundxa̱ʼwa̱míjna̱ rí ñajuunʼ rí nikhánulú ragíʼdoo wéñuʼ numuu ki xóo rí nakhánun eʼwíínʼ (Gál. 6:4).

Mbáa Juan nikumuu rí maʼtáraʼa xágajyúuʼ mba̱yu̱u̱ʼ, maski má táku̱mu̱u̱ rí nda̱a̱ tsu̱ma̱ gámbáa ñajuunʼ rí nixtáa raʼni (Juan 3:30). Nákha tsiguʼ 30, rey Herodes nikudaaʼ guʼwá e̱jua̱nʼ káaʼ majun igu̱nʼ nda̱wa̱á rí nikuma̱a̱ʼ iyááʼ Jesús. Maski ajndu xúʼko̱ ikhaa na̱nguá niniñuuʼ raʼtáraʼa (Mar. 6:17-20). Ndiéjunʼ nimbáyúu mu maxtáa má xúʼko̱ gagi maski ajndu nixtiʼkhuu xóo nixtáa xá. Rí nigíminaʼ maʼni itháan ñajuunʼ Jeobá.

Náa guʼwá e̱jua̱nʼ Juan niʼdxaun xúgíʼ rí naʼni Jesús náa naʼtáraʼa (Mat. 11:2; Luc. 7:18). Ndiʼyoo rí Jesús nindxu̱u̱ Mesías, mú mbáa niraximínáʼ á mu rí maʼnimbánuu xúgíʼ rí kiʼniraʼmáʼ náa Biblia rí nijuiʼthá maʼni Mesías índo̱ gáʼkha̱. Xóo muʼthá, rí maʼga̱nú mani̱ndxu̱u̱ mbáa  rey, lá magi̱ʼdu̱u̱ maʼtáñajunʼ nacha̱ xáʼ. Lá maríyaaʼ náa guʼwá e̱jua̱nʼ xáʼ. Juan nindoo mbaʼyoo itháan rí gáʼni Jesús. Ikha jngó nikuʼmiin a̱jmi̱i̱n discípulos ndrígio̱o̱ mu muraxi̱i̱: “Aah ikháán ñajuanʼ bi̱ wíji̱ ma̱ʼkha̱ o muguáʼthi̱i̱nxu imba̱a̱ dxe̱ʼ.” (Luc. 7:19). Índo̱ nitangi̱i̱n, mbáa Juan raʼkháa tháán nindoo maʼdxaun xúgíʼ rí nitháán ga̱jma̱a̱ numuu mbaʼa milagros rí niʼni Jesús ga̱jma̱a̱ ajngáa rí nikuʼma mu maʼdxúún: “Bi̱ tsíkruigu̱u̱n, nakruigu̱u̱n, bi̱ tsíyoo gágún, nandoo nagún, ga̱jma̱a̱ bi̱ naʼniún nandii lepra naguma kaʼwíín, bi̱ tsédxuun, nudxawíín, bi̱ nikháñun, nagabi̱ín, xó má bi̱ ngíníi, na̱thu̱u̱n ajngáa rí májánʼ” (Luc. 7:20-22).

Gajkhun rí ajngáa rígi̱ nixnúu wéñuʼ tsiakii Juan. Nitháán rí Jesús xtáa raʼnimbánúu xúgíʼ rí kiʼtáriyaʼ maʼni Mesías. Maski má Jesús xáriyaaʼ náa guʼwá e̱jua̱nʼ, Juan ndiʼyoo rí ñajuunʼ rí niʼni tánindxu̱u̱ ndíí. Maski ajndu gákhii nimínuuʼ, ikhaa nixtáa gagi.

Á mu nuʼnilú xó má niʼni Juan, maʼngo̱o̱ a̱jkiu̱lú muguaʼthi̱i̱n ga̱jma̱a̱ makuwáanʼlu gagi (Col. 1:9-11). Rí muraxnuu Biblia ga̱jma̱a̱ rí mundxaʼwamíjna̱ rí nuraxnuu mambáyulúʼ mu maʼngulú, numuu rí nduʼyáá rí ñajuunʼ rí nuʼni na̱nguá nindxu̱u̱ ndíí (1 Cor. 15:58). Sandra, bi̱ niʼthá ga̱jma̱a̱ numuu, naʼthí: “Rí magúxnuu mbáa capítulo ndrígóo Biblia tsejtsi mbiʼi nimbáyuʼ makuʼmáminaʼ mijngii náa Jeobá ga̱jma̱a̱ rí mba̱yo̱o̱ rí ñajuunʼ ndrígóo gíʼdoo itháan numuu ki xóo ñajunʼ ndrígóʼ ikhúún”. Ma̱ngaa ma̱ndoo mbuʼyáá ñajuunʼ rí nuni a̱ngiu̱lú náa mbájndi numbaaʼ ga̱jma̱a̱ numuu Reino. Ga̱jma̱a̱ rí mundxa̱ʼwa̱míjna̱ xúgíʼ rí Jeobá naʼngo̱o̱ naʼni. Sandra naʼthí xóó: “Númaa wéñuʼ programas JW Broadcasting rí nagájnuu mámbá igu̱nʼ, naʼni makumuxu rí kuwáanʼ mijngii náa xuajñuu Dios ga̱jma̱a̱ naʼni makuwáanʼ gagi runi ñajuunʼ rí nikhánú muníxu”.

Juan bi̱ Nakumíínʼ iyááʼ xa̱bu̱ niʼtáraʼa káaʼ nguáthá mba̱yu̱u̱ʼ ga̱jma̱a̱ ‹espíritu ma̱ngaa tsiakii ndrígóo Elías›. Ga̱jma̱a̱, xóo Elías, ninindxu̱u̱ “mbáa xa̱bu̱ bi̱ nigiʼdoo a̱jkiu̱u̱n xó má ikháanʼ” (Luc. 1:17; Sant. 5:17). Á mu nuxnáalú núma̱aʼ ga̱jma̱a̱ i̱ndó naxmiéjunlú muʼni ñajuunʼ Dios xó má niʼni Juan, makuwáanʼlu gagi ru̱ʼni̱ ñajuunʼ Reino, garigá má rí gárígá.